ಮಧ್ಯಪ್ರಾಚ್ಯದಲ್ಲಿ ಇರಾನ್-ಅಮೆರಿಕಾ-ಇಸ್ರೇಲ್ ಸಂಘರ್ಷ ತೀವ್ರಗೊಂಡಿದ್ದು, ಇದರ ಪರಿಣಾಮ ಭಾರತದ ಡ್ರೈಫ್ರೂಟ್ಸ್ ಮಾರುಕಟ್ಟೆಯ ಮೇಲೆ ಬೀಳುತ್ತಿದೆ. ಇರಾನ್ನಿಂದ ಆಮದಾಗುವ ಪಿಸ್ತಾ, ಬಾದಾಮಿ, ಅಂಜೂರ, ಒಣದ್ರಾಕ್ಷಿ, ಪೈನ್ನಟ್ಸ್ ಮತ್ತು ಸಾಫ್ರಾನ್ನಂತಹ ಒಣಹಣ್ಣುಗಳ ಬೆಲೆ ಏರಿಕೆಯಾಗುವ ಸಾಧ್ಯತೆ ಹೆಚ್ಚಿದೆ. ಬಂದರ್ ಅಬ್ಬಾಸ್ ಬಂದರಿನ ಸ್ಥಗಿತ ಮತ್ತು ಶಿಪ್ಮೆಂಟ್ಗಳು ನಿಲುಗಡೆಯಾಗಿರುವುದರಿಂದ ಬೆಂಗಳೂರಿನ ವ್ಯಾಪಾರಿಗಳು ಆತಂಕ ವ್ಯಕ್ತಪಡಿಸಿದ್ದಾರೆ.
ಇರಾನ್ನ ಸುಪ್ರೀಂ ಲೀಡರ್ ಅಯಾತೊಲ್ಲಾ ಅಲಿ ಖಮೇನಿ ಹತ್ಯೆಯ ನಂತರ ಇರಾನ್ ಪ್ರತೀಕಾರದ ದಾಳಿಗಳನ್ನು ತೀವ್ರಗೊಳಿಸಿದ್ದು, ಸೌದಿ ಅರೇಬಿಯಾ, ಯುಎಇ, ಕತಾರ್, ಕುವೈತ್, ಒಮಾನ್ ಸೇರಿದಂತೆ ಗಲ್ಫ್ ದೇಶಗಳ ಮೇಲೆ ಕ್ಷಿಪಣಿ ದಾಳಿಗಳು ನಡೆದಿವೆ. ಇದರಿಂದ ಶಿಪ್ಪಿಂಗ್ ರೂಟ್ಗಳು ಮತ್ತು ಬಂದರುಗಳು ಪ್ರಭಾವಿತವಾಗಿವೆ.
ಇರಾನ್ನಿಂದಲೇ ಬರುತ್ತದೆ ಹೆಚ್ಚಿನ ಡ್ರೈಫ್ರೂಟ್ಸ್!
ಭಾರತಕ್ಕೆ ಪಿಸ್ತಾ, ಬಾದಾಮಿ, ಅಂಜೂರ, ಒಣದ್ರಾಕ್ಷಿ ಮತ್ತು ಪೈನ್ನಟ್ಸ್ ಸೇರಿದಂತೆ ಹಲವು ಒಣಹಣ್ಣುಗಳು ಇರಾನ್ನಿಂದ ಆಮದಾಗುತ್ತವೆ. ಸೌದಿ ಅರೇಬಿಯಾದ ಖರ್ಜೂರ ಮತ್ತು ಆಫ್ಘಾನಿಸ್ತಾನದ ಏಪ್ರಿಕಾಟ್, ವಾಲ್ನಟ್ಸ್ಗೂ ಬೇಡಿಕೆ ಹೆಚ್ಚು. ಆದರೆ ಯುದ್ಧದಿಂದ ಈ ಪ್ರದೇಶಗಳಲ್ಲಿ ಸರಬರಾಜು ಸರಪಳಿ ಭಂಗವಾಗಿದೆ.
ರಂಜಾನ್ ಸಮಯದಲ್ಲಿ ಬೇಡಿಕೆ ಶಿಖರಕ್ಕೆ: ರಂಜಾನ್ ಸಮಯದಲ್ಲಿ ಉಪವಾಸದ ನಂತರ ಇಫ್ತಾರ್ ಮತ್ತು ಸುಹೂರ್ಗೆ ಡ್ರೈಫ್ರೂಟ್ಸ್ ಅತ್ಯಗತ್ಯ. ಇದರಿಂದ ಬೇಡಿಕೆ ಗಗನಕ್ಕೇರಿದೆ. ವ್ಯಾಪಾರಿಗಳು ರಂಜಾನ್ಗಾಗಿ ಮುಂಚಿತವಾಗಿ ಸ್ಟಾಕ್ ಮಾಡಿಕೊಂಡಿದ್ದರಿಂದ ಹಬ್ಬಕ್ಕೆ ಕೊರತೆ ಇಲ್ಲ. ಆದರೆ ಒಂದು ತಿಂಗಳ ನಂತರ ಸರಕು ಕೊರತೆ ಉಂಟಾಗಬಹುದು ಎಂದು ಆತಂಕವಿದೆ.
ಕಂಟೋನ್ಮೆಂಟ್ ಫ್ರೂಟ್ಸ್ ಅಸೋಸಿಯೇಷನ್ ಅಧ್ಯಕ್ಷರ ಆತಂಕ ‘ಕಂಟೋನ್ಮೆಂಟ್ ಫ್ರೂಟ್ಸ್ & ಡ್ರೈ ಫ್ರೂಟ್ಸ್ ಮರ್ಚೆಂಟ್ ಅಸೋಸಿಯೇಷನ್’ ಅಧ್ಯಕ್ಷ ಮೊಹಮ್ಮದ್ ಇದ್ರೀಸ್ ಚೌಧರಿ ಹೇಳಿದರು: “ಯುದ್ಧ ಹಠಾತ್ ಆರಂಭವಾಯಿತು. ರಂಜಾನ್ಗಾಗಿ ಸ್ಟಾಕ್ ಮಾಡಿಕೊಂಡಿದ್ದೇವೆ, ಸದ್ಯಕ್ಕೆ ಒಂದು ತಿಂಗಳಿಗೆ ಸಾಕಷ್ಟು ಇದೆ. ಬಂದರ್ ಅಬ್ಬಾಸ್ ಡ್ಯಾಮೇಜ್ ಆಗಿದೆ, ಶಿಪ್ಮೆಂಟ್ ಸ್ಥಗಿತಗೊಂಡಿದೆ. ಮುಂದೇನಾಗುತ್ತದೋ ಗೊತ್ತಿಲ್ಲ.”
ಬೆಲೆ ಏರಿಕೆಯ ಬಿಸಿ ಈಗಲೇ ಶುರು!
- ಇರಾನ್ ಪಿಸ್ತಾ: ₹1,800 – ₹2,100/ಕೆ.ಜಿ
- ಅಂಜೂರ: ₹1,200 – ₹1,600/ಕೆ.ಜಿ
- ಬಾದಾಮಿ: ₹2,500/ಕೆ.ಜಿ
- ಪೈನ್ ನಟ್ಸ್: ₹8,000/ಕೆ.ಜಿ ಸಾಫ್ರಾನ್ 1 ಕೆ.ಜಿಗೆ ₹2.5 ಲಕ್ಷ ದಾಟಿದ್ದು, ಮುಂದೆ ₹4 ಲಕ್ಷ ತಲುಪಬಹುದು ಎಂದು ಚೌಧರಿ ಹೇಳಿದರು. ಯುದ್ಧ ಮುಂದುವರಿದರೆ ಬೆಲೆ ತ್ರಿಗುಣವಾಗಬಹುದು.
ಮಸಾಲೆಗಳ ಮೇಲೂ ಪರಿಣಾಮ ಜಾಯಿಕಾಯಿ, ದಾಲ್ಚಿನ್ನಿ, ಚಕ್ರಫುಲ್ ಮುಂತಾದ ಮಸಾಲೆಗಳು ಕೂಡ ಇರಾನ್ನಿಂದ ಬರುತ್ತವೆ. ಇದರಿಂದ ಮಸಾಲೆ ಮಾರುಕಟ್ಟೆಯಲ್ಲೂ ಬೆಲೆ ಏರಿಕೆಯ ಸಾಧ್ಯತೆ ಇದೆ.
ರಂಜಾನ್ ಮತ್ತು ಈದ್ಗೆ ಸರಕು ಕೊರತೆ ಇಲ್ಲದಿದ್ದರೂ, ಯುದ್ಧ ಮುಂದುವರಿದರೆ 20-30 ದಿನಗಳ ನಂತರ ಮಾರುಕಟ್ಟೆಯಲ್ಲಿ ಸರಕು ಕೊರತೆ ಮತ್ತು ಬೆಲೆ ಏರಿಕೆ ಖಚಿತ. ವ್ಯಾಪಾರಿಗಳು ಆತಂಕದಲ್ಲಿದ್ದಾರೆ.