ಬೆಂಗಳೂರು: ಬಿಗ್ ಬಾಸ್ ಕನ್ನಡ ಸೀಸನ್ 12ನೇ ಸೀಸನ್ನಲ್ಲಿ ಪುನಃ ಪ್ರವೇಶಿಸಿದ ನಟಿ ರಕ್ಷಿತಾ ಶೆಟ್ಟಿ ಅವರು ತಮ್ಮ ಪ್ರವೇಶದಿಂದಲೇ ಮನೆಯಲ್ಲಿ ಕೋಲಾಹಲವೆಬ್ಬಿಸಿದ್ದಾರೆ. ಅಕ್ಟೋಬರ್ 9ರ ಸಂಚಿಕೆಯಲ್ಲಿ ರಕ್ಷಿತಾ ಶೆಟ್ಟಿ ಅವರ ಸೌಂಡು ಜಾಸ್ತಿ ಆಗಿದ್ದು, ಅವರ ಆರ್ಭಟಕ್ಕೆ ಧ್ರುವಂತ್, ಅಶ್ವಿನಿ ಗೌಡ ಸೇರಿದಂತೆ ಎಲ್ಲರೂ ಅಚ್ಚರಿಗೊಂಡಿದ್ದಾರೆ.
‘ಒಂಟಿಗಳು ವರ್ಸಸ್ ಜಂಟಿಗಳು’ ಎಂಬ ಥೀಮ್‌ನಲ್ಲಿ ನಡೆಯುತ್ತಿರುವ ಈ ಸೀಸನ್ನಲ್ಲಿ ರಕ್ಷಿತಾ ಶೆಟ್ಟಿ ಅವರು ಒಂಟಿಗಳ ತಂಡದಲ್ಲಿದ್ದಾರೆ. ಕಾಕ್ರೂಚ್ ಸುಧಿ ಅವರಿಗೆ ಅಸುರಾಧಿಪತಿಯಾಗಿ ವಿಶೇಷ ಅಧಿಕಾರ ನೀಡಲಾಗಿದ್ದು, ಮನೆಯ ಸದಸ್ಯರನ್ನು ಅವರು ಇಷ್ಟ ಪಟ್ಟಂತೆ ಶಿಕ್ಷಿಸಬಹುದಾದ ಸನ್ನಿವೇಶವಿತ್ತು. ಆದರೆ ರಕ್ಷಿತಾ ಶೆಟ್ಟಿ ಅವರಿಗೆ ಬುದ್ಧಿ ಕಲಿಸಲು ಕಾಕ್ರೋಚ್ ಸುಧಿ ಪರದಾಡುವ ಪರಿಸ್ಥಿತಿ ಒದಗಿದೆ.
ಘಟನೆ ಪ್ರಾರಂಭವಾದದ್ದು ಕಾಕ್ರೂಚ್ ಸುಧಿ ರಕ್ಷಿತಾ ಶೆಟ್ಟಿ ಅವರು ಮಾಡುತ್ತಿದ್ದ ಅಡುಗೆಯನ್ನು ಕೆಡಿಸಿದಾಗ. ಇದರಿಂದ ಕೋಪಗೊಂಡ ರಕ್ಷಿತಾ ಶೆಟ್ಟಿ ಅವರು ಪ್ರತೀಕಾರ ತೀರಿಸಿಕೊಳ್ಳಲು ನಿರ್ಧರಿಸಿದರು. ಜಂಟಿಗಳ ತಂಡದ 12 ಸದಸ್ಯರಿಗೆ ಬೇಯಿಸಲಾಗುತ್ತಿದ್ದ ಚಿಕನ್‌ನ ಪಾತ್ರೆಗೆ ರಕ್ಷಿತಾ ಶೆಟ್ಟಿ ಟೀ ಸುರಿದರು. ಈ ಕ್ರಮದಿಂದ ಚಿಕನ್‌ನೊಂದಿಗೆ ಬೇಯಿಸಲಾಗುತ್ತಿದ್ದ ಅನ್ನವೂ ಕೆಟ್ಟಿತು.
ರಕ್ಷಿತಾ ಶೆಟ್ಟಿ ಮಾಡಿದ ಈ ಕೆಲಸದಿಂದ ಬಿಗ್ ಬಾಸ್ ಮನೆಯ ಜಂಟಿಗಳ ತಂಡದ ಸದಸ್ಯರಿಗೆ ತೀವ್ರ ಕೋಪ ಬಂತು. ಕಾಕ್ರೋಚ್ ಸುಧಿ ಒಬ್ಬರು ಮಾಡಿದ ತಪ್ಪಿಗಾಗಿ ರಕ್ಷಿತಾ ಶೆಟ್ಟಿ ಅವರು 12 ಜನರ ಊಟ ಕೆಡಿಸಬಾರದಾಗಿತ್ತು ಎಂದು ಎಲ್ಲರೂ ರೇಗಾಡಲಾರಂಭಿಸಿದರು. ಈ ಸಮಯದಲ್ಲಿ ಮಂಜು ಭಾಷಿಣಿ ಅವರು ರಕ್ಷಿತಾ ಶೆಟ್ಟಿಗೆ ಖಡಕ್ ಆಗಿ ಕ್ಲಾಸ್ ತೆಗೆದುಕೊಂಡರು. ಇಬ್ಬರ ನಡುವೆ ಮಾತಿಗೆ ಮಾತು ಬೆಳೆದು ವಾದವು ಪ್ರಾರಂಭವಾಯಿತು.
ರಕ್ಷಿತಾ ಶೆಟ್ಟಿ ಅವರಲ್ಲಿ ಮುಗ್ಧತೆ ಇದೆ ಎಂದು ಎಲ್ಲರೂ ಭಾವಿಸಿದ್ದರು. ಆದರೆ ಈ ಘಟನೆಯ ನಂತರ ಅವರು ಅಂದುಕೊಂಡಷ್ಟು ಮುಗ್ಧರಲ್ಲ ಎಂಬುದು ಸ್ಪಷ್ಟವಾಯಿತು. ಬಿಗ್ ಬಾಸ್ ಮನೆಯಲ್ಲಿ ಊಟಕ್ಕೆ ಎಲ್ಲರೂ ಕಷ್ಟಪಡುವ ಸನ್ನಿವೇಶದಲ್ಲಿ, ಊಟವನ್ನು ಹಾಳುಮಾಡಿದ ರಕ್ಷಿತಾ ಶೆಟ್ಟಿ ಅವರ ಮೇಲೆ ಮನೆಯ ಸದಸ್ಯರು ತೀವ್ರ ಕೋಪ ವ್ಯಕ್ತಪಡಿಸಿದ್ದಾರೆ.