ಬೆಂಗಳೂರು, ಆಗಸ್ಟ್ 04: ಕನ್ನಡದ ಅತಿ ದೊಡ್ಡ ರಿಯಾಲಿಟಿ ಶೋ ‘ಬಿಗ್ ಬಾಸ್ ಕನ್ನಡ ಸೀಸನ್ 13’ರ (Bigg Boss Kannada Season 13) ಆರಂಭಕ್ಕೆ ಮುಹೂರ್ತ ಫಿಕ್ಸ್ ಆಗಿದೆ. ಈ ಬಾರಿ ದೊಡ್ಮನೆಗೆ ಎಂಟ್ರಿ ಕೊಡೋಕೆ ‘ಅಗ್ನಿಪರೀಕ್ಷೆ’ (Agniparikshe) ಯ ವೇದಿಕೆ ಸಜ್ಜಾಗಿದೆ. ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ (Kiccha Sudeep) ಸಾರಥ್ಯದ ಬಿಗ್ ಬಾಸ್ ಕನ್ನಡ ಸೀಸನ್ 13 ಪ್ರೇಕ್ಷಕರಲ್ಲಿ ಭಾರೀ ಕುತೂಹಲ ಮೂಡಿಸಿದೆ. ಇದೀಗ ವಾಹಿನಿ ಹೊಸ ಪ್ರೋಮೋ ರಿಲೀಸ್ ಮಾಡಿದ್ದು, ಆಗಸ್ಟ್ 16ರ ರಾತ್ರಿ 9ಕ್ಕೆ ಬಿಗ್ ಮನೆಗೆ ಎಂಟ್ರಿ ಕೊಡೋಕೆ ಅಗ್ನಿಪರೀಕ್ಷೆಯ ವೇದಿಕೆ ಸಜ್ಜಾಗಿದೆ .
‘ಅಗ್ನಿಪರೀಕ್ಷೆ’ ಥೀಮ್ ವಿಶೇಷತೆ ಏನು?
ಈ ಬಾರಿಯ ಬಿಗ್ ಬಾಸ್ ಹೊಸ ಸೀಸನ್ ಸ್ಪರ್ಧಿಗಳ ಆಯ್ಕೆ ವಿಧಾನದಲ್ಲಿ ಮಹತ್ವದ ಬದಲಾವಣೆ ತಂದಿದೆ. ಹಿಂದಿನ ಸೀಸನ್ಗಳಲ್ಲಿ ನೇರವಾಗಿ ದೊಡ್ಮನೆಗೆ ಎಂಟ್ರಿ ಪಡೆಯುತ್ತಿದ್ದ ಸ್ಪರ್ಧಿಗಳು, ಈ ಬಾರಿ ಮೊದಲು ‘ಅಗ್ನಿಪರೀಕ್ಷೆ’ ಎಂಬ ವಿಶೇಷ ಪ್ರಕ್ರಿಯೆಯನ್ನು ಎದುರಿಸಬೇಕಾಗುತ್ತದೆ. ಸ್ಪರ್ಧಿಗಳ ಸಹಿಷ್ಣುತೆ, ನಿರ್ಧಾರಶಕ್ತಿ ಮತ್ತು ಮಾನಸಿಕ ಸಾಮರ್ಥ್ಯವನ್ನು ಪರೀಕ್ಷಿಸುವ ಈ ಹೊಸ ಫಾರ್ಮ್ಯಾಟ್ ಹಿಂದಿನ ಎಲ್ಲಾ ಸೀಸನ್ಗಳಿಗಿಂತ ಭಿನ್ನವಾಗಿದೆ .
ಬಿಗ್ ಬಾಸ್ ಮನೆಗೆ entry ಕೊಡೋಕೆ – ಅಗ್ನಿಪರೀಕ್ಷೆ!
ಆಗಸ್ಟ್ 16 ರಾತ್ರಿ 9
ಸೋಮ – ಶುಕ್ರ ರಾತ್ರಿ 9:30#BBAgniparikshe #ColorsKannada #ಕಲರ್ಫುಲ್ಕತೆ #colorfulstory #KichchaSudeepa #CKPromo pic.twitter.com/3B20EagXRl— Colors Kannada (@ColorsKannada) August 4, 2026
ಕಿಚ್ಚ ಸುದೀಪ್ ಅವರ ಹೊಸ ಅವತಾರ
ಕಿಚ್ಚ ಸುದೀಪ್ ಅವರು 13ನೇ ಬಾರಿಗೂ ಬಿಗ್ ಬಾಸ್ ಕನ್ನಡದ ಆತಿಥ್ಯ ವಹಿಸುತ್ತಿರುವುದು ದೃಢಪಟ್ಟಿದೆ. ಇತ್ತೀಚೆಗೆ ಬಿಡುಗಡೆಯಾದ ಪ್ರೋಮೋನಲ್ಲಿ ಸುದೀಪ್ ಅವರು ಕಪ್ಪು ಉಡುಗೆಯಲ್ಲಿ ಹೊಸ ಲುಕ್ನಲ್ಲಿ ಕಾಣಿಸಿಕೊಂಡಿದ್ದು, ಅಭಿಮಾನಿಗಳಲ್ಲಿ ಭಾರೀ ಸಂಚಲನ ಮೂಡಿಸಿದೆ . ಪ್ರೋಮೋನಲ್ಲಿ “ನಮಸ್ತೆ ಕರ್ನಾಟಕ, ದಿ ಬಿಗ್ ವೇಟ್ ಈಸ್ ಓವರ್!” ಎಂಬ ಸಂದೇಶದೊಂದಿಗೆ, “ಕರ್ನಾಟಕದ ಜನರು ಯಾರಿಗೂ ಕಾಯುವುದಿಲ್ಲ. ಆದರೆ ವರ್ಷಕ್ಕೊಮ್ಮೆ ಕಾಯುವುದಾದರೆ ಅದು ಬಿಗ್ ಬಾಸ್ಗೆ ಮಾತ್ರ. ಶುರು ಮಾಡೋಣವಾ?” ಎಂದು ಸುದೀಪ್ ಕೇಳಿದ್ದು, ಸೀಸನ್ಗೆ ಉತ್ಸಾಹದ ಟೋನ್ ಸೆಟ್ ಮಾಡಿದೆ .
ಬಿಗ್ ಬಾಸ್ ಅಗ್ನಿಪರೀಕ್ಷೆ ಅನುಭವ ಝೋನ್:
ಬಿಗ್ ಬಾಸ್ ಕನ್ನಡ 13ರ ಉತ್ಸಾಹವನ್ನು ಪ್ರೇಕ್ಷಕರಿಗೂ ಸವಿಯಲು ಅವಕಾಶ ನೀಡಲಾಗಿದೆ. ಆಗಸ್ಟ್ 6ರಂದು ಬೆಂಗಳೂರಿನ ಲಾಲ್ಬಾಗ್ ಬೊಟಾನಿಕಲ್ ಗಾರ್ಡನ್ನಲ್ಲಿ ‘ಬಿಗ್ ಬಾಸ್ ಅಗ್ನಿಪರೀಕ್ಷೆ ಅನುಭವ ಝೋನ್’ (Bigg Boss Agniparikshe Experience Zone) ಆಯೋಜಿಸಲಾಗಿದೆ. ಈ ವಿಶೇಷ ವಲಯದಲ್ಲಿ ಅಭಿಮಾನಿಗಳು ಬಿಗ್ ಬಾಸ್ ಕುರ್ಚಿಯಲ್ಲಿ ಫೋಟೋ ತೆಗೆಸಿಕೊಳ್ಳುವುದು, ಸೆಲ್ಫಿ ಝೋನ್ಗೆ ಭೇಟಿ ನೀಡುವುದು ಮತ್ತು ಅಗ್ನಿಪರೀಕ್ಷೆ ಚಾಲೆಂಜ್ ಗಳಲ್ಲಿ ಭಾಗವಹಿಸುವ ಅವಕಾಶವಿದೆ .
ವಿಶೇಷವೆಂದರೆ, ಈ ಅನುಭವ ವಲಯದಲ್ಲಿ ಭಾಗವಹಿಸಿ #BBKAGNIPARIKSHE ಹ್ಯಾಶ್ಟ್ಯಾಗ್ನೊಂದಿಗೆ ಫೋಟೋ ಪೋಸ್ಟ್ ಮಾಡುವವರಿಗೆ ಕಿಚ್ಚ ಸುದೀಪ್ ಅವರೊಂದಿಗೆ ವೀಕೆಂಡ್ ಎಪಿಸೋಡ್ ಅನ್ನು LIVE ಆಗಿ ವೀಕ್ಷಿಸುವ ಸುವರ್ಣಾವಕಾಶ ದೊರೆಯಲಿದೆ .
ಕಾಮನ್ ಮ್ಯಾನ್ಗೂ ಅವಕಾಶ:
ಈ ಸೀಸನ್ನ ವಿಶೇಷ ಆಕರ್ಷಣೆಯೆಂದರೆ ‘ಕಾಮನ್ ಮ್ಯಾನ್’ ಎಂಟ್ರಿ. ಸಾಮಾನ್ಯ ಜನರು ಕೂಡ ಸೆಲೆಬ್ರಿಟಿಗಳ ಜೊತೆಗೆ ಬಿಗ್ ಬಾಸ್ ಮನೆಗೆ ಪ್ರವೇಶಿಸಲು ಆಡಿಷನ್ ಮೂಲಕ ಅವಕಾಶ ಪಡೆಯಬಹುದು. ಬಿಗ್ ಬಾಸ್ ಕನ್ನಡ 5 ಮತ್ತು 6ನೇ ಸೀಸನ್ನಲ್ಲಿ ಈ ಫಾರ್ಮ್ಯಾಟ್ ಯಶಸ್ವಿಯಾಗಿದ್ದು, 6ನೇ ಸೀಸನ್ನಲ್ಲಿ ರೈತ ಶಶಿ ಕುಮಾರ್ ಅವರು ಈ ಮಾರ್ಗದ ಮೂಲಕ ಆಯ್ಕೆಯಾಗಿ ವಿಜೇತರಾಗಿದ್ದರು . ಆಡಿಷನ್ ಮೂಲಕ ಆಯ್ಕೆಯಾದ ಸಾಮಾನ್ಯರು ‘ಅಗ್ನಿಪರೀಕ್ಷೆ’ ಎದುರಿಸಬೇಕಿದ್ದು, ಅದರಲ್ಲಿ ಉತ್ತೀರ್ಣರಾದವರು ಮಾತ್ರ ಬಿಗ್ ಬಾಸ್ ಕನ್ನಡ 13ರ ಅಧಿಕೃತ ಟಿವಿ ಸೀಸನ್ಗೆ ಆಯ್ಕೆಯಾಗಲಿದ್ದಾರೆ .
ಸ್ಪರ್ಧಿಗಳ ಬಗ್ಗೆ ಊಹಾಪೋಹಗಳು
ಬಿಗ್ ಬಾಸ್ ಪ್ರತಿ ಸೀಸನ್ಗೂ ಸ್ಪರ್ಧಿಗಳ ಹೆಸರುಗಳ ಬಗ್ಗೆ ಅನೇಕ ಊಹಾಪೋಹಗಳು ಹರಡುವುದು ಸಾಮಾನ್ಯ. ಈ ಬಾರಿಯೂ ಕೆಲವು ಹೆಸರುಗಳು ಸಾಮಾಜಿಕ ಜಾಲತಾಣಗಳಲ್ಲಿ ಸುದ್ದಿಯಾಗಿವೆ. ಕಿರುತೆರೆ ನಟಿ ಆಶಾ ಅಯ್ಯನರ್, ಪಾಯಲ್ ಚೆಂಗಪ್ಪ, ಹಾಸ್ಯನಟ ಶಿವಪುತ್ರ ಮತ್ತು ರಂಗಭೂಮಿ ನಟ ದಿಲೀಪ್ ಶೆಟ್ಟಿ ಅವರ ಹೆಸರುಗಳು ಚರ್ಚೆಯಲ್ಲಿವೆ. ಈ ಪಟ್ಟಿಯು ಅಧಿಕೃತವಲ್ಲ ಎಂದು ಮೂಲಗಳು ತಿಳಿಸಿವೆ .