ಬಿಗ್ ಬಾಸ್ ಕನ್ನಡ ಸೀಸನ್‌ನ ಈ ವಾರದ ವೀಕೆಂಡ್ ಎಪಿಸೋಡ್ ಒಂದು ರಣರಂಗವೇ ಆಗಿತ್ತು. ಮನೆಯ ಒಳಗೆ ರಕ್ಷಿತಾ ಶೆಟ್ಟಿ ಅವರನ್ನು ಟಾರ್ಗೆಟ್ ಮಾಡುವ ಪ್ರಯತ್ನಗಳು ತೀವ್ರಗೊಂಡಿದ್ದವು. ‘ಅವರು ಎಲ್ಲದಕ್ಕೂ ಮೂಗು ತೋರಿಸುತ್ತಾರೆ, ಇತರರ ವಿಚಾರದಲ್ಲಿ ತಲೆಹಾಕುತ್ತಾರೆ’ ಎಂದು ಅಶ್ವಿನಿ ಗೌಡ, ರಿಷಾ ಗೌಡ ಮತ್ತು ರಾಶಿಕಾ ಶೆಟ್ಟಿ ಅವರು ಪದೇ ಪದೇ ಆರೋಪಿಸಿದ್ದರು. ಆದರೆ ವೀಕೆಂಡ್‌ನಲ್ಲಿ ಹಾಜರಿದ್ದ ಸೂಪರ್‌ಸ್ಟಾರ್ ಸುದೀಪ್ ಅವರು ರಕ್ಷಿತಾ ಅವರ ಪರವಾಗಿ ಧ್ವನಿ ಎತ್ತಿ, ಟೀಕಿಸುವವರಿಗೆ ಗಟ್ಟಿ ಎಚ್ಚರಿಕೆ ನೀಡಿದರು. ‘ನಿಮ್ಮ ಬಿಸ್ನೆಸ್‌ನಲ್ಲಿ ನೀವಿರಿ’ ಎಂಬ ಸುದೀಪ್ ಅವರ ಕಿವಿಮಾತು ಹೇಳಿದ್ದಾರೆ.
ರಕ್ಷಿತಾ ಮೇಲಿನ ಆರೋಪಗಳ ಸುರಿಮಳೆ
ಈ ವಾರದ ಟಾಸ್ಕ್‌ಗಳು ಮತ್ತು ದೈನಂದಿನ ಚಟುವಟಿಕೆಗಳಲ್ಲಿ ರಕ್ಷಿತಾ ಶೆಟ್ಟಿ ಅವರು ಸಕ್ರಿಯವಾಗಿ ಭಾಗವಹಿಸಿದ್ದರು. ಅಶ್ವಿನಿ ಗೌಡ ಅವರು ಮೊದಲು ದಾಳಿ ಆರಂಭಿಸಿದರು. “ರಕ್ಷಿತಾ ಕಲಾವಿದರನ್ನು ಅವಮಾನಿಸಿದ್ದಾರೆ. ಅವರು ಮಾಡಿದ್ದು ಸರಿಯಲ್ಲ. ಯಾರ ವಿಚಾರದಲ್ಲೂ ತಲೆಹಾಕುವುದು ಅವರ ಸ್ವಭಾವವೇ ಆಗಿದೆ” ಎಂದು ಆಕ್ರೋಶ ವ್ಯಕ್ತಪಡಿಸಿದರು. ರಾಶಿಕಾ ಶೆಟ್ಟಿ ಕೂಡ ಈ ಆರೋಪಕ್ಕೆ ಬೆಂಬಲ ನೀಡಿ, “ರಕ್ಷಿತಾ ಎಲ್ಲರ ಸಮಸ್ಯೆಗಳನ್ನು ತಮ್ಮದು ಎಂದುಕೊಂಡು ತೊಡಗಿಸಿಕೊಳ್ಳುತ್ತಾರೆ. ಇದು ಮನೆಯ ಶಾಂತಿಗೆ ಧಕ್ಕೆ ತರುತ್ತದೆ” ಎಂದು ಹೇಳಿದರು.
ರಿಷಾ ಗೌಡ ಅವರು ಇದಕ್ಕಿಂತ ಹೆಚ್ಚು ಆಕ್ರಮಣಕಾರಿಯಾಗಿ ಮಾತನಾಡಿದರು. “ರಕ್ಷಿತಾ ವಾರದ ದಿನಗಳಲ್ಲಿ ಒಂದು ರೀತಿ ವರ್ತಿಸುತ್ತಾರೆ, ವೀಕೆಂಡ್‌ಗೆ ಬಂದಾಗ ಮತ್ತೊಂದು ರೀತಿ ಕಾಣುತ್ತಾರೆ. ಇದು ನಾಟಕವಲ್ಲವೇ?” ಎಂದು ಪ್ರಶ್ನಿಸಿದರು. ರಿಷಾ ಅವರ ಈ ಹೇಳಿಕೆ ಮನೆಯ ಒಳಗೆ ಉದ್ವಿಗ್ನತೆ ಹೆಚ್ಚಿಸಿತ್ತು. ರಕ್ಷಿತಾ ಅವರು ಶಾಂತವಾಗಿ ಕುಳಿತಿದ್ದರೂ, ಅವರ ಮುಖದಲ್ಲಿ ನೋವು ಕಂಡುಬಂತು.
ಸುದೀಪ್ ಪ್ರತಿಕ್ರಿಯೆ
ಸುದೀಪ್ ಅವರು ಮೊದಲು ಸ್ಪರ್ಧಿಗಳನ್ನು ಶಾಂತವಾಗಿ ಆಲಿಸಿದರು. ನಂತರ ತಮ್ಮದೇ ಶೈಲಿಯಲ್ಲಿ ಉತ್ತರ ನೀಡತೊಡಗಿದರು. “ಜನರು ಎಲ್ಲವನ್ನೂ ನೋಡುತ್ತಾರೆ. ಶನಿವಾರ ನಾನು ಬೆಸ್ಟ್ ಆಗಿ ಕಾಣಬೇಕು ಎಂಬ ಆಸೆ ಎಲ್ಲರಲ್ಲೂ ಇರುತ್ತದೆ. ಆದರೆ ಅದಕ್ಕಾಗಿ ಮುಖವಾಡ ಹಾಕಿಕೊಂಡಿದ್ದಾರೆ ಎಂದು ಹೇಳುವ ನೀವೇ ಶನಿವಾರ ಬೇರೆಯೇ ರೀತಿಯಲ್ಲಿ ವರ್ತಿಸುತ್ತೀರಲ್ಲವೇ?” ಎಂದು ರಿಷಾ ಅವರನ್ನು ನೇರವಾಗಿ ಪ್ರಶ್ನಿಸಿದರು.
ಸುದೀಪ್ ಮುಂದುವರಿದು, “ರಿಷಾ, ನೀವು ಮನೆಗೆ ಬರುವಾಗ ರೋಷದಿಂದ ಇದ್ದಿದ್ದೀರಿ. ಒಳಗೆ ಬಂದಮೇಲೆ ನಿಮ್ಮ ವರ್ತನೆ ಬದಲಾಯಿತು. ಇದು ಕೂಡ ಮುಖವಾಡವಲ್ಲವೇ? ಎಲ್ಲರೂ ಒಬ್ಬರ ಸರಿ-ತಪ್ಪು ಸುಧಾರಿಸಲು ಹೋಗುತ್ತಿದ್ದೀರಿ. ಆದರೆ ಒಳ್ಳೆಯವರು-ಕೆಟ್ಟವರು ಎಂಬ ಗೆರೆ ಎಳೆಯುವುದು ಸಾಧ್ಯವಿಲ್ಲ. ಕೆಲವರೊಂದಿಗೆ ಹೊಂದಾಣಿಕೆ ಆಗುತ್ತದೆ, ಕೆಲವರೊಂದಿಗೆ ಆಗುವುದಿಲ್ಲ, ಇದು ಸಹಜ” ಎಂದು ವಿವರಿಸಿದರು.
‘ನಿಮ್ಮ ಬಿಸ್ನೆಸ್‌ನಲ್ಲಿ ನೀವಿರಿ’ – ಕಿವಿಮಾತು
ಸುದೀಪ್ ಅವರು ಕಿವಿಮಾತು ಹೇಳಿದ್ದಾರೆ. “ನಿಮ್ಮ ಬಿಸ್ನೆಸ್‌ನಲ್ಲಿ ನೀವಿರಿ.” ಈ ಒಂದು ವಾಕ್ಯ ಮನೆಯ ಒಳಗಿನ ಗುಂಪುಗಳನ್ನು, ಒಳ ಒಪ್ಪಂದಗಳನ್ನು ಮತ್ತು ಟಾರ್ಗೆಟಿಂಗ್ ಆಟವನ್ನು ಪ್ರಶ್ನಿಸಿತು. “ಬಿಗ್ ಬಾಸ್ ಮನೆಯಲ್ಲಿ ಆಟವಾಡುವುದು ಸ್ವಾಗತ. ಆದರೆ ವೈಯಕ್ತಿಕ ದ್ವೇಷಕ್ಕೆ ಇಳಿಯಬಾರದು. ಪ್ರೇಕ್ಷಕರು ಬುದ್ಧಿವಂತರು, ಯಾರು ನಿಜವಾಗಿ ಆಡುತ್ತಾರೆ, ಯಾರು ನಾಟಕ ಮಾಡುತ್ತಾರೆ ಎಂಬುದನ್ನು ಗುರುತಿಸುತ್ತಾರೆ” ಎಂದು ಸುದೀಪ್ ಎಚ್ಚರಿಕೆ ನೀಡಿದರು.
ರಕ್ಷಿತಾ ಅವರ ಪ್ರತಿಕ್ರಿಯೆ
ರಕ್ಷಿತಾ ಶೆಟ್ಟಿ ಅವರು ಸುದೀಪ್ ಅವರ ಬೆಂಬಲಕ್ಕೆ ಕೃತಜ್ಞತೆ ಸಲ್ಲಿಸಿದರು. “ನಾನು ಯಾರನ್ನೂ ಗುರಿಯಾಗಿಸಿಲ್ಲ. ಕೇವಲ ಆಟದ ನಿಯಮಗಳನ್ನು ಪಾಲಿಸಲು ಪ್ರಯತ್ನಿಸುತ್ತಿದ್ದೇನೆ. ಒಳಗೆ ಒಗ್ಗಟ್ಟು ಮುಖ್ಯ, ಆದರೆ ಕೆಲವರು ಗುಂಪು ರಾಜಕಾರಣ ಮಾಡುತ್ತಾರೆ” ಎಂದು ಶಾಂತವಾಗಿ ಉತ್ತರಿಸಿದರು.