ಬೆಂಗಳೂರು, ಡಿಸೆಂಬರ್ 6: ಬಿಗ್ ಬಾಸ್ ಕನ್ನಡ ಮನೆ (Bigg Boss Kannada) ಅಂದರೆ ಅಲ್ಲಿ ನಿಯಮಗಳು ಅತಿ ಮುಖ್ಯ. ಅದರಲ್ಲಿಯೂ ಕ್ಯಾಪ್ಟನ್ ರೂಂ (Captain Room) ಒಂದು ವಿಶೇಷವಾದ ಮೌಲ್ಯ ಮತ್ತು ಗೌರವವನ್ನು ಹೊಂದಿದೆ. ಬಿಗ್ ಬಾಸ್ ಮನೆಯಲ್ಲಿ ಕ್ಯಾಪ್ಟನ್ ಆದವರು ಮಾತ್ರ ಆ ವಿಶೇಷ ಕೊಠಡಿಯನ್ನು ಪ್ರವೇಶ ಮಾಡಬೇಕು ಮತ್ತು ಬಳಸಬೇಕು ಎಂಬುದು ದೀರ್ಘಕಾಲದಿಂದ ನಡೆದು ಬಂದಿರುವ ನಿಯಮ. ಆದರೆ, ಬಿಗ್ ಬಾಸ್ ಕನ್ನಡ ಸೀಸನ್ 12 (Bigg Boss Kannada Season 12) ರ ಸ್ಪರ್ಧಿಗಳಲ್ಲಿ, ಅದರಲ್ಲೂ ಮುಖ್ಯವಾಗಿ ‘ಗಿಲ್ಲಿ’ ನಟನಿಗೆ ಈ ಕ್ಯಾಪ್ಟನ್ ರೂಂನ ಮೌಲ್ಯ ತಿಳಿದಂತೆ ಕಾಣಿಸುತ್ತಿಲ್ಲ. ಅವರ ಪದೇ ಪದೇ ನಿಯಮ ಉಲ್ಲಂಘನೆಯಿಂದಾಗಿ, ಕೊನೆಗೂ ಕ್ಯಾಪ್ಟನ್ ರೂಂಗೆ ಬೀಗ ಜಡಿಯುವ ಪರಿಸ್ಥಿತಿ ನಿರ್ಮಾಣವಾಗಿದೆ.
ಗಿಲ್ಲಿ ನಟನ ಪುನರಾವರ್ತಿತ ನಿಯಮ ಉಲ್ಲಂಘನೆ
ಗಿಲ್ಲಿ ನಟ ಅವರು ಕ್ಯಾಪ್ಟನ್ ಆಗದೆ ಇದ್ದರೂ ಪದೇ ಪದೇ ಕ್ಯಾಪ್ಟನ್ ರೂಂ ಪ್ರವೇಶಿಸುವುದು ಈ ಸೀಸನ್‌ನಲ್ಲಿ ಅನೇಕ ಬಾರಿ ಕಂಡುಬಂದಿದೆ. ಈ ವಾರವೂ ಇದೇ ವಿಷಯ ಪುನರಾವರ್ತನೆಯಾಗಿದೆ.
ಕ್ಯಾಪ್ಟನ್ ಆಗಿದ್ದ ಸ್ಪಂದನಾ ಮತ್ತು ಅಭಿಷೇಕ್ ಅವರು ರೂಂನಲ್ಲಿ ಇದ್ದಾಗ ಗಿಲ್ಲಿ ನಟ ಅವರು ಮತ್ತೊಬ್ಬ ಸ್ಪರ್ಧಿ ಕಾವ್ಯಾ ಅವರೊಂದಿಗೆ ಕ್ಯಾಪ್ಟನ್ ರೂಂ ಪ್ರವೇಶಿಸಿದರು. ಮೊದಲು ಬೆಡ್ ಪಕ್ಕದ ಚೇರ್ ಮೇಲೆ ಕುಳಿತುಕೊಂಡ ಗಿಲ್ಲಿ ನಟ, ನಂತರ ಒಂದು ಹಂತಕ್ಕೆ ಮುಂದೆ ಹೋಗಿ, ಕ್ಯಾಪ್ಟನ್ ರೂಂನ ಹಾಸಿಗೆ ಮೇಲೆ ಮಲಗಿದರು. ಆಗ ಅಲ್ಲಿದ್ದ ಅಭಿಷೇಕ್ ಮತ್ತು ಧನುಷ್ ಅವರು ನಿಯಮದ ಬಗ್ಗೆ ನೆನಪಿಸಿ, ಹಾಗೆ ಕುಳಿತುಕೊಳ್ಳಬಾರದು, ಹೊರಗೆ ಹೋಗಿ ಎಂದು ಹಲವು ಬಾರಿ ಹೇಳಿದರು. ಆದರೆ ಗಿಲ್ಲಿ ನಟ ಅದನ್ನು ಕೇಳಿಸಿಕೊಳ್ಳದೆ ಮಲಗೇ ಇದ್ದರು. ಇದು ಕ್ಯಾಪ್ಟನ್ ಪದವಿಗೆ ಮತ್ತು ಕ್ಯಾಪ್ಟನ್ ರೂಂಗೆ ತೋರಿಸಿದ ಸ್ಪಷ್ಟ ಅಗೌರವ ಎಂದು ಪರಿಗಣಿಸಲಾಗಿದೆ.
ಈ ಹಿಂದೆ ಸೀಸನ್‌ನ ಹಲವು ವಾರಗಳಲ್ಲಿ ‘ಗಿಲ್ಲಿ’ ನಟ ಈ ರೀತಿ ನಿಯಮ ಮೀರಿ ಕ್ಯಾಪ್ಟನ್ ರೂಂ ಬಳಸಿದ್ದರೂ, ಕಾರ್ಯಕ್ರಮದ ನಿರೂಪಕ ಕಿಚ್ಚ ಸುದೀಪ್ (Kichcha Sudeep) ಅವರು ಈ ವಿಷಯದಲ್ಲಿ ಸೈಲೆಂಟ್ ಆಗಿದ್ದರು. ಸ್ಪರ್ಧಿಗಳು ತಾವಾಗಿಯೇ ತಪ್ಪು ತಿದ್ದುಕೊಳ್ಳುತ್ತಾರೆ ಎಂದು ನಿರೀಕ್ಷಿಸಲಾಗಿತ್ತು. ಆದರೆ 70 ದಿನಗಳ ನಂತರವೂ ನಿಯಮ ಉಲ್ಲಂಘನೆ ಮುಂದುವರಿದ ಕಾರಣ, ಸುದೀಪ್ ಅವರು ಕಠಿಣ ಕ್ರಮಕ್ಕೆ ಮುಂದಾಗಿದ್ದಾರೆ.
ಹೊಸದಾಗಿ ಬಿಡುಗಡೆಯಾದ ಪ್ರೋಮೋದಲ್ಲಿ, ಕಿಚ್ಚ ಸುದೀಪ್ ಅವರು ‘ಗಿಲ್ಲಿ’ ನಟನನ್ನು ನೇರವಾಗಿ ಕ್ಯಾಪ್ಟನ್ಗೆ ಮರ್ಯಾದೆ ಇಲ್ಲ, ಕ್ಯಾಪ್ಟನ್ ರೂಂಗೂ ಮರ್ಯಾದೆ ಇಲ್ಲ ಅಲ್ಲವೇ ಗಿಲ್ಲಿ? ಎಂದು ಪ್ರಶ್ನಿಸುತ್ತಾ, ಕ್ಯಾಪ್ಟನ್ ರೂಂಗೆ ಅದರದೇ ಆದ ಬೆಲೆ ಇದೆ ಎಂದು ತರಾಟೆಗೆ ತೆಗೆದುಕೊಂಡಿದ್ದಾರೆ.
ಈ ನಡೆಯಿಂದಾಗಿ, ಕ್ಯಾಪ್ಟನ್ ರೂಂನ ನಿಯಮ ಉಲ್ಲಂಘನೆಗೆ ದಂಡವಾಗಿ ಸುದೀಪ್ ಅವರು ಕ್ಯಾಪ್ಟನ್ ರೂಂಗೆ ಬೀಗ ಹಾಕಿಸಿದ್ದಾರೆ. ಈ ಮೂಲಕ, ಆ ವಾರದ ಕ್ಯಾಪ್ಟನ್‌ಗಳು ಆ ವಿಶೇಷ ಕೊಠಡಿಯನ್ನು ಬಳಸುವ ಅವಕಾಶದಿಂದ ವಂಚಿತರಾಗಿದ್ದಾರೆ.
ಇದು ಎರಡನೇ ಬಾರಿ ಸಂಭವಿಸಿದ ಘಟನೆ
ಬಿಗ್ ಬಾಸ್ ಕನ್ನಡ ಇತಿಹಾಸದಲ್ಲಿ ಕ್ಯಾಪ್ಟನ್ ರೂಂಗೆ ಬೀಗ ಜಡಿದಿರುವುದು ಇದು ಎರಡನೇ ಬಾರಿಯಾಗಿದೆ. ಈ ಮೊದಲು ಸಹ ಸ್ಪರ್ಧಿಗಳ ನಿಯಮ ಉಲ್ಲಂಘನೆಯ ಕಾರಣದಿಂದಾಗಿ ಕ್ಯಾಪ್ಟನ್ ರೂಂಗೆ ಬೀಗ ಹಾಕಲಾಗಿತ್ತು. ಈಗ, ಸೀಸನ್ 12 ರಲ್ಲಿ ಇದೇ ಘಟನೆ ರಿಪೀಟ್ ಆಗಿದೆ.
ಬಿಗ್ ಬಾಸ್ ಮನೆಯಲ್ಲಿ ಸಾಕಷ್ಟು ಸ್ಪರ್ಧಿಗಳು ಬೇರೆ ಬೇರೆ ರೂಲ್ಸ್‌ಗಳನ್ನು ಬ್ರೇಕ್ ಮಾಡಿದ್ದಾರೆ. ಈ ಎಲ್ಲ ವಿಷಯಗಳನ್ನು ಬಿಗ್ ಬಾಸ್‌ಗೆ ಹೇಳಿ ಸಾಕಾಗಿದೆ. ಆದರೂ ತಪ್ಪುಗಳು ಮತ್ತೆ ಮತ್ತೆ ಪುನರಾವರ್ತನೆಯಾಗುತ್ತಿವೆ. ಹಾಗಾಗಿ, ಈ ವಿಷಯದಲ್ಲಿ ಕಠಿಣ ನಿಯಮವನ್ನೇ ತೆಗೆದುಕೊಂಡು ಬರಲಾಗಿದೆ. ಕ್ಯಾಪ್ಟನ್ಸಿ ರೂಂಗೆ ಬೀಗ ಹಾಕಿರುವ ಸುದೀಪ್ ಅವರ ಈ ನಿರ್ಧಾರವು, ಇನ್ನುಳಿದ ಸ್ಪರ್ಧಿಗಳಿಗೆ ನಿಯಮ ಪಾಲನೆಯ ಕುರಿತು ಗಂಭೀರ ಎಚ್ಚರಿಕೆಯನ್ನು ನೀಡಿದೆ.
