ಬೆಂಗಳೂರು, ಡಿಸೆಂಬರ್ ೦3: ಬೆಂಗಳೂರಿನ ಮೆಟ್ರೊ ಹಳದಿ ಮಾರ್ಗದ (ಯೆಲ್ಲೋ ಲೈನ್) ಸೇವಾ ಆವರ್ತನವನ್ನು ಹೆಚ್ಚಿಸಲು , ಆರನೇ ಡ್ರೈವರ್ಲೆಸ್ ಮೆಟ್ರೊ ರೈಲು ಸೆಟ್ ಇಂದು ಸಂಜೆ ಬೆಂಗಳೂರಿನ ಹೆಬ್ಬಗೋಡಿ ಡಿಪೋಗೆ ಸುರಕ್ಷಿತವಾಗಿ ತಲುಪಿದೆ. ಕೊಲ್ಕತ್ತಾದ ಟಿಟಾಗರ್ ನಿಂದ ನವೆಂಬರ್ 18ರಂದು ಪ್ರಯಾಣವನ್ನು ಆರಂಭಿಸಿದ ಈ ಹೊಸ ರೈಲು ಸೆಟ್,ಇಂದು ಬೆಂಗಳೂರಿಗೆ ತಲುಪಿದೆ.
ಪ್ರಯಾಣ ಸೌಲಭ್ಯಕ್ಕೆ ಹೊಸ ಚಾಲನೆ
ಸದ್ಯದಲ್ಲಿ, ಆರ್.ವಿ. ರೋಡ್ ನಿಂದ ಬೊಮ್ಮಸಂದ್ರದವರೆಗೆ 19.15 ಕಿಮೀ ದೂರವನ್ನು ಒಳಗೊಂಡಿರುವ ಹಳದಿ ಮಾರ್ಗದಲ್ಲಿ ಕೇವಲ ಐದು ರೈಲು ಸೆಟ್ಗಳು ಸಂಚರಿಸುತ್ತಿದ್ದು, ರೈಲುಗಳ ನಡುವಿನ ಆವರ್ತನ ಸಮಯ 15 ರಿಂದ 18 ನಿಮಿಷಗಳಷ್ಟು ದೀರ್ಘವಾಗಿದೆ. ಇದರಿಂದಾಗಿ ಪ್ರಯಾಣಿಕರು ಆಗಾಗ್ಗೆ ತೊಂದರೆ ಅನುಭವಿಸುತ್ತಿದ್ದರು. ಈ ಹೊಸ ಆರನೇ ರೈಲು ಸೆಟ್ ಡಿಸೆಂಬರ್ ಅಂತ್ಯದ ವೇಳೆಗೆ ವಾಣಜ್ಯಿಕ ಸೇವೆಯನ್ನು ಆರಂಭಿಸುವ ಮೂಲಕ, ರೈಲು ಆವರ್ತನವನ್ನು 10 ರಿಂದ 12 ನಿಮಿಷಗಳಿಗೆ ಇಳಿಸಲು ಬೆಂಗಳೂರು ಮೆಟ್ರೊ ರೇಲ್ ಕಾರ್ಪೊರೇಷನ್ ಲಿಮಿಟೆಡ್ (BMRCL) ಯೋಜಿಸಿದೆ. ಇದು ಪ್ರಸ್ತುತ ಸೇವೆಯಲ್ಲಿ ಗಮನಾರ್ಹ ಸುಧಾರಣೆಯನ್ನು ತಂದು, ಪ್ರಯಾಣಿಕರಿಗೆ ಹೆಚ್ಚು ಸುಲಭ ಮತ್ತು ವೇಗವಾದ ಸಂಚಾರ ಅನುಭವವನ್ನು ನೀಡಲಿದೆ.
ಜನವರಿಯೊಳಗೆ ಮತ್ತಷ್ಟು ಸೇರ್ಪಡೆ
ಹೊಸ ವರ್ಷದ ಆರಂಭದಲ್ಲಿ ಮೆಟ್ರೊ ಸೇವೆಯನ್ನು ಇನ್ನಷ್ಟು ಉತ್ತಮಗೊಳಿಸಲು BMRCL ಹೆಚ್ಚಿನ ಯೋಜನೆ ಹಾಕಿದೆ. ಡಿಸೆಂಬರ್ ಮತ್ತು ಜನವರಿ ತಿಂಗಳ ಆರಂಭದಲ್ಲಿ ಇನ್ನೂ ಎರಡು ಹೊಸ ಡ್ರೈವರ್ಲೆಸ್ ರೈಲು ಸೆಟ್ಗಳು ಟಿಟಾಗರ್ ನಿಂದ ಬೆಂಗಳೂರಿಗೆ ಆಗಮಿಸಲಿವೆ. ಈ ಎಲ್ಲಾ ಹೊಸ ಸೇರ್ಪಡೆಗಳೊಂದಿಗೆ, 2026ರ ಆರಂಭದ ಹೊತ್ತಿಗೆ ಹಳದಿ ಮಾರ್ಗವು ಬೆಂಗಳೂರಿನ ಇತರ ಮುಖ್ಯ ಮೆಟ್ರೊ ಮಾರ್ಗಗಳಾದ ಹಸಿರು ಮತ್ತು ನೇರಳೆ ಮಾರ್ಗಗಳಂತೆಯೇ ಪ್ರತಿ 5 ನಿಮಿಷಗಳಿಗೊಮ್ಮೆ ರೈಲು ಸೇವೆಯನ್ನು ನೀಡುವ ಸಾಮರ್ಥ್ಯವನ್ನು ಪಡೆಯಲಿದೆ. ಇದು ನಗರದ ಉತ್ತರ-ದಕ್ಷಿಣ ಉದ್ದಕ್ಕೂ ಸಂಚಾರವನ್ನು ಪೂರ್ತಿಯಾಗಿ ರೂಪಾಂತರಿಸುವ ನಿರೀಕ್ಷೆಯಿದೆ.
ಹಳದಿ ಮೆಟ್ರೊ ಮಾರ್ಗವನ್ನು ಈ ವರ್ಷ ಆಗಸ್ಟ್ 10ರಂದು ಉದ್ಘಾಟಿಸಲಾಗಿದ್ದು, ಮರುದಿನ ಆಗಸ್ಟ್ 11ರಿಂದ ಸಾರ್ವಜನಿಕರಿಗೆ ವಾಣಜ್ಯಿಕ ಸೇವೆಯನ್ನು ಆರಂಭಿಸಲಾಗಿತ್ತು. ತನ್ನ ಸಂಪೂರ್ಣ ಸಾಮರ್ಥ್ಯದೊಂದಿಗೆ ಕಾರ್ಯನಿರ್ವಹಿಸಲು ಅಗತ್ಯವಿರುವ ರೈಲು ಬಂಡಿಗಳ ಸಂಖ್ಯೆಯನ್ನು ತಲುಪುವುದು, ಈ ಮಹತ್ವದ ನಗರ ಸಾರಿಗೆ ಯೋಜನೆಯ ಮುಂದಿನ ಪ್ರಮುಖ ಗುರಿಯಾಗಿದೆ. ಆರನೇ ರೈಲಿನ ಆಗಮನ ಮತ್ತು ಮುಂದಿನ ಸೇರ್ಪಡೆಗಳು ಈ ದಿಕ್ಕಿನಲ್ಲಿ ಒಂದು ಮಹತ್ವದ ಹೆಜ್ಜೆಯಾಗಿದೆ.
