ಬೀದರ್ ಎಟಿಎಂ ರಾಬರಿ-ಹ*ತ್ಯೆ ಪ್ರಕರಣ: ವರ್ಷವಾದರೂ ಆರೋಪಿಗಳನ್ನ ಬಂಧಿಸಿಲ್ಲವೇಕೆ..?

ಬೀದರ್, ನವೆಂಬರ್ 19, 2025: ಕಳೆದ ವರ್ಷ ಜನವರಿ 16ರಂದು ಬೀದರ್ ಜಿಲ್ಲೆಯಲ್ಲಿ ನಡೆದ ಭೀಕರ ಎಟಿಎಂ ಕ್ಯಾಶ್ ವ್ಯಾನ್ ದರೋಡೆ ಮತ್ತು ಹತ್ಯೆ ಪ್ರಕರಣಕ್ಕೆ ಇನ್ನೂ ನ್ಯಾಯ ದೊರೆತಿಲ್ಲ. ಈ ಘಟನೆಯಲ್ಲಿ 83 ಲಕ್ಷ ರೂಪಾಯಿ ಲೂಟಿ ಮಾಡಿ, ಇಬ್ಬರು ಸಿಬ್ಬಂದಿಯ ಮೇಲೆ ಗುಂಡಿನ ದಾಳಿ ನಡೆಸಿದ್ದ ಆರೋಪಿಗಳು ಒಂದು ವರ್ಷಕ್ಕೆ ಸಮೀಪಿಸುತ್ತಿದ್ದರೂ ಪೊಲೀಸರ ಬಲೆಯಿಂದ ತಪ್ಪಿಸಿಕೊಂಡು ತಿರುಗುತ್ತಿದ್ದಾರೆ.

2025 ಜನವರಿ 16ರ ಬೆಳಗ್ಗೆ ಬೀದರ್ ನಗರದ ಬಳಿ CMS ಕ್ಯಾಶ್ ಮ್ಯಾನೇಜ್‌ಮೆಂಟ್ ಏಜೆನ್ಸಿಯ ಕ್ಯಾಶ್ ವ್ಯಾನ್‌ಗೆ ದರೋಡೆಕೋರರ ಗ್ಯಾಂಗ್ ತಡೆದು ನಿಲ್ಲಿಸಿತ್ತು. ಗನ್ ಹಿಡಿದ ಆರೋಪಿಗಳು ವಾಹನದಲ್ಲಿದ್ದ ಸಿಬ್ಬಂದಿ ವೆಂಕಟೇಶ್ (35) ಮತ್ತು ಶಿವಕುಮಾರ್ ಮೇಲೆ ನಿರ್ದಾಕ್ಷಿಣ್ಯವಾಗಿ ಗುಂಡು ಹಾರಿಸಿದ್ದರು. ಸ್ಥಳದಲ್ಲೇ ವೆಂಕಟೇಶ್ ಮೃತಪಟ್ಟಿದ್ದರೆ, ಶಿವಕುಮಾರ್ ತೀವ್ರ ಗಾಯಗೊಂಡು ಪ್ರಾಣಾಪಾಯದಿಂದ ಪಾರಾಗಿದ್ದರು. 83 ಲಕ್ಷ ರೂಪಾಯಿ ನಗದನ್ನು ಲೂಟಿ ಮಾಡಿ ಆರೋಪಿಗಳು ಕಾಲ್ಕಿತ್ತಿದ್ದರು.

ಘಟನೆ ನಡೆದ ಒಂದೇ ತಿಂಗಳಲ್ಲಿ ಬೀದರ್ ಎಸ್‌ಪಿ ನೇತೃತ್ವದ ತಂಡವು ಆರೋಪಿಗಳ ಗುರುತು ಪತ್ತೆ ಮಾಡಿತ್ತು. ದರೋಡೆಯಲ್ಲಿ ಭಾಗಿಯಾದ ಮುಖ್ಯ ಆರೋಪಿಗಳು ಬಿಹಾರ ಮೂಲದ ಇಬ್ಬರು ಅಪರಿಚಿತ ಖದೀಮರು ಎಂಬುದು ಬಯಲಾಗಿತ್ತು. ಅವರ ಫೋಟೋ, ಹೆಸರು, ಮೊಬೈಲ್ ಸಂಖ್ಯೆ, ಬಿಹಾರದ ಸ್ಥಳೀಯ ವಿಳಾಸ ಸೇರಿದಂತೆ ಎಲ್ಲ ಮಾಹಿತಿ ಪೊಲೀಸರ ಕೈವಶವಿದ್ದರೂ, ಇಂದಿಗೂ ಅವರನ್ನು ಬಂಧಿಸಲು ಸಾಧ್ಯವಾಗಿಲ್ಲ.

ಆರೋಪಿಗಳು ಅಂತರ್‌ ರಾಜ್ಯ ಗ್ಯಾಂಗ್‌ನ ಸದಸ್ಯರು. ಬಿಹಾರ, ಉತ್ತರ ಪ್ರದೇಶ, ಝಾರ್ಖಂಡ್‌ಗಳಲ್ಲಿ ಅವರು ತಲೆಮರೆಸಿಕೊಂಡಿರಬಹುದು ಎಂಬ ಶಂಕೆ ಇದೆ. ಅಲ್ಲಿನ ಪೊಲೀಸರ ಸಹಕಾರ ಪಡೆದು ದಾಳಿ ನಡೆಸಲಾಗುತ್ತಿದೆ ಎಂದು ಬೀದರ್ ಜಿಲ್ಲಾ ಪೊಲೀಸ್ ಮೂಲಗಳು ತಿಳಿಸಿವೆ. ಆದರೆ ಒಂದು ವರ್ಷಕ್ಕೆ ಸಮೀಪಿಸುತ್ತಿದ್ದರೂ ಯಾವುದೇ ಆರೋಪಿ ಬಂಧನವಾಗದಿರುವುದು ರಾಜ್ಯ ಪೊಲೀಸ್ ವ್ಯವಸ್ಥೆಯ ಮೇಲೆ ಗಂಭೀರ ಪ್ರಶ್ನೆ ಎತ್ತಿದೆ.

ಈ ಪ್ರಕರಣದಲ್ಲಿ ಬಳಕೆಯಾದ ಪಿಸ್ತೂಲ್, ಬೈಕ್ ಸಂಖ್ಯೆ, ಮೊಬೈಲ್ ಸಿಗ್ನಲ್ ಲೊಕೇಶನ್ ಎಲ್ಲವೂ ಪೊಲೀಸರ ಬಳಿ ದಾಖಲೆಯಲ್ಲಿದೆ. ಆದರೂ “ಖಿಲಾಡಿ” ಎನಿಸಿಕೊಂಡಿರುವ ಈ ಗ್ಯಾಂಗ್ ಪತ್ತೆಯಾಗದೇ ಇರುವುದು ಆಘಾತಕಾರಿಯಾಗಿದೆ. ಇದೇ ಗ್ಯಾಂಗ್ ಅಥವಾ ಇದೇ ರೀತಿಯ ಗ್ಯಾಂಗ್ ಈ ವರ್ಷ ಬೆಂಗಳೂರಿನಲ್ಲಿ 7.11 ಕೋಟಿ ರೂಪಾಯಿ ಎಟಿಎಂ ಕ್ಯಾಶ್ ಲೂಟಿ ಮಾಡಿದೆ ಎಂಬ ಶಂಕೆಯೂ ವ್ಯಕ್ತವಾಗುತ್ತಿದೆ.

ವೆಂಕಟೇಶ್ ಅವರ ಕುಟುಂಬ ಇನ್ನೂ ನ್ಯಾಯಕ್ಕಾಗಿ ಕಾಯುತ್ತಿದೆ. ಒಬ್ಬನನ್ನು ಕೊಂದು, ಒಬ್ಬನನ್ನು ಗಾಯಗೊಳಿಸಿ 83 ಲಕ್ಷ ಲೂಟಿ ಮಾಡಿದ ಆರೋಪಿಗಳು ಒಂದು ವರ್ಷದಿಂದ ಸುಲಭವಾಗಿ ತಿರುಗುತ್ತಿದ್ದಾರೆ. ಪೊಲೀಸರು ಏನು ಮಾಡುತ್ತಿದ್ದಾರೆ ? ಎಂದು ಕುಟುಂಬಸ್ಥರು ಪ್ರಶ್ನಿಸುತ್ತಾರೆ.

ಬೀದರ್ ಜಿಲ್ಲಾ ಪೊಲೀಸರು ಈ ಪ್ರಕರಣದಲ್ಲಿ 5 ಲಕ್ಷ ರೂ. ಬಹುಮಾನ ಘೋಷಿಸಿದ್ದರು. ಆದರೂ ಯಾವುದೇ ಸುಳಿವು ಫಲಕಾರಿಯಾಗಿಲ್ಲ. ಈಗೀಗ ಬೆಂಗಳೂರಿನ 7 ಕೋಟಿ ದರೋಡೆ ಪ್ರಕರಣದಲ್ಲೂ “ಒಳಗಿನ ಸುಳಿವು” ಎಂಬ ಮಾತು ಬಂದಿರುವುದರಿಂದ, ಬೀದರ್ ಪ್ರಕರಣವನ್ನು ಮತ್ತೊಮ್ಮೆ ತ್ವರಿತವಾಗಿ ಪತ್ತೆಹಚ್ಚಬೇಕು ಎಂದು ಹತ್ಯೆಯಾದ ಸಿಬ್ಬಂಧಿಯ ಕುಟುಂಬಸ್ಥರು ಮನವಿ ಮಾಡಿದ್ದಾರೆ