ಬೆಂಗಳೂರು: ಬ್ಯಾಂಕ್‌ಗಳು ಸಾಮಾನ್ಯ ಜನರಿಗೆ ಉಳಿತಾಯಕ್ಕೆ ಒಂದು ಉತ್ತಮ ಆಯ್ಕೆಯಾಗಿದ್ದರೂ, ಇತ್ತೀಚಿನ ಬೆಳವಣಿಗೆಗಳು ಉಳಿತಾಯ ಖಾತೆದಾರರಲ್ಲಿ, ವಿಶೇಷವಾಗಿ ಮಧ್ಯಮ ವರ್ಗ ಮತ್ತು ಹಿರಿಯ ನಾಗರಿಕರಲ್ಲಿ ಅಸಮಾಧಾನ ಹುಟ್ಟಿಸಿವೆ. ಭಾರತೀಯ ರಿಸರ್ವ್ ಬ್ಯಾಂಕ್ (RBI) ತನ್ನ ಇತ್ತೀಚಿನ ಬುಲೆಟಿನ್‌ನಲ್ಲಿ, ಸರ್ಕಾರಿ ಮತ್ತು ಖಾಸಗಿ ಬ್ಯಾಂಕ್‌ಗಳಲ್ಲಿ ಉಳಿತಾಯ ಖಾತೆಯ ಠೇವಣಿಗಳ ಮೇಲಿನ ಬಡ್ಡಿ ದರ ಕನಿಷ್ಠ ಮಟ್ಟಕ್ಕೆ ಇಳಿದಿರುವುದಾಗಿ ತಿಳಿಸಿದೆ.
ಒಂದೆಡೆ ಸಾಲಗಾರರಿಗೆ ಸಿಹಿಸುದ್ದಿಯಾಗಿ, ಕಾರು ಮತ್ತು ಮನೆ ಸಾಲದ ಮೇಲಿನ ಬಡ್ಡಿ ದರವನ್ನು ಕಡಿಮೆ ಮಾಡಲಾಗಿದೆ. ಆದರೆ, ಮತ್ತೊಂದೆಡೆ ಉಳಿತಾಯ ಖಾತೆದಾರರಿಗೆ ಠೇವಣಿ ಬಡ್ಡಿ ದರ ಕಡಿತದಿಂದ ಆಘಾತವಾಗಿದೆ. 2011ರ ಅಕ್ಟೋಬರ್‌ನಲ್ಲಿ RBI ಉಳಿತಾಯ ಖಾತೆಯ ಬಡ್ಡಿ ದರದ ನಿಯಂತ್ರಣವನ್ನು ತೆಗೆದುಹಾಕಿ, ಬ್ಯಾಂಕ್‌ಗಳಿಗೆ ಸ್ವತಂತ್ರವಾಗಿ ದರ ನಿಗದಿಪಡಿಸಲು ಅನುಮತಿ ನೀಡಿತ್ತು. ಆದರೆ, ಅಂದಿನಿಂದ ಠೇವಣಿಗಳ ಮೇಲಿನ ಬಡ್ಡಿ ದರ ಸತತವಾಗಿ ಇಳಿಮುಖವಾಗಿದೆ, ಇದರಿಂದ ಸರ್ಕಾರಿ ಮತ್ತು ಖಾಸಗಿ ಬ್ಯಾಂಕ್‌ಗಳಲ್ಲಿ ಠೇವಣಿ ಪ್ರಮಾಣ ಕಡಿಮೆಯಾಗಿದೆ.
ಪ್ರಸಕ್ತ ಫೆಬ್ರವರಿಯಿಂದ RBI ರೆಪೋ ದರವನ್ನು ಶೇಕಡಾ 1ರಷ್ಟು ಕಡಿಮೆ ಮಾಡಿದ್ದು, ಇದಕ್ಕೆ ಸಾಲದ ಬಡ್ಡಿ ದರವನ್ನು ರೆಪೋ ಆಧಾರಿತವಾಗಿ ಕಡಿಮೆ ಮಾಡಲಾಗಿದೆ. ಆದರೆ, ಸಣ್ಣ ಉಳಿತಾಯ ಯೋಜನೆಗಳ ಮೇಲಿನ ಬಡ್ಡಿ ದರವನ್ನು ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ಸರ್ಕಾರ ಯಥಾಸ್ಥಿತಿಯಲ್ಲಿ ಇರಿಸಿದೆ, ಇದು ಉಳಿತಾಯಕಾರರಿಗೆ ಮತ್ತಷ್ಟು ನಿರಾಸೆ ತಂದಿದೆ.
