ಕ್ರಿಕೆಟ್, ವಿಶ್ವದಾದ್ಯಂತ ಲಕ್ಷಾಂತರ ಅಭಿಮಾನಿಗಳನ್ನು ಹೊಂದಿರುವ ಕ್ರೀಡೆ, ಯಾವಾಗಲೂ ದಾಖಲೆಗಳಿಂದ ಕೂಡಿರುತ್ತದೆ. ಸ್ಟಾರ್‌ ಆಟಗಾರರು ಅಥವಾ ದೊಡ್ಡ ತಂಡಗಳು ದಾಖಲೆ ಬರೆಯುವುದು ಸಾಮಾನ್ಯವಾದರೂ, ಸಣ್ಣ ತಂಡಗಳು ಅಥವಾ ಗುರುತಿಸಿಕೊಳ್ಳದ ಆಟಗಾರರಿಂದ ಸಾಧನೆಯಾದಾಗ ಅದು ಎಲ್ಲರ ಗಮನ ಸೆಳೆಯುತ್ತದೆ. ಇಂತಹದ್ದೇ ಒಂದು ಐತಿಹಾಸಿಕ ದಾಖಲೆಯನ್ನು ಐರಿಶ್ ಬೌಲರ್‌ ಕರ್ಟಿಸ್ ಕ್ಯಾಂಪರ್‌ ಸೃಷ್ಟಿಸಿದ್ದಾರೆ.
ಹೌದು, ಐರ್ಲೆಂಡ್‌ನಲ್ಲಿ ನಡೆಯುತ್ತಿರುವ ಅಂತರ-ಪ್ರಾಂತೀಯ ಟಿ20 ಪಂದ್ಯಾವಳಿಯಲ್ಲಿ, ಕರ್ಟಿಸ್ ಕ್ಯಾಂಪರ್‌ ಸತತ 5 ಎಸೆತಗಳಲ್ಲಿ 5 ವಿಕೆಟ್‌ಗಳನ್ನು ಕಬಳಿಸುವ ಮೂಲಕ ಕ್ರಿಕೆಟ್ ಇತಿಹಾಸದಲ್ಲಿ ಹೊಸ ದಾಖಲೆ ಬರೆದಿದ್ದಾರೆ. ಈ ಸಾಧನೆಯ ಮೂಲಕ ವೃತ್ತಿಪರ ಕ್ರಿಕೆಟ್‌ನಲ್ಲಿ ಈ ದಾಖಲೆಯನ್ನು ಮಾಡಿದ ಮೊದಲ ಬೌಲರ್‌ ಎಂಬ ಹೆಗ್ಗಳಿಕೆಗೆ ಅವರು ಪಾತ್ರರಾಗಿದ್ದಾರೆ.
ಮಾನ್‌ಸ್ಟರ್ ರೆಡ್ಸ್‌ ಮತ್ತು ನಾರ್ತ್‌ ವೆಸ್ಟ್‌ ವಾರಿಯರ್ಸ್‌ ತಂಡಗಳ ನಡುವಿನ ಪಂದ್ಯದಲ್ಲಿ ಕರ್ಟಿಸ್ ಕ್ಯಾಂಪರ್‌ ಈ ಸಾಧನೆ ಮಾಡಿದರು. ಮಾನ್‌ಸ್ಟರ್ ರೆಡ್ಸ್‌ ತಂಡ ಮೊದಲು ಬ್ಯಾಟಿಂಗ್‌ ಮಾಡಿ, 20 ಓವರ್‌ಗಳಲ್ಲಿ 188 ರನ್‌ ಗಳಿಸಿತು. 189 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ವಾರಿಯರ್ಸ್‌ ತಂಡ, 11 ಓವರ್‌ಗಳಲ್ಲಿ 5 ವಿಕೆಟ್ ಕಳೆದುಕೊಂಡಿತು. ಈ ಸಂದರ್ಭದಲ್ಲಿ ಕರ್ಟಿಸ್ ಕ್ಯಾಂಪರ್‌ ತಮ್ಮ 2ನೇ ಓವರ್‌ನ ಕೊನೆಯ ಎರಡು ಎಸೆತಗಳಲ್ಲಿ 2 ವಿಕೆಟ್‌ಗಳನ್ನು ಪಡೆದರು. ನಂತರ, 14ನೇ ಓವರ್‌ನ ಮೊದಲ ಮೂರು ಎಸೆತಗಳಲ್ಲಿ 3 ವಿಕೆಟ್‌ಗಳನ್ನು ಕಬಳಿಸಿ, ಸತತ 5 ಎಸೆತಗಳಲ್ಲಿ 5 ವಿಕೆಟ್ ಗಳಿಸಿದರು. ಈ ಅಪೂರ್ವ ಸಾಧನೆಯಿಂದಾಗಿ, ಮಾನ್‌ಸ್ಟರ್ ರೆಡ್ಸ್‌ ತಂಡ 100 ರನ್‌ಗಳ ಭಾರಿ ಅಂತರದಿಂದ ಜಯಗಳಿಸಿತು.
ಈ ದಾಖಲೆಯು ಕ್ರಿಕೆಟ್ ಅಭಿಮಾನಿಗಳಿಗೆ ಮಾತ್ರವಲ್ಲ, ಸಣ್ಣ ತಂಡಗಳ ಆಟಗಾರರಿಗೂ ದೊಡ್ಡ ಸಾಧನೆ ಮಾಡಲು ಸಾಧ್ಯ ಎಂಬುದನ್ನು ತೋರಿಸಿದೆ. ಕರ್ಟಿಸ್ ಕ್ಯಾಂಪರ್‌ರ ಈ ಸಾಧನೆ ಕ್ರಿಕೆಟ್ ಇತಿಹಾಸದಲ್ಲಿ ಚಿರಸ್ಥಾಯಿಯಾಗಿ ಉಳಿಯಲಿದೆ.
