ತಂದೆಗಾಗಿ ಸ್ಟಾಂಡಪ್ ಕಾಮಿಡಿ ಶೋಗೆ ಟಿಕೆಟ್ ಖರೀದಿಸಿ ಸೀಟು ಖಾಲಿ ಇಟ್ಟ ಭಾರತೀಯ ಯುವತಿ: ವಿಡಿಯೋ ವೈರಲ್

ಹೆತ್ತವರ ಪ್ರೀತಿಯ ಎದುರಿಗೆ ಯಾವ ಕಷ್ಟವೂ ದೊಡ್ಡದಲ್ಲ. ತಮ್ಮ ಮಕ್ಕಳ ಸಂತೋಷಕ್ಕಾಗಿ ತಂದೆ-ತಾಯಿಯರು ತಮ್ಮ ಜೀವನವನ್ನೇ ಮುಡಿಪಾಗಿಡುತ್ತಾರೆ. ಆದರೆ, ಭಾರತದ ರಿತಿಕಾ ಎಂಬ ಯುವತಿಯೊಬ್ಬಳು ತನ್ನ ಇಹಲೋಕ ತ್ಯಜಿಸಿದ ತಂದೆಗಾಗಿ ಮಾಡಿದ ಕೆಲಸ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ರಿತಿಕಾ ತನ್ನ ತಂದೆಗಾಗಿ ಸ್ಟಾಂಡಪ್ ಕಾಮಿಡಿ ಶೋಗೆ ಟಿಕೆಟ್ ಖರೀದಿಸಿ, ಆ ಸೀಟನ್ನು ಖಾಲಿಯಾಗಿಟ್ಟಿದ್ದಾಳೆ, ಇದು ಶೋನಲ್ಲಿ ಭಾಗವಹಿಸಿದವರಿಗೆ ಭಾವುಕ ಕ್ಷಣಕ್ಕೆ ಸಾಕ್ಷಿಯಾಯಿತು.

ಹೌದು, @itsmeurstruly ಎಂಬ ಎಕ್ಸ್ ಖಾತೆಯಲ್ಲಿ ಶೇರ್ ಆಗಿರುವ ವಿಡಿಯೋದಲ್ಲಿ, ಈ ಘಟನೆಯನ್ನು “ತುಂಬಾ ಸೂಕ್ಷ್ಮವಾದ ವಿಚಾರವನ್ನು ಸರಾಗವಾಗಿ ಮತ್ತು ಅದ್ಭುತವಾಗಿ ನಿರ್ವಹಿಸಲಾಗಿದೆ” ಎಂದು ಶೀರ್ಷಿಕೆಯಲ್ಲಿ ಬರೆಯಲಾಗಿದೆ. ವಿಡಿಯೋದಲ್ಲಿ, ಸ್ಟಾಂಡಪ್ ಕಾಮಿಡಿಯನ್ ವೇದಿಕೆಯಲ್ಲಿ ಮಾತನಾಡುತ್ತಿರುವಾಗ ರಿತಿಕಾ ಓಡಿಬಂದು ಖಾಲಿ ಸೀಟಿನ ಬಳಿ ಕುಳಿತಿದ್ದಾಳೆ. ಕಾಮಿಡಿಯನ್, “ಆ ಸೀಟ್ ಖಾಲಿಯಿಲ್ಲ” ಎಂದು ತಮಾಷೆಯಾಗಿ ಹೇಳಿದಾಗ, ರಿತಿಕಾ, “ಕಳೆದ ವರ್ಷ ನಾನು ನನ್ನ ತಂದೆಯನ್ನು ಕಳೆದುಕೊಂಡೆ, ಈ ಸೀಟ್ ಅವರಿಗಾಗಿ ಇಟ್ಟಿದ್ದೇನೆ” ಎಂದು ಭಾವುಕವಾಗಿ ಉತ್ತರಿಸಿದ್ದಾಳೆ. ಇದನ್ನು ಕೇಳಿದ ಪ್ರೇಕ್ಷಕರು ಜೋರಾಗಿ ಚಪ್ಪಾಳೆ ತಟ್ಟಿ ಆಕೆಯ ಭಾವನೆಗೆ ಸಾಥ್ ನೀಡಿದ್ದಾರೆ.

Such a sensitive topic and bro handled it so smoothly, much respect! 👏👏 ❤️ pic.twitter.com/4cdM6ugBPk

— Wholesome Side of 𝕏 (@itsme_urstruly) June 15, 2025

ಕಾಮಿಡಿಯನ್ ರಿತಿಕಾಳನ್ನು “ನಿಮ್ಮ ಹೆಸರು ಏನು, ಎಲ್ಲಿಂದ ಬಂದಿದ್ದೀರಿ?” ಎಂದು ಕೇಳಿದಾಗ, “ನನ್ನ ಹೆಸರು ರಿತಿಕಾ, ನಾನು ಭಾರತದಿಂದ ಬಂದಿದ್ದೇನೆ” ಎಂದು ಆಕೆ ಉತ್ತರಿಸಿದ್ದಾಳೆ. ಇದಕ್ಕೆ ಕಾಮಿಡಿಯನ್, “ನಿಮ್ಮನ್ನು ಭೇಟಿಯಾದದ್ದು ಖುಷಿಯಾಯಿತು” ಎಂದು ಹೇಳಿ, ಈ ಭಾವುಕ ಕ್ಷಣವನ್ನು ತಮಾಷೆಯ ರೀತಿಯಲ್ಲಿ ಮುಂದುವರೆಸಿದ್ದಾರೆ. ಅವರು, “ನಾನು ಐರಾನಿಯನ್, 2015ರಲ್ಲಿ ನಾನೂ ನನ್ನ ತಂದೆಯನ್ನು ಕಳೆದುಕೊಂಡೆ. ಆದರೆ ನಾನು ನಿಮ್ಮಂತೆ ಟಿಕೆಟ್ ಖರೀದಿಸಿ ಸೀಟು ಖಾಲಿಯಿಡಲಿಲ್ಲ. ಯಾಕೆಂದರೆ, ನನ್ನ ತಂದೆ ಖಂಡಿತವಾಗಿ ಸಂತೋಷವಾಗಿರಲಿಲ್ಲ. ‘ನೀನು ಯಾಕೆ ಹಣವನ್ನು ವ್ಯರ್ಥ ಮಾಡುತ್ತೀಯ?’ ಎಂದು ಕೇಳುತ್ತಿದ್ದರು” ಎಂದು ಹಾಸ್ಯದಿಂದ ಎಲ್ಲರನ್ನೂ ನಗೆಗಡಲಿನಲ್ಲಿ ತೇಲಿಸಿದ್ದಾರೆ.

ಮುಂದುವರೆದ ಕಾಮಿಡಿಯನ್, “ನನ್ನ ತಂದೆ ಸ್ವರ್ಗದಲ್ಲಿ ಒಂದು ಒಳ್ಳೆಯ ಮನೆಯಲ್ಲಿ ಇದ್ದಾರೆ. ಆದರೆ ಅವರು, ‘ನಾನು ನಿನಗೆ ಏನೆಂದು ಕಲಿಸಿದ್ದೆ? ಈ ಸೀಟಿಗಾಗಿ ಯಾಕೆ ಹಣ ವ್ಯರ್ಥ ಮಾಡಿದೆ?’ ಎಂದು ಕೇಳುತ್ತಾರೆ” ಎಂದು ಹೇಳಿ, ಪ್ರೇಕ್ಷಕರನ್ನು ಮತ್ತಷ್ಟು ನಗಿಸಿದ್ದಾರೆ. “ನಿಮ್ಮ ತಂದೆಯ ಆತ್ಮ ನಗುತ್ತಿರುವುದನ್ನು ಕೇಳಿದೆ. ಅವರು ಹೇಳಿದ್ದಾರೆ, ‘ನಾನು ಯಾರಿಗೂ ತಲೆಕೆಡಿಸಿಕೊಳ್ಳುವುದಿಲ್ಲ, ನನ್ನ ಮಗಳ ಪಕ್ಕದಲ್ಲಿ ಕುಳಿತು ಈ ಶೋ ನೋಡುತ್ತೇನೆ, ಸ್ವರ್ಗದಿಂದ ಸಿಹಿ ಮುತ್ತೊಂದನ್ನು ಕಳುಹಿಸುತ್ತೇನೆ’” ಎಂದು ಕಾಮಿಡಿಯನ್ ಭಾವುಕವಾಗಿ ಹೇಳಿದ್ದಾರೆ.

ಈ ವಿಡಿಯೋ 3.4 ಮಿಲಿಯನ್‌ಗಿಂತಲೂ ಹೆಚ್ಚು ವೀಕ್ಷಣೆಗಳನ್ನು ಪಡೆದುಕೊಂಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಬಳಕೆದಾರರು, “ಇದು ಅದ್ಭುತವಾದ ಕಾಮಿಡಿ, ಸೂಕ್ಷ್ಮ ವಿಷಯವನ್ನು ತುಂಬಾ ಚೆನ್ನಾಗಿ ನಿರ್ವಹಿಸಿದ್ದಾರೆ” ಎಂದು ಕಾಮೆಂಟ್ ಮಾಡಿದ್ದಾರೆ. ಮತ್ತೊಬ್ಬರು, “ಕಾಮಿಡಿಯನ್ ಮ್ಯಾಕ್ಸ್ ಒಬ್ಬ ಅದ್ಭುತ ಕಲಾವಿದ” ಎಂದು ಶ್ಲಾಘಿಸಿದ್ದಾರೆ.