ಕೇವಲ 14 ವರ್ಷಕ್ಕೆ ಐಪಿಎಲ್ ಟೂರ್ನಿಯಲ್ಲಿ ಡೆಬ್ಯೂ ಮಾಡಿ ಕ್ರಿಕೆಟ್ ಜಗತ್ತಿನ ಸೆನ್ಸೇಷನ್ ಆಗಿರುವ ವೈಭವ್ ಸೂರ್ಯವಂಶಿ, ಒಂದೇ ಇನ್ನಿಂಗ್ಸ್ನಲ್ಲಿ ಸೂಪರ್ಸ್ಟಾರ್ ಸ್ಥಾನಕ್ಕೇರಿದ್ದಾನೆ. ಆದರೆ ಈ ಖ್ಯಾತಿಯ ಹಿಂದೆ ಕಠಿಣ ಶ್ರಮ, ತಂದೆಯ ತ್ಯಾಗ ಮತ್ತು ವೈಭವ್ನ ಅಸಾಧಾರಣ ಸಮರ್ಪಣೆಯ ಕತೆಯಿದೆ.
ವೈಭವ್ ಸೂರ್ಯವಂಶಿ, ಭಾರತೀಯ ಕ್ರಿಕೆಟ್ನ ರೈಸಿಂಗ್ ಸ್ಟಾರ್. ಕೇವಲ 14 ವರ್ಷದಲ್ಲಿ ಐಪಿಎಲ್ನಲ್ಲಿ ಡೆಬ್ಯೂ ಮಾಡಿ ಇತಿಹಾಸ ಸೃಷ್ಟಿಸಿದ ಈ ಬಾಲಕ, ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧದ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ಸೋತರೂ ತನ್ನ ಬ್ಯಾಟಿಂಗ್ನಿಂದ ಎಲ್ಲರ ಗಮನ ಸೆಳೆದ. ಮೊದಲ ಎಸೆತದಲ್ಲೇ ಸಿಕ್ಸರ್ ಸಿಡಿಸಿ, ಸ್ಟಾರ್ ಬೌಲರ್ಗಳನ್ನು ಧೀರವಾಗಿ ಎದುರಿಸಿದ ವೈಭವ್ನ ಆಕ್ರಮಣಕಾರಿ ಆಟ, ಅನುಭವಿ ಆಟಗಾರನ ನೆನಪಿಸಿತು. ಈತನ ಆಟ, “ವಯಸ್ಸು ಕೇವಲ ಸಂಖ್ಯೆ” ಎಂಬುದನ್ನು ಸಾರಿ ಹೇಳಿತು.
ಗೂಗಲ್ ಸಿಇಒ ಸುಂದರ್ ಪಿಚೈಯಿಂದ ಹಿಡಿದು ಹಳ್ಳಿಯ ಕ್ರಿಕೆಟ್ ಅಭಿಮಾನಿಗಳವರೆಗೆ ವೈಭವ್ನ ಹೆಸರು ಎಲ್ಲೆಡೆ ಕೇಳಿಬರುತ್ತಿದೆ. ಕ್ರಿಕೆಟ್ ದಿಗ್ಗಜರು ಈತನ ಆಟಕ್ಕೆ ಫಿದಾ ಆಗಿದ್ದಾರೆ. ಆದರೆ ಈ ಯಶಸ್ಸು ಸುಲಭವಾಗಿ ಬಂದಿಲ್ಲ. ಇದರ ಹಿಂದೆ ವೈಭವ್ನ ಶ್ರಮ, ತಂದೆಯ ತ್ಯಾಗ ಮತ್ತು ಕುಟುಂಬದ ಬೆಂಬಲವಿದೆ.
ವಿಶ್ವ ಕ್ರಿಕೆಟ್ನಲ್ಲಿ ಯಶಸ್ಸಿಗಾಗಿ ಹಲವು ಆಟಗಾರರು ತಮ್ಮ ನೆಚ್ಚಿನ ಆಹಾರವನ್ನು ತ್ಯಜಿಸಿದ್ದಾರೆ. ಆದರೆ 14 ವರ್ಷದ ಬಾಲಕನಿಗೆ ತನ್ನ ಇಷ್ಟದ ಆಹಾರವನ್ನು ಬಿಡುವುದು ಸುಲಭವೇ? ವೈಭವ್ಗೆ ಪಿಜ್ಜಾ ಮತ್ತು ಮಟನ್ ಎಂದರೆ ಪ್ರಾಣ. ಆದರೆ ಕ್ರಿಕೆಟ್ನಲ್ಲಿ ಯಶಸ್ಸು ಸಾಧಿಸುವ ಕನಸಿನ ಮುಂದೆ ಈತ ಜಂಕ್ ಫುಡ್ ಮತ್ತು ನಾನ್-ವೆಜ್ ಆಹಾರವನ್ನು ಸಂಪೂರ್ಣವಾಗಿ ತ್ಯಜಿಸಿದ. ಫಿಟ್ನೆಸ್ಗೆ ಗಮನ ಕೊಟ್ಟ ವೈಭವ್, ಐಪಿಎಲ್ಗಾಗಿ ತೀವ್ರ ಕಸರತ್ತು ನಡೆಸಿದ. ರಾಜಸ್ಥಾನ್ ರಾಯಲ್ಸ್ನ ನೆಟ್ ಸೆಷನ್ಗಳಲ್ಲಿ ಜೋಫ್ರಾ ಆರ್ಚರ್ನಂತಹ ಸ್ಟಾರ್ ಬೌಲರ್ಗಳ ದಾಳಿಯನ್ನು ಚಿಂದಿ ಉಡಾಯಿಸಿ ಎಲ್ಲರ ಗಮನ ಸೆಳೆದ.
ವೈಭವ್ನ ಸ್ಫೋಟಕ ಬ್ಯಾಟಿಂಗ್ಗೆ ರಾಜಸ್ಥಾನ್ ರಾಯಲ್ಸ್ನ ಹೆಡ್ ಕೋಚ್ ರಾಹುಲ್ ದ್ರಾವಿಡ್ರ ಮಾರ್ಗದರ್ಶನ ಮುಖ್ಯ ಕಾರಣ. ಹರಾಜಿನಲ್ಲಿ ವೈಭವ್ನನ್ನು ಖರೀದಿಸಿದ ಬಳಿಕ ದ್ರಾವಿಡ್ ಈತನ ಮೇಲೆ ವಿಶೇಷ ಗಮನ ಹರಿಸಿದರು. ನೆಟ್ ಸೆಷನ್ಗಳಲ್ಲಿ 4 ಓವರ್ಗಳಲ್ಲಿ 40 ಅಥವಾ 60 ರನ್ಗಳಂತಹ ಗುರಿಗಳನ್ನು ನೀಡಿ, ಆ ಗುರಿಗಳನ್ನು ಸಾಧಿಸುವಂತೆ ತರಬೇತಿ ನೀಡಿದರು. ಡೆಬ್ಯೂ ಪಂದ್ಯದಲ್ಲಿ ವೈಭವ್ನ ಆಕ್ರಮಣಕಾರಿ ಆಟಕ್ಕೆ ಈ ತರಬೇತಿಯೇ ದಾರಿದೀಪವಾಯಿತು.
ವೈಭವ್ಗೆ ತಂದೆ ಸಂಜೀವ್ ಸೂರ್ಯವಂಶಿಯೇ ಮೊದಲ ಗುರು. ಮಗನ ಕ್ರಿಕೆಟ್ ಉತ್ಸಾಹವನ್ನು ಗುರುತಿಸಿದ ಸಂಜೀವ್, ವೈಭವ್ ಕೇವಲ 5 ವರ್ಷದವನಿದ್ದಾಗ ಮನೆಯ ಬಳಿ ನೆಟ್ಸ್ ತಯಾರಿಸಿ ಅಭ್ಯಾಸಕ್ಕೆ ಸಹಕರಿಸಿದರು. ಕೃಷಿಕರಾದ ಸಂಜೀವ್, ಮಗನ ಕನಸಿಗಾಗಿ ತಮ್ಮ ಕೃಷಿ ಭೂಮಿಯನ್ನೇ ಮಾರಾಟ ಮಾಡಿದರು. 9ನೇ ವಯಸ್ಸಿನಲ್ಲಿ ವೈಭವ್ನನ್ನು ಸಮಸ್ತಿಪುರದ ಕ್ರಿಕೆಟ್ ಅಕಾಡೆಮಿಗೆ ಸೇರಿಸಿದರು. ಬಿಹಾರದ ಮಾಜಿ ಕ್ರಿಕೆಟಿಗ ಮನೀಷ್ ಓಜಾ ಬಳಿ ಕೋಚಿಂಗ್ ಪಡೆದ ವೈಭವ್, ತಂದೆಯ ತ್ಯಾಗಕ್ಕೆ ತಕ್ಕಂತೆ ಪ್ರತಿ ಅವಕಾಶದಲ್ಲೂ ತನ್ನ ಸಾಮರ್ಥ್ಯವನ್ನು ಸಾಬೀತುಪಡಿಸಿದ.
ಯಶಸ್ಸಿನ ದಾರಿಯಲ್ಲಿ ವೈಭವ್ಗೆ ವಯಸ್ಸಿನ ಕುರಿತಾದ ಆರೋಪಗಳೂ ಎದುರಾದವು. ಆದರೆ, ಬಿಸಿಸಿಐ ನಿಯಮದಂತೆ ಬೋನ್ ಟೆಸ್ಟ್ಗೆ ಒಳಗಾಗಿ ತಾನು ಯಾವುದೇ ತಪ್ಪು ಮಾಡಿಲ್ಲ ಎಂದು ಸಾಬೀತುಪಡಿಸಿದ. ಈ ಘಟನೆ ವೈಭವ್ನ ಧೈರ್ಯ ಮತ್ತು ಪಾರದರ್ಶಕತೆಯನ್ನು ತೋರಿಸಿತು.
ಚಿಕ್ಕ ವಯಸ್ಸಿನಲ್ಲೇ ಯಶಸ್ಸಿನ ಮೆಟ್ಟಿಲೇರುತ್ತಿರುವ ವೈಭವ್ಗೆ, ಕಠಿಣ ಪರಿಶ್ರಮಕ್ಕೆ ತಕ್ಕ ಪ್ರತಿಫಲ ಸಿಗುತ್ತಿದೆ. ಆದರೆ ಯಶಸ್ಸಿನ ಅಮಲು ತಲೆಗೇರದೆ, ಸರಿಯಾದ ದಾರಿಯಲ್ಲಿ ಮುನ್ನಡೆಯಲಿ ಎಂಬುದು ಕ್ರಿಕೆಟ್ ಅಭಿಮಾನಿಗಳ ಆಶಯ. ವೈಭವ್ ಸೂರ್ಯವಂಶಿಯ ಕತೆ, ಕನಸುಗಳಿಗಾಗಿ ತ್ಯಾಗ ಮಾಡುವ, ಶ್ರಮಿಸುವ ಮತ್ತು ಗುರಿ ಸಾಧಿಸುವ ಒಂದು ಸ್ಫೂರ್ತಿದಾಯಕ ಉದಾಹರಣೆಯಾಗಿದೆ.
