ಕರ್ನಾಟಕದ ಬಹುನಿರೀಕ್ಷಿತ ಬೆಂಗಳೂರು-ಮಂಗಳೂರು ವಂದೇ ಭಾರತ್ ಎಕ್ಸ್ಪ್ರೆಸ್ ಸಂಚಾರಕ್ಕೆ ಮತ್ತೊಂದು ಮಹತ್ವದ ಹೆಜ್ಜೆ ಇಡಲಾಗಿದೆ. ಯಶವಂತಪುರ ಮತ್ತು ಮಂಗಳೂರು ಸೆಂಟ್ರಲ್ ನಡುವೆ ವಂದೇ ಭಾರತ್ ರೈಲಿನ ಖಾಲಿ ರೇಕ್ನ ಪ್ರಾಯೋಗಿಕ ಸಂಚಾರವನ್ನು ಸೆಪ್ಟೆಂಬರ್ 5ರಂದು ನಡೆಸಲು ಭಾರತೀಯ ರೈಲ್ವೆ ಮುಂದಾಗಿದೆ. ರೈಲಿನ ಸಂಚಾರ ಸಮಯ, ಮಾರ್ಗದ ಕಾರ್ಯಸಾಧ್ಯತೆ ಹಾಗೂ ಘಾಟ್ ಪ್ರದೇಶದಲ್ಲಿನ ಕಾರ್ಯಕ್ಷಮತೆಯನ್ನು ಪರಿಶೀಲಿಸುವುದು ಈ ಟ್ರಯಲ್ ರನ್ನ ಪ್ರಮುಖ ಉದ್ದೇಶವಾಗಿದೆ.
ಪ್ರಸ್ತಾವಿತ ವೇಳಾಪಟ್ಟಿಯ ಪ್ರಕಾರ, 16 ಬೋಗಿಗಳ ವಂದೇ ಭಾರತ್ ರೇಕ್ ಯಶವಂತಪುರ ಜಂಕ್ಷನ್ನಿಂದ ಬೆಳಗ್ಗೆ 6.05ಕ್ಕೆ ಹೊರಡಲಿದೆ. ಬೆಳಗ್ಗೆ 9 ಗಂಟೆಗೆ ಹಾಸನ ತಲುಪಿ, ಐದು ನಿಮಿಷಗಳ ಬಳಿಕ 9.05ಕ್ಕೆ ಅಲ್ಲಿಂದ ನಿರ್ಗಮಿಸಲಿದೆ. ಬಳಿಕ 9.55ಕ್ಕೆ ಸಕಲೇಶಪುರ ತಲುಪಿ, 10 ಗಂಟೆಗೆ ಮುಂದುವರಿಯಲಿದೆ.
ಘಾಟ್ ಪ್ರದೇಶವನ್ನು ದಾಟಿ ಸುಬ್ರಹ್ಮಣ್ಯ ರೋಡ್ಗೆ ಮಧ್ಯಾಹ್ನ 12.30ಕ್ಕೆ ತಲುಪುವ ರೈಲು, ಐದು ನಿಮಿಷಗಳ ನಿಲುಗಡೆಯ ಬಳಿಕ 12.35ಕ್ಕೆ ಮಂಗಳೂರಿನತ್ತ ಪ್ರಯಾಣ ಮುಂದುವರಿಸಲಿದೆ. ಮಧ್ಯಾಹ್ನ 2.25ಕ್ಕೆ ಮಂಗಳೂರು ಸೆಂಟ್ರಲ್ ತಲುಪುವ ನಿರೀಕ್ಷೆ ಇದೆ.
ಮಂಗಳೂರಿನಿಂದ ಮಧ್ಯಾಹ್ನ 3ಕ್ಕೆ ವಾಪಸ್
ಮಂಗಳೂರು ಸೆಂಟ್ರಲ್ನಿಂದ ಮಧ್ಯಾಹ್ನ 3 ಗಂಟೆಗೆ ರೈಲು ವಾಪಸ್ ಹೊರಡಲಿದೆ. ಸಂಜೆ 4.30ಕ್ಕೆ ಸುಬ್ರಹ್ಮಣ್ಯ ರೋಡ್ ತಲುಪಿ 4.35ಕ್ಕೆ ಹೊರಡಲಿದೆ. ಬಳಿಕ ಸಂಜೆ 6.30ಕ್ಕೆ ಸಕಲೇಶಪುರ ತಲುಪಿ, 6.35ಕ್ಕೆ ಪ್ರಯಾಣ ಮುಂದುವರಿಸಲಿದೆ.
ಹಾಸನಕ್ಕೆ ರಾತ್ರಿ 7.20ಕ್ಕೆ ಆಗಮಿಸಿ, 7.30ಕ್ಕೆ ಅಲ್ಲಿಂದ ಹೊರಡುವ ರೈಲು ರಾತ್ರಿ 11 ಗಂಟೆಗೆ ಯಶವಂತಪುರ ತಲುಪುವ ತಾತ್ಕಾಲಿಕ ವೇಳಾಪಟ್ಟಿ ರೂಪಿಸಲಾಗಿದೆ. ಈ ಸಮಯಗಳು ಕೇವಲ ಪ್ರಾಯೋಗಿಕ ಸಂಚಾರಕ್ಕಾಗಿ ನಿಗದಿಪಡಿಸಲಾಗಿದ್ದು, ಸಾಮಾನ್ಯ ಪ್ರಯಾಣಿಕರ ಸಂಚಾರದ ಅಂತಿಮ ವೇಳಾಪಟ್ಟಿಯಲ್ಲ.
ಘಾಟ್ ಮಾರ್ಗವೇ ದೊಡ್ಡ ಸವಾಲು
ಬೆಂಗಳೂರು-ಮಂಗಳೂರು ಮಾರ್ಗದಲ್ಲಿ ಸಕಲೇಶಪುರ-ಸುಬ್ರಹ್ಮಣ್ಯ ರೋಡ್ ನಡುವಿನ ಪಶ್ಚಿಮ ಘಟ್ಟ ಪ್ರದೇಶ ಅತ್ಯಂತ ಸವಾಲಿನ ರೈಲು ಮಾರ್ಗವಾಗಿದೆ. ತೀವ್ರ ಇಳಿಜಾರು, ತಿರುವುಗಳು, ಸುರಂಗಗಳು ಮತ್ತು ಸೇತುವೆಗಳನ್ನು ಹೊಂದಿರುವ ಈ ಮಾರ್ಗದಲ್ಲಿ ರೈಲಿನ ಸುರಕ್ಷಿತ ಸಂಚಾರವನ್ನು ಖಚಿತಪಡಿಸಿಕೊಳ್ಳುವುದು ರೈಲ್ವೆಗೆ ಪ್ರಮುಖ ಸವಾಲಾಗಿದೆ. ಈ ಕಾರಣದಿಂದ ವಂದೇ ಭಾರತ್ ರೈಲಿಗೆ ವಿಶೇಷ ಸುರಕ್ಷತಾ ವ್ಯವಸ್ಥೆಗಳ ಅಗತ್ಯ ಎದುರಾಗಿದೆ.
AEB ವ್ಯವಸ್ಥೆಯ ಮಹತ್ವ
ಘಾಟ್ ಪ್ರದೇಶದಲ್ಲಿ ರೈಲಿನ ವೇಗ ಮತ್ತು ಬ್ರೇಕಿಂಗ್ ನಿಯಂತ್ರಣಕ್ಕೆ ಆಟೋಮ್ಯಾಟಿಕ್ ಎಮರ್ಜೆನ್ಸಿ ಬ್ರೇಕಿಂಗ್ (AEB) ವ್ಯವಸ್ಥೆ ಹೊಂದಿರುವ ವಿಶೇಷ ವಂದೇ ಭಾರತ್ ರೇಕ್ ಬಳಸಲಾಗುತ್ತಿದೆ. ಆಗಸ್ಟ್ನಲ್ಲಿ ಸಕಲೇಶಪುರ-ಸುಬ್ರಹ್ಮಣ್ಯ ರೋಡ್ ವಿಭಾಗದಲ್ಲಿ AEB ಹೊಂದಿರುವ ವಂದೇ ಭಾರತ್ ರೇಕ್ನ ಕ್ಷೇತ್ರ ಪ್ರಯೋಗವನ್ನು ನಡೆಸಲಾಗಿತ್ತು. ಈ ಪರೀಕ್ಷೆಯಲ್ಲಿ ರೈಲಿನ ಬ್ರೇಕಿಂಗ್, ವೇಗ, ಸ್ಥಿರತೆ ಮತ್ತು ಸುರಕ್ಷತಾ ಮಾನದಂಡಗಳನ್ನು ಪರಿಶೀಲಿಸಲಾಗಿತ್ತು.
ಈಗ ಯಶವಂತಪುರ-ಮಂಗಳೂರು ನಡುವಿನ ಸಂಪೂರ್ಣ ಮಾರ್ಗದಲ್ಲಿ ನಡೆಯಲಿರುವ ಸೆಪ್ಟೆಂಬರ್ 5ರ ಪ್ರಾಯೋಗಿಕ ಸಂಚಾರವು ಸೇವೆ ಆರಂಭಿಸುವ ನಿಟ್ಟಿನಲ್ಲಿ ಮತ್ತೊಂದು ಪ್ರಮುಖ ಹಂತವಾಗಿದೆ. ಟ್ರಯಲ್ ರನ್ ಯಶಸ್ವಿಯಾಗಿ ಪೂರ್ಣಗೊಂಡ ಬಳಿಕ ಅಗತ್ಯ ತಾಂತ್ರಿಕ ಪರಿಶೀಲನೆ ಮತ್ತು ಅನುಮೋದನೆಗಳ ಆಧಾರದ ಮೇಲೆ ವಾಣಿಜ್ಯ ಸಂಚಾರದ ಕುರಿತು ಅಂತಿಮ ನಿರ್ಧಾರ ಕೈಗೊಳ್ಳುವ ಸಾಧ್ಯತೆ ಇದೆ.
