ಚೆನ್ನೈ: ಚೆನ್ನೈ ಸೂಪರ್‌ ಕಿಂಗ್ಸ್‌ (CSK) ಹಾಗೂ ದಿಗ್ಗಜ ಕ್ರಿಕೆಟಿಗ ಮಹೇಂದ್ರ ಸಿಂಗ್‌ ಧೋನಿ ನಡುವಿನ ಸಂಬಂಧದಲ್ಲಿ ಬಿರುಕು ಮೂಡಿದೆಯೇ ಎಂಬ ಚರ್ಚೆ ಇದೀಗ ಜೋರಾಗಿದೆ. ಫ್ರಾಂಚೈಸಿಯಲ್ಲಿ ಪಾಲು ಖರೀದಿಸುವ ಧೋನಿ ಅವರ ಪ್ರಯತ್ನಕ್ಕೆ ಆಡಳಿತ ಮಂಡಳಿ ಒಪ್ಪಿಗೆ ನೀಡದಿರುವುದು ಈ ಬೆಳವಣಿಗೆಗೆ ಕಾರಣ ಎನ್ನಲಾಗುತ್ತಿದೆ. ಹೀಗಾಗಿ ಮುಂದಿನ ದಿನಗಳಲ್ಲಿ ಧೋನಿ ಸಿಎಸ್‌ಕೆಯಿಂದ ದೂರವಾಗಲಿದ್ದಾರಾ ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಮೂಡಿದೆ.
2008ರಲ್ಲಿ ನಡೆದ ಮೊದಲ ಐಪಿಎಲ್‌ ಆವೃತ್ತಿಯಿಂದಲೂ ಧೋನಿ ಸಿಎಸ್‌ಕೆ ತಂಡದ ಪ್ರಮುಖ ಭಾಗವಾಗಿದ್ದಾರೆ. 2007ರ ಟಿ20 ವಿಶ್ವಕಪ್‌ ಗೆಲುವಿನ ಬಳಿಕ ನಡೆದ ಹರಾಜಿನಲ್ಲಿ ಅವರು ಸುಮಾರು ₹6 ಕೋಟಿಗೆ ಚೆನ್ನೈ ಫ್ರಾಂಚೈಸಿ ಪಾಲಾಗಿದ್ದರು. ಬಳಿಕ ತಂಡದ ನಾಯಕನಾಗಿ ಸಿಎಸ್‌ಕೆಗೆ ಹಲವು ಯಶಸ್ಸುಗಳನ್ನು ತಂದುಕೊಟ್ಟ ಧೋನಿ, ಫ್ರಾಂಚೈಸಿಯೊಂದಿಗಿನ ಅವಿಭಾಜ್ಯ ಸಂಬಂಧದಿಂದಲೇ ‘ಥಲಾ’ ಎಂಬ ಪ್ರೀತಿಯ ಬಿರುದು ಪಡೆದಿದ್ದಾರೆ.
ತಮ್ಮ ಕ್ರಿಕೆಟ್‌ ವೃತ್ತಿಜೀವನದ ಅಂತ್ಯದ ಹಂತದಲ್ಲಿರುವ ಧೋನಿ, ಸಿಎಸ್‌ಕೆ ಫ್ರಾಂಚೈಸಿಯಲ್ಲಿ ಪಾಲು ಖರೀದಿಸುವ ಮೂಲಕ ತಮ್ಮ ಸಂಬಂಧವನ್ನು ಮತ್ತಷ್ಟು ಗಟ್ಟಿಗೊಳಿಸಲು ಆಸಕ್ತಿ ಹೊಂದಿದ್ದರು ಎನ್ನಲಾಗಿದೆ. ಆದರೆ ಪಾಲಿನ ಪ್ರಮಾಣದ ವಿಚಾರದಲ್ಲಿ ಧೋನಿ ಹಾಗೂ ಆಡಳಿತ ಮಂಡಳಿ ನಡುವೆ ಒಮ್ಮತ ಮೂಡಲಿಲ್ಲ ಎಂಬ ಮಾತುಗಳು ಕೇಳಿಬರುತ್ತಿವೆ.
ಮೂಲಗಳ ಪ್ರಕಾರ, ಧೋನಿ ಆರಂಭದಲ್ಲಿ ಫ್ರಾಂಚೈಸಿಯ ಶೇ.25ರಷ್ಟು ಪಾಲನ್ನು ಖರೀದಿಸಲು ಆಸಕ್ತಿ ತೋರಿದ್ದರು. ಆದರೆ ಸಿಎಸ್‌ಕೆ ಆಡಳಿತ ಮಂಡಳಿ ಶೇ.3ರಷ್ಟು ಪಾಲು ನೀಡಲು ಮುಂದಾಗಿತ್ತು ಎನ್ನಲಾಗಿದೆ. ಬಳಿಕ ಧೋನಿ ತಮ್ಮ ಬೇಡಿಕೆಯನ್ನು ಶೇ.20ಕ್ಕೆ ಇಳಿಸಿದರೂ, ಮಂಡಳಿ ಶೇ.4ಕ್ಕೆ ಮಾತ್ರ ಒಪ್ಪಿಕೊಂಡಿತು. ಅಂತಿಮವಾಗಿ ಶೇ.18ರಷ್ಟು ಪಾಲು ಖರೀದಿಸಲು ಧೋನಿ ಮುಂದಾದಾಗ, ಸಿಎಸ್‌ಕೆ ಶೇ.5.5ರಷ್ಟು ಪಾಲಿಗೆ ಮಾತ್ರ ಸಮ್ಮತಿಸಿತು ಎನ್ನಲಾಗುತ್ತಿದೆ. ಹಲವು ಸುತ್ತಿನ ಮಾತುಕತೆ ನಡೆದರೂ ಅಂತಿಮ ಒಪ್ಪಂದಕ್ಕೆ ಬರಲು ಸಾಧ್ಯವಾಗಿಲ್ಲ.
2023ರಲ್ಲಿ ಧೋನಿ ನಾಯಕತ್ವದಲ್ಲಿ ಸಿಎಸ್‌ಕೆ ಐದನೇ ಐಪಿಎಲ್‌ ಪ್ರಶಸ್ತಿ ಗೆದ್ದಿತ್ತು. ಬಳಿಕ ಅವರು ನಿವೃತ್ತಿಯಾಗಬಹುದು ಎಂಬ ನಿರೀಕ್ಷೆ ಇತ್ತು. 2026ರ ಆವೃತ್ತಿಯಲ್ಲಿ ಅನ್‌ಕ್ಯಾಪ್ಡ್‌ ಆಟಗಾರರ ನಿಯಮದಡಿ ಧೋನಿ ತಂಡದಲ್ಲಿದ್ದರೂ, ಒಂದು ಪಂದ್ಯದಲ್ಲೂ ಕಣಕ್ಕಿಳಿಯಲಿಲ್ಲ ಎನ್ನಲಾಗಿದೆ.
ಇದೀಗ 2027ರ ಐಪಿಎಲ್‌ ಆವೃತ್ತಿಗೂ ಮುನ್ನ ಧೋನಿ ಆಟಕ್ಕೆ ವಿದಾಯ ಹೇಳಿ, ಸಿಎಸ್‌ಕೆ ತಂಡದ ಮುಖ್ಯ ಕೋಚ್ ಅಥವಾ ಮಾರ್ಗದರ್ಶಕರಾಗಿ ಹೊಸ ಜವಾಬ್ದಾರಿ ವಹಿಸಿಕೊಳ್ಳಲಿದ್ದಾರೆ ಎಂಬ ಚರ್ಚೆಯೂ ನಡೆಯುತ್ತಿದೆ. ಆದರೆ ಫ್ರಾಂಚೈಸಿಯಲ್ಲಿನ ಪಾಲು ಖರೀದಿ ಮಾತುಕತೆ ವಿಫಲವಾಗಿರುವ ಹಿನ್ನೆಲೆ ಧೋನಿ ಮುಂದಿನ ಹೆಜ್ಜೆ ಏನು ಎಂಬುದು ಕುತೂಹಲ ಮೂಡಿಸಿದೆ.
