ರೈಲು ಪ್ರಯಾಣಿಕರ ಅನುಕೂಲಕ್ಕಾಗಿ ಭಾರತೀಯ ರೈಲ್ವೆ ಇಲಾಖೆ ಮತ್ತೊಂದು ಮಹತ್ವದ ಡಿಜಿಟಲ್ ಸೇವೆಯನ್ನು ಪರಿಚಯಿಸುತ್ತಿದೆ. ಉಚಿತ ಮಿತಿಗಿಂತ ಹೆಚ್ಚಿನ ಲಗೇಜ್ ಸಾಗಿಸುವ ಪ್ರಯಾಣಿಕರಿಗೆ ಅನುಕೂಲವಾಗುವಂತೆ ಜುಲೈ 31ರಿಂದ ಹೊಸ ಆನ್ಲೈನ್ ಲಗೇಜ್ ಬುಕಿಂಗ್ ವ್ಯವಸ್ಥೆ ಜಾರಿಗೆ ಬರಲಿದೆ. ಈ ಮೂಲಕ ರೈಲ್ವೆ ನಿಲ್ದಾಣಗಳ ಲಗೇಜ್ ಬುಕಿಂಗ್ ಕೌಂಟರ್ಗಳಲ್ಲಿ ಗಂಟೆಗಟ್ಟಲೆ ಸಾಲಿನಲ್ಲಿ ನಿಲ್ಲುವ ತೊಂದರೆ ತಪ್ಪಲಿದ್ದು, ಪ್ರಯಾಣಕ್ಕೂ ಮುನ್ನವೇ ಹೆಚ್ಚುವರಿ ಲಗೇಜ್ ಅನ್ನು ಆನ್ಲೈನ್ನಲ್ಲಿ ಕಾಯ್ದಿರಿಸಬಹುದಾಗಿದೆ.
ಇದುವರೆಗೆ ಹೆಚ್ಚುವರಿ ಲಗೇಜ್ ಹೊಂದಿರುವ ಪ್ರಯಾಣಿಕರು ನಿಲ್ದಾಣದಲ್ಲಿರುವ ಪಾರ್ಸೆಲ್ ಅಥವಾ ಲಗೇಜ್ ಕೌಂಟರ್ಗೆ ತೆರಳಿ ಪ್ರತ್ಯೇಕವಾಗಿ ಬುಕ್ಕಿಂಗ್ ಮಾಡಬೇಕಾಗುತ್ತಿತ್ತು. ಸಮಯದ ಅಭಾವ ಅಥವಾ ಮಾಹಿತಿ ಕೊರತೆಯಿಂದ ಹಲವು ಮಂದಿ ಈ ಪ್ರಕ್ರಿಯೆ ಪೂರ್ಣಗೊಳಿಸಲು ಸಾಧ್ಯವಾಗದೆ, ಪ್ರಯಾಣದ ವೇಳೆ ಟಿಕೆಟ್ ತಪಾಸಕರಿಂದ (TTE) ದಂಡವನ್ನು ಪಾವತಿಸುವ ಪರಿಸ್ಥಿತಿ ಎದುರಾಗುತ್ತಿತ್ತು. ಆದರೆ ಹೊಸ ವ್ಯವಸ್ಥೆ ಜಾರಿಯಾದ ಬಳಿಕ, ಪ್ರಯಾಣಕ್ಕೂ ಮುನ್ನವೇ ಹೆಚ್ಚುವರಿ ಲಗೇಜ್ ಅನ್ನು ಆನ್ಲೈನ್ನಲ್ಲಿ ನೋಂದಾಯಿಸಿ ಶುಲ್ಕ ಪಾವತಿಸಬಹುದಾಗಿದೆ.
ರೈಲ್ವೆ ಇಲಾಖೆಯ ಪ್ರಕಾರ, ಈ ಹೊಸ ಸೇವೆಯು ಅನಗತ್ಯ ಪೇಪರ್ವರ್ಕ್ ಕಡಿಮೆ ಮಾಡುವುದರ ಜೊತೆಗೆ ಲಗೇಜ್ ಬುಕ್ಕಿಂಗ್ ಪ್ರಕ್ರಿಯೆಯನ್ನು ಹೆಚ್ಚು ಪಾರದರ್ಶಕ ಮತ್ತು ವೇಗವಾಗಿಸುತ್ತದೆ. ಅಲ್ಲದೆ, ಪ್ರಮುಖ ರೈಲು ನಿಲ್ದಾಣಗಳಲ್ಲಿನ ಜನಸಂದಣಿ ಮತ್ತು ಕೌಂಟರ್ಗಳ ಮೇಲಿನ ಒತ್ತಡವೂ ಕಡಿಮೆಯಾಗಲಿದೆ. ಡಿಜಿಟಲ್ ಸೇವೆಗಳ ವಿಸ್ತರಣೆಯ ಭಾಗವಾಗಿ ಈ ವ್ಯವಸ್ಥೆಯನ್ನು ದೇಶಾದ್ಯಂತ ಹಂತ ಹಂತವಾಗಿ ಜಾರಿಗೆ ತರಲಾಗುತ್ತಿದೆ.
ಪ್ರಯಾಣಿಕರು ತಮ್ಮ ಟಿಕೆಟ್ನ ಕ್ಲಾಸ್ಗೆ ಅನುಗುಣವಾಗಿ ಉಚಿತ ಲಗೇಜ್ ಮಿತಿಯನ್ನು ಬಳಸಿಕೊಳ್ಳಬಹುದು. ಎಸಿ ಫಸ್ಟ್ ಕ್ಲಾಸ್ ಪ್ರಯಾಣಿಕರಿಗೆ 70 ಕೆಜಿ ಉಚಿತ ಲಗೇಜ್ ಸಾಗಿಸಲು ಅವಕಾಶವಿದ್ದು, ಗರಿಷ್ಠ 150 ಕೆಜಿವರೆಗೆ ಬುಕ್ ಮಾಡಬಹುದು. ಫಸ್ಟ್ ಕ್ಲಾಸ್ ಮತ್ತು ಎಸಿ 2-ಟೈಯರ್ ಪ್ರಯಾಣಿಕರಿಗೆ 50 ಕೆಜಿ ಉಚಿತ ಮಿತಿ ಹಾಗೂ 100 ಕೆಜಿವರೆಗೆ ಬುಕಿಂಗ್ ಅವಕಾಶವಿದೆ.
ಎಸಿ 3-ಟೈಯರ್, ಎಸಿ 3 ಇಕಾನಮಿ ಮತ್ತು ಎಸಿ ಚೇರ್ ಕಾರ್ ಪ್ರಯಾಣಿಕರಿಗೆ 40 ಕೆಜಿ ಉಚಿತ ಲಗೇಜ್ ಸಾಗಿಸಲು ಅವಕಾಶ ನೀಡಲಾಗಿದೆ. ಸ್ಲೀಪರ್ ಕ್ಲಾಸ್ ಪ್ರಯಾಣಿಕರಿಗೆ 40 ಕೆಜಿ ಉಚಿತ ಮಿತಿ ಇದ್ದು, ಗರಿಷ್ಠ 80 ಕೆಜಿವರೆಗೆ ಹೆಚ್ಚುವರಿ ಲಗೇಜ್ ಬುಕ್ ಮಾಡಬಹುದು. ಸೆಕೆಂಡ್ ಕ್ಲಾಸ್ ಮತ್ತು ಜನರಲ್ ಕೋಚ್ ಪ್ರಯಾಣಿಕರಿಗೆ 35 ಕೆಜಿ ಉಚಿತ ಲಗೇಜ್ ಮಿತಿ ಹಾಗೂ 70 ಕೆಜಿವರೆಗೆ ಬುಕಿಂಗ್ ಸೌಲಭ್ಯ ಕಲ್ಪಿಸಲಾಗಿದೆ.
ಪ್ರಯಾಣಕ್ಕೂ ಮುನ್ನವೇ ಹೆಚ್ಚುವರಿ ಲಗೇಜ್ ಅನ್ನು ಆನ್ಲೈನ್ನಲ್ಲಿ ಬುಕ್ ಮಾಡುವ ಮೂಲಕ ದಂಡದ ಆತಂಕವಿಲ್ಲದೆ ಸುಗಮವಾಗಿ ಪ್ರಯಾಣಿಸಬಹುದು ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ. ಈ ಹೊಸ ಸೇವೆ ಪ್ರಯಾಣಿಕರ ಸಮಯ ಉಳಿಸುವುದರ ಜೊತೆಗೆ ರೈಲ್ವೆ ಸೇವೆಯನ್ನು ಇನ್ನಷ್ಟು ಆಧುನಿಕ, ಪಾರದರ್ಶಕ ಹಾಗೂ ಪ್ರಯಾಣಿಕ ಸ್ನೇಹಿಯಾಗಿಸುವ ಮಹತ್ವದ ಹೆಜ್ಜೆಯಾಗಿದೆ.
