ಕಾಡಾನೆಗಳು ಜನವಸತಿ ಪ್ರದೇಶಗಳಿಗೆ ನುಗ್ಗಿ ದಾಂಧಲೆ ಮಾಡುವ ದೃಶ್ಯಗಳನ್ನು ನಾವು ಹಲವಾರು ಬಾರಿ ಕಂಡಿದ್ದೇವೆ. ಗ್ರಾಮಗಳು, ಮನೆಗಳು, ಹೊಲಗಳನ್ನು ಹಾಳುಮಾಡುವ ಆನೆಗಳು ಜನರಲ್ಲಿ ಭಯವನ್ನುಂಟುಮಾಡುತ್ತವೆ. ಆದರೆ, ಥೈಲ್ಯಾಂಡ್‌ನ ಖಾವೋ ಯಾಯ್ ರಾಷ್ಟ್ರೀಯ ಉದ್ಯಾನವನದ ಒಂದು ಕಾಡಾನೆ ತನ್ನ ವಿಶಿಷ್ಟ ಕಿಡಿಗೇಡಿತನದಿಂದ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಈ ಆನೆ ಯಾರನ್ನೂ ಗಾಯಗೊಳಿಸದೆ, ಯಾವುದೇ ದೊಡ್ಡ ಹಾನಿಯನ್ನುಂಟುಮಾಡದೆ, ಕೇವಲ ತಿಂಡಿಗಾಗಿ ಅಂಗಡಿಯೊಂದಕ್ಕೆ ನುಗ್ಗಿ, ಹೊಟ್ಟೆತುಂಬ ತಿಂದು, ಇನ್ನಷ್ಟು ತಿಂಡಿಯನ್ನು ತನ್ನ ಸೊಂಡಿಲಿನಲ್ಲಿ ಎತ್ತಿಕೊಂಡು ಕಾಡಿಗೆ ಮರಳಿದೆ.
ಈ ಘಟನೆ ಥೈಲ್ಯಾನ ಒಂದು ಸಣ್ಣ ಅಂಗಡಿಯಲ್ಲಿ ನಡೆದಿದ್ದು, ರಾತ್ರಿಯ ವೇಳೆಯಲ್ಲಿ ಅಂಗಡಿಯೊಳಗೆ ನುಗ್ಗಿದೆ. ಸಾಮಾನ್ಯವಾಗಿ, ಆನೆಯೊಂದು ಊರಿಗೆ ಬಂದರೆ ಜನ ಭಯಗೊಂಡು ಓಡಾಡುವುದು ಸಾಮಾನ್ಯ. ಆದರೆ, ಈ ಆನೆಯ ಉದ್ದೇಶವೇ ಬೇರೆಯಾಗಿತ್ತು. ಇದು ಯಾವುದೇ ಗಾಬರಿಯನ್ನುಂಟುಮಾಡದೆ, ನೇರವಾಗಿ ಅಂಗಡಿಯ ಒಳಗೆ ಹೋಗಿ, ಅಕ್ಕಿಯ ಪ್ಯಾಕೆಟ್‌ಗಳನ್ನು ಗುರಿಯಾಗಿಟ್ಟುಕೊಂಡಿತ್ತು. ತನ್ನ ಉದ್ದನೆಯ ಸೊಂಡಿಲಿನಿಂದ ಅಕ್ಕಿಯ ಪ್ಯಾಕೆಟ್‌ಗಳನ್ನು ಎತ್ತಿಕೊಂಡು, ಕೆಲವನ್ನು ತಿಂದು, ಉಳಿದವುಗಳನ್ನು ತನ್ನೊಂದಿಗೆ ಕೊಂಡೊಯ್ಯಿತು.
ಈ ಆನೆಯ ತನ್ನ ಹಸಿವನ್ನು ತೀರಿಸಿಕೊಂಡ ನಂತರ, ತನಗೆ ಬೇಕಾದಷ್ಟು ತಿಂಡಿಯನ್ನು ಎತ್ತಿಕೊಂಡು ಶಾಂತವಾಗಿ ಕಾಡಿಗೆ ಮರಳಿತು. ಆನೆ ಅಂಗಡಿಗೆ ನುಗ್ಗಿದಾಗ ಜನರು ಆತಂಕಗೊಂಡಿದ್ದು ಸತ್ಯ. ಅಂಗಡಿಯ ಕೆಲವು ವಸ್ತುಗಳಿಗೆ ಸಣ್ಣಪುಟ್ಟ ಹಾನಿಯೂ ಆಗಿತ್ತು. ಆದರೆ, ಈ ಆನೆ ಯಾರಿಗೂ ಯಾವುದೇ ರೀತಿಯ ಗಾಯವನ್ನುಂಟುಮಾಡಲಿಲ್ಲ. ಇದರ ಈ ವಿಶಿಷ್ಟ ಕೃತ್ಯವನ್ನು ಯಾರೋ ಒಬ್ಬರು ವಿಡಿಯೋದಲ್ಲಿ ಸೆರೆಹಿಡಿದಿದ್ದು, @bangkokcommunityhelp ಎಂಬ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಈ ವಿಡಿಯೋ ವೈರಲ್ ಆಗಿದೆ. ಈ ವಿಡಿಯೋವನ್ನು ನೋಡಿದವರು ಆನೆಯ ಚಾಣಾಕ್ಷತನಕ್ಕೆ ಮೆಚ್ಚಿಕೊಂಡಿದ್ದಾರೆ.