ಡಿಜಿಟಲ್ ಯುಗದಲ್ಲಿ ಮೊಬೈಲ್ ಫೋನ್ ಮತ್ತು ಸೋಶಿಯಲ್ ಮೀಡಿಯಾ ಬಳಕೆ ದಿನೇ ದಿನೇ ಹೆಚ್ಚುತ್ತಿದೆ. ಚಿಕ್ಕವರಿಂದ ಹಿಡಿದು ದೊಡ್ಡವರ ತನಕ ಬಹುತೇಕ ಎಲ್ಲರೂ ಮೆಸೇಜಿಂಗ್ ಅಪ್ಲಿಕೇಶನ್ಗಳನ್ನು ಬಳಸುತ್ತಿದ್ದಾರೆ. ವಿಶೇಷವಾಗಿ ಕುಟುಂಬದವರ ಜೊತೆ ಸಂಪರ್ಕದಲ್ಲಿರಲು ಮತ್ತು ಆನ್ಲೈನ್ ತರಗತಿಗಳಿಗೆ ಸಂಪರ್ಕ ಸಾಧಿಸಲು ಅನೇಕ ಮಕ್ಕಳು ಕೂಡ WhatsApp ಬಳಸುತ್ತಿರುವುದು ಸಾಮಾನ್ಯವಾಗಿದೆ.
ಆದರೆ, ಮಕ್ಕಳ ಸುರಕ್ಷತೆ ಮತ್ತು ಅವರ ಆನ್ಲೈನ್ ಚಟುವಟಿಕೆಗಳ ಬಗ್ಗೆ ಪೋಷಕರಲ್ಲಿ ಸದಾ ಆತಂಕ ಇರುತ್ತದೆ. ಅಪರಿಚಿತ ವ್ಯಕ್ತಿಗಳ ಸಂಪರ್ಕ, ಅನಗತ್ಯ ವಿಷಯಗಳು ಹಾಗೂ ಡಿಜಿಟಲ್ ಅಡ್ಡ ಪರಿಣಾಮಗಳಿಂದ ಮಕ್ಕಳನ್ನು ರಕ್ಷಿಸುವುದು ದೊಡ್ಡ ಸವಾಲಾಗಿದೆ. ಈ ಸಮಸ್ಯೆಯನ್ನು ಗಮನದಲ್ಲಿಟ್ಟುಕೊಂಡು Meta Platforms ಸಂಸ್ಥೆ ಈಗ ಮಕ್ಕಳಿಗಾಗಿ ವಿಶೇಷವಾದ ಹೊಸ ಫೀಚರ್ನ್ನು ಪರಿಚಯಿಸಿದೆ.
ಮಕ್ಕಳಿಗಾಗಿ ‘Parent-Managed Account’
13 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗಾಗಿ ವಾಟ್ಸಾಪ್ ಈಗ ‘Parent-Managed Account’ ಎಂಬ ಹೊಸ ವ್ಯವಸ್ಥೆಯನ್ನು ಪರಿಚಯಿಸಿದೆ. ಈ ಫೀಚರ್ ಮೂಲಕ ಮಕ್ಕಳ ವಾಟ್ಸಾಪ್ ಖಾತೆ ಸಂಪೂರ್ಣವಾಗಿ ಪೋಷಕರ ನಿಯಂತ್ರಣದಲ್ಲಿ ಇರಲಿದೆ.
ಅಂದರೆ, ಮಕ್ಕಳು ಯಾರ ಜೊತೆ ಮಾತನಾಡಬೇಕು, ಯಾವ ಗ್ರೂಪ್ಗಳಲ್ಲಿ ಸೇರಬೇಕು ಅಥವಾ ಯಾವ ಸಂಪರ್ಕಗಳನ್ನು ಸ್ವೀಕರಿಸಬೇಕು ಎಂಬುದನ್ನು ಪೋಷಕರೇ ನಿರ್ಧರಿಸಬಹುದು. ಇದರಿಂದ ಮಕ್ಕಳ ಆನ್ಲೈನ್ ಸುರಕ್ಷತೆ ಹೆಚ್ಚುವ ನಿರೀಕ್ಷೆಯಿದೆ.
ಅಪರಿಚಿತ ಮೆಸೇಜ್ಗಳಿಗೆ ಪೋಷಕರ ಅನುಮತಿ ಅಗತ್ಯ
ಹೊಸ ವ್ಯವಸ್ಥೆಯಲ್ಲಿ ಅಪರಿಚಿತ ನಂಬರ್ಗಳಿಂದ ಬರುವ ಮೆಸೇಜ್ಗಳನ್ನು ಮಕ್ಕಳು ನೇರವಾಗಿ ನೋಡಲು ಸಾಧ್ಯವಿಲ್ಲ. ಮೊದಲು ಆ ಮೆಸೇಜ್ಗಳು ಪೋಷಕರಿಗೆ ಹೋಗುತ್ತವೆ. ಪೋಷಕರು ಅನುಮತಿ ನೀಡಿದ ನಂತರ ಮಾತ್ರ ಮಕ್ಕಳು ಆ ವ್ಯಕ್ತಿಯ ಜೊತೆ ಚಾಟ್ ಮುಂದುವರಿಸಬಹುದು.
ಇದರಿಂದ ಅಪರಿಚಿತ ವ್ಯಕ್ತಿಗಳಿಂದ ಆಗಬಹುದಾದ ಮೋಸ ಅಥವಾ ಕಿರುಕುಳವನ್ನು ತಪ್ಪಿಸಲು ಸಹಾಯವಾಗುತ್ತದೆ ಎಂದು ಕಂಪನಿ ಹೇಳಿದೆ.
‘Parent PIN’ ಮೂಲಕ ಹೆಚ್ಚುವರಿ ಸುರಕ್ಷತೆ
ಮಕ್ಕಳು ಸ್ವತಃ ತಮ್ಮ ಪ್ರೈವಸಿ ಸೆಟ್ಟಿಂಗ್ಗಳನ್ನು ಬದಲಿಸದಂತೆ ತಡೆಯಲು ಈ ಹೊಸ ವ್ಯವಸ್ಥೆಯಲ್ಲಿ ವಿಶೇಷ ಸುರಕ್ಷತಾ ವ್ಯವಸ್ಥೆ ಕೂಡ ಇದೆ. ಪೋಷಕರು 6 ಅಂಕಿಯ ‘Parent PIN’ ಅನ್ನು ಸೆಟ್ ಮಾಡಬಹುದು.
ಈ ಪಿನ್ ಇಲ್ಲದೆ ಮಕ್ಕಳು ಯಾವುದೇ ಪ್ರಮುಖ ಸೆಟ್ಟಿಂಗ್ಗಳನ್ನು ಬದಲಾಯಿಸಲು ಸಾಧ್ಯವಿಲ್ಲ. ಇದರಿಂದ ಪೋಷಕರು ತಮ್ಮ ಮಕ್ಕಳ ಡಿಜಿಟಲ್ ಚಟುವಟಿಕೆಗಳ ಮೇಲೆ ಸಂಪೂರ್ಣ ನಿಯಂತ್ರಣ ಹೊಂದಬಹುದು.
ಕೆಲವು ಫೀಚರ್ಗಳಿಗೆ ನಿರ್ಬಂಧ
ಮಕ್ಕಳ ಸುರಕ್ಷತೆಗಾಗಿ ಕೆಲವು ಸಾಮಾನ್ಯ ವಾಟ್ಸಾಪ್ ಫೀಚರ್ಗಳನ್ನು ಈ ಅಕೌಂಟ್ಗಳಲ್ಲಿ ಬಳಸಲು ಅವಕಾಶ ನೀಡಲಾಗುವುದಿಲ್ಲ. ಉದಾಹರಣೆಗೆ
-
ವಾಟ್ಸಾಪ್ ಸ್ಟೇಟಸ್
-
ಚಾನೆಲ್ಗಳು
-
ಮೆಟಾ AI
ಈ ಫೀಚರ್ಗಳನ್ನು 13 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಬಳಕೆದಾರರ ಖಾತೆಗಳಲ್ಲಿ ನಿರ್ಬಂಧಿಸಲಾಗಿದೆ. ಇದರಿಂದ ಮಕ್ಕಳು ಅನಗತ್ಯ ಅಥವಾ ಅಪಾಯಕಾರಿ ವಿಷಯಗಳನ್ನು ನೋಡುವ ಸಾಧ್ಯತೆ ಕಡಿಮೆಯಾಗುತ್ತದೆ.
ಹೊಸ ಅಕೌಂಟ್ ಸೆಟ್-ಅಪ್ ಮಾಡುವುದು ಹೇಗೆ?
ಮಕ್ಕಳಿಗಾಗಿ Parent-Managed Account ಸೃಷ್ಟಿಸುವುದು ತುಂಬಾ ಸುಲಭವಾಗಿದೆ. ಪೋಷಕರು ಈ ಹಂತಗಳನ್ನು ಅನುಸರಿಸಿದರೆ ಸಾಕು..
-
ಮೊದಲು ಮಗುವಿನ ಫೋನ್ನಲ್ಲಿ ವಾಟ್ಸಾಪ್ ಅಪ್ಲಿಕೇಶನ್ ಡೌನ್ಲೋಡ್ ಮಾಡಿ.
-
ನಂತರ ‘More Options’ ಗೆ ಹೋಗಿ ‘Create a Parent-Managed Account’ ಆಯ್ಕೆ ಮಾಡಬೇಕು.
-
ಮಗುವಿನ ಮೊಬೈಲ್ ಸಂಖ್ಯೆ ಮತ್ತು ಹುಟ್ಟಿದ ದಿನಾಂಕ ನಮೂದಿಸಬೇಕು.
-
ನಂತರ ಪೋಷಕರ ಫೋನ್ನಲ್ಲಿ ವಾಟ್ಸಾಪ್ ತೆರೆಯಿಸಿ ಮಗುವಿನ ಫೋನ್ನಲ್ಲಿ ಕಾಣುವ QR ಕೋಡ್ ಸ್ಕ್ಯಾನ್ ಮಾಡಬೇಕು.
-
ಪೋಷಕರು 18 ವರ್ಷ ಮೇಲ್ಪಟ್ಟವರು ಎಂಬುದನ್ನು ಖಚಿತಪಡಿಸಬೇಕು.
-
ಕೊನೆಗೆ 6 ಅಂಕಿಯ Parent PIN ರಚಿಸಿದರೆ ಸೆಟ್-ಅಪ್ ಪೂರ್ಣಗೊಳ್ಳುತ್ತದೆ.
ಡಿಜಿಟಲ್ ಬಳಕೆಗೆ ಹೊಸ ಹೆಜ್ಜೆ
ಇತ್ತೀಚೆಗೆ ಕೆಲವು ರಾಜ್ಯಗಳಲ್ಲಿ 16 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ಸೋಶಿಯಲ್ ಮೀಡಿಯಾ ಬಳಕೆಯನ್ನು ನಿಯಂತ್ರಿಸುವ ಬಗ್ಗೆ ಚರ್ಚೆಗಳು ನಡೆಯುತ್ತಿವೆ. ಇಂತಹ ಸಂದರ್ಭದಲ್ಲಿ ಮೆಟಾ ಕಂಪನಿಯ ಈ ಹೊಸ ಫೀಚರ್ ಮಹತ್ವ ಪಡೆದುಕೊಂಡಿದೆ.