ನ್ಯೂಯಾರ್ಕ್, ಜೂನ್ 8: ಅಮೆರಿಕದ ಎಲೆಕ್ಟ್ರಿಕ್ ಕಾರು ತಯಾರಿಕಾ ಕಂಪನಿ ಟೆಸ್ಲಾ ಮತ್ತು ಬಾಹ್ಯಾಕಾಶ ಸಂಸ್ಥೆ ಸ್ಪೇಸ್ಎಕ್ಸ್ನ ಮಾಲೀಕ, ಉದ್ಯಮಿ ಇಲಾನ್ ಮಸ್ಕ್ ಅವರು ವಿಶ್ವದ ಮೊದಲ ಟ್ರಿಲಿಯನೇರ್ (ಲಕ್ಷ ಕೋಟಿ ಡಾಲರ್ ಒಡೆಯ) ಆಗಲಿದ್ದಾರೆ ಎಂದು ಸಿಎನ್ಎನ್ ವರದಿ ಮಾಡಿದೆ.
ಸ್ಪೇಸ್ಎಕ್ಸ್ IPO ಯೋಜನೆಯೇ ದಾರಿ
ಸ್ಪೇಸ್ಎಕ್ಸ್ ಸಂಸ್ಥೆಯು ಯೋಜಿಸಿರುವ ಐಪಿಒ (IPO) ಇಲಾನ್ ಮಸ್ಕ್ ಅವರ ಆಸ್ತಿಯನ್ನು 1 ಟ್ರಿಲಿಯನ್ ಅಮೆರಿಕ ಡಾಲರ್ಗಿಂತಲೂ ಹೆಚ್ಚು ಮಾಡಬಹುದು. ಪ್ರಸ್ತುತ ಮಸ್ಕ್ ಟೆಸ್ಲಾ ಕಂಪನಿಯ ಸಿಇಒ ಆಗಿ 273 ಬಿಲಿಯನ್ ಡಾಲರ್ ಮೌಲ್ಯದ ಷೇರುಗಳನ್ನು ಹೊಂದಿದ್ದಾರೆ. ಸ್ಪೇಸ್ಎಕ್ಸ್ ಐಪಿಒ ಯೋಜನೆಯಂತೆ ನಡೆದರೆ, ಅವರ ಆಸ್ತಿಗೆ ಇನ್ನು 841 ಬಿಲಿಯನ್ ಡಾಲರ್ ಸೇರ್ಪಡೆಯಾಗಬಹುದು. ಸ್ಪೇಸ್ಎಕ್ಸ್ನ ಒಟ್ಟು ಮೌಲ್ಯ 1.77 ಟ್ರಿಲಿಯನ್ ಡಾಲರ್ ಆಗಲಿದ್ದು, ಅದರಲ್ಲಿ ಮಸ್ಕ್ ಅರ್ಧದಷ್ಟು ಷೇರುಗಳನ್ನು ಹೊಂದಲಿದ್ದಾರೆ. ಹೀಗಾಗಿ ಕೇವಲ ಎರಡು ಕಂಪನಿಗಳಿಂದಲೇ ಮಸ್ಕ್ ಅವರ ಒಟ್ಟು ನಿವ್ವಳ ಆಸ್ತಿ 1.1 ಟ್ರಿಲಿಯನ್ ಡಾಲರ್ ದಾಟಬಹುದು.
ಟ್ರಿಲಿಯನ್ ಡಾಲರ್ ಎಂದರೆ ಅರ್ಥಮಾಡಿಕೊಳ್ಳುವುದು ಹೇಗೆ?
ಸಾಮಾನ್ಯ ಜನರಿಗೆ ಒಂದು ಮಿಲಿಯನ್ ಡಾಲರ್ ಕಲ್ಪಿಸಿಕೊಳ್ಳಬಹುದು. ಬಿಲಿಯನೇರ್ ಎನಿಸಿಕೊಳ್ಳುವುದು ಸ್ವಲ್ಪ ಕಷ್ಟ. ಆದರೆ ಒಂದು ಟ್ರಿಲಿಯನ್ ಡಾಲರ್ ಕಲ್ಪಿಸಿಕೊಳ್ಳುವುದು ಅಸಾಧ್ಯವೇ ಸರಿ. ‘ಎಕಾನಮಿಕ್ ಟೈಮ್ಸ್’ ಪ್ರಕಾರ, ದಿನದ ಪ್ರತಿ ಗಂಟೆಗೆ 1 ಮಿಲಿಯನ್ ಡಾಲರ್ ಖರ್ಚು ಮಾಡಿದರೂ, ಈ ಹಣ ಖಾಲಿಯಾಗಲು 100 ವರ್ಷಗಳಿಗಿಂತ ಹೆಚ್ಚು ಸಮಯ ಬೇಕಾಗುತ್ತದೆ.
ಹಲವು ದೇಶಗಳ ಆರ್ಥಿಕತೆಗಿಂತ ದೊಡ್ಡದು
ಒಂದು ಟ್ರಿಲಿಯನ್ ಡಾಲರ್ ಆಸ್ತಿಯು ಮಸ್ಕ್ ಅವರನ್ನು ಜಗತ್ತಿನ ಬಹುತೇಕ ದೇಶಗಳಿಗಿಂತ ಶ್ರೀಮಂತರನ್ನಾಗಿ ಮಾಡಲಿದೆ. ಪ್ರಸ್ತುತ ಪ್ರಪಂಚದ ಕೇವಲ 20 ದೇಶಗಳು ಮಾತ್ರ ವಾರ್ಷಿಕವಾಗಿ 1.1 ಟ್ರಿಲಿಯನ್ ಡಾಲರ್ಗಿಂತ ಹೆಚ್ಚಿನ ಆರ್ಥಿಕ ಉತ್ಪಾದನೆಯನ್ನು ಹೊಂದಿವೆ. ಮಸ್ಕ್ ಅವರ ಅಂದಾಜು ಆಸ್ತಿಯು ತೈವಾನ್, ಐರ್ಲೆಂಡ್, ಸ್ವೀಡನ್, ಸಿಂಗಾಪುರ ಮತ್ತು ಅವರ ಹುಟ್ಟೂರಾದ ದಕ್ಷಿಣ ಆಫ್ರಿಕಾದಂತಹ ದೇಶಗಳ ಒಟ್ಟು ವಾರ್ಷಿಕ ಆರ್ಥಿಕತೆಗಿಂತಲೂ ಹೆಚ್ಚಾಗಿರಲಿದೆ.
ಮ್ಯಾನ್ಹ್ಯಾಟನ್ ಆರ್ಥಿಕತೆಗಿಂತ ಹೆಚ್ಚು
ನ್ಯೂಯಾರ್ಕ್ನ ಮ್ಯಾನ್ಹ್ಯಾಟನ್ ಪ್ರದೇಶದ ವಾರ್ಷಿಕ ಒಟ್ಟು ಆರ್ಥಿಕ ಉತ್ಪಾದನೆಯು 1 ಟ್ರಿಲಿಯನ್ ಡಾಲರ್ಗಿಂತ ಸ್ವಲ್ಪವೇ ಹೆಚ್ಚಿದೆ. ಅಂದರೆ ಮಸ್ಕ್ ಆಸ್ತಿಯು ವಿಶ್ವದ ಅತ್ಯಂತ ಪ್ರಮುಖ ಹಣಕಾಸು ಕೇಂದ್ರದ ವಾರ್ಷಿಕ ಆರ್ಥಿಕ ಚಟುವಟಿಕೆಗೆ ಸಮನಾಗಬಹುದು ಅಥವಾ ಅದನ್ನೂ ಮೀರಿಸಬಹುದು.
ಇತರ ಶ್ರೀಮಂತರಿಗಿಂತ ದೂರ
ಅಮೆಜಾನ್ ಸಂಸ್ಥಾಪಕ ಜೆಫ್ ಬೆಜೋಸ್, ಒರಾಕಲ್ ಸಂಸ್ಥಾಪಕ ಲ್ಯಾರಿ ಎಲಿಸನ್, ಗೂಗಲ್ ಸಂಸ್ಥಾಪಕರಾದ ಲ್ಯಾರಿ ಪೇಜ್ ಮತ್ತು ಸೆರ್ಗೆ ಬ್ರಿನ್ ಅವರ ಒಟ್ಟು ಆಸ್ತಿಯನ್ನು ಸೇರಿಸಿದರೂ ಅದು ಮಸ್ಕ್ ಅವರ ನಿರೀಕ್ಷಿತ ಆಸ್ತಿಗಿಂತ ಸ್ವಲ್ಪ ಕಡಿಮೆಯೇ ಇರುತ್ತದೆ.
50 ಕ್ರೀಡಾ ತಂಡಗಳನ್ನು ಖರೀದಿಸಬಹುದು
ಪ್ರಸ್ತುತ ವಿಶ್ವದ 50 ಅತ್ಯಂತ ಮೌಲ್ಯಯುತ ಕ್ರೀಡಾ ತಂಡಗಳ (ಎನ್ಎಫ್ಎಲ್, ಯುರೋಪಿಯನ್ ಫುಟ್ಬಾಲ್ ಕ್ಲಬ್ಗಳು ಮತ್ತು ಎನ್ಬಿಎ ತಂಡಗಳು ಸೇರಿದಂತೆ) ಒಟ್ಟು ಮೌಲ್ಯ ಸುಮಾರು 353 ಬಿಲಿಯನ್ ಡಾಲರ್ ಆಗಿದೆ. ಇವೆಲ್ಲವನ್ನೂ ಒಟ್ಟಿಗೆ ಸೇರಿಸಿದರೂ, ಅದು ಮಸ್ಕ್ ಹೊಂದಬಹುದಾದ ಆಸ್ತಿಯ ಕೇವಲ ಮೂರನೇ ಒಂದು ಭಾಗ ಮಾತ್ರ ಆಗಿರುತ್ತದೆ.
ನಗದು ಹಣವಲ್ಲ, ಗಮನಿಸಬೇಕಾದ ಪ್ರಮುಖ ವಿಷಯ
ಮಸ್ಕ್ ಅವರ ಬ್ಯಾಂಕ್ ಖಾತೆಯಲ್ಲಿ 1 ಟ್ರಿಲಿಯನ್ ಡಾಲರ್ ನಗದು ಹಣ ಇರುವುದಿಲ್ಲ. ಅವರ ಈ ಸಂಪತ್ತು ಹೆಚ್ಚಾಗಿ ಟೆಸ್ಲಾ ಅಥವಾ ಸ್ಪೇಸ್ಎಕ್ಸ್ನ ಷೇರು ಮಾರುಕಟ್ಟೆಯ ಮೌಲ್ಯದ ಮೇಲೆ ಆಧಾರಿತವಾಗಿರುತ್ತದೆ.