ಬೆಂಗಳೂರು: ನಿನ್ನೆ ದಿನ(ಜೂನ್ 3) ಅಹಮದಾಬಾದ್‌ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆದ 18ನೇ ಐಪಿಎಲ್ ಫೈನಲ್‌ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡವು ಪಂಜಾಬ್ ಕಿಂಗ್ಸ್ ವಿರುದ್ಧ 6 ರನ್‌ಗಳ ರೋಚಕ ಗೆಲುವು ಸಾಧಿಸಿ ಐತಿಹಾಸಿಕ ಚೊಚ್ಚಲ ಟ್ರೋಫಿಯನ್ನು ಗೆದ್ದುಕೊಂಡಿದೆ. ಈ ಗೆಲುವಿನೊಂದಿಗೆ ಆರ್‌ಸಿಬಿ ತಂಡವು 20 ಕೋಟಿ ರೂ. ನಗದು ಬಹುಮಾನವನ್ನು ಗಳಿಸಿದ್ದರೆ, ಫ್ರಾಂಚೈಸಿಯ ಮಾಲೀಕರಾದ ಯುನೈಟೆಡ್ ಸ್ಪಿರಿಟ್ಸ್ ಲಿಮಿಟೆಡ್ (ಯುಎಸ್‌ಎಲ್) ಕಂಪನಿಯು ಒಂದೇ ದಿನದಲ್ಲಿ 2164 ಕೋಟಿ ರೂ. ಲಾಭವನ್ನು ತನ್ನ ಜೇಬಿಗಿಳಿಸಿಕೊಂಡಿದೆ.
17 ವರ್ಷಗಳಿಂದ ಐಪಿಎಲ್ ಟ್ರೋಫಿಗಾಗಿ ಕಾಯುತ್ತಿದ್ದ ಆರ್‌ಸಿಬಿ, ರಜತ್ ಪಾಟೀದಾರ್ ನಾಯಕತ್ವದಲ್ಲಿ ಈ ಬಾರಿ ಚಾಂಪಿಯನ್ ಆಗಿ ಹೊರಹೊಮ್ಮಿತು. ಫೈನಲ್‌ನಲ್ಲಿ ಗೆದ್ದ ಆರ್‌ಸಿಬಿಗೆ 20 ಕೋಟಿ ರೂ. ಬಹುಮಾನ ದೊರೆತಿತು, ಆದರೆ ಆರ್‌ಸಿಬಿಯ ಆರ್ಥಿಕ ಯಶಸ್ಸಿನ ಹಿಂದಿನ ದೊಡ್ಡ ಕಥೆಯು ಫ್ರಾಂಚೈಸಿಯ ಷೇರು ಮಾರುಕಟ್ಟೆಯ ಲಾಭದಲ್ಲಿದೆ. ಯುನೈಟೆಡ್ ಸ್ಪಿರಿಟ್ಸ್ ಲಿಮಿಟೆಡ್‌ನ ಷೇರುಗಳು ಫೈನಲ್ ದಿನದಂದು 2% ಏರಿಕೆ ಕಂಡವು. ಷೇರು ಬೆಲೆಯು 1579.05 ರೂ.ನಿಂದ 1609.60 ರೂ.ಗೆ ಏರಿತು, ಒಂದೇ ದಿನದಲ್ಲಿ ಪ್ರತಿ ಷೇರಿಗೆ 29.75 ರೂ. ಲಾಭವನ್ನು ದಾಖಲಿಸಿತು. ಇದರಿಂದ ಕಂಪನಿಯ ಮಾರ್ಕೆಟ್ ಕ್ಯಾಪ್ 1,12,688.47 ಕೋಟಿ ರೂ.ನಿಂದ 1,14,852.34 ಕೋಟಿ ರೂ.ಗೆ ಏರಿತು, ಒಟ್ಟು 2164 ಕೋಟಿ ರೂ. ಲಾಭವನ್ನು ಗಳಿಸಿತು.
ಆರ್‌ಸಿಬಿಯ ಫ್ರಾಂಚೈಸಿ ಮಾಲೀಕರು:
ಆರ್‌ಸಿಬಿಯ ಫ್ರಾಂಚೈಸಿಯನ್ನು ಯುನೈಟೆಡ್ ಸ್ಪಿರಿಟ್ಸ್ ಲಿಮಿಟೆಡ್ (ಯುಎಸ್‌ಎಲ್) ನಿರ್ವಹಿಸುತ್ತಿದ್ದು, ಇದು ದೇಶದ ಅತಿದೊಡ್ಡ ಮದ್ಯ ತಯಾರಿಕಾ ಕಂಪನಿಯಾಗಿದೆ. 200 ವರ್ಷಗಳ ಇತಿಹಾಸವಿರುವ ಈ ಕಂಪನಿಯು ಬ್ರಿಟಿಷ್ ಆಳ್ವಿಕೆಯ ಕಾಲದಲ್ಲಿ ಮದ್ರಾಸ್ ಪ್ರೆಸಿಡೆನ್ಸಿಯಲ್ಲಿ ಆರಂಭವಾಯಿತು. ಯುಎಸ್‌ಎಲ್‌ನ ಸಿಇಒ ಮತ್ತು ಎಂಡಿಯಾಗಿ ಪ್ರವೀಣ್ ಸೋಮೇಶ್ವರ್ ಕಾರ್ಯನಿರ್ವಹಿಸುತ್ತಿದ್ದಾರೆ. ಕಂಪನಿಯು ಮೆಕ್‌ಡೊವೆಲ್ಸ್‌ನಂತಹ ಜನಪ್ರಿಯ ಮದ್ಯ ಬ್ರಾಂಡ್‌ಗಳನ್ನು ಉತ್ಪಾದಿಸುತ್ತದೆ. ಈಗ ಯುಎಸ್‌ಎಲ್‌ನ ಒಡೆತನವು ಡಿಯಾಜಿಯೊ (Diageo) ಕಂಪನಿಯ ಕೈವಶವಿದ್ದು, ಈ ಹಿಂದೆ ಆರ್‌ಸಿಬಿಯನ್ನು ವಿಜಯ್ ಮಲ್ಯ ಖರೀದಿಸಿದ್ದರು.
