ಅಹಮದಾಬಾದ್‌: ನಿನ್ನೆ ನಡೆದ ರೋಚಕ ಐಪಿಎಲ್‌ ಪಂದ್ಯದಲ್ಲಿ ಲಖನೌ ಸೂಪರ್ ಜೈಂಟ್ಸ್‌, ಗುಜರಾತ್ ಟೈಟಾನ್ಸ್ ವಿರುದ್ಧ ಮಿಚೆಲ್ ಮಾರ್ಷ್ ಗುಜರಾತ್ ಟೈಟಾನ್ಸ್ ವಿರುದ್ಧ ಶತಕ ಸಿಡಿಸಿದರು. ಇದು ಈ ಐಪಿಎಲ್‌ನ ಏಳನೇ ಶತಕವಾಗಿದ್ದು, ವಿದೇಶಿ ಆಟಗಾರನಿಂದ ಬಂದ ಮೊದಲ ಶತಕವಾಗಿದೆ. ಮಾರ್ಷ್ ಅವರ ಶತಕದ ನೆರವಿನಿಂದ ಲಖನೌ 33 ರನ್‌ಗಳ ಜಯ ಸಾಧಿಸಿತು.. ಈಗಾಗಲೇ ಪ್ಲೇ-ಆಫ್‌ ಸ್ಥಾನವನ್ನು ಖಚಿತಪಡಿಸಿಕೊಂಡಿರುವ ಗುಜರಾತ್ ಟೈಟಾನ್ಸ್ ಈ ಸೋಲಿನ ಹೊರತಾಗಿಯೂ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ. ತಂಡ 13 ಪಂದ್ಯಗಳಿಂದ 9 ಗೆಲುವು, 4 ಸೋಲುಗಳೊಂದಿಗೆ 18 ಅಂಕಗಳನ್ನು ಗಳಿಸಿದೆ.
ಇನ್ನೊಂದೆಡೆ, ಸತತ 4 ಸೋಲುಗಳ ಬಳಿಕ ಲಖನೌ ಸೂಪರ್ ಜೈಂಟ್ಸ್‌ ಗೆಲುವಿನ ಸಿಹಿಯನ್ನು ಸವಿದಿದೆ. ತಂಡಕ್ಕೆ ಇದು 13 ಪಂದ್ಯಗಳಲ್ಲಿ 5ನೇ ಗೆಲುವು. ಪ್ಲೇ-ಆಫ್‌ ರೇಸ್‌ನಿಂದ ಹೊರಬಿದ್ದಿರುವ ರಿಷಭ್‌ ಪಂತ್‌ರ ತಂಡ, ಈಗ ಪ್ರತಿಷ್ಠೆಗಾಗಿ ಹೋರಾಡುತ್ತಿದೆ.
ಲಖನೌ ಸೂಪರ್ ಜೈಂಟ್ಸ್‌ನ ಸ್ಫೋಟಕ ಬ್ಯಾಟಿಂಗ್‌
ಮೊದಲು ಬ್ಯಾಟಿಂಗ್‌ ಆಯ್ಕೆ ಮಾಡಿಕೊಂಡ ಲಖನೌ ಸೂಪರ್ ಜೈಂಟ್ಸ್‌ ಆಕರ್ಷಕ ಆಟವಾಡಿತು. ಮಿಚೆಲ್ ಮಾರ್ಷ್‌ರ ಶತಕದ ನೆರವಿನಿಂದ ತಂಡ 20 ಓವರ್‌ಗಳಲ್ಲಿ 2 ವಿಕೆಟ್‌ಗೆ 235 ರನ್‌ ಕಲೆಹಾಕಿತು. ಮಾರ್ಕ್‌ರಮ್‌ 24 ಎಸೆತಗಳಲ್ಲಿ 36 ರನ್‌ ಗಳಿಸಿ ಔಟಾದ ಬಳಿಕ, ಮಿಚೆಲ್ ಮಾರ್ಷ್ ಮತ್ತು ನಿಕೋಲಸ್‌ ಪೂರನ್‌ 52 ಎಸೆತಗಳಲ್ಲಿ 121 ರನ್‌ಗಳ ಭರ್ಜರಿ ಜೊತೆಯಾಟವಾಡಿದರು. ಮಿಚೆಲ್ ಮಾರ್ಷ್ 64 ಎಸೆತಗಳಲ್ಲಿ 117 ರನ್‌ ಸಿಡಿಸಿದರೆ, ಪೂರನ್‌ 27 ಎಸೆತಗಳಲ್ಲಿ ಔಟಾಗದೆ 56 ರನ್‌ ಗಳಿಸಿದರು. ರಿಷಭ್‌ ಪಂತ್‌ 6 ಎಸೆತಗಳಲ್ಲಿ ಎರಡು ಸಿಕ್ಸರ್‌ ಸಹಿತ ಔಟಾಗದೆ 16 ರನ್‌ ಕೊಡುಗೆ ನೀಡಿದರು.
235 ರನ್‌ಗಳ ಬೃಹತ್‌ ಗುರಿಯನ್ನು ಬೆನ್ನತ್ತಿದ ಗುಜರಾತ್ ಟೈಟಾನ್ಸ್ 20 ಓವರ್‌ಗಳಲ್ಲಿ 9 ವಿಕೆಟ್‌ಗೆ 202 ರನ್‌ ಗಳಿಸಿ ಸೋಲನ್ನೊಪ್ಪಿಕೊಂಡಿತು. ಸಾಯಿ ಸುದರ್ಶನ್‌ (21), ನಾಯಕ ಶುಭ್‌ಮನ್‌ ಗಿಲ್‌ (35), ಮತ್ತು ಜೋಸ್‌ ಬಟ್ಲರ್‌ (33) ದೊಡ್ಡ ಮೊತ್ತ ಗಳಿಸಲು ವಿಫಲರಾದರು. ಸೋಲಿನತ್ತ ಸಾಗುತ್ತಿದ್ದ ತಂಡವನ್ನು ಶಾರುಖ್‌ ಖಾನ್‌ (29 ಎಸೆತಗಳಲ್ಲಿ 57) ಮತ್ತು ರುಥರ್‌ಫೋರ್ಡ್‌ (38) ಗೆಲುವಿನ ಆಸೆಯನ್ನು ಚಿಗುರಿಸಿದರೂ, ಕೊನೆಯ ಓವರ್‌ಗಳಲ್ಲಿ ತಂಡ ಎಡವಿತು. ಲಖನೌದ ಆವೇಶ್‌ ಖಾನ್‌ ಡೆತ್‌ ಓವರ್‌ಗಳಲ್ಲಿ ಅದ್ಭುತ ಬೌಲಿಂಗ್‌ ಮೂಲಕ ಪಂದ್ಯವನ್ನು ಲಖನೌ ಪರ ವಾಲಿಸಿದರು.
ಮಿಚೆಲ್ ಮಾರ್ಷ್‌ರ ಐತಿಹಾಸಿಕ ಶತಕ
ಲಖನೌ ಸೂಪರ್ ಜೈಂಟ್ಸ್‌ನ ಆರಂಭಿಕ ಬ್ಯಾಟರ್‌ ಮಿಚೆಲ್ ಮಾರ್ಷ್ ಈ ಪಂದ್ಯದಲ್ಲಿ ಐಪಿಎಲ್‌ನ 18ನೇ ಆವೃತ್ತಿಯ ಮೊದಲ ವಿದೇಶಿ ಶತಕವನ್ನು ದಾಖಲಿಸಿದರು. 64 ಎಸೆತಗಳಲ್ಲಿ 10 ಬೌಂಡರಿ, 8 ಸಿಕ್ಸರ್‌ಗಳೊಂದಿಗೆ 117 ರನ್‌ ಗಳಿಸಿದ ಅವರು, ಈ ಟೂರ್ನಿಯ ಏಳನೇ ಶತಕವನ್ನು ಬಾರಿಸಿದರು. ಇದರೊಂದಿಗೆ, ಮಿಚೆಲ್ ಮಾರ್ಷ್ ಮತ್ತು ಶಾನ್‌ ಮಾರ್ಷ್ ಐಪಿಎಲ್‌ನಲ್ಲಿ ಶತಕ ಬಾರಿಸಿದ ಮೊದಲ ಸಹೋದರರಾದರು. 2008ರಲ್ಲಿ ಶಾನ್‌ ಮಾರ್ಷ್ ಕಿಂಗ್ಸ್‌ ಇಲೆವನ್‌ ಪಂಜಾಬ್‌ಗಾಗಿ ಶತಕ ಸಿಡಿಸಿದ್ದರು.
