2008ರಲ್ಲಿ ಕೇವಲ ಒಂದು ಪ್ರಯೋಗವಾಗಿ ಆರಂಭವಾದ ಇಂಡಿಯನ್ ಪ್ರೀಮಿಯರ್ ಲೀಗ್ (IPL), ಇಂದು ಜಗತ್ತಿನ ಅತ್ಯಂತ ಜನಪ್ರಿಯ ಮತ್ತು ಶ್ರೀಮಂತ ಕ್ರೀಡಾ ಕೂಟವಾಗಿ ಬೆಳೆದು ನಿಂತಿದೆ. 2007ರಲ್ಲಿ ಎಂ.ಎಸ್. ಧೋನಿ ನೇತೃತ್ವದಲ್ಲಿ ಭಾರತ ಟಿ20 ವಿಶ್ವಕಪ್ ಗೆದ್ದಾಗ ಹುಟ್ಟಿದ ಈ ಕಲ್ಪನೆ, ಇಂದು ರಣಜಿ ಅಥವಾ ದುಲೀಪ್ ಟ್ರೋಫಿಯ ಜನಪ್ರಿಯತೆಯನ್ನೂ ಮೀರಿಸಿ ಬೆಳೆದಿದೆ. ಈಗ 19ನೇ ಆವೃತ್ತಿಯ ಐಪಿಎಲ್ ಆರಂಭವಾಗಿದ್ದು, ಕಳೆದ 18 ವರ್ಷಗಳಲ್ಲಿ ಕ್ರಿಕೆಟ್ ಮೈದಾನದಲ್ಲಿ ದಾಖಲಾದ ಕೆಲವು ಅದ್ಭುತ ಮೈಲಿಗಲ್ಲುಗಳನ್ನು ಇಲ್ಲಿವೆ.
ಕಳೆದ ಎರಡು ವರ್ಷಗಳಲ್ಲಿ ಸನ್ರೈಸರ್ಸ್ ಹೈದರಾಬಾದ್ (SRH) ತಂಡವು ಐಪಿಎಲ್ ಇತಿಹಾಸದ ಬ್ಯಾಟಿಂಗ್ ಸ್ವರೂಪವನ್ನೇ ಬದಲಿಸಿದೆ. ಇನ್ನಿಂಗ್ಸ್ನಲ್ಲಿ ಅತಿಹೆಚ್ಚು ರನ್ ಗಳಿಸಿದ ಪಟ್ಟಿಯಲ್ಲಿ ಮೊದಲ ನಾಲ್ಕು ಸ್ಥಾನಗಳೂ ಹೈದರಾಬಾದ್ ಪಾಲಾಗಿರುವುದು ವಿಶೇಷ.
-
SRH: 287 ರನ್ (2024ರಲ್ಲಿ ಆರ್ಸಿಬಿ ವಿರುದ್ಧ)
-
SRH: 286 ರನ್ (2025ರಲ್ಲಿ ರಾಜಸ್ಥಾನ್ ವಿರುದ್ಧ)
-
SRH: 278 ರನ್ (2025ರಲ್ಲಿ ಕೆಕೆಆರ್ ವಿರುದ್ಧ)
-
SRH: 277 ರನ್ (2024ರಲ್ಲಿ ಮುಂಬೈ ವಿರುದ್ಧ)
ಪವರ್ ಪ್ಲೇ (ಮೊದಲ 6 ಓವರ್) ಹಂತದಲ್ಲೂ ಹೈದರಾಬಾದ್ ತಂಡದ ಅಬ್ಬರ ಜೋರಾಗಿದೆ. 2024ರಲ್ಲಿ ಡೆಲ್ಲಿ ವಿರುದ್ಧ ಕೇವಲ 6 ಓವರ್ಗಳಲ್ಲಿ 125 ರನ್ ಸಿಡಿಸಿದ್ದು ಐಪಿಎಲ್ ಇತಿಹಾಸದ ಶ್ರೇಷ್ಠ ದಾಖಲೆಯಾಗಿದೆ.
ವೈಯಕ್ತಿಕ ಸ್ಕೋರ್ ವಿಚಾರಕ್ಕೆ ಬಂದರೆ, 2013ರಲ್ಲಿ ಆರ್ಸಿಬಿ ಪರ ಕ್ರಿಸ್ ಗೇಲ್ ಸಿಡಿಸಿದ 175 ರನ್ (66 ಎಸೆತ) ಇಂದಿಗೂ ಅಜೇಯ ದಾಖಲೆಯಾಗಿದೆ. ಇದಾದ ನಂತರ 2025ರಲ್ಲಿ ಯುವ ಪ್ರತಿಭೆ ಅಭಿಷೇಕ್ ಶರ್ಮಾ 141 ರನ್ ಗಳಿಸಿ ದ್ವಿತೀಯ ಸ್ಥಾನದಲ್ಲಿದ್ದಾರೆ.
ಅತಿ ಕಡಿಮೆ ಎಸೆತಗಳಲ್ಲಿ ಶತಕ ಸಿಡಿಸಿದ ವೀರರ ಪಟ್ಟಿಯಲ್ಲಿ ಕ್ರಿಸ್ ಗೇಲ್ (30 ಎಸೆತ) ಅಗ್ರಸ್ಥಾನದಲ್ಲಿದ್ದರೆ, 2025ರ ಆವೃತ್ತಿಯಲ್ಲಿ ಉದಯೋನ್ಮುಖ ತಾರೆ ವೈಭವ್ ಸೂರ್ಯವಂಶಿ ಕೇವಲ 35 ಎಸೆತಗಳಲ್ಲಿ ಶತಕ ಚಚ್ಚಿ ಜಗತ್ತನ್ನೇ ಚಕಿತಗೊಳಿಸಿದ್ದರು. ಹೆನ್ರಿಕ್ ಕ್ಲಾಸೆನ್ (37 ಎಸೆತ) ಮತ್ತು ಯೂಸುಫ್ ಪಠಾಣ್ (37 ಎಸೆತ) ಕೂಡ ಈ ಪಟ್ಟಿಯಲ್ಲಿದ್ದಾರೆ.
ಹಲವು ವರ್ಷಗಳಿಂದ ಸ್ಥಿರ ಪ್ರದರ್ಶನ ನೀಡುತ್ತಿರುವ ಆಟಗಾರರಲ್ಲಿ ‘ಕಿಂಗ್’ ವಿರಾಟ್ ಕೊಹ್ಲಿ ಅಗ್ರಗಣ್ಯರು.
-
ವಿರಾಟ್ ಕೊಹ್ಲಿ: 8,661 ರನ್ (267 ಪಂದ್ಯ) – ಐಪಿಎಲ್ನ ಸಾರ್ವಕಾಲಿಕ ಶ್ರೇಷ್ಠ ಬ್ಯಾಟರ್.
-
ರೋಹಿತ್ ಶರ್ಮಾ: 7,046 ರನ್ (272 ಪಂದ್ಯ)
-
ಶಿಖರ್ ಧವನ್: 6,769 ರನ್ (222 ಪಂದ್ಯ)
-
ಡೇವಿಡ್ ವಾರ್ನರ್: 6,565 ರನ್ (184 ಪಂದ್ಯ)
ಐಪಿಎಲ್ ಕೇವಲ ರನ್ ಗಳಿಕೆಯ ವೇದಿಕೆಯಲ್ಲ, ಇದು ಹೊಸ ಪ್ರತಿಭೆಗಳ ಉದಯಕ್ಕೆ ದಾರಿದೀಪ. 19ನೇ ಆವೃತ್ತಿಯಲ್ಲಿ ಈ ಹಳೆಯ ದಾಖಲೆಗಳು ಧೂಳೀಪಟವಾಗುತ್ತವೆಯೇ ಅಥವಾ ಹೊಸ ದಾಖಲೆಗಳು ಸೃಷ್ಟಿಯಾಗುತ್ತವೆಯೇ ಎಂಬುದು ಕ್ರೀಡಾಭಿಮಾನಿಗಳ ಕುತೂಹಲವಾಗಿದೆ.