ಲೀಡ್ಸ್ನ ಹೆಡಿಂಗ್ಲೆಯಲ್ಲಿ ಇಂಗ್ಲೆಂಡ್ ವಿರುದ್ಧ (IND vs ENG) ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾದ ಆಟಗಾರರಾದ ಜಸ್ಪ್ರೀತ್ ಬುಮ್ರಾ ಮತ್ತು ರಿಷಭ್ ಪಂತ್ ದಾಖಲೆಯ ಹೊಸ ಅಧ್ಯಾಯ ಬರೆದಿದ್ದಾರೆ. ಈ ಪಂದ್ಯದಲ್ಲಿ ಭಾರತ ತಂಡದ ಆಕರ್ಷಕ ಪ್ರದರ್ಶನದೊಂದಿಗೆ ಇಂಗ್ಲೆಂಡ್ಗೆ ಕಠಿಣ ಸವಾಲು ಒಡ್ಡಿದೆ. ಬುಮ್ರಾ ತಮ್ಮ ಅಮೋಘ ಬೌಲಿಂಗ್ನಿಂದ ಕಪಿಲ್ ದೇವ್ರ ದಾಖಲೆಯನ್ನು ಸರಿಗಟ್ಟಿದರೆ, ಪಂತ್ ವಿಕೆಟ್ ಕೀಪಿಂಗ್ನಲ್ಲಿ ಐತಿಹಾಸಿಕ ಮೈಲಿಗಲ್ಲು ತಲುಪಿದ್ದಾರೆ.
ಬುಮ್ರಾ: ವಿದೇಶದಲ್ಲಿ 5 ವಿಕೆಟ್ ಸಾಧನೆಯ ದಿಗ್ಗಜ
ಜಸ್ಪ್ರೀತ್ ಬುಮ್ರಾ ಈ ಪಂದ್ಯದಲ್ಲಿ 5 ವಿಕೆಟ್ ಕಿತ್ತುಕೊಂಡು ವಿದೇಶಿ ನೆಲದಲ್ಲಿ ಭಾರತದ ದಿಗ್ಗಜ ಆಟಗಾರ ಕಪಿಲ್ ದೇವ್ರ ದಾಖಲೆಯನ್ನು (12 ಬಾರಿ 5 ವಿಕೆಟ್) ಸರಿಗಟ್ಟಿದ್ದಾರೆ. ಕೇವಲ 34 ಟೆಸ್ಟ್ ಪಂದ್ಯಗಳಲ್ಲಿ ಈ ಸಾಧನೆ ಮಾಡಿರುವ ಬುಮ್ರಾ, ಕಪಿಲ್ ದೇವ್ಗೆ 66 ಟೆಸ್ಟ್ ಪಂದ್ಯಗಳು ಬೇಕಾಗಿದ್ದವು. ಈ ದಾಖಲೆಯೊಂದಿಗೆ ಬುಮ್ರಾ, ವಿದೇಶದಲ್ಲಿ ಭಾರತದ ಅತ್ಯಂತ ಯಶಸ್ವಿ ವೇಗದ ಬೌಲರ್ಗಳ ಸಾಲಿನಲ್ಲಿ ತಮ್ಮ ಸ್ಥಾನವನ್ನು ಗಟ್ಟಿಗೊಳಿಸಿದ್ದಾರೆ. ಇಶಾಂತ್ ಶರ್ಮಾ (9 ಬಾರಿ), ಜಹೀರ್ ಖಾನ್ (8 ಬಾರಿ), ಮತ್ತು ಇರ್ಫಾನ್ ಪಠಾಣ್ (7 ಬಾರಿ) ತಮ್ಮದೇ ಆದ ಸ್ಥಾನವನ್ನು ಹೊಂದಿದ್ದಾರೆ.
ಪಂತ್ ದಾಖಲೆ
ರಿಷಭ್ ಪಂತ್ ಈ ಪಂದ್ಯದ ಮೂರನೇ ದಿನದಾಟದಲ್ಲಿ ಒಂದು ಕ್ಯಾಚ್ ಪಡೆಯುವ ಮೂಲಕ ಟೆಸ್ಟ್ ಕ್ರಿಕೆಟ್ನಲ್ಲಿ 150 ಕ್ಯಾಚ್ಗಳ ದಾಖಲೆ ಮಾಡಿದ ಮೂರನೇ ಭಾರತೀಯ ವಿಕೆಟ್ ಕೀಪರ್ ಎನಿಸಿಕೊಂಡಿದ್ದಾರೆ. ಈ ಸಾಧನೆಯೊಂದಿಗೆ ಅವರು ಸಯ್ಯದ್ ಕಿರ್ಮಾನಿ (160 ಕ್ಯಾಚ್) ಮತ್ತು ಎಂ.ಎಸ್. ಧೋನಿ (256 ಕ್ಯಾಚ್) ಜೊತೆಗೆ ಸ್ಥಾನ ಪಡೆದಿದ್ದಾರೆ. ಧೋನಿ ಈ ಯಾದಿಯಲ್ಲಿ ಅಗ್ರಸ್ಥಾನದಲ್ಲಿದ್ದರೆ, ಕಿರ್ಮಾನಿ ದ್ವಿತೀಯ ಸ್ಥಾನದಲ್ಲಿದ್ದಾರೆ. ಕಿರ್ಮಾನಿಯ ದಾಖಲೆಯನ್ನು ಮುರಿಯಲು ಪಂತ್ಗೆ ಇನ್ನೂ ಕೇವಲ 11 ಕ್ಯಾಚ್ಗಳ ಅಗತ್ಯವಿದೆ.
ಪಂದ್ಯದ ವಿವರ
ಮೊದಲ ಇನಿಂಗ್ಸ್ನಲ್ಲಿ ಭಾರತ 6 ರನ್ಗಳ ಮುನ್ನಡೆ ಸಾಧಿಸಿತ್ತು. ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಭಾರತಕ್ಕೆ ಆರಂಭಿಕ ಆಘಾತ ಎದುರಾಯಿತು. ಮೊದಲ ಇನಿಂಗ್ಸ್ನ ಶತಕ ವೀರ ಯಶಸ್ವಿ ಜೈಸ್ವಾಲ್ ಕೇವಲ 4 ರನ್ ಗಳಿಸಿ ವಿಕೆಟ್ ಕಳೆದುಕೊಂಡರು. ಇಂಗ್ಲೆಂಡ್ ತಮ್ಮ ಮೊದಲ ಇನಿಂಗ್ಸ್ನಲ್ಲಿ 3 ವಿಕೆಟ್ ನಷ್ಟಕ್ಕೆ 209 ರನ್ ಗಳಿಂದ ಆಟ ಆರಂಭಿಸಿತ್ತು. ಆದರೆ, ಭಾರತದ ಬೌಲರ್ಗಳ ಆಕ್ರಮಣಕಾರಿ ದಾಳಿಗೆ ಸಿಲುಕಿ 465 ರನ್ಗಳಿಗೆ ಸರ್ವಪತನ ಕಂಡಿತ್ತು. ಹ್ಯಾರಿ ಬ್ರೂಕ್ಸ್ 99 ರನ್ ಗಳಿಸಿ ಒಂದು ರನ್ ಅಂತರದಿಂದ ಶತಕ ವಂಚಿತರಾದರು. ಇಂಗ್ಲೆಂಡ್ ನಾಯಕ ಬೆನ್ ಸ್ಟೋಕ್ಸ್ 20 ರನ್ ಗಳಿಸಿ ಮೊಹಮ್ಮದ್ ಸಿರಾಜ್ಗೆ ವಿಕೆಟ್ ಒಪ್ಪಿಸಿದರು.
ಈ ಪಂದ್ಯದಲ್ಲಿ ಭಾರತದ ಆಟಗಾರರು ತಮ್ಮ ಆಲ್ರೌಂಡ್ ಪ್ರದರ್ಶನದೊಂದಿಗೆ ಗಮನ ಸೆಳೆದಿದ್ದಾರೆ. ಬುಮ್ರಾ ಮತ್ತು ಸಿರಾಜ್ರಂತಹ ಬೌಲರ್ಗಳು ಇಂಗ್ಲೆಂಡ್ ಬ್ಯಾಟಿಂಗ್ ಸಾವಾಲನ್ನು ಕಾಡಿದರೆ, ಪಂತ್ರ ವಿಕೆಟ್ ಕೀಪಿಂಗ್ ತಂಡಕ್ಕೆ ಹೆಚ್ಚುವರಿ ಶಕ್ತಿ ತಂದಿತ್ತು. ಜೈಸ್ವಾಲ್ರ ಶತಕದೊಂದಿಗೆ ಭಾರತದ ಬ್ಯಾಟಿಂಗ್ ಕೂಡ ಗಟ್ಟಿಯಾಗಿತ್ತು. ಈ ಎಲ್ಲಾ ಸಾಧನೆಗಳು ಭಾರತವನ್ನು ಪಂದ್ಯದಲ್ಲಿ ಮೇಲುಗೈ ಸಾಧಿಸುವಂತೆ ಮಾಡಿವೆ.