ಫಿಫಾ ವಿಶ್ವಕಪ್ 2026ರ 16ನೇ ಸುತ್ತಿನ ಪಂದ್ಯದಲ್ಲಿ ಬೆಲ್ಜಿಯಂ ತಂಡ ಅಮೆರಿಕ ವಿರುದ್ಧ 4-1 ಅಂತರದ ಭರ್ಜರಿ ಗೆಲುವು ದಾಖಲಿಸಿ ಕ್ವಾರ್ಟರ್ ಫೈನಲ್ಗೆ ಪ್ರವೇಶಿಸಿದೆ. ಸಹ-ಆತಿಥೇಯ ರಾಷ್ಟ್ರವಾದ ಅಮೆರಿಕದ ಎದುರು ಸಿಯಾಟಲ್ ಕ್ರೀಡಾಂಗಣದಲ್ಲಿ ನಡೆದ ಈ ಪಂದ್ಯದಲ್ಲಿ ಬೆಲ್ಜಿಯಂ ಆರಂಭದಿಂದಲೇ ಆಕ್ರಮಣಕಾರಿ ಆಟವಾಡಿ ಸಂಪೂರ್ಣ ಪ್ರಾಬಲ್ಯ ಸಾಧಿಸಿತು. ಅಮೆರಿಕ ತಂಡಕ್ಕೆ ಪಂದ್ಯದ ಯಾವುದೇ ಹಂತದಲ್ಲೂ ಸ್ಪಷ್ಟವಾಗಿ ಮೇಲೇಳುವ ಅವಕಾಶ ಸಿಗಲಿಲ್ಲ. ಈ ಗೆಲುವಿನೊಂದಿಗೆ ಬೆಲ್ಜಿಯಂ ಈಗ ಕ್ವಾರ್ಟರ್ ಫೈನಲ್ನಲ್ಲಿ ಸ್ಪೇನ್ ತಂಡವನ್ನು ಎದುರಿಸಲು ಸಜ್ಜಾಗಿದೆ.
ಪಂದ್ಯ ಆರಂಭವಾದ ಕೆಲವೇ ನಿಮಿಷಗಳಲ್ಲಿ ಬೆಲ್ಜಿಯಂ ತನ್ನ ಉದ್ದೇಶ ಸ್ಪಷ್ಟಪಡಿಸಿತು. 9ನೇ ನಿಮಿಷದಲ್ಲಿ ಚಾರ್ಲ್ಸ್ ಡಿ ಕೆಟೆಲೇರೆ ಮೊದಲ ಗೋಲು ದಾಖಲಿಸಿ ತಂಡಕ್ಕೆ ಮುನ್ನಡೆ ತಂದುಕೊಟ್ಟರು. ಆರಂಭದಲ್ಲೇ ಹಿನ್ನಡೆ ಅನುಭವಿಸಿದ ಅಮೆರಿಕ 31ನೇ ನಿಮಿಷದಲ್ಲಿ ಮಲಿಕ್ ಟಿಲ್ಮನ್ ಗಳಿಸಿದ ಗೋಲಿನ ನೆರವಿನಿಂದ 1-1 ಸಮಬಲ ಸಾಧಿಸಿ ಹೋರಾಟದ ಸುಳಿವು ನೀಡಿತು. ಆದರೆ ಆತಿಥೇಯರ ಸಂಭ್ರಮ ಹೆಚ್ಚು ಹೊತ್ತು ಉಳಿಯಲಿಲ್ಲ. ಕೇವಲ ಎರಡು ನಿಮಿಷಗಳ ಬಳಿಕ ಡಿ ಕೆಟೆಲೇರೆ ಮತ್ತೊಮ್ಮೆ ಬಲೆಗೆ ಚೆಂಡು ಸೇರಿಸಿ ಬೆಲ್ಜಿಯಂಗೆ 2-1 ಮುನ್ನಡೆ ತಂದುಕೊಟ್ಟರು. ಈ ಮೂಲಕ ಮೊದಲಾರ್ಧದ ಅಂತ್ಯಕ್ಕೆ ಬೆಲ್ಜಿಯಂ ಮೇಲುಗೈ ಸಾಧಿಸಿತು.
57ನೇ ನಿಮಿಷದಲ್ಲಿ ಹ್ಯಾನ್ಸ್ ವನ್ನಾಕೆನ್ ಮೂರನೇ ಗೋಲು ದಾಖಲಿಸಿ ಅಮೆರಿಕದ ಮೇಲೆ ಒತ್ತಡ ಹೆಚ್ಚಿಸಿದರು. ಅಮೆರಿಕ ಸಮಬಲ ಸಾಧಿಸಲು ಯತ್ನಿಸಿದರೂ ಬೆಲ್ಜಿಯಂನ ಸಂಘಟಿತ ರಕ್ಷಣಾ ಕೌಶಲ್ಯ ಮತ್ತು ಮಧ್ಯಮೈದಾನದ ಹಿಡಿತದ ಮುಂದೆ ಅದು ಫಲಿಸಲಿಲ್ಲ. ಅಂತಿಮ ಕ್ಷಣಗಳಲ್ಲಿ ಇಂಜುರಿ ಸಮಯದ 90+3ನೇ ನಿಮಿಷದಲ್ಲಿ ರೊಮೆಲು ಲುಕಾಕು ನಾಲ್ಕನೇ ಗೋಲು ಗಳಿಸಿ ಬೆಲ್ಜಿಯಂನ 4-1 ಅಂತರದ ಅದ್ಭುತ ಗೆಲುವಿಗೆ ಮುದ್ರೆ ಒತ್ತಿದರು.
ಈ ಸೋಲಿನೊಂದಿಗೆ 2026ರ ಫಿಫಾ ವಿಶ್ವಕಪ್ನಲ್ಲಿ ಸಹ-ಆತಿಥೇಯ ರಾಷ್ಟ್ರಗಳಾದ ಅಮೆರಿಕ, ಕೆನಡಾ ಮತ್ತು ಮೆಕ್ಸಿಕೊಗಳ ಅಭಿಯಾನ ಅಂತ್ಯಗೊಂಡಿದೆ. ಈಗಾಗಲೇ ಕೆನಡಾ ಮೊರಾಕೊ ವಿರುದ್ಧ ಹಾಗೂ ಮೆಕ್ಸಿಕೊ ಇಂಗ್ಲೆಂಡ್ ವಿರುದ್ಧ ಸೋಲು ಅನುಭವಿಸಿದ್ದರೆ, ಅಮೆರಿಕ ಬೆಲ್ಜಿಯಂ ಎದುರು ನಿರಾಸೆ ಕಂಡಿತು. ಇದರಿಂದ ಮೂವರು ಆತಿಥೇಯ ರಾಷ್ಟ್ರಗಳೂ ಪ್ರಿ-ಕ್ವಾರ್ಟರ್ ಫೈನಲ್ ಹಂತದಲ್ಲೇ ಟೂರ್ನಿಯಿಂದ ಹೊರಬಿದ್ದಂತಾಗಿದೆ.
ಇದೀಗ ಕ್ವಾರ್ಟರ್ ಫೈನಲ್ಗೆ ಮೊರಾಕೊ, ಇಂಗ್ಲೆಂಡ್, ಬೆಲ್ಜಿಯಂ, ಫ್ರಾನ್ಸ್, ನಾರ್ವೆ ಮತ್ತು ಸ್ಪೇನ್ ತಂಡಗಳು ಪ್ರವೇಶಿಸಿವೆ. ಉಳಿದ ಎರಡು ಸ್ಥಾನಗಳಿಗಾಗಿ ಇನ್ನೂ ಕೆಲವು ಪಂದ್ಯಗಳ ಫಲಿತಾಂಶ ಬಾಕಿಯಿದೆ. ಟೂರ್ನಿಯ ಗೋಲ್ಡನ್ ಬೂಟ್ ಸ್ಪರ್ಧೆಯೂ ರೋಚಕ ಹಂತ ತಲುಪಿದ್ದು, ಲಿಯೋನೆಲ್ ಮೆಸ್ಸಿ ಮತ್ತು ಕೆಲಿಯನ್ ಎಂಬಪ್ಪೆ ತಲಾ 9 ಗೋಲುಗಳೊಂದಿಗೆ ಅಗ್ರಸ್ಥಾನದಲ್ಲಿದ್ದಾರೆ. ನಾರ್ವೆಯ ಎರ್ಲಿಂಗ್ ಹಾಲೆಂಡ್ 7 ಗೋಲುಗಳೊಂದಿಗೆ ಮೂರನೇ ಸ್ಥಾನದಲ್ಲಿದ್ದು, ಮುಂದಿನ ಹಂತಗಳಲ್ಲಿ ಈ ಪೈಪೋಟಿ ಮತ್ತಷ್ಟು ಕುತೂಹಲ ಮೂಡಿಸಿದೆ.