ವಿಶ್ವದ ಅತ್ಯಂತ ದುಬಾರಿ ಮಾವಿನ ಹಣ್ಣುಗಳಲ್ಲಿ ಒಂದಾದ ಜಪಾನ್ನ ಪ್ರಸಿದ್ಧ ಮಿಯಾಝಾಕಿ ಮಾವು ಇದೀಗ ಅಯೋಧ್ಯೆಯ ರಾಮ ಮಂದಿರದಲ್ಲಿ ಗಮನ ಸೆಳೆದಿದೆ. ‘ಸೂರ್ಯನ ಮೊಟ್ಟೆ’ ಎಂದು ಜನಪ್ರಿಯವಾಗಿರುವ ಈ ಅಪರೂಪದ ಮಾವನ್ನು ಮೊದಲ ಬಾರಿಗೆ ಶ್ರೀರಾಮನಿಗೆ ನೈವೇದ್ಯವಾಗಿ ಅರ್ಪಿಸಲಾಗಿದೆ.
ಅಯೋಧ್ಯೆಯ ಸ್ಥಳೀಯ ರೈತ ಓಂಪ್ರಕಾಶ್ ಸಿಂಗ್ ಅವರು ಬೆಳೆದ ಈ ವಿಶೇಷ ಮಾವಿನ ಹಣ್ಣು ಸ್ಥಳೀಯವಾಗಿ ಮಾತ್ರವಲ್ಲದೆ ಅಂತರರಾಷ್ಟ್ರೀಯ ಮಟ್ಟದಲ್ಲೂ ಭಾರೀ ಬೆಲೆ ಹೊಂದಿದೆ. ಮಿಯಾಝಾಕಿ ಮಾವು ಸಾಮಾನ್ಯ ಮಾವುಗಳಿಗಿಂತ ವಿಭಿನ್ನವಾಗಿದ್ದು, ಉತ್ತಮ ಗುಣಮಟ್ಟ, ಸಿಹಿ ರುಚಿ ಮತ್ತು ಪೌಷ್ಟಿಕ ಮೌಲ್ಯಗಳಿಂದ ಪ್ರಸಿದ್ಧವಾಗಿದೆ.
ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಈ ಮಾವಿನ ಬೆಲೆ ಪ್ರತಿ ಕಿಲೋ ಗ್ರಾಂಗೆ ಸುಮಾರು 2.5 ಲಕ್ಷದಿಂದ 3 ಲಕ್ಷ ರೂಪಾಯಿಗಳ ವರೆಗೆ ತಲುಪಬಹುದು ಎನ್ನಲಾಗಿದೆ. ಒಂದು ಹಣ್ಣಿನ ಬೆಲೆ ಸುಮಾರು ಒಂದು ಲಕ್ಷ ರೂಪಾಯಿಗಳ ವರೆಗೆ ಇರಬಹುದು ಎಂದು ಅಂದಾಜಿಸಲಾಗಿದೆ.
ಸ್ಥಳೀಯ ಸಂಪ್ರದಾಯದಂತೆ ನಿನ್ನೆ ಶ್ರೀರಾಮನಿಗೆ ಈ ಅಪರೂಪದ ಹಣ್ಣನ್ನು ತುಳಸಿ ಎಲೆಯೊಂದಿಗೆ ನೈವೇದ್ಯವಾಗಿ ಅರ್ಪಿಸಲಾಯಿತು. ಇದು ಕೇವಲ ದುಬಾರಿ ಹಣ್ಣಿನ ಪ್ರದರ್ಶನವಲ್ಲ, ಕೃಷಿಯಲ್ಲಿ ಹೊಸ ಪ್ರಯೋಗ ಮತ್ತು ಸ್ಥಳೀಯ ಪರಿಸರಕ್ಕೆ ಹೊಂದಿಕೊಳ್ಳುವ ಸಾಮರ್ಥ್ಯದ ಉದಾಹರಣೆಯಾಗಿದೆ ಎಂದು ರೈತರು ಹೇಳಿದ್ದಾರೆ.
ಓಂ ಪ್ರಕಾಶ್ ಸಿಂಗ್ ಅವರು ಸುಮಾರು 2ವರ್ಷಗಳ ಹಿಂದೆ ಅಯೋಧ್ಯೆಯ ವಾತಾವರಣದಲ್ಲಿ ಮಿಯಾಝಾಕಿ ಮಾವಿನ ಮರವನ್ನು ಬೆಳೆಸಲು ಪ್ರಾರಂಭಿಸಿದ್ದರು. ಆರಂಭದಲ್ಲಿ ಈ ಮರ ಸ್ಥಳೀಯ ಹವಾಮಾನಕ್ಕೆ ಹೊಂದಿಕೊಳ್ಳುತ್ತದೆಯೇ ಎಂಬ ಅನುಮಾನವಿತ್ತು. ಆದರೆ ಇದೀಗ ಮರವು ಉತ್ತಮವಾಗಿ ಬೆಳೆದು ಈ ಋತುವಿನಲ್ಲಿ ಸುಮಾರು 1 ಡಜನ್ ಹಣ್ಣುಗಳನ್ನು ನೀಡಿದೆ.
ಮಿಯಾಝಾಕಿ ಮಾವು ಜಪಾನ್ನಿಂದ ಬಂದ ವಿಶೇಷ ತಳಿಯಾಗಿದ್ದು, ಅದರ ಅಸಾಧಾರಣ ಸಿಹಿ, ಮೃದುವಾದ ರುಚಿ, ಹೆಚ್ಚಿನ ನಾರಿನ ಅಂಶ ಮತ್ತು ವಿಟಮಿನ್ಗಳ ಕಾರಣದಿಂದ ವಿಶ್ವದ ದುಬಾರಿ ಹಣ್ಣುಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿದೆ.
ಈ ಅಪರೂಪದ ಮಾವು ಅಯೋಧ್ಯೆಯ ರಾಮ ಮಂದಿರದಲ್ಲಿ ಅರ್ಪಣೆಯಾದ ಸುದ್ದಿ ಸಾಮಾಜಿಕ ಜಾಲತಾಣಗಳಲ್ಲೂ ಚರ್ಚೆಗೆ ಕಾರಣವಾಗಿದೆ. ಕೃಷಿ ಕ್ಷೇತ್ರದಲ್ಲಿ ಹೊಸ ಪ್ರಯತ್ನಗಳು ಹೇಗೆ ವಿಶೇಷ ಗುರುತನ್ನು ಪಡೆಯಬಹುದು ಎಂಬುದಕ್ಕೆ ಇದು ಒಂದು ಉದಾಹರಣೆಯಾಗಿದೆ.