ಗುಜರಾತ್ ಏಪ್ರಿಲ್ 27: ಗುಜರಾತ್ ರಾಜ್ಯದ ಸೂರತ್ ನಗರದಲ್ಲಿ ನಡೆದಿರುವ ಭೀಭತ್ಸ ಘಟನೆಯೊಂದು ಸಾರ್ವಜನಿಕರನ್ನು ಬೆಚ್ಚಿಬೀಳಿಸಿದೆ. ವ್ಯಕ್ತಿಯೊಬ್ಬ ತನ್ನ ಹೆಂಡತಿಯನ್ನು ಕೊಂದು, ಆಕೆಯ ಮೃತದೇಹವನ್ನು ಮರದ ಪೆಟ್ಟಿಗೆಯಲ್ಲಿ ಅಡಗಿಸಿ, ನಂತರ ‘ನಾಪತ್ತೆಯಾಗಿದ್ದಾಳೆ’ ಎಂದು ನಾಟಕವಾಡಿದ ಪತಿಯ ಕೃತ್ಯ ಎಲ್ಲರನ್ನೂ ಬೆಚ್ಚಿಬೀಳಿಸಿದೆ.
40 ವರ್ಷದ ವಿಶಾಲ್ ಸಾಲ್ವಿ ಎಂಬಾತ ತನ್ನ ಪತ್ನಿ ಶಿಲ್ಪಾ ಸಾಲ್ವಿ (39) ಅವರನ್ನು ಹತ್ಯೆ ಮಾಡಿ, ಶವವನ್ನು ಮನೆಯಲ್ಲೇ ಇದ್ದ ಮರದ ಪೆಟ್ಟಿಗೆಯಲ್ಲಿ ಅಡಗಿಸಿಟ್ಟಿದ್ದಾನೆ. ನಂತರ ಪತ್ನಿ ನಾಪತ್ತೆಯಾಗಿದ್ದಾಳೆ ಎಂದು ಪೊಲೀಸರಲ್ಲಿ ದೂರು ದಾಖಲಿಸಿದ್ದು, ಪೊಲೀಸರು ತನಿಖೆಯ ಮೂಲಕ ಗಂಡನ ಅಸಲಿ ಮುಖವನನ್ಉ ಬಯಲಿಗೆಳೆದಿದ್ದಾರೆ.
ದೂರಿನ ಹಿಂದಿನ ನಿಗೂಢತೆ
ಶಿಲ್ಪಾ ಅವರು ಇದ್ದಕ್ಕಿದ್ದಂತೆ ನಾಪತ್ತೆಯಾದಾಗ, ಅವರ ಪತಿ ವಿಶಾಲ್ ಸಾಲ್ವಿ ನಾಪತ್ತೆ ದೂರು ದಾಖಲಿಸಿದ್ದರು. “ನನ್ನ ಪತ್ನಿ ತಾನಾಗಿಯೇ ಮನೆಬಿಟ್ಟು ಹೋಗಿದ್ದಾಳೆ. ಹೋಗುವ ಮುನ್ನ ಅವಳು ಒಂದು ಪತ್ರವನ್ನೂ ಬರೆದಿಟ್ಟಿದ್ದಾಳೆ” ಎಂದು ವಿಶಾಲ್ ಪೊಲೀಸರಿಗೆ ತಿಳಿಸಿದ್ದ. ಆದರೆ, ಆ ಪತ್ರದಲ್ಲಿನ ಬರವಣಿಗೆಯ ಶೈಲಿ ವಿಶಾಲ್ ಅವರ ಕೈಬರಹಕ್ಕೆ ಹೋಲಿಕೆಯಾಗಿತ್ತು. ಈ ಗಂಭೀರ ಅನುಮಾನದ ಹಿನ್ನೆಲೆ ಪೊಲೀಸರು ವಿಶಾಲ್ ಅವರನ್ನು ಪ್ರತ್ಯೇಕವಾಗಿ ವಿಚಾರಣೆಗೆ ಒಳಪಡಿಸಿದರು.
ಪೊಲೀಸರ ವಿಚಾರಣೆ ಕೊನೆಯಲ್ಲಿ ಆ ವ್ಯಕ್ತಿ ತನ್ನ ಪತ್ನಿ ಶಿಲ್ಪಾ ಅವರನ್ನೇ ಹತ್ಯೆ ಮಾಡಿರುವುದಾಗಿ ಒಪ್ಪಿಕೊಂಡ. ಶವವನ್ನು ಮನೆಯೊಳಗಿನ ನಿರ್ಜನ ಪ್ರದೇಶದಲ್ಲಿದ್ದ ಮರದ ಪೆಟ್ಟಿಗೆಯಲ್ಲಿ ಅಡಗಿಸಿಟ್ಟ ಸ್ಥಳವನ್ನೂ ತೋರಿಸಿದ್ದಾನೆ. ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ, ಮರದ ಪೆಟ್ಟಿಗೆಯಿಂದ ಶಿಲ್ಪಾ ಅವರ ಶವವನ್ನು ವಶಕ್ಕೆ ಪಡೆದರು. ಮರಣೋತ್ತರ ಪರೀಕ್ಷೆ ನಂತರ, ಶಿಲ್ಪಾ ಅವರನ್ನು ಹೇಗೆ ಹತ್ಯೆ ಮಾಡಲಾಗಿದೆ ಎಂಬುದು ತಿಳಿಯಲಿದೆ.
ಶಿಲ್ಪಾ ಸಾಲ್ವಿ ಯಾರು?
ಮೃತೆ ಶಿಲ್ಪಾ ಸಾಲ್ವಿ (39) ಅವರು ವೃತ್ತಿಯಲ್ಲಿ ಡಯಟೀಶಿಯನ್ ಆಗಿ ಕೆಲಸ ಮಾಡುತ್ತಿದ್ದರು. ಆರೋಗ್ಯಕರ ಜೀವನಶೈಲಿ ಮತ್ತು ಪೌಷ್ಟಿಕ ಆಹಾರ ಕುರಿತು ಜನರಿಗೆ ಮಾರ್ಗದರ್ಶನ ನೀಡುತ್ತಿದ್ದರು.
ಪೊಲೀಸರ ಕ್ರಮ
ವಿಶಾಲ್ ಸಾಲ್ವಿ ವಿರುದ್ಧ ಸೂರತ್ ಪೊಲೀಸರು ಕೊಲೆ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಆರೋಪಿಯನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.