ಮರುಭೂಮಿ ದೇಶ ಎಂದು ಹೆಸರಾದ ಸೌದಿ ಅರೇಬಿಯಾದಲ್ಲಿ ಡಿಸೆಂಬರ್ 17-18ರಂದು ಅಪರೂಪದ ಹಿಮಪಾತ ಸಂಭವಿಸಿದ್ದು, ಉತ್ತರದ ತಬೂಕ್ ಪ್ರದೇಶದ ಜಬಲ್ ಅಲ್ ಲಾವ್ಜ್ (ಅಲ್ ಲಾವ್ಜ್ ಬೆಟ್ಟ) ಮತ್ತು ಟ್ರೋಜೆನಾ ಹೈಲ್ಯಾಂಡ್ಸ್ ಬಿಳಿ ಹಿಮದಿಂದ ಆವೃತವಾಗಿವೆ. ಈ ಅದ್ಭುತ ದೃಶ್ಯಗಳ ವೀಡಿಯೋಗಳು ಮತ್ತು ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ, ಜನರನ್ನು ಆಶ್ಚರ್ಯಕ್ಕೆ ಒಳಗಾಗಿಸಿವೆ. ಕೆಲವರು “ಇದು AI ಜನರೇಟೆಡ್ ಇದ್ದೀತೇ?” ಎಂದು ಪ್ರಶ್ನಿಸುತ್ತಿದ್ದಾರೆ.
ಸೌದಿ ಅರೇಬಿಯಾದ ಉತ್ತರ ಭಾಗದಲ್ಲಿ ಸಮುದ್ರ ಮಟ್ಟದಿಂದ 2,600 ಮೀಟರ್ಗೂ ಹೆಚ್ಚು ಎತ್ತರದ ಬೆಟ್ಟಗಳು ಇರುವುದರಿಂದ ಚಳಿಗಾಲದಲ್ಲಿ ಹಿಮಪಾತ ಸಂಭವಿಸುವುದು ಸಾಮಾನ್ಯವಾದರೂ, ಈ ಬಾರಿ ಡಿಸೆಂಬರ್ ಮಧ್ಯದಲ್ಲೇ ಭಾರೀ ಹಿಮ ಬೀಳುವುದು ವಿಶೇಷ. ಜಬಲ್ ಅಲ್ ಲಾವ್ಜ್ (ಅಲ್ಮಂಡ್ ಬೆಟ್ಟ) ಸಂಪೂರ್ಣ ಬಿಳಿ ಹಿಮದಿಂದ ಕೂಡಿ ವಿಂಟರ್ ವಂಡರ್ಲ್ಯಾಂಡ್ ಆಗಿ ಮಾರ್ಪಟ್ಟಿದೆ. ದಟ್ಟ ಮಂಜು ಮತ್ತು ಬಿರುಗಾಳಿಯೊಂದಿಗೆ ಹಿಮ ಬೀಳುತ್ತಿರುವ ದೃಶ್ಯಗಳು ಸಾಮಾಜಿಕ ಮಾಧ್ಯಮದಲ್ಲಿ ಲಕ್ಷಾಂತರ ವೀಕ್ಷಣೆಗಳನ್ನು ಪಡೆದಿವೆ.
ಸೌದಿ ನ್ಯಾಷನಲ್ ಸೆಂಟರ್ ಫಾರ್ ಮೆಟೀರಾಲಜಿ (NCM) ಪ್ರಕಾರ, ತಬೂಕ್, ಹೈಲ್, ಅಲ್ ಜೌಫ್, ಕ್ವಾಸಿಂ ಮತ್ತು ರಿಯಾದ್ನ ಉತ್ತರ ಭಾಗಗಳಲ್ಲಿ ತಾಪಮಾನ ಮೈನಸ್ ಡಿಗ್ರಿಗೆ ಇಳಿದಿದ್ದು, ಕೆಲವೆಡೆ -4 ಡಿಗ್ರಿ ಸೆಲ್ಸಿಯಸ್ ದಾಖಲಾಗಿದೆ. ಗುಡುಗು ಸಹಿತ ಭಾರಿ ಮಳೆ, ಆಲಿಕಲ್ಲು, ಬಿರುಗಾಳಿ, ಹಠಾತ್ ಪ್ರವಾಹ ಮತ್ತು ಸಮುದ್ರದಲ್ಲಿ ಎತ್ತರದ ಅಲೆಗಳ ಸಾಧ್ಯತೆಯಿದೆ. ರೆಡ್ ಸೀ ಮತ್ತು ಅರೇಬಿಯನ್ ಗಲ್ಫ್ನಲ್ಲಿ ಗಾಳಿ ವೇಗ 60 ಕಿ.ಮೀ.ಗಿಂತ ಹೆಚ್ಚು ಇರಬಹುದು ಎಂದು ಎಚ್ಚರಿಕೆ ನೀಡಲಾಗಿದೆ.
ಈ ಹವಾಮಾನ ಬದಲಾವಣೆಯಿಂದಾಗಿ ಕ್ವಾಸಿಂ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ರೆಡ್ ಅಲರ್ಟ್ ಘೋಷಿಸಲಾಗಿದೆ. ಮಳೆಯಿಂದ ಪ್ರವಾಹದ ಅಪಾಯವಿದ್ದು, ಜನರು ಕಣಿವೆಗಳು, ಕೆಳಗಿನ ಪ್ರದೇಶಗಳನ್ನು ತಪ್ಪಿಸಿ, ಅಧಿಕೃತ ಮಾಹಿತಿಯನ್ನು ಅನುಸರಿಸಬೇಕು ಎಂದು ಅಧಿಕಾರಿಗಳು ಸಲಹೆ ನೀಡಿದ್ದಾರೆ. ತಬೂಕ್ನಲ್ಲಿ ಹಿಮಪಾತದಿಂದ ಪ್ರವಾಸಿಗರು ಆಕರ್ಷಿತರಾಗುತ್ತಿದ್ದು, ಗಲ್ಫ್ ರಾಷ್ಟ್ರಗಳಿಂದ ಜನರು ಆಗಮಿಸುತ್ತಿದ್ದಾರೆ.
ಸೌದಿ ಅರೇಬಿಯಾದ ಉತ್ತರ ಬೆಟ್ಟಗಳಲ್ಲಿ ಚಳಿಗಾಲದಲ್ಲಿ ಹಿಮ ಬೀಳುವುದು ವಾರ್ಷಿಕ ಸಂಗತಿಯಾದರೂ, ಈ ಬಾರಿ ಆರಂಭದಲ್ಲೇ ಭಾರೀ ಹಿಮಪಾತವು ಜನರ ಗಮನ ಸೆಳೆದಿದೆ. ಪ್ರಕೃತಿಯ ಈ ಅದ್ಭುತ ಕೊಡುಗೆಯನ್ನು ಸುರಕ್ಷಿತವಾಗಿ ಆನಂದಿಸಿ ಎಂದು ಹವಾಮಾನ ಇಲಾಖೆ ಕೋರಿದೆ.