ನವದೆಹಲಿ: ಜನಸಾಮಾನ್ಯರಿಗೆ ಹಾಗೂ ದೀರ್ಘಕಾಲದ ಕಾಯಿಲೆಗಳಿಂದ ಬಳಲುತ್ತಿರುವ ಕೋಟಿ ಕೋಟಿ ರೋಗಿಗಳಿಗೆ ಕೇಂದ್ರ ಸರ್ಕಾರವು ದೊಡ್ಡ ಸಿಹಿ ಸುದ್ದಿ ನೀಡಿದೆ. ಹೃದಯ ಸಂಬಂಧಿ ಕಾಯಿಲೆಗಳು, ಮಧುಮೇಹ (ಡಯಾಬಿಟಿಸ್), ಹಾರ್ಮೋನ್ ಸಮಸ್ಯೆಗಳು ಸೇರಿದಂತೆ ಒಟ್ಟು 42 ಅಗತ್ಯ ಔಷಧಗಳ ಬೆಲೆಯನ್ನು ಕಡಿತಗೊಳಿಸಲಾಗಿದೆ. ಈ ಕ್ರಮವನ್ನು ರಾಷ್ಟ್ರೀಯ ಔಷಧ ಬೆಲೆ ನಿಯಂತ್ರಣ ಪ್ರಾಧಿಕಾರ (NPPA) ಜಾರಿಗೆ ತಂದಿದ್ದು, ಔಷಧಗಳ ದರವನ್ನು ನಿಯಂತ್ರಿಸಲು ಔಷಧ ಬೆಲೆ ನಿಯಂತ್ರಣ ಕಾಯ್ದೆ 2013ರ ಅಡಿಯಲ್ಲಿ ಕ್ರಮ ಕೈಗೊಳ್ಳಲಾಗಿದೆ.
ಇದರಿಂದಾಗಿ ಇನ್ನುಮುಂದೆ ಮೆಡಿಕಲ್ ಅಂಗಡಿಗಳಲ್ಲಿ ಈ ಔಷಧಗಳನ್ನು ನಿಗದಿಪಡಿಸಿದ ಗರಿಷ್ಠ ದರಕ್ಕಿಂತ ಹೆಚ್ಚು ಬೆಲೆಗೆ ಮಾರಾಟ ಮಾಡಲು ಅವಕಾಶ ಇರುವುದಿಲ್ಲ. ಈ ಕ್ರಮವು ದೇಶದ ಮಧ್ಯಮ ವರ್ಗ ಮತ್ತು ಬಡ ವರ್ಗದ ಜನರಿಗೆ ನೆರವಾಗಲಿದೆ. ಪ್ರತಿದಿನ ಮಾತ್ರೆಗಳನ್ನು ಸೇವಿಸಬೇಕಾದ ರೋಗಿಗಳಿಗೆ ಈ ದರ ಇಳಿಕೆ ದೊಡ್ಡ ಮಟ್ಟದ ಉಳಿತಾಯವನ್ನು ನೀಡಲಿದೆ.
ಬೆಲೆ ಇಳಿಕೆಗೊಂಡ ಔಷಧಗಳಲ್ಲಿ ಮುಖ್ಯವಾಗಿ ಕಾಂಬಿನೇಷನ್ ಮಾತ್ರೆಗಳು ಸೇರಿವೆ. ಉದಾಹರಣೆಗೆ, ಕೊಲೆಸ್ಟ್ರಾಲ್ ನಿಯಂತ್ರಣಕ್ಕೆ ಬಳಸುವ ಅಟೋರ್ವಾಸ್ಟಾಟಿನ್ ಮತ್ತು ಎಜೆಟಿಮೈಬ್ ಮಿಶ್ರಿತ ಮಾತ್ರೆಗಳ ದರವನ್ನು ಕಡಿತಗೊಳಿಸಲಾಗಿದೆ. ಇವುಗಳ ಬೆಲೆ ಈಗ ಪ್ರತಿ ಮಾತ್ರೆಗೆ 21.36 ರೂ. ರಿಂದ 32.46 ರೂ. ನಡುವೆ ನಿಗದಿಯಾಗಿದೆ.
ಅದೇ ರೀತಿ ಮಧುಮೇಹ ನಿಯಂತ್ರಣಕ್ಕೆ ವ್ಯಾಪಕವಾಗಿ ಬಳಸುವ ಗ್ಲಿಕ್ಲಾಜೈಡ್ ಮತ್ತು ಮೆಟ್ಫಾರ್ಮಿನ್ ಮಿಶ್ರಿತ ಮಾತ್ರೆಗಳ ಬೆಲೆ ಕೂಡ ಇಳಿಕೆ ಕಂಡಿದೆ. ಈ ಮಾತ್ರೆಗಳ ದರ ಈಗ ಸುಮಾರು 10.53 ರೂ. ಆಗಿದ್ದು, ಶುಗರ್ ರೋಗಿಗಳಿಗೆ ಇದು ದೊಡ್ಡ ಸಹಾಯವಾಗಲಿದೆ.
ಇನ್ನೂ ಬ್ಯಾಕ್ಟೀರಿಯಾ ಸೋಂಕುಗಳಿಗೆ ಬಳಸುವ ಆಂಟಿಬಯೋಟಿಕ್ ಔಷಧಗಳಲ್ಲಿ ಕೂಡ ದರ ಇಳಿಕೆ ಮಾಡಲಾಗಿದೆ. ಸೆಫಿಕ್ಸಿಮ್ ಮತ್ತು ಪೊಟ್ಯಾಸಿಯಮ್ ಕ್ಲಾವುಲನೇಟ್ ಸಂಯೋಜನೆಯ ಮಾತ್ರೆಗಳ ಬೆಲೆ ಸುಮಾರು 25 ರೂ.ಗೆ ನಿಗದಿಯಾಗಿದೆ. ಇದರಿಂದ ಸೋಂಕು ಚಿಕಿತ್ಸೆಯ ವೆಚ್ಚ ಕೂಡ ಕಡಿಮೆಯಾಗಲಿದೆ.
ಹಾರ್ಮೋನ್ ಚಿಕಿತ್ಸೆಗೆ ಬಳಸುವ ದುಬಾರಿ ಔಷಧಗಳ ಬೆಲೆಯಲ್ಲಿಯೂ ನಿಯಂತ್ರಣ ತರಲಾಗಿದೆ. ಈ ಔಷಧಗಳ ದರವನ್ನು 107 ರೂ. ರಿಂದ 120 ರೂ. ಒಳಗೆ ಮಿತಿಗೊಳಿಸಲಾಗಿದೆ. ಇದರಿಂದ ಹಾರ್ಮೋನ್ ಸಮಸ್ಯೆಗಳಿಂದ ಬಳಲುತ್ತಿರುವ ರೋಗಿಗಳಿಗೆ ಹೆಚ್ಚಿನ ಆರ್ಥಿಕ ಭಾರ ತಪ್ಪಲಿದೆ.
ಸರ್ಕಾರ ಸ್ಪಷ್ಟವಾಗಿ ತಿಳಿಸಿರುವಂತೆ, ಈ ನಿಗದಿತ ದರಕ್ಕಿಂತ ಹೆಚ್ಚಿನ ಹಣವನ್ನು ವಸೂಲಿ ಮಾಡುವಂತಿಲ್ಲ. ಜಿಎಸ್ಟಿ ಹೊರತುಪಡಿಸಿ ಹೆಚ್ಚುವರಿ ಹಣ ವಸೂಲಿ ಮಾಡಿದರೆ, ಸಂಬಂಧಿಸಿದ ಕಂಪನಿಗಳು ಅಥವಾ ಮೆಡಿಕಲ್ ಅಂಗಡಿಗಳಿಗೆ ಕಠಿಣ ಕ್ರಮ ಕೈಗೊಳ್ಳಲಾಗುತ್ತದೆ. ಹೆಚ್ಚಿನ ಹಣವನ್ನು ಬಡ್ಡಿ ಸಮೇತ ಸರ್ಕಾರಕ್ಕೆ ಮರುಪಾವತಿಸಬೇಕಾಗುತ್ತದೆ.
ಇದಲ್ಲದೆ, ಗ್ರಾಹಕರಿಗೆ ಪಾರದರ್ಶಕತೆ ಒದಗಿಸಲು ಹೊಸ ಬೆಲೆ ಪಟ್ಟಿಯನ್ನು ಪ್ರತಿಯೊಂದು ಮೆಡಿಕಲ್ ಅಂಗಡಿಯಲ್ಲಿ ಸ್ಪಷ್ಟವಾಗಿ ಪ್ರದರ್ಶಿಸುವಂತೆ ಸೂಚಿಸಲಾಗಿದೆ. ಈ ಕ್ರಮವು ಔಷಧಗಳ ದರದಲ್ಲಿ ಏರುಪೇರನ್ನು ತಡೆಯುವುದಲ್ಲದೆ, ಗ್ರಾಹಕರ ಹಕ್ಕುಗಳನ್ನು ಕಾಪಾಡಲು ಸಹಾಯ ಮಾಡಲಿದೆ.