ಭಾರತದ ಎರಡನೇ ಅತಿದೊಡ್ಡ ಐಟಿ ಸೇವಾ ಸಂಸ್ಥೆಯಾದ ಇನ್ಫೋಸಿಸ್ (Infosys), ಪ್ರತಿಭಾನ್ವಿತ ಹೊಸಬರನ್ನು ಸೆಳೆಯಲು ನಿರ್ಧಾರವೊಂದನ್ನು ಕೈಗೊಂಡಿದೆ. ಸಾಂಪ್ರದಾಯಿಕವಾಗಿ ಐಟಿ ಕ್ಷೇತ್ರದಲ್ಲಿ ಫ್ರೆಶರ್ಸ್ಗಳಿಗೆ ನೀಡಲಾಗುತ್ತಿದ್ದ ಕಡಿಮೆ ಸಂಬಳದ ಪದ್ಧತಿಯನ್ನು ಬದಿಗೊತ್ತಿರುವ ಕಂಪನಿಯು, ಈಗ ಎಂಟ್ರಿ ಲೆವೆಲ್ ಅಭ್ಯರ್ಥಿಗಳಿಗೆ ವಾರ್ಷಿಕ 21 ಲಕ್ಷ ರೂಪಾಯಿ ವರೆಗಿನ ಪ್ಯಾಕೇಜ್ ಘೋಷಿಸಿದೆ.
ವಿಶೇಷ ತಂತ್ರಜ್ಞಾನ ವಿಭಾಗಕ್ಕೆ ಭಾರಿ ಬೇಡಿಕೆ:
ಎಐ (AI) ಮತ್ತು ಡಿಜಿಟಲ್ ತಂತ್ರಜ್ಞಾನಗಳು ವೇಗವಾಗಿ ಬೆಳೆಯುತ್ತಿರುವ ಈ ಕಾಲಘಟ್ಟದಲ್ಲಿ, ವಿಶೇಷ ನೈಪುಣ್ಯ ಹೊಂದಿರುವ ಅಭ್ಯರ್ಥಿಗಳಿಗಾಗಿ ಇನ್ಫೋಸಿಸ್ ಈ ಬೃಹತ್ ಮೊತ್ತವನ್ನು ಮೀಸಲಿಟ್ಟಿದೆ. ಮುಖ್ಯವಾಗಿ ಎಂಜಿನಿಯರಿಂಗ್ ಮತ್ತು ಕಂಪ್ಯೂಟರ್ ಸೈನ್ಸ್ ವಿದ್ಯಾರ್ಥಿಗಳಿಗೆ ಈ ಅವಕಾಶ ಲಭ್ಯವಿದ್ದು, ಹುದ್ದೆಯ ಜವಾಬ್ದಾರಿಗೆ ಅನುಗುಣವಾಗಿ 7 ಲಕ್ಷ ರೂ.ನಿಂದ 21 ಲಕ್ಷ ರೂ. ವರೆಗೆ ಸಂಬಳ ನಿಗದಿಪಡಿಸಲಾಗಿದೆ. ವಿಶೇಷವೆಂದರೆ, ಭಾರತದ ಬೇರಾವ ಪ್ರಮುಖ ಐಟಿ ಕಂಪನಿಯೂ ಪ್ರಸ್ತುತ ಫ್ರೆಶರ್ಗೆ ಇಷ್ಟು ದೊಡ್ಡ ಮೊತ್ತದ ಪ್ಯಾಕೇಜ್ ನೀಡುತ್ತಿಲ್ಲ.
ಇನ್ಫೋಸಿಸ್ ವಿವಿಧ ಮಟ್ಟದ ಟ್ರೈನೀ ಹುದ್ದೆಗಳಿಗೆ ಈ ಕೆಳಗಿನಂತೆ ಸಂಬಳದ ಶ್ರೇಣಿಯನ್ನು ವಿಂಗಡಿಸಿದೆ:
-
ಸ್ಪೆಷಲಿಸ್ಟ್ ಪ್ರೋಗ್ರಾಮರ್ ಎಲ್3 (ಟ್ರೈನೀ): ವಾರ್ಷಿಕ 21 ಲಕ್ಷ ರೂ.
-
ಸ್ಪೆಷಲಿಸ್ಟ್ ಪ್ರೋಗ್ರಾಮರ್ ಎಲ್2 (ಟ್ರೈನೀ): ವಾರ್ಷಿಕ 16 ಲಕ್ಷ ರೂ.
-
ಸ್ಪೆಷಲಿಸ್ಟ್ ಪ್ರೋಗ್ರಾಮರ್ ಎಲ್1 (ಟ್ರೈನೀ): ವಾರ್ಷಿಕ 11 ಲಕ್ಷ ರೂ.
-
ಡಿಜಿಟಲ್ ಸ್ಪೆಷಲಿಸ್ಟ್ ಎಂಜಿನಿಯರ್ (ಟ್ರೈನೀ): ವಾರ್ಷಿಕ 7 ಲಕ್ಷ ರೂ.
ಆಫ್-ಕ್ಯಾಂಪಸ್ ನೇಮಕಾತಿಗೆ ಒತ್ತು:
ಇದುವರೆಗೆ ಇನ್ಫೋಸಿಸ್ ಕಾಲೇಜು ಕ್ಯಾಂಪಸ್ಗಳಿಗೆ ಭೇಟಿ ನೀಡಿ ನೇಮಕಾತಿ ಮಾಡಿಕೊಳ್ಳುತ್ತಿತ್ತು. ಆದರೆ ಇತ್ತೀಚಿನ ವರದಿಗಳ ಪ್ರಕಾರ, ಸಂಸ್ಥೆಯು ಈ ಬಾರಿ ಆಫ್-ಕ್ಯಾಂಪಸ್ (Off-campus) ನೇಮಕಾತಿಗೆ ಹೆಚ್ಚಿನ ಆದ್ಯತೆ ನೀಡಲು ನಿರ್ಧರಿಸಿದೆ. ಅಂದರೆ, ಕಾಲೇಜು ಕ್ಯಾಂಪಸ್ಗೆ ಕಂಪನಿ ಬರುವುದನ್ನು ಕಾಯುವ ಬದಲು, ಅಭ್ಯರ್ಥಿಗಳು ನೇರವಾಗಿ ಕಂಪನಿಯ ಪೋರ್ಟಲ್ ಮೂಲಕ ಅರ್ಜಿ ಸಲ್ಲಿಸಿ ಈ ಸುವರ್ಣಾವಕಾಶವನ್ನು ಪಡೆದುಕೊಳ್ಳಬಹುದಾಗಿದೆ.
20,000 ಹೊಸಬರ ನೇಮಕದ ಗುರಿ:
2025-26ರ ಹಣಕಾಸು ವರ್ಷದಲ್ಲಿ ಇನ್ಫೋಸಿಸ್ ಒಟ್ಟು 20,000 ಫ್ರೆಶರ್ಸ್ಗಳನ್ನು ಕೆಲಸಕ್ಕೆ ಸೇರಿಸಿಕೊಳ್ಳುವ ಗುರಿ ಹೊಂದಿದೆ. ಈಗಾಗಲೇ 12,000 ಮಂದಿಯನ್ನು ನೇಮಕ ಮಾಡಿಕೊಂಡಿದ್ದು, ಉಳಿದ 8,000 ಅಭ್ಯರ್ಥಿಗಳನ್ನು ಮಾರ್ಚ್ 31ರ ಒಳಗಾಗಿ ನೇಮಕ ಮಾಡಿಕೊಳ್ಳುವ ಸಾಧ್ಯತೆ ಇದೆ. ಐಟಿ ವಲಯದಲ್ಲಿ ಕಳೆದ ಒಂದು ದಶಕದಿಂದ ಸಂಬಳದ ಪ್ರಮಾಣ ಶೇ. 45ರಷ್ಟು ಮಾತ್ರ ಏರಿಕೆಯಾಗಿತ್ತು. ಆದರೆ ಇನ್ಫೋಸಿಸ್ನ ಈ ಹೊಸ ನಡೆಯು ಉದ್ಯಮದಲ್ಲಿ ಹೊಸ ಮೈಲಿಗಲ್ಲು ಸ್ಥಾಪಿಸಿದೆ.