ನವದೆಹಲಿ: ಭಾರತ ಎಂದಿಗೂ ಯಾರ ತಂಟೆಗೂ ಹೋಗುವ ದೇಶವಲ್ಲ, ಹಾಗಂತ ತನ್ನ ತಂಟೆಗೆ ಬಂದವರನ್ನು ಸುಮ್ಮನೆ ಬಿಡುವ ದೇಶವೂ ಅಲ್ಲ. ಜಾಗತಿಕ ರಾಜತಾಂತ್ರಿಕತೆಯಲ್ಲಿ ಭಾರತದ ಈ ಕಠಿಣ ನಿಲುವು ಇಂದಿಗೂ ಹಲವು ರಾಷ್ಟ್ರಗಳಲ್ಲಿ ಗೌರವದ ಜೊತೆಗೆ ಒಂದು ರೀತಿಯ ನಡುಕವನ್ನೂ ಸೃಷ್ಟಿಸಿದೆ. ಇದಕ್ಕೆ ತಾಜಾ ಉದಾಹರಣೆ ಎಂಬಂತೆ, ಇಷ್ಟು ದಿನ ಭಾರತದ ವಿಷಯದಲ್ಲಿ ಉಡಾಫೆ ಪ್ರದರ್ಶಿಸುತ್ತಿದ್ದ ಪಾಕಿಸ್ತಾನದ ಪರಮ ಮಿತ್ರ ಟರ್ಕಿಗೆ ಈಗ ಭಾರತದ ಆಯುಧಗಳ ಭೀತಿ ಶುರುವಾಗಿದೆ.
‘ನಮ್ಮ ಮೇಲ್ಯಾಕೆ ಸಿಟ್ಟು?’ ಎಂದು ಪ್ರಶ್ನಿಸಿದ ಟರ್ಕಿ!
ಗಡಿ ನಿಯಂತ್ರಣ ರೇಖೆಯುದ್ದಕ್ಕೂ ಪಾಕಿಸ್ತಾನದ ಕುತಂತ್ರಗಳಿಗೆ ಭಾರತೀಯ ಸೇನೆ ತನ್ನ ಆಧುನಿಕ ಆಯುಧಗಳ ಮೂಲಕ ತಕ್ಕ ಪ್ರತ್ಯುತ್ತರ ನೀಡುತ್ತಲೇ ಬಂದಿದೆ. ಆದರೆ, ಭಾರತದ ಆಪರೇಷನ್ಗಳನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ವಿರೋಧಿಸಿ, ಪಾಕಿಸ್ತಾನದ ಪರ ಬ್ಯಾಟ್ ಬೀಸುತ್ತಿದ್ದ ಟರ್ಕಿಗೆ ಈಗ ಭಾರತದ ಸೇನಾ ಶಕ್ತಿ ಏನು ಎಂಬುದು ಅರ್ಥವಾಗಲಾರಂಭಿಸಿದೆ. ಭಾರತದ ಹೆಮ್ಮೆಯ ‘ಬ್ರಹ್ಮೋಸ್’ (BrahMos) ಸೂಪರ್ಸಾನಿಕ್ ಕ್ರೂಸ್ ಕ್ಷಿಪಣಿಯ ಹೆಸರು ಕೇಳಿಯೇ ಟರ್ಕಿ ಈಗ ಆತಂಕಕ್ಕೆ ಒಳಗಾಗಿದೆ. “ನಮ್ಮ ಮೇಲೆ ಭಾರತಕ್ಕೆ ಏಕಿಷ್ಟು ಸಿಟ್ಟು?” ಎಂದು ಪ್ರಶ್ನಿಸುವ ಮಟ್ಟಿಗೆ ಟರ್ಕಿ ರಾಜತಾಂತ್ರಿಕವಾಗಿ ಹಿನ್ನಡೆ ಅನುಭವಿಸುತ್ತಿದೆ.
‘ಆಪರೇಷನ್’ ಯಶಸ್ಸಿನ ಬೆನ್ನಲ್ಲೇ ಭಾರತೀಯ ಶಸ್ತ್ರಾಸ್ತ್ರಗಳಿಗೆ ಜಾಗತಿಕ ಬೇಡಿಕೆ
ಭಾರತೀಯ ಸೇನೆ ನಡೆಸಿದ ಯಶಸ್ವಿ ಮಿಲಿಟರಿ ಆಪರೇಷನ್ಗಳ ಬಳಿಕ ಮೇಡ್ ಇನ್ ಇಂಡಿಯಾ (Made in India) ರಕ್ಷಣಾ ಸಾಮಗ್ರಿಗಳಿಗೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಭಾರೀ ಬೇಡಿಕೆ ಸೃಷ್ಟಿಯಾಗಿದೆ. ಭಾರತದ ಸ್ವದೇಶಿ ತಂತ್ರಜ್ಞಾನದ ಪಿನಾಕಾ ರಲ್ಟಿ-ಬ್ಯಾರೆಲ್ ರಾಕೆಟ್ ಸಿಸ್ಟಮ್, ಆಕಾಶ್ ಕ್ಷಿಪಣಿ ಮತ್ತು ಬ್ರಹ್ಮೋಸ್ ಕ್ಷಿಪಣಿಗಳನ್ನು ಖರೀದಿಸಲು ಫ್ರಾನ್ಸ್, ಇಂಡೋನೇಷ್ಯಾ, ವಿಯೆಟ್ನಾಂ ಸೇರಿದಂತೆ ಹಲವು ದೇಶಗಳು ಮುಗಿಬೀಳುತ್ತಿವೆ.
ಟರ್ಕಿಯ ವೈರಿ ಗ್ರೀಸ್ ಜೊತೆ ಭಾರತದ ಬಿಗ್ ಡೀಲ್!
ಟರ್ಕಿಯ ನಿದ್ದೆಗೆಡಿಸಿರುವ ಅಸಲಿ ವಿಷಯವೇನೆಂದರೆ, ಅದರ ಸಾಂಪ್ರದಾಯಿಕ ಎದುರಾಳಿಯಾಗಿರುವ ‘ಗ್ರೀಸ್’ ದೇಶದೊಂದಿಗೆ ಭಾರತ ರಕ್ಷಣಾ ಒಪ್ಪಂದಕ್ಕೆ ಮುಂದಾಗಿರುವುದು. ಭಾರತದ ಆಪ್ತ ಮಿತ್ರ ರಾಷ್ಟ್ರವಾಗಿರುವ ಗ್ರೀಸ್, ಭಾರತದ ಬ್ರಹ್ಮೋಸ್ ಮತ್ತು ಆಕಾಶ್ ಮಿಸೈಲ್ಗಳನ್ನು ಖರೀದಿಸಲು ತೀವ್ರ ಆಸಕ್ತಿ ತೋರಿಸಿದೆ. ಇದಕ್ಕೆ ಭಾರತ ಸರ್ಕಾರ ಕೂಡ ಸಕಾರಾತ್ಮಕವಾಗಿ ಸ್ಪಂದಿಸಿದ್ದು, ಗ್ರೀಸ್ಗೆ ಅತ್ಯಾಧುನಿಕ ಆಯುಧಗಳನ್ನು ಪೂರೈಸಲು ಒಪ್ಪಿಗೆ ಸೂಚಿಸಿದೆ ಎನ್ನಲಾಗಿದೆ.
ಜಂಟಿ ಸಮರಾಭ್ಯಾಸ ಮತ್ತು ತಂತ್ರಜ್ಞಾನದ ಹೆಜ್ಜೆ
ಕೇವಲ ಆಯುಧ ಪೂರೈಕೆಯಷ್ಟೇ ಅಲ್ಲದೆ, ಭಾರತ ಮತ್ತು ಗ್ರೀಸ್ ಜಂಟಿ ಸಮರಾಭ್ಯಾಸ ನಡೆಸಲು ಹಾಗೂ ರಕ್ಷಣಾ ವಲಯದಲ್ಲಿ ಜಂಟಿ ತಂತ್ರಜ್ಞಾನ ಅಭಿವೃದ್ಧಿಗೆ ಕೈಜೋಡಿಸುತ್ತಿವೆ. ಈ ಬೆಳವಣಿಗೆಯು ಮೆಡಿಟರೇನಿಯನ್ ಸಮುದ್ರ ಭಾಗದಲ್ಲಿ ಟರ್ಕಿಯ ಏಕಸ್ವಾಮ್ಯಕ್ಕೆ ಬ್ರೇಕ್ ಹಾಕಲಿದ್ದು, ಪಾಕಿಸ್ತಾನದ ಬೆಂಬಲಕ್ಕೆ ನಿಲ್ಲುತ್ತಿದ್ದ ಟರ್ಕಿಗೆ ಭಾರತ ನೀಡಿರುವ ಪರೋಕ್ಷ ‘ಚೆಕ್ ಮೇಟ್’ ಎಂದೇ ವಿಶ್ಲೇಷಿಸಲಾಗುತ್ತಿದೆ. ಇಷ್ಟು ದಿನ ಜಾಗತಿಕ ವೇದಿಕೆಗಳಲ್ಲಿ ಭಾರತದ ವಿರುದ್ಧ ಮಾತನಾಡುತ್ತಿದ್ದ ದೇಶಗಳಿಗೆ, ಭಾರತೀಯ ಸೇನೆಯ ಇಂದಿನ ದೈತ್ಯ ರೂಪವೇ ನಡುಕ ಹುಟ್ಟಿಸುವಂತೆ ಮಾಡಿದೆ.