ನವದೆಹಲಿ: ರಾಷ್ಟ್ರ ರಾಜಧಾನಿಯಲ್ಲಿ ನಡೆದ ಭಾರತದ ಎಐ (AI) ಶೃಂಗಸಭೆಯಲ್ಲಿ ರೋಬೋಟಿಕ್ ಡಾಗ್ ಪ್ರದರ್ಶನದ ವಿಚಾರ ದೊಡ್ಡ ವಿವಾದಕ್ಕೆ ಕಾರಣವಾಗಿದೆ. ಉತ್ತರ ಪ್ರದೇಶದ ಗ್ರೇಟರ್ ನೋಯ್ಡಾದಲ್ಲಿರುವ ಗಾಲ್ಗೋಟಿಯಾಸ್ ವಿಶ್ವವಿದ್ಯಾಲಯ (Galgotias University) ತನ್ನ ಬೂತ್ನಲ್ಲಿ ‘ಓರಿಯೊನ್’ ಎಂಬ ಹೆಸರಿನಲ್ಲಿ ರೋಬೋಟಿಕ್ ಡಾಗ್ ಅನ್ನು ಪ್ರದರ್ಶಿಸಿತ್ತು. ಆದರೆ ಈ ರೋಬೋಟ್ ಚೀನಾ ನಿರ್ಮಿತ ಉತ್ಪನ್ನವೆಂಬ ಆರೋಪ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ, ಸಮಿಟ್ ವಾತಾವರಣವೇ ಗದ್ದಲಗೊಳಿಸಿದೆ.
‘ಇನ್ಹೌಸ್’ ನಿರ್ಮಿತವೆಂಬ ದಾವೆ
ವೈರಲ್ ಆದ ವಿಡಿಯೋದಲ್ಲಿ ವಿಶ್ವವಿದ್ಯಾಲಯದ ಪ್ರೊಫೆಸರ್ ನೇಹಾ ಸಿಂಗ್ ರೋಬೋಟಿಕ್ ಡಾಗ್ ಅನ್ನು ಪ್ರದರ್ಶಿಸಿ, ಇದು ಎಐ ಇನಿಶಿಯೇಟಿವ್ ಅಡಿ ವಿಶ್ವವಿದ್ಯಾಲಯವೇ ಅಭಿವೃದ್ಧಿಪಡಿಸಿದ ‘ಇನ್ಹೌಸ್’ ಉತ್ಪನ್ನ ಎಂದು ಹೇಳಿದ್ದಾರೆ.. ಇದಕ್ಕಾಗಿ ಸುಮಾರು ₹350 ಕೋಟಿ ವೆಚ್ಚ ಮಾಡಲಾಗಿದೆ ಎಂದು ಅವರು ಹೇಳಿದ್ದಾರೆ..
ಆದರೆ ಕೆಲವು ಟೆಕ್ ಬಳಕೆದಾರರು ಮತ್ತು ವಿಶ್ಲೇಷಕರು ಈ ರೋಬೋಟಿಕ್ ಡಾಗ್ ವಾಸ್ತವವಾಗಿ ಚೀನಾ ಕಂಪನಿಯಾದ ಯುನಿಟ್ರೀ ರೊಬೊಟಿಕ್ಸ್ (Unitree Robotics) ನಿರ್ಮಿಸಿರುವ ಯುನಿಟ್ರೀ Go2 ಮಾದರಿಯೇ ಆಗಿದೆ ಎಂದು ಪ್ರತಿಪಾದಿಸಿದರು. ಈ ಮಾದರಿ ವಾಣಿಜ್ಯವಾಗಿ ಸುಮಾರು 2,800 ಡಾಲರ್ (ಸುಮಾರು ₹2.3 ಲಕ್ಷ) ದರಕ್ಕೆ ಲಭ್ಯವಿದೆ ಎಂದು ಅವರು ಉಲ್ಲೇಖಿಸಿದರು.
ಸಾಮಾಜಿಕ ಜಾಲತಾಣಗಳಲ್ಲಿ ಟೀಕಾಪ್ರಹಾರ
ವಿಡಿಯೋ ವೈರಲ್ ಆದ ತಕ್ಷಣವೇ, ‘ಇನ್ಹೌಸ್’ ಅಭಿವೃದ್ಧಿ ಎಂಬ ಹೇಳಿಕೆಗೆ ವಿರುದ್ಧವಾಗಿ ಸಾಕ್ಷ್ಯಾಧಾರಗಳೊಂದಿಗೆ ಹಲವರು ಪ್ರಶ್ನೆ ಎತ್ತಿದರು. ರೋಬೋಟ್ನ ವಿನ್ಯಾಸ, ಚಲನೆ ಹಾಗೂ ತಾಂತ್ರಿಕ ವೈಶಿಷ್ಟ್ಯಗಳು ಯುನಿಟ್ರಿ GO2 ಮಾದರಿಯೊಂದಿಗೆ ಹೋಲಿಕೆಯಾಗುತ್ತವೆ ಎಂಬ ಅಭಿಪ್ರಾಯಗಳು ಹರಿದಾಡಿದವು.
ಇದರ ಪರಿಣಾಮವಾಗಿ ವಿಶ್ವವಿದ್ಯಾಲಯದ ಹೇಳಿಕೆಗಳ ಬಗ್ಗೆ ಅನುಮಾನ ಮೂಡಿದ್ದು, ಪ್ರೊಫೆಸರ್ ನೇಹಾ ಸಿಂಗ್ ಅವರ ಹೇಳಿಕೆಗಳ ಸತ್ಯಾಸತ್ಯತೆ ಪ್ರಶ್ನಿಸಲಾಯಿತು. ₹350 ಕೋಟಿ ವೆಚ್ಚದ ದಾವೆ ಮತ್ತು ಮಾರುಕಟ್ಟೆಯಲ್ಲಿ ಲಭ್ಯವಿರುವ ಉತ್ಪನ್ನದ ಬೆಲೆ ನಡುವೆ ಭಾರೀ ವ್ಯತ್ಯಾಸವಿರುವುದು ನೆಟ್ಟಿಗರ ಆಕ್ರೋಶಕ್ಕೆ ಕಾರಣವಾಯಿತು.
ರಾಜಕೀಯ ಆರೋಪ–ಪ್ರತ್ಯಾರೋಪ
ಈ ವಿವಾದ ರಾಜಕೀಯ ತಿರುವನ್ನೂ ಪಡೆದಿದೆ. ಭಾರತದ AI ಶೃಂಗದಲ್ಲಿ ಚೀನಾ ಉತ್ಪನ್ನ ಪ್ರದರ್ಶನಕ್ಕೆ ಅವಕಾಶ ನೀಡಲಾಗಿದೆ ಎಂಬ ಆರೋಪವನ್ನು ಕೆಲವು ವಿರೋಧ ಪಕ್ಷಗಳು ಕೇಂದ್ರ ಸರ್ಕಾರದ ವಿರುದ್ಧ ಹೊರಿಸಿವೆ. ಸ್ವದೇಶಿ ತಂತ್ರಜ್ಞಾನ ಪ್ರೋತ್ಸಾಹದ ಮಾತುಗಳ ನಡುವೆಯೇ ವಿದೇಶಿ ಉತ್ಪನ್ನ ಪ್ರದರ್ಶನ ನಡೆದಿರುವುದು ಪ್ರಶ್ನಾರ್ಥಕ ಎಂದು ಟೀಕಿಸಲಾಗಿದೆ.
ಸಮಿಟ್ನಿಂದ ಹೊರನಡೆದ ವಿವಿ?
ವಿವಾದ ಗಂಭೀರವಾಗುತ್ತಿದ್ದಂತೆ, ಸಂಬಂಧಿತ ವಿಶ್ವವಿದ್ಯಾಲಯಕ್ಕೆ ಶೃಂಗಸಭೆಯಿಂದ ಹೊರನಡೆಯುವಂತೆ ಸೂಚಿಸಲಾಗಿದೆ ಎಂಬ ವರದಿಗಳು ಹೊರಬಿದ್ದಿವೆ. ಈ ಬೆಳವಣಿಗೆ AI ಶೃಂಗಸಭೆಯ ಪ್ರತಿಷ್ಠೆಗೆ ಧಕ್ಕೆಯಾಯಿತೆಂಬ ಮಾತುಗಳೂ ಕೇಳಿಬಂದಿವೆ.
