ಹೈದರಾಬಾದ್, ಏಪ್ರಿಲ್ 11: ಮದುವೆಯಾಗಲು ನಿರಾಕರಿಸಿದ್ದಕ್ಕಾಗಿ ವ್ಯಕ್ತಿಯೊಬ್ಬ 24 ವರ್ಷದ ಯುವತಿಗೆ ತನ್ನ ಎಚ್ಐವಿ ಪಾಸಿಟಿವ್ (HIV-positive) ರಕ್ತವನ್ನು ಇಂಜೆಕ್ಟ್ ಮಾಡಿದ ನೀಚ ಘಟನೆ ಹೈದರಾಬಾದ್ನಲ್ಲಿ ನಡೆದಿತ್ತು. ಈ ಘಟನೆ ನಡೆದು ಸುಮಾರು ಒಂದು ತಿಂಗಳ ನಂತರ, ಮನನೊಂದ ಯುವತಿ ತನ್ನ ಮನೆಯಲ್ಲಿ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ.
ಪ್ರಕರಣದ ಹಿನ್ನೆಲೆ ಏನು?
ಪೋಲಿಸ್ ಮೂಲಗಳ ಪ್ರಕಾರ, ಆರೋಪಿ ಮನೋಹರ್ ಮತ್ತು ಸಂತ್ರಸ್ತೆಯ ಸಂಬಂಧಿಕರು. ಆಕೆಯ ಪೋಷಕರು ಆರಂಭದಲ್ಲಿ ಇವರಿಬ್ಬರ ಮದುವೆಯನ್ನು ನಿಶ್ಚಯಿಸಿದ್ದರು. ಆದರೆ, ಮನೋಹರ್ ಮತ್ತು ಅವನ ಪೋಷಕರು ಎಚ್ಐವಿ ಪೀಡಿತರಾಗಿದ್ದರು ಎಂಬುದು ನಂತರ ತಿಳಿದುಬಂತು. ಕಳೆದ ವರ್ಷ ಸೆಪ್ಟೆಂಬರ್ನಲ್ಲಿ ಯುವತಿಯ ಕುಟುಂಬಸ್ಥರು ಮನೋಹರನಿಗೆ ಎಚ್ಐವಿ ಪರೀಕ್ಷೆ ಮಾಡಿಸಿದಾಗ, ಅವನು ಸೋಂಕಿತನಾಗಿರುವುದು ದೃಢಪಟ್ಟಿತು. ಆಕೆ ತಕ್ಷಣ ಮದುವೆಯನ್ನು ರದ್ದುಗೊಳಿಸಿದಳು.
ಇಂಜೆಕ್ಷನ್ ಘಟನೆ
ಮದುವೆ ರದ್ದಾದ ಕಾರಣಕ್ಕೆ ಮನೋಹರ್, ಮಾರ್ಚ್ 11, 2026 ರಂದು ಯುವತಿಯ ಮನೆಗೆ ನುಗ್ಗಿ ಅವಳ ಮೇಲೆ ಹಲ್ಲೆ ನಡೆಸಿದ. ನಂತರ, ತನ್ನ ದೇಹದಿಂದ ಎಚ್ಐವಿ ಸೋಂಕಿತ ರಕ್ತವನ್ನು ಸಿರಿಂಜ್ ಮೂಲಕ ತೆಗೆದುಕೊಂಡು ಬಲವಂತವಾಗಿ ಆಕೆಗೆ ಚುಚ್ಚಿದ. “ನೀನು ನನ್ನನ್ನು ಮದುವೆಯಾಗದಿದ್ದರೆ, ನೀನೂ ನನ್ನಂತೆಯೇ ಅನುಭವಿಸು” ಎಂದು ಬೆದರಿಸಿದ್ದಾನೆ. ಈ ದೃಶ್ಯವನ್ನು ಕಂಡು ಆಕೆಯ ಕುಟುಂಬಸ್ಥರು ತಕ್ಷಣ ಪೊಲೀಸರಿಗೆ ಮಾಹಿತಿ ನೀಡಿದರು. ಪೊಲೀಸರು ಮನೋಹರನನ್ನು ಬಂಧಿಸಿದ್ದರು.
ಒಂದು ತಿಂಗಳ ನಂತರದ ದುರಂತ
ಎಚ್ಐವಿ ಸೋಂಕಿತ ರಕ್ತ ಚುಚ್ಚಿದ ಬಳಿಕ ಯುವತಿ ತೀವ್ರ ಮಾನಸಿಕ ಒತ್ತಡಕ್ಕೆ ಒಳಗಾಗಿದ್ದಳು. ತನಗೆ ಎಚ್ಐವಿ ಸೋಂಕು ತಗುಲಿರಬಹುದು ಎಂಬ ಭಯ ಮತ್ತು ಅವಮಾನದಿಂದ ಆಕೆ ದಿನೇ ದಿನೇ ಕುಗ್ಗಿದಳು. ವೈದ್ಯಕೀಯ ಪರೀಕ್ಷೆಗಳು ನಡೆಯುತ್ತಿದ್ದರೂ, ಅಂತಿಮ ಫಲಿತಾಂಶಕ್ಕಾಗಿ ಕಾಯುತ್ತಿರುವಾಗಲೇ ಆಕೆ ಮನಸ್ಸಿನ ಸ್ಥೈರ್ಯ ಕಳೆದುಕೊಂಡಿದ್ದರು.
ಏಪ್ರಿಲ್ 10 ರಂದು, ಯುವತಿಯ ತನ್ನ ಕೋಣೆಯಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದೆ. ತಕ್ಷಣ ಅವಳನ್ನು ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಯಿತು. ಆದರೆ ವೈದ್ಯರು ಆಕೆ ಮೃತಪಟ್ಟಿರುವುದಾಗಿ ಘೋಷಿಸಿದರು. ಆಕೆಯ ಅಂತ್ಯಕ್ರಿಯೆ ಕುಟುಂಬಸ್ಥರ ಸಮ್ಮುಖದಲ್ಲಿ ನೆರವೇರಿತು.