ಅಮೆರಿಕದ ನ್ಯೂಜೆರ್ಸಿ ರಾಜ್ಯದ ಹ್ಯಾಮಂಟನ್ ಬಳಿ ಭೀಕರ ಹೆಲಿಕಾಪ್ಟರ್ ಅಪಘಾತ ಸಂಭವಿಸಿದೆ. ಎರಡು ಹಗುರ ತೂಕದ ಹೆಲಿಕಾಪ್ಟರ್ಗಳು (Enstrom F-28A ಮತ್ತು Enstrom 280C ಮಾದರಿ) ಆಕಾಶದಲ್ಲೇ ಮುಖಾಮುಖಿ ಡಿಕ್ಕಿ ಹೊಡೆದು ಕೆಳಗೆ ಬಿದ್ದಿವೆ. ಸ್ಥಳೀಯ ಸಮಯ ಸುಮಾರು ಬೆಳಗ್ಗೆ 11:25ಕ್ಕೆ (ಭಾರತೀಯ ಸಮಯ ಸಂಜೆ 4:55) ನಡೆದ ಈ ದುರಂತದಲ್ಲಿ ಒಬ್ಬ ಪೈಲಟ್ ಸಾವನ್ನಪ್ಪಿದ್ದು, ಮತ್ತೊಬ್ಬರು ಗಂಭೀರವಾಗಿ ಗಾಯಗೊಂಡಿದ್ದಾರೆ ಎಂದು ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ (FAA) ಮತ್ತು ಹ್ಯಾಮಂಟನ್ ಪೊಲೀಸ್ ಇಲಾಖೆ ತಿಳಿಸಿದೆ.
ಅಪಘಾತದಲ್ಲಿ ತೊಡಗಿಕೊಂಡಿದ್ದ ಎರಡು ಹೆಲಿಕಾಪ್ಟರ್ಗಳಲ್ಲಿ ಕೇವಲ ಪೈಲಟ್ಗಳು ಮಾತ್ರ ಇದ್ದರು ಪ್ರಯಾಣಿಕರಿಲ್ಲ. ಡಿಕ್ಕಿಯ ನಂತರ ಒಂದು ಹೆಲಿಕಾಪ್ಟರ್ ಸಂಪೂರ್ಣ ಬೆಂಕಿಯಲ್ಲಿ ಮುಳುಗಿ ನೆಲಕ್ಕೆ ಅಪ್ಪಳಿಸಿತು, ಮತ್ತೊಂದು ಕಾಡಿನಲ್ಲಿ ಬಿದ್ದು ನಜ್ಜುಗುಜ್ಜಾಗಿದೆ. ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡುತ್ತಿರುವ ವೀಡಿಯೊಗಳು ಹೆಲಿಕಾಪ್ಟರ್ಗಳು ನಿಯಂತ್ರಣ ತಪ್ಪಿ ತಿರುಗುತ್ತಾ ಕೆಳಗೆ ಬೀಳುತ್ತಿರುವ ಭಯಾನಕ ದೃಶ್ಯಗಳನ್ನು ತೋರಿಸುತ್ತವೆ.
ಹ್ಯಾಮಂಟನ್ ಪೊಲೀಸ್ ಮುಖ್ಯಸ್ಥ ಕೆವಿನ್ ಫ್ರೀಲ್ ಅವರು, “ಎರಡು ಹೆಲಿಕಾಪ್ಟರ್ಗಳು ಒಟ್ಟಿಗೆ ಹಾರುತ್ತಿದ್ದವು . ಹತ್ತಿರದಲ್ಲಿ ಹಾರುತ್ತಿದ್ದುದೇ ಡಿಕ್ಕಿಗೆ ಕಾರಣವಾಗಿರಬಹುದು” ಎಂದು ಹೇಳಿದ್ದಾರೆ. ಸ್ಥಳೀಯರು ದೊಡ್ಡ ಸದ್ದು ಕೇಳಿ ಆಕಾಶ ನೋಡಿದಾಗ ಹೆಲಿಕಾಪ್ಟರ್ಗಳು ತಿರುಗುತ್ತಾ ಬೀಳುತ್ತಿರುವುದನ್ನು ಕಂಡಿದ್ದಾರೆ. ಒಬ್ಬ ಸಾಕ್ಷಿಯಾದ ಡ್ಯಾನ್ ಡೇಮ್ಶೆಕ್ ಅವರು, “ದೊಡ್ಡ ಸ್ಫೋಟದ ಸದ್ದು ಕೇಳಿ ನೋಡಿದಾಗ ಒಂದು ಹೆಲಿಕಾಪ್ಟರ್ ತಿರುಗುತ್ತಾ ಬೀಳುತ್ತಿತ್ತು, ನಂತರ ಎರಡನೇಯದೂ” ಎಂದು ಹೇಳಿದ್ದಾರೆ.
ತುರ್ತು ಸೇವೆಗಳು ತಕ್ಷಣ ಸ್ಥಳಕ್ಕೆ ಧಾವಿಸಿ ಬೆಂಕಿ ನಂದಿಸಿದವು ಮತ್ತು ರಕ್ಷಣಾ ಕಾರ್ಯ ನಡೆಸಿದವು. ಗಾಯಗೊಂಡ ಪೈಲಟ್ನ್ನು ಹೆಲಿಕಾಪ್ಟರ್ ಮೂಲಕ ಆಸ್ಪತ್ರೆಗೆ ಕಳುಹಿಸಲಾಗಿದೆ. ಅಪಘಾತದ ಸ್ಥಳದಲ್ಲಿ ದಟ್ಟ ಹೊಗೆ ಮತ್ತು ಜ್ವಾಲೆಗಳು ಕಾಣಿಸಿಕೊಂಡಿದ್ದವು. ಒಂದು ಹೆಲಿಕಾಪ್ಟರ್ನ ಬಾಲ ಭಾಗ ಮಾತ್ರ ಉಳಿದಿದ್ದು, ಉಳಿದ್ದು ಸುಟ್ಟು ಭಸ್ಮವಾಗಿದೆ. ಮತ್ತೊಂದರ ಕಾಕ್ಪಿಟ್ ನಜ್ಜುಗುಜ್ಜಾಗಿದೆ.
ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ (FAA) ಮತ್ತು ರಾಷ್ಟ್ರೀಯ ಸಾರಿಗೆ ಸುರಕ್ಷತಾ ಮಂಡಳಿ (NTSB) ತನಿಖೆ ಆರಂಭಿಸಿವೆ. ಡಿಕ್ಕಿಗೆ ನಿಖರ ಕಾರಣ ಇನ್ನೂ ತಿಳಿದುಬಂದಿಲ್ಲ, ಆದರೆ “see and avoid” ನಿಯಮ ಉಲ್ಲಂಘನೆಯೇ ಮುಖ್ಯ ಕಾರಣ ಎಂಬ ಅನುಮಾನ ವ್ಯಕ್ತವಾಗಿದೆ. ಹ್ಯಾಮಂಟನ್ ಸುಮಾರು 15,000 ಜನಸಂಖ್ಯೆ ಹೊಂದಿದ ಸಣ್ಣ ಪಟ್ಟಣವಾಗಿದ್ದು, ಫಿಲಡೆಲ್ಫಿಯಾದಿಂದ 35 ಮೈಲಿ ದೂರದಲ್ಲಿದೆ.
ಈ ದುರಂತದಿಂದ ಸ್ಥಳೀಯರು ಆತಂಕಗೊಂಡಿದ್ದಾರೆ. ಅಮೆರಿಕದಲ್ಲಿ ಹೆಲಿಕಾಪ್ಟರ್ ಸುರಕ್ಷತೆಯ ಬಗ್ಗೆ ಮತ್ತೊಮ್ಮೆ ಚರ್ಚೆ ಆರಂಭವಾಗಿದೆ. ಮೃತ ಪೈಲಟ್ನ ಕುಟುಂಬಕ್ಕೆ ಸಂತಾಪ ಸೂಚಿಸುತ್ತೇವೆ. ತನಿಖೆಯಿಂದ ಸತ್ಯ ಬಯಲಾಗಲಿ ಎಂದು ಆಶಿಸೋಣ.