ಲಕ್ನೋ: ಕೇವಲ ಯೂಟ್ಯೂಬ್ ವಿಡಿಯೋಗಳ ಮೂಲಕ ಕೋಟ್ಯಂತರ ರೂಪಾಯಿ ಗಳಿಸಿ ಐಷಾರಾಮಿ ಜೀವನ ನಡೆಸುತ್ತಿದ್ದ ಉತ್ತರ ಪ್ರದೇಶದ ಯೂಟ್ಯೂಬರ್ ಅನುರಾಗ್ ದ್ವಿವೇದಿಗೆ ಜಾರಿ ನಿರ್ದೇಶನಾಲಯ (ED) ಬಿಗ್ ಶಾಕ್ ನೀಡಿದೆ. ಅಕ್ರಮ ಹಣ ವರ್ಗಾವಣೆ ಮತ್ತು ಕಾನೂನುಬಾಹಿರ ಬೆಟ್ಟಿಂಗ್ ಅಪ್ಲಿಕೇಶನ್ಗಳ ಪ್ರಚಾರದ ಆರೋಪದ ಮೇಲೆ ಇಡಿ ಅಧಿಕಾರಿಗಳು ಅನುರಾಗ್ ಅವರ ಉನ್ನಾವೊ ನಿವಾಸದ ಮೇಲೆ ದಾಳಿ ನಡೆಸಿದ್ದು, ಅಲ್ಲಿನ ಐಷಾರಾಮಿ ಕಾರುಗಳನ್ನ ಕಂಡು ಅಧಿಕಾರಿಗಳೇ ಶಾಕ್ ಆಗಿದ್ದಾರೆ.
ಬೆಟ್ಟಿಂಗ್ ಅಪ್ಲಿಕೇಶನ್ ಮೂಲಕ ಅಕ್ರಮ ಸಂಪಾದನೆ
ಅನುರಾಗ್ ದ್ವಿವೇದಿ ಅವರು ತಮ್ಮ ಯೂಟ್ಯೂಬ್ ಚಾನೆಲ್ ಮೂಲಕ ವಿವಿಧ ಆನ್ಲೈನ್ ಬೆಟ್ಟಿಂಗ್ ಮತ್ತು ಜೂಜಾಟದ ಅಪ್ಲಿಕೇಶನ್ಗಳನ್ನು ದೊಡ್ಡ ಮಟ್ಟದಲ್ಲಿ ಪ್ರಚಾರ ಮಾಡುತ್ತಿದ್ದರು. ಭಾರತದಲ್ಲಿ ಕಾನೂನುಬಾಹಿರವೆಂದು ಪರಿಗಣಿಸಲಾದ ‘ಸೈ ಎಂಜ್’ (Sci-Enge) ಸೇರಿದಂತೆ ಹಲವು ಗೇಮಿಂಗ್ ಆಪ್ಗಳ ಮೂಲಕ ಇವರು ಭಾರಿ ಪ್ರಮಾಣದ ಲಾಭ ಗಳಿಸುತ್ತಿದ್ದರು ಎಂಬುದು ಇಡಿ ತನಿಖೆಯಿಂದ ಬಯಲಾಗಿದೆ. ದ್ವಿವೇದಿ ಅವರ ಪ್ರಚೋದನಾತ್ಮಕ ವಿಡಿಯೋಗಳನ್ನು ನೋಡಿ ಸಾವಿರಾರು ಯುವಕರು ಈ ಬೆಟ್ಟಿಂಗ್ ಅಪ್ಲಿಕೇಶನ್ಗಳಿಗೆ ಹಣ ಸುರಿದು ಮೋಸ ಹೋಗಿರುವುದು ತನಿಖೆಯಲ್ಲಿ ತಿಳಿದುಬಂದಿದೆ.
ಇಡಿ ಅಧಿಕಾರಿಗಳು ದ್ವಿವೇದಿ ನಿವಾಸವನ್ನು ಪರಿಶೀಲಿಸಿದಾಗ ಕಂಡುಬಂದ ಕಾರುಗಳ ಪಟ್ಟಿ ಹೀಗಿದೆ:
-
ಲ್ಯಾಂಬೋರ್ಗಿನಿ ಉರುಸ್ SE: ಇದರ ಬೆಲೆ ಅಂದಾಜು 3 ಕೋಟಿ ರೂ.ಗೂ ಅಧಿಕ.
-
BMW Z4: ಅತ್ಯಂತ ದುಬಾರಿ ಸ್ಪೋರ್ಟ್ಸ್ ಕಾರ್.
-
ಮರ್ಸಿಡಿಸ್ ಬೆಂಜ್ ಸೆಡಾನ್: ಐಷಾರಾಮಿ ಸರಣಿಯ ಕಾರು.
-
ಮಹೀಂದ್ರಾ ಥಾರ್: ಆಫ್-ರೋಡಿಂಗ್ ವಾಹನ.
ಕೇವಲ ಮನರಂಜನೆಯ ಹೆಸರಿನಲ್ಲಿ ಚಾನೆಲ್ ನಡೆಸುತ್ತಿದ್ದ ಯೂಟ್ಯೂಬರ್ ಒಬ್ಬರ ಬಳಿ ಇಷ್ಟೊಂದು ದುಬಾರಿ ವಾಹನಗಳು ಪತ್ತೆಯಾಗಿರುವುದು ಅಕ್ರಮ ಹಣ ವರ್ಗಾವಣೆಯ ಅನುಮಾನವನ್ನು ಸೃಷ್ಟಿಸಿದೆ. ಈ ಕಾರುಗಳನ್ನು ಬೆಟ್ಟಿಂಗ್ ಮೂಲದಿಂದ ಬಂದ ಕಪ್ಪು ಹಣದಲ್ಲೇ ಖರೀದಿಸಲಾಗಿದೆ ಎಂದು ಪ್ರಾಥಮಿಕ ತನಿಖೆಯಲ್ಲಿ ತಿಳಿದುಬಂದಿದೆ.
ಅನುರಾಗ್ ದ್ವಿವೇದಿ ಅವರು ಲಕ್ಷಾಂತರ ಫಾಲೋವರ್ಸ್ಗಳನ್ನು ಹೊಂದಿದ್ದು, ಕ್ರಿಕೆಟ್ ಮುನ್ಸೂಚನೆ ನೀಡುವ ಸೋಗಿನಲ್ಲಿ ಬೆಟ್ಟಿಂಗ್ ದಂಧೆಗೆ ಬೆಂಬಲ ನೀಡುತ್ತಿದ್ದರು. ಇವರ ಜಾಹೀರಾತುಗಳಿಂದಾಗಿ ಬೆಟ್ಟಿಂಗ್ ಅಪ್ಲಿಕೇಶನ್ಗಳಿಗೆ ನೋಂದಾಯಿಸಿಕೊಳ್ಳುವವರ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗಿತ್ತು. ಈ ಮೂಲಕ ಅಕ್ರಮ ಚಟುವಟಿಕೆಗಳ ವ್ಯಾಪ್ತಿಯನ್ನು ವಿಸ್ತರಿಸಲು ಇವರು ನೆರವಾಗುತ್ತಿದ್ದರು ಎಂದು ಇಡಿ ಅಧಿಕಾರಿಗಳು ತಿಳಿಸಿದ್ದಾರೆ. ಪ್ರಸ್ತುತ ಇಡಿ ಅಧಿಕಾರಿಗಳು ಈ ಹಣಕ್ಕೆ ಸಂಬಂಧಿಸಿದ ಕೆಲವು ದಾಖಲೆಗಳನ್ನು ವಶಪಡಿಸಿಕೊಂಡಿದ್ದು, ತನಿಖೆಯನ್ನು ತೀವ್ರಗೊಳಿಸಿದ್ದಾರೆ.