ತಮಿಳುನಾಡು ಮುಖ್ಯಮಂತ್ರಿ ದಳಪತಿ ವಿಜಯ್ ಅವರು ಇಂದು ಎಂಡಿಎಂಕೆ ನಾಯಕ ವೈಕೋ ಅವರ ನಿವಾಸಕ್ಕೆ ಭೇಟಿ ನೀಡಿದ್ದರು. ಈ ಭೇಟಿ ಸಾಮಾನ್ಯ ರಾಜಕೀಯ ಭೇಟಿಯಾಗಿರದೆ, ಹೃದಯಸ್ಪರ್ಶಿ ಕ್ಷಣಕ್ಕೆ ಸಾಕ್ಷಿಯಾಯಿತು.
ವೈಕೋ ಅವರು ತಮ್ಮ ಕುಟುಂಬದ ಸದಸ್ಯರನ್ನು ವಿಜಯ್ ಅವರಿಗೆ ಪರಿಚಯಿಸುತ್ತಿದ್ದಾಗ, ಅಲ್ಲೇ ಇದ್ದ ಮನೆಕೆಲಸದವರು ಮುಂದೆ ಬಂದು, “ನಾವು ನಿಮಗೆ ಮತ ಹಾಕಿದ್ದೇವೆ ಸಾರ್, ನಾವು ನಿಮ್ಮ ಅಭಿಮಾನಿಗಳು” ಎಂದು ಕೈಮುಗಿದರು. ಇದಕ್ಕೆ ಸಂತೋಷಗೊಂಡ ವಿಜಯ್ ಅವರು ಅವರಿಗೆ ಪ್ರತಿಯಾಗಿ ಕೈಮುಗಿದರು. ಆಗ ಆ ಮನೆಕೆಲಸದವರು ವಿಜಯ್ ಅವರಿಗೆ ದೃಷ್ಟಿ ತೆಗೆದು ಸಂಭ್ರಮಿಸಿದ್ದಾರೆ. ವಿಜಯ್ ಅವರು ಕೂಡ ಸ್ಮೈಲ್ ಮಾಡುತ್ತಾ ಅವರಿಗೆ ಪ್ರತಿಕ್ರಿಯೆ ನೀಡಿದ್ದಾರೆ.
ಈ ಹೃದಯಸ್ಪರ್ಶಿ ಕ್ಷಣವನ್ನು ಸೆರೆಹಿಡಿದ ವಿಡಿಯೋ ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರೀ ವೈರಲ್ ಆಗುತ್ತಿದೆ. ನೆಟ್ಟಿಗರು “ನಿಜವಾದ ಅಭಿಮಾನಿಗಳು”, “ಸಿಎಂ ಆದರೂ ಸರಳತೆ ಕಾಯ್ದುಕೊಂಡಿದ್ದಾರೆ” ಎಂದು ಪ್ರಶಂಸೆ ಸುರಿಸುತ್ತಿದ್ದಾರೆ.
ವಿಜಯ್ ಅವರು ವೈಕೋ ಅವರೊಂದಿಗೆ ಸರ್ಕಾರ ರಚನೆ ಮತ್ತು ಬಹುಮತದ ಬಗ್ಗೆ ಚರ್ಚೆ ನಡೆಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಆದರೆ ಈ ಭೇಟಿಯಲ್ಲಿ ನಡೆದ ಮನೆಕೆಲಸದವರ ದೃಷ್ಟಿ ತೆಗೆಯುವ ಘಟನೆಯೇ ಈಗ ಎಲ್ಲರ ಗಮನ ಸೆಳೆದಿದೆ.