ನವದೆಹಲಿ: ಕ್ಯಾನ್ಸರ್‌ನಂತಹ ಗಂಭೀರ ಕಾಯಿಲೆಯಿಂದ ಬಳಲುತ್ತಿರುವ ರೋಗಿಗಳು ಹಾಗೂ ಅವರ ಕುಟುಂಬಗಳಿಗೆ ಕೇಂದ್ರ ಸರ್ಕಾರ ಸಿಹಿಸುದ್ದಿ ನೀಡಿದೆ. ಕ್ಯಾನ್ಸರ್ ಚಿಕಿತ್ಸೆಗೆ ಬಳಸುವ 1,000ಕ್ಕೂ ಹೆಚ್ಚು ಔಷಧೀಯ ಉತ್ಪನ್ನಗಳ ಗರಿಷ್ಠ ಚಿಲ್ಲರೆ ಮಾರಾಟ ಬೆಲೆಯನ್ನು (ಎಂಆರ್‌ಪಿ) ಗಣನೀಯವಾಗಿ ಕಡಿತಗೊಳಿಸಲಾಗಿದೆ.
ಪರಿಷ್ಕೃತ ದರಗಳು 2026ರ ನವೆಂಬರ್ 9ರಿಂದ ಜಾರಿಗೆ ಬರಲಿದ್ದು, ಕೆಲವು ಔಷಧಿಗಳ ಬೆಲೆಯಲ್ಲಿ ಶೇ.96.45ರವರೆಗೂ ಇಳಿಕೆಯಾಗಿದೆ. ಈ ಕ್ರಮದಿಂದ ದೇಶದ ಜನರಿಗೆ ವಾರ್ಷಿಕ ಅಂದಾಜು ₹3,502.31 ಕೋಟಿ ಉಳಿತಾಯವಾಗುವ ನಿರೀಕ್ಷೆಯಿದೆ.
ಕೇಂದ್ರ ರಾಸಾಯನಿಕ ಮತ್ತು ರಸಗೊಬ್ಬರ ಸಚಿವಾಲಯದ ಅಧೀನದಲ್ಲಿರುವ ರಾಷ್ಟ್ರೀಯ ಔಷಧೀಯ ಬೆಲೆ ನಿಗದಿ ಪ್ರಾಧಿಕಾರ (ಎನ್‌ಪಿಪಿಎ) ಈ ನಿರ್ಧಾರ ಕೈಗೊಂಡಿದೆ. ಆರೋಗ್ಯ ಸೇವೆಗಳ ಮಹಾನಿರ್ದೇಶನಾಲಯ ರಚಿಸಿದ್ದ ತಜ್ಞರ ಸಮಿತಿಯ ಶಿಫಾರಸುಗಳ ಆಧಾರದ ಮೇಲೆ 137 ಕ್ಯಾನ್ಸರ್ ನಿರೋಧಕ ಔಷಧಿಗಳ ಮೇಲಿನ ವ್ಯಾಪಾರ ಲಾಭಕ್ಕೆ ಮಿತಿ ನಿಗದಿಪಡಿಸಲಾಗಿದೆ.
ಈಗಾಗಲೇ 76 ಔಷಧ ತಯಾರಿಕಾ ಕಂಪನಿಗಳು 121 ಔಷಧಿಗಳನ್ನು ಒಳಗೊಂಡ 1,225 ಉತ್ಪನ್ನಗಳ ಪರಿಷ್ಕೃತ ಬೆಲೆಗಳನ್ನು ವರದಿ ಮಾಡಿವೆ. ಇವುಗಳಲ್ಲಿ 1,031 ಉತ್ಪನ್ನಗಳ ಬೆಲೆ ಕಡಿಮೆಯಾಗಿದೆ. ಸುಮಾರು 600 ಬ್ರ್ಯಾಂಡ್‌ಗಳ ಬೆಲೆಯಲ್ಲಿ ಶೇ.50ಕ್ಕೂ ಹೆಚ್ಚು ಇಳಿಕೆಯಾಗಿದೆ.
₹41 ಸಾವಿರದ ಔಷಧಿ ಬೆಲೆ ₹3 ಸಾವಿರಕ್ಕೆ!
ಕ್ಯಾನ್ಸರ್ ಚಿಕಿತ್ಸೆಯಲ್ಲಿ ಬಳಸುವ ಹಲವು ಪ್ರಮುಖ ಔಷಧಿಗಳ ಬೆಲೆಯಲ್ಲಿ ಭಾರಿ ಕಡಿತವಾಗಿದೆ. ಪ್ರಾಸ್ಟೇಟ್ ಕ್ಯಾನ್ಸರ್ ಚಿಕಿತ್ಸೆಗೆ ಬಳಸುವ ಅಬಿರಾಟೆರೋನ್ ಅಸಿಟೇಟ್ 250 ಎಂಜಿ ಮಾತ್ರೆಗಳ ಪೈಕಿ ಅರ್ವಿನ್‌ಕೇರ್ ಫಾರ್ಮಾದ ಅಬಿರೋನ್ ಬ್ರ್ಯಾಂಡ್ ಬೆಲೆ ₹41,250ರಿಂದ ₹3,218.23ಕ್ಕೆ ಇಳಿಕೆಯಾಗಿದೆ. ಹೆಟೆರೋ ಕಂಪನಿಯ ಅಹಾಬಿರ್ ಬೆಲೆ ₹33,876.50ರಿಂದ ₹4,925ಕ್ಕೆ ಕಡಿಮೆಯಾಗಿದೆ.
ಶ್ವಾಸಕೋಶ, ಕರುಳು, ಅಂಡಾಶಯ ಮತ್ತು ಗರ್ಭಕಂಠದ ಕ್ಯಾನ್ಸರ್ ಚಿಕಿತ್ಸೆಗೆ ಬಳಸುವ ಬೆವಾಸಿಜುಮಾಬ್ 100 ಎಂಜಿ ಇಂಜೆಕ್ಷನ್‌ಗಳ ಬೆಲೆಯೂ ಇಳಿಕೆಯಾಗಿದೆ. ಜೈಡಸ್ ಕಂಪನಿಯ ಬ್ರಿಕ್ಸ್ಟಾ ಬೆಲೆ ₹25,995ರಿಂದ ₹3,318ಕ್ಕೆ ಹಾಗೂ ರಿಲಯನ್ಸ್ ಕಂಪನಿಯ ಬೆವಾಸಿರೆಲ್ ಬೆಲೆ ₹24,079ರಿಂದ ₹3,985ಕ್ಕೆ ಇಳಿದಿದೆ.
ಸ್ತನ ಮತ್ತು ಪ್ರಾಸ್ಟೇಟ್ ಕ್ಯಾನ್ಸರ್ ಚಿಕಿತ್ಸೆಯಲ್ಲಿ ಬಳಸುವ ಡೆನೊಸುಮಾಬ್ 60 ಎಂಜಿ ಇಂಜೆಕ್ಷನ್‌ಗಳ ಬೆಲೆಯಲ್ಲಿಯೂ ಕಡಿತ ಮಾಡಲಾಗಿದೆ. ರಿಲಯನ್ಸ್ ಕಂಪನಿಯ ಡೆನ್ಒಸ್ಟಿಯೊರೆಲ್ ಬೆಲೆ ₹24,955ರಿಂದ ₹6,240ಕ್ಕೆ ಇಳಿದಿದೆ.
ರಕ್ತದ ಕ್ಯಾನ್ಸರ್ ಚಿಕಿತ್ಸೆಗೆ ಬಳಸುವ ಅಜಾಸಿಟಿಡಿನ್ 100 ಎಂಜಿ ಇಂಜೆಕ್ಷನ್ ಬೆಲೆಯೂ ಕಡಿಮೆಯಾಗಿದೆ. ಇಂಟಾಸ್ ಕಂಪನಿಯ ಅಜಡೈನ್ ಬೆಲೆ ₹5,964.70ರಿಂದ ₹1,199.50ಕ್ಕೆ ಇಳಿಕೆಯಾಗಿದೆ. ಕ್ಯಾನ್ಸರ್ ಚಿಕಿತ್ಸೆಯಿಂದ ಉಂಟಾಗಬಹುದಾದ ನ್ಯೂಟ್ರೋಪೀನಿಯಾ ಸಮಸ್ಯೆ ತಡೆಯಲು ಬಳಸುವ ಪೆಗ್‌ಫಿಲ್ಗ್ರಾಸ್ಟಿಮ್ 6 ಎಂಜಿ ಇಂಜೆಕ್ಷನ್‌ಗಳ ಬೆಲೆಯೂ ಗಣನೀಯವಾಗಿ ಕಡಿಮೆಯಾಗಿದೆ.
ಸ್ತನ ಕ್ಯಾನ್ಸರ್ ಚಿಕಿತ್ಸೆಗೆ ಬಳಸುವ ಪಾಲ್ಬೊಸಿಕ್ಲಿಬ್ 125 ಎಂಜಿ ಕ್ಯಾಪ್ಸೂಲ್‌ಗಳ ಪೈಕಿ ಆರ್‌ಪಿಜಿ ಕಂಪನಿಯ ಪಾಲ್ಬೊಪ್ರೊ ಬೆಲೆ ₹40,421.33ರಿಂದ ₹2,720ಕ್ಕೆ ಇಳಿದಿದೆ. ಮೆಡಿಕಮೆನ್ ಕಂಪನಿಯ ಪಾಲ್ಬೊಮೆಡ್ ಬೆಲೆ ₹13,500ರಿಂದ ₹2,302ಕ್ಕೆ ಕಡಿಮೆಯಾಗಿದೆ. ಇನ್ನು ಪೆರ್ಟುಜುಮಾಬ್ 420 ಎಂಜಿ ಇಂಜೆಕ್ಷನ್‌ನ ಕೆಲವು ಬ್ರ್ಯಾಂಡ್‌ಗಳ ಬೆಲೆಯಲ್ಲಿಯೂ ದೊಡ್ಡ ಪ್ರಮಾಣದ ಇಳಿಕೆಯಾಗಿದೆ.
ಔಷಧಿಗಳ ಮೇಲಿನ ವ್ಯಾಪಾರ ಲಾಭಕ್ಕೆ ಶೇ.30ರ ಮಿತಿ
ಕೇಂದ್ರ ಸರ್ಕಾರದ ಈ ನಿರ್ಧಾರದ ಪ್ರಮುಖ ಉದ್ದೇಶ ಕ್ಯಾನ್ಸರ್ ಔಷಧಿಗಳ ಮಾರಾಟದಲ್ಲಿನ ವ್ಯಾಪಾರ ಲಾಭವನ್ನು ನಿಯಂತ್ರಿಸುವುದಾಗಿದೆ. ಔಷಧಿಗಳ ಬೆಲೆ ನಿಯಂತ್ರಣ ಆದೇಶ 2013ರ ಅನ್ವಯ ಗರಿಷ್ಠ ಶೇ.30ರ ವ್ಯಾಪಾರ ಲಾಭದ ಮಿತಿಯನ್ನು ಪಾಲಿಸುವುದು ಕಡ್ಡಾಯವಾಗಿದೆ. ಭಾರತದಲ್ಲಿ ಇನ್ನೂ ಮಾರುಕಟ್ಟೆಗೆ ಬಿಡುಗಡೆಯಾಗದ ಕೆಲವು ಔಷಧಿಗಳಿಗೂ ಈ ನಿಯಮ ಅನ್ವಯವಾಗಲಿದೆ.
ಔಷಧಿ ಅಂಗಡಿಗಳಲ್ಲಿ ಹೊಸ ದರಪಟ್ಟಿ ಕಡ್ಡಾಯ
ನವೆಂಬರ್ 9ರಿಂದ ಪರಿಷ್ಕೃತ ಬೆಲೆಗಳು ಜಾರಿಗೆ ಬಂದ ಬಳಿಕ ಔಷಧಿ ಮಾರಾಟಗಾರರು, ವಿತರಕರು, ಆಸ್ಪತ್ರೆಗಳು ಮತ್ತು ವೈದ್ಯಕೀಯ ಸಂಸ್ಥೆಗಳು ಹೊಸ ದರಪಟ್ಟಿಯನ್ನು ಸಾರ್ವಜನಿಕರಿಗೆ ಕಾಣುವಂತೆ ಪ್ರದರ್ಶಿಸಬೇಕು. ತಮ್ಮ ವೆಬ್‌ಸೈಟ್‌ಗಳಲ್ಲಿಯೂ ಪರಿಷ್ಕೃತ ಎಂಆರ್‌ಪಿ ವಿವರಗಳನ್ನು ಪ್ರಕಟಿಸಬೇಕು. ನಿಯಮಗಳ ಪಾಲನೆಯ ಮೇಲೆ ರಾಜ್ಯಗಳ ಔಷಧ ನಿಯಂತ್ರಣ ಅಧಿಕಾರಿಗಳು ನಿಗಾ ವಹಿಸಲಿದ್ದಾರೆ.
ಹೊಸ ದರ ಪರಿಶೀಲಿಸುವುದು ಹೇಗೆ?
ಗ್ರಾಹಕರು ಕೇಂದ್ರ ಸರ್ಕಾರದ ‘ಫಾರ್ಮಾ ಸಹಿ ದಾಮ್’ ಮೊಬೈಲ್ ಅಪ್ಲಿಕೇಶನ್ ಅಥವಾ ಎನ್‌ಪಿಪಿಎ ಅಧಿಕೃತ ವೆಬ್‌ಸೈಟ್ (www.nppa.gov.in) ಮೂಲಕ ಔಷಧಿಗಳ ಹೊಸ ಬೆಲೆಗಳನ್ನು ಪರಿಶೀಲಿಸಬಹುದು. ನಿಗದಿತ ದರಕ್ಕಿಂತ ಹೆಚ್ಚಿನ ಬೆಲೆಗೆ ಔಷಧಿ ಮಾರಾಟವಾಗುತ್ತಿದ್ದರೆ 1800-11-1255 ಸಹಾಯವಾಣಿ ಅಥವಾ monitoring-nppa@gov.in ಇಮೇಲ್ ಮೂಲಕ ದೂರು ಸಲ್ಲಿಸಬಹುದು.