ವರನ ಕೈ ನಡುಗುತ್ತೆ..ಕೊನೆ ಕ್ಷಣದಲ್ಲಿ ಮದುವೆ ಕ್ಯಾನ್ಸಲ್‌ ಮಾಡಿದ ವಧು

ಬಿಹಾರದ ಕೈಮೂರ್ ಜಿಲ್ಲೆಯ ಒಂದು ಮದುವೆ ಮನೆಯಲ್ಲಿ ನಡೆದ ವಿಚಿತ್ರ ಘಟನೆಯೊಂದು ಎಲ್ಲರ ಗಮನ ಸೆಳೆದಿದೆ. ಮದುವೆಯ ಪ್ರಮುಖ ಆಚರಣೆಯಾದ ಸಿಂದೂರ ದಾನದ ಸಮಯದಲ್ಲಿ ವರನ ಕೈ ನಡುಗಿದ ಕಾರಣಕ್ಕೆ ವಧು ಮದುವೆಯನ್ನೇ ರದ್ದುಗೊಳಿಸಿದ ಘಟನೆ ನಡೆದಿದೆ. ಈ ಘಟನೆಯಿಂದ ವರ, ವಧುವಿನ ಕುಟುಂಬಗಳ ನಡುವೆ ತೀವ್ರ ಗೊಂದಲ ಉಂಟಾಗಿದ್ದು, ಕೊನೆಗೆ ವರನಿಗೆ ಖಾಲಿ ಕೈಯಲ್ಲಿ ಮನೆಗೆ ಮರಳುವಂತಾಯಿತು.

ಮದುವೆಯ ಸಂಭ್ರಮವು ಅದ್ಧೂರಿಯಾಗಿಯೇ ಆರಂಭವಾಯಿತು. ವರನ ಕಡೆಯಿಂದ ದೊಡ್ಡ ಮೆರವಣಿಗೆಯೊಂದಿಗೆ ವಧುವಿನ ಮನೆಗೆ ಆಗಮಿಸಲಾಯಿತು. ಎಲ್ಲಾ ಶಾಸ್ತ್ರ-ಸಂಪ್ರದಾಯಗಳು ಸುಗಮವಾಗಿ ನಡೆಯುತ್ತಿದ್ದವು. ಎರಡೂ ಕುಟುಂಬಗಳ ಸದಸ್ಯರು, ಸಂಬಂಧಿಕರು ಮತ್ತು ಗೆಳೆಯರು ಸಂತೋಷದಿಂದ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಮದುವೆಯ ವಿಧಿವಿಧಾನಗಳು ಒಂದೊಂದಾಗಿ ನೆರವೇರಿದವು. ಆದರೆ, ಸಿಂದೂರ ದಾನದ ಸಮಯದಲ್ಲಿ ವರನ ಕೈಗಳು ಲಘುವಾಗಿ ನಡುಗಲಾರಂಭಿಸಿದವು. ಇದನ್ನು ಗಮನಿಸಿದ ವಧು ತಕ್ಷಣವೇ ಕೋಪಗೊಂಡಳು.

ವಧು, ವರನ ಕೈ ನಡುಕವನ್ನು ಗಂಭೀರವಾಗಿ ತೆಗೆದುಕೊಂಡು, ಅವನು ಆರೋಗ್ಯವಾಗಿಲ್ಲ ಎಂದು ಆರೋಪಿಸಿದಳು. ಇದರ ಜೊತೆಗೆ, ವರನನ್ನು “ಹುಚ್ಚ” ಎಂದು ಕರೆದು ಮದುವೆಯನ್ನು ನಿರಾಕರಿಸಿದಳು. ಈ ಆಕಸ್ಮಿಕ ನಿರ್ಧಾರವು ಎಲ್ಲರಿಗೂ ಆಘಾತವನ್ನುಂಟು ಮಾಡಿತ್ತು. ವಧುವಿನ ಕುಟುಂಬದವರು ಆಕೆಯನ್ನು ಮನವೊಲಿಸಲು ಎಷ್ಟೇ ಪ್ರಯತ್ನಿಸಿದರೂ, ಆಕೆ ತನ್ನ ನಿರ್ಧಾರದಲ್ಲಿ ದೃಢವಾಗಿದ್ದಳು.

ಈ ಘಟನೆಯಿಂದ ಮದುವೆ ಮನೆಯ ವಾತಾವರಣವೇ ಬದಲಾಯಿತು. ಎರಡೂ ಕಡೆಯವರು ಚರ್ಚೆಯಲ್ಲಿ ತೊಡಗಿದರೂ ಯಾವುದೇ ಒಪ್ಪಂದಕ್ಕೆ ಬರಲು ಸಾಧ್ಯವಾಗಲಿಲ್ಲ. ಕೊನೆಗೆ, ಈ ವಿಷಯವು ಸ್ಥಳೀಯ ಪೊಲೀಸ್ ಠಾಣೆಗೆ ತಲುಪಿತು. ಭಭುವಾ ಪೊಲೀಸ್ ಠಾಣೆಯಲ್ಲಿ ಎರಡೂ ಕುಟುಂಬಗಳ ಸದಸ್ಯರನ್ನು ಕರೆಸಿ ದೀರ್ಘ ಚರ್ಚೆ ನಡೆಸಲಾಯಿತು. ಆದರೆ, ಯಾವುದೇ ರಾಜಿ ಸಾಧ್ಯವಾಗಲಿಲ್ಲ. ವಧು ತನ್ನ ನಿರ್ಧಾರದಿಂದ ಒಂದಿಂಚೂ ಹಿಂದೆ ಸರಿಯಲಿಲ್ಲ. ಅಂತಿಮವಾಗಿ, ವರನ ಕುಟುಂಬವು ವಧುವಿಲ್ಲದೆ ಮನೆಗೆ ಮರಳಬೇಕಾಯಿತು.