ಪಟನಾ: ಬಿಹಾರದಲ್ಲಿ ಶನಿವಾರ ನಡೆಯಲಿರುವ ಆರು ಪುರಸಭೆ ಚುನಾವಣೆಗಳಲ್ಲಿ ಮೊಬೈಲ್‌ ಮೂಲಕ ಮತ ಚಲಾಯಿಸುವ ನವೀನ ಸೌಲಭ್ಯವನ್ನು ಪರಿಚಯಿಸಲಾಗಿದೆ. ಇದು ಭಾರತದಲ್ಲಿ ಈ ರೀತಿಯ ಮೊದಲ ಪ್ರಯೋಗವಾಗಿದ್ದು, ರಾಜ್ಯ ಚುನಾವಣಾ ಆಯುಕ್ತ ದೀಪಕ್‌ ಪ್ರಸಾದ್‌ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. ಈ ವ್ಯವಸ್ಥೆಯು ಮತಗಟ್ಟೆಗೆ ತೆರಳಲಾಗದವರಿಗೆ ಮತದಾನವನ್ನು ಸುಲಭಗೊಳಿಸುವ ಗುರಿಯನ್ನು ಹೊಂದಿದೆ.
ಯಾರಿಗೆ ಈ ಸೌಲಭ್ಯ ಲಭ್ಯ?
ಅಂಗವಿಕಲರು, ವೃದ್ಧರು, ಗರ್ಭಿಣಿಯರು, ವಲಸೆ ಕಾರ್ಮಿಕರು ಹಾಗೂ ಸಂಚಾರ ಸಮಸ್ಯೆಯಿಂದ ಮತಗಟ್ಟೆಗೆ ತೆರಳಲಾಗದವರಿಗೆ ಈ ಇ-ವೋಟಿಂಗ್‌ ವ್ಯವಸ್ಥೆಯನ್ನು ಒದಗಿಸಲಾಗಿದೆ. ಈ ಸೌಲಭ್ಯವನ್ನು ಸೆಂಟರ್‌ ಫಾರ್‌ ಡೆವಲಪ್‌ಮೆಂಟ್‌ ಆಫ್‌ ಅಡ್ವಾನ್ಸ್ಟ್‌ ಕಂಪ್ಯೂಟಿಂಗ್‌ (C-DAC) ಮತ್ತು ಬಿಹಾರ ಸರ್ಕಾರದ ಸಹಯೋಗದೊಂದಿಗೆ ಅಭಿವೃದ್ಧಿಪಡಿಸಲಾದ ಆ್ಯಪ್‌ ಮೂಲಕ ಒದಗಿಸಲಾಗುತ್ತಿದೆ.
ಇ-ವೋಟಿಂಗ್‌ ಪ್ರಕ್ರಿಯೆ ಹೇಗೆ?
ಇ-ಮತದಾನ ಮಾಡಲು ಆಸಕ್ತರು ತಮ್ಮ ಆ್ಯಂಡ್ರಾಯ್ಡ್‌ ಮೊಬೈಲ್‌ನಲ್ಲಿ A-SECBR ಆ್ಯಪ್‌ ಅನ್ನು ಇನ್‌ಸ್ಟಾಲ್‌ ಮಾಡಿಕೊಳ್ಳಬೇಕು. ಸದ್ಯಕ್ಕೆ ಈ ಸೌಲಭ್ಯ ಆ್ಯಂಡ್ರಾಯ್ಡ್‌ ಫೋನ್‌ಗಳಿಗೆ ಮಾತ್ರ ಲಭ್ಯವಿದೆ. ಬಳಿಕ, ಮತದಾರರು ತಮ್ಮ ಹೆಸರಿನೊಂದಿಗೆ ನೋಂದಾಯಿತ ದೂರವಾಣಿ ಸಂಖ್ಯೆಯನ್ನು ಆ್ಯಪ್‌ನಲ್ಲಿ ನಮೂದಿಸಿ ನೋಂದಣಿ ಪೂರ್ಣಗೊಳಿಸಬೇಕು.
ಮೊಬೈಲ್‌ ಇಲ್ಲದವರಿಗೆ ಬಿಹಾರ ರಾಜ್ಯ ಚುನಾವಣಾ ಆಯೋಗದ ವೆಬ್‌ಸೈಟ್‌ನಲ್ಲಿ ಮತ ಚಲಾಯಿಸುವ ಆಯ್ಕೆಯೂ ಲಭ್ಯವಿದೆ. ಪಾರದರ್ಶಕತೆ ಮತ್ತು ಸುರಕ್ಷತೆಯನ್ನು ಖಾತ್ರಿಪಡಿಸಲು, ಒಂದು ದೂರವಾಣಿ ಸಂಖ್ಯೆಯಿಂದ ಗರಿಷ್ಠ ಇಬ್ಬರು ಮಾತ್ರ ಲಾಗಿನ್‌ ಆಗಬಹುದು. ಪ್ರತಿ ಮತವನ್ನು ಮತದಾರರ ಗುರುತಿನ ಚೀಟಿಯೊಂದಿಗೆ ತಾಳೆ ಹಾಕಿ ಧೃಡೀಕರಿಸಲಾಗುವುದು. ಇದಕ್ಕಾಗಿ ಮುಖ ಹೊಂದಿಕೆ (ಫೇಸ್‌ ಮ್ಯಾಚ್‌) ಮತ್ತು ಸ್ಕ್ಯಾನಿಂಗ್‌ನಂತಹ ತಾಂತ್ರಿಕ ವ್ಯವಸ್ಥೆಗಳನ್ನು ಬಳಸಲಾಗುತ್ತದೆ.
ಈಗಾಗಲೇ 10,000 ನೋಂದಣಿ, 50,000 ದಾಟುವ ನಿರೀಕ್ಷೆ
ಈಗಾಗಲೇ 10,000 ಮತದಾರರು ಆ್ಯಪ್‌ನಲ್ಲಿ ನೋಂದಣಿಯಾಗಿದ್ದು, ಈ ಸಂಖ್ಯೆ 50,000 ದಾಟುವ ನಿರೀಕ್ಷೆಯಿದೆ. ಈ ವ್ಯವಸ್ಥೆಯು ಮತದಾನದ ಪ್ರಕ್ರಿಯೆಯನ್ನು ಎಲ್ಲರಿಗೂ ಸುಲಭ ಮತ್ತು ಸಮಾವೇಶಕವಾಗಿಸುವ ಗುರಿಯನ್ನು ಹೊಂದಿದೆ.
ವಿಧಾನಸಭಾ ಚುನಾವಣೆಯಲ್ಲೂ ಇ-ವೋಟಿಂಗ್‌?
ವರ್ಷಾಂತ್ಯದಲ್ಲಿ ಬಿಹಾರದಲ್ಲಿ ವಿಧಾನಸಭೆ ಚುನಾವಣೆ ನಡೆಯಲಿದ್ದು, ಈ ಇ-ವೋಟಿಂಗ್‌ ವ್ಯವಸ್ಥೆಯನ್ನು ಆ ಚುನಾವಣೆಯಲ್ಲೂ ಬಳಸುವ ಸಾಧ್ಯತೆಯ ಕುರಿತು ಚರ್ಚೆಗಳು ಆರಂಭವಾಗಿವೆ. ಈ ಪ್ರಯೋಗದ ಯಶಸ್ಸು ಭವಿಷ್ಯದಲ್ಲಿ ದೇಶಾದ್ಯಂತ ಇಂತಹ ವ್ಯವಸ್ಥೆಯನ್ನು ಜಾರಿಗೊಳಿಸಲು ಮಾರ್ಗದರ್ಶಿಯಾಗಬಹುದು.