ಪಾಟ್ನಾ: ಬಿಹಾರ ವಿಧಾನಸಭಾ ಚುನಾವಣೆಯ ಎರಡನೇ ಹಂತದ ಮತದಾನ ಮಂಗಳವಾರ ನಡೆಯಲಿದ್ದು, ರಾಜ್ಯದ ರಾಜಕೀಯ ಭವಿಷ್ಯ ನಿರ್ಧಾರವಾಗಲಿದೆ. ಒಟ್ಟು 122 ಕ್ಷೇತ್ರಗಳಲ್ಲಿ ನಡೆಯುವ ಚುನಾವಣೆಯಲ್ಲಿ 3.70 ಕೋಟಿ ಮತದಾರರು 1,302 ಅಭ್ಯರ್ಥಿಗಳ ಭವಿಷ್ಯವನ್ನು ನಿರ್ಧರಿಸಲಿದ್ದಾರೆ.
ಈ ಹಂತದಲ್ಲಿ ಪಶ್ಚಿಮ ಚಂಪಾರಣ್, ಪೂರ್ವ ಚಂಪಾರಣ್, ಸೀತಾಮರ್ಹಿ, ಮಧುಬನಿ, ಸುಪೌಲ್, ಅರಾರಿಯಾ ಮತ್ತು ಕಿಶನ್ಗಂಜ್ ಸೇರಿದಂತೆ ನೇಪಾಳ ಗಡಿಯ ಸಮೀಪದ ಜಿಲ್ಲೆಗಳಲ್ಲಿ ಮತದಾನ ನಡೆಯುತ್ತಿದೆ. ಈ ಜಿಲ್ಲೆಗಳಲ್ಲಿನ ಹೆಚ್ಚಿನ ಪ್ರದೇಶಗಳಲ್ಲಿ ಮುಸ್ಲಿಂ ಮತದಾರರ ಪ್ರಮಾಣ ಇಲ್ಲಿ ಹೆಚ್ಚು. ಇದರಿಂದಾಗಿ ಅಲ್ಪಸಂಖ್ಯಾತ ಸಮುದಾಯದ ಬೆಂಬಲವನ್ನು ಹೊಂದಿರುವ ವಿರೋಧ ಪಕ್ಷ ಇಂಡಿಯಾ ಬಣ ಮತ್ತು ಆಡಳಿತಾರೂಢ ಎನ್ಡಿಎ ನಡುವಿನ ಹೋರಾಟ ಹೆಚ್ಚು ತೀವ್ರಗೊಂಡಿದೆ.
ಭದ್ರತೆಯ ದೃಷ್ಟಿಯಿಂದ ರಾಜ್ಯದಾದ್ಯಂತ ಬಿಗಿ ಸಿದ್ಧತೆ ಕೈಗೊಳ್ಳಲಾಗಿದೆ. 4 ಲಕ್ಷಕ್ಕೂ ಹೆಚ್ಚು ಭದ್ರತಾ ಸಿಬ್ಬಂದಿ ಹಾಗೂ ಚುನಾವಣಾ ಅಧಿಕಾರಿಗಳು ಮತದಾನ ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದಾರೆ. ಒಟ್ಟು 45,399 ಮತಗಟ್ಟೆಗಳಲ್ಲಿ ಮತದಾನ ನಡೆಯುತ್ತಿದ್ದು, ಅದರಲ್ಲಿ 40,000ಕ್ಕೂ ಹೆಚ್ಚು ಗ್ರಾಮೀಣ ಪ್ರದೇಶಗಳಲ್ಲಿವೆ.
ಮತದಾರರ ಸಂಖ್ಯೆಯಲ್ಲಿ, 2.28 ಕೋಟಿ ಮಂದಿ 30 ರಿಂದ 60 ವರ್ಷದ ವಯೋಮಾನದವರಾಗಿದ್ದು, 18 ರಿಂದ 19 ವರ್ಷದ ಯುವ ಮತದಾರರು ಕೇವಲ 7.69 ಲಕ್ಷ ಮಂದಿ. ಮಹಿಳಾ ಮತದಾರರ ಸಂಖ್ಯೆಯು 1.75 ಕೋಟಿಯಷ್ಟಿದೆ. ನವಾಡಾ ಜಿಲ್ಲೆಯ ಹಿಸುವಾ ಕ್ಷೇತ್ರವು ಅತಿ ಹೆಚ್ಚು ಮತದಾರರಿರುವ ಪ್ರದೇಶವಾಗಿದ್ದು (3.67 ಲಕ್ಷ ಮತದಾರರು), ಲೌರಿಯಾ, ಚನ್ನಟಿಯಾ, ರಕೌಲ್, ತ್ರಿವೇಣಿಗಂಜ್, ಸುಗೌಲಿ ಹಾಗೂ ಬನ್ಮಖಿ ಕ್ಷೇತ್ರಗಳಲ್ಲಿ ತಲಾ 22 ಅಭ್ಯರ್ಥಿಗಳು ಕಣಕ್ಕಿಳಿದಿದ್ದಾರೆ.
ಮೊದಲ ಹಂತದಲ್ಲಿ ನಡೆದ 121 ಕ್ಷೇತ್ರಗಳ ಮತದಾನದಲ್ಲಿ ಶೇ.65 ಕ್ಕಿಂತ ಹೆಚ್ಚು ಮತದಾನ ದಾಖಲಾಗಿದ್ದು, ಇದು ಇತ್ತೀಚಿನ ಚುನಾವಣಾ ಇತಿಹಾಸದಲ್ಲಿ ಅತ್ಯಧಿಕವಾಗಿದೆ. ಈ ಹಂತದ ಪ್ರಮುಖ ಅಭ್ಯರ್ಥಿಗಳಲ್ಲಿ ಜೆಡಿಯು ಪಕ್ಷದ ಹಿರಿಯ ನಾಯಕ ಹಾಗೂ ರಾಜ್ಯ ಸಚಿವ ಸಂಪುಟದ ಅತ್ಯಂತ ಹಿರಿಯ ಸದಸ್ಯ ಬಿಜೇಂದ್ರ ಪ್ರಸಾದ್ ಯಾದವ್ ಮುಖ್ಯಸ್ಥರಾಗಿದ್ದು, ಅವರು ಸುಪೌಲ್ ಕ್ಷೇತ್ರದಿಂದ ಎಂಟನೇ ಬಾರಿ ಗೆಲುವಿನತ್ತ ನೋಟ ಹರಿಸಿದ್ದಾರೆ.
ಬಿಜೆಪಿಯ ಪ್ರೇಮ್ ಕುಮಾರ್ ಗಯಾ ಟೌನ್ ಕ್ಷೇತ್ರದಿಂದ ಸತತ ಎಂಟನೇ ಬಾರಿ ಸ್ಪರ್ಧಿಸುತ್ತಿದ್ದಾರೆ. ಅವರು 1990ರಿಂದ ಏಳು ಬಾರಿ ಸತತವಾಗಿ ಗೆದ್ದಿದ್ದು, ಈ ಬಾರಿ ಕೂಡಾ ಜಯದ ಹಾದಿಯನ್ನು ಮುಂದುವರಿಸಲು ಪ್ರಯತ್ನಿಸುತ್ತಿದ್ದಾರೆ.
ಇತರ ಪ್ರಮುಖ ಸಚಿವರಲ್ಲಿ ಬಿಜೆಪಿ ನಾಯಕಿ ರೇಣು ದೇವಿ (ಬೆಟ್ಟಿಯಾ), ನೀರಜ್ ಕುಮಾರ್ ಸಿಂಗ್ ಬಬ್ಬು (ಛತ್ತಾಪುರ), ಜೆಡಿಯು ನಾಯಕಿ ಲೆಶಿ ಸಿಂಗ್ (ಧಮಾಹ), ಶೀಲಾ ಮಂಡಲ್ (ಫುಲ್ಸರಾಸ್) ಮತ್ತು ಜಮಾ ಖಾನ್ (ಚೈನ್ಪುರ) ಸೇರಿದ್ದಾರೆ. ಮಾಜಿ ಉಪಮುಖ್ಯಮಂತ್ರಿ ತಾರ್ಕಿಶೋರ್ ಪ್ರಸಾದ್ ಕತಿಹಾರ್ ಕ್ಷೇತ್ರದಿಂದ ಸತತ ಐದನೇ ಬಾರಿ ಸ್ಪರ್ಧಿಸುತ್ತಿದ್ದು, ಬಿಜೆಪಿ ಪರ ಬಲಿಷ್ಠ ನಾಯಕನಾಗಿ ಎದುರಾಳಿಗಳಿಗೆ ಕಂಟಕವಾಗಿದ್ದಾರೆ.
ಬಿಹಾರದ ಮತದಾನದ ಎರಡನೇ ಹಂತವು ಎನ್ಡಿಎ ಮತ್ತು ಇಂಡಿಯಾ ಬಣಕ್ಕೆ ಸಮಾನ ಸವಾಲುಗಳನ್ನೆಸೆದಿದ್ದು, ಜನವರಿ 2026ರಲ್ಲಿ ಅಧಿಕಾರಕ್ಕೆ ಬರಲಿರುವ ಹೊಸ ಸರ್ಕಾರದ ಭವಿಷ್ಯ ಈ ಹಂತದ ಫಲಿತಾಂಶದಿಂದಲೇ ನಿರ್ಧಾರವಾಗಲಿದೆ.