ಪ್ರಶಾಂತ್ ಎಸ್ ಸ್ಪೇಶಲ್ ಡೆಸ್ಕ್
ಡೊನಾಲ್ಡ್ ಟ್ರಂಪ್ ಅಮೆರಿಕ ಅಧ್ಯಕ್ಷರಾದ ಮೇಲೆ ಸಖತ್ ಸೌಂಡ್ ಮಾಡುತ್ತಿದ್ದಾರೆ. ಉಕ್ರೇನ್ ಅಧ್ಯಕ್ಷ ಝಲೆನ್ಸಿಗೆ ಯುದ್ಧ ಬೇಡ ಸಾಕು ನಿಲ್ಲಿಸಿ ಅಂತ ಬುದ್ದಿ ಹೇಳಿದ್ದಾರೆ. ಕೆಲ ದೇಶಗಳ ಮೇಲೆ ವ್ಯಾಪಾರ ಯುದ್ಧ ಸ್ಟಾರ್ಟ್ ಮಾಡಿದ್ದಾರೆ. ಇದರ ಮಧ್ಯೆ 13 ವರ್ಷ ಬಾಲಕನನ್ನು ಅಮೆರಿಕದ ಸೀಕ್ರೆಟ್ ಸರ್ವೀಸ್ ಎಜೆಂಟ್ ಆಗಿ ನೇಮಕ ಮಾಡಿದ್ದಾರೆ. ಅರೆ, ಇದೇನಿದು ಅಂತ ಶಾಕ್ ಆಗಬೇಡಿ. ಟ್ರಂಪ್ ನಿರ್ಧಾರದ ಹಿಂದೆ ಒಂದು ನೋವಿನ ಕಥೆ ಇದೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಒಂದಾದ ಮೇಲೊಂದು ವ್ಯಾಪಾರ, ವಿದೇಶಾಂಗ ನೀತಿಯ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿದ್ದಾರೆ. ಇದುವರೆಗು ತಾವು ಹೇಳಿದಂತೆ ಮಾಡುತ್ತಿದ್ದಾರೆ. ಕೆನಡಾ, ಮೆಕ್ಸಿಕೋ ಹಾಗೂ ಚೀನಾ ದೇಶಗಳ ಮೇಲೆ ಸುಂಕ ವಿಧಿಸಿದ್ದಾರೆ. ಈಗ ಭಾರತ ಸೇರಿದಂತೆ ಐರೋಪ್ಯ ಒಕ್ಕೂಟಗಳ ಮೇಲೆ ಟ್ಯಾರಿಫ್ ಹಾಕುವುದಾಗಿ ಹೇಳಿದ್ದಾರೆ. ವಿಶ್ವದೆಲ್ಲೆಡೆ ಟ್ರಂಪ್ನ ಈ ನಿರ್ಧಾರಗಳು ಸದ್ದು ಮಾಡ್ತಿರುವಾಗಲೆ ಮತ್ತೊಂದು ನಿರ್ಧಾರ ತೆಗೆದುಕೊಂಡಿದ್ದಾರೆ. ಆದರೆ ಟ್ರಂಪ್ನ ಈ ನಿರ್ಧಾರಕ್ಕೆ ಎಲ್ಲರಿಂದಲೂ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ವಿಶ್ವದ ದೊಡ್ಡಣ್ಣ ಡೊನಾಲ್ಡ್ ಟ್ರಂಪ್ನ ಎಲ್ಲರೂ ಕೊಂಡಾಡಲು ಕಾರಣ ಏನಪ್ಪಾ ಅಂತೀರಾ..? ಕೇವಲ 13 ವರ್ಷದ ಬಾಲಕನನ್ನ ಅಮೆರಿಕದ ಸೀಕ್ರೆಟ್ ಸರ್ವೀಸ್ ಎಜೆಂಟ್ ಆಗಿ ನೇಮಕ ಮಾಡಿದ್ದಾರೆ. ಹೌದು, ಈತನ ಹೆಸರು ದೇವರ್ಜಯೆ ಡಿಜೆ ಡೆನಿಯಲ್. ವಯಸ್ಸು 13. ಸದಾ ಲವಲವಿಕೆಯಿಂದ ಇರುವ ಈ ಹುಡುಗನಿಗೆ ದೇವರು ದೊಡ್ಡ ಕಾಯಿಲೆ ಕೊಟ್ಟು ಬಿಟ್ಟಿದ್ದಾನೆ. ಆಡುವ ವಯಸ್ಸಿನಲ್ಲಿ ನೋವಿನಿಂದ ನರಳಾಡುವಂತೆ ಮಾಡಿದ್ದಾನೆ. ಅದೇನು ಅಂದರೆ ಡಿಜೆ ಡೆನಿಯಲ್ಗೆ 2018ರಿಂದ ಬ್ರೇನ್ ಕ್ಯಾನ್ಸರ್ನಿಂದ ಬಳಲುತಿದ್ದಾನೆ.
ಡಿಜೆ ಡೆನಿಯಲ್ಗೆ ಚಿಕಿತ್ಸೆ ನೀಡಿದ ವೈದ್ಯರು ಇನ್ನು ಐದಾರು ತಿಂಗಳು ಬದುಕಿದ್ದರೆ ಹೆಚ್ಚು ಅಂತ ಹೇಳಿದ್ದರು. ವೈದ್ಯರ ಈ ಮಾತು ಬಾಲಕನ ಕುಟುಂಬಸ್ಥರಿಗೆ ಸಿಡಿಲು ಬಡಿದಂತಾಗಿತ್ತು. ಇದರ ಪರಿವೇ ಇಲ್ಲದಿದ್ದ ಡೆನಿಯಲ್ ದಿಢೀರ್ ಎಂದು ಸಖತ್ ಆಕ್ಟೀವ್ ಆಗಿದ್ದ. ಈತನ ಮನೆಯವರು ಅಷ್ಟೆ ಅಲ್ಲ, ಇನ್ನು ಐದಾರು ತಿಂಗಳಷ್ಟೆ ಬದುಕಬಹುದು ಅಂತ ಹೇಳಿದ್ದ ಡಾಕ್ಟರ್ ಕೂಡ ದಂಗಾಗುವಂತೆ ಜೋಷ್ನಲ್ಲಿದ್ದ. ಅದೆಷ್ಟರ ಮಟ್ಟಿಗೆ ಅಂದ್ರೆ ಕೊನೆಗೂ ಬ್ರೈನ್ ಕ್ಯಾನ್ಸರ್ ವಿರುದ್ಧ ಹೋರಾಡಿ ಸೀಕ್ರೆಟ್ ಸರ್ವೀಸ್ ಏಜೆಂಟ್ ಆಗಿದ್ದಾನೆ. ಇದರ ಮೂಲಕ ತನ್ನ ಹಾಗೂ ತಂದೆ ಕನಸ್ಸನ್ನು ನನಸು ಮಾಡಿದ್ದಾನೆ.
ಡಿಜೆ ಡೆನಿಯಲ್ ಸೀಕ್ರೆಟ್ ಸರ್ವೀಸ್ ಏಜೆಂಟ್ ಆಗುವ ಕನಸಿಗೆ ನೀರೆದಿದ್ದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್. ಜಂಟಿ ಅಧಿವೇಶನದ ಮೊದಲ ಭಾಷಣದಲ್ಲೇ ಗ್ಯಾಲರಿಯಲ್ಲಿ ಕೂತಿದ್ದ ಡಿಜೆ ಡೆನಿಯಲ್ ಬಗ್ಗೆ ಪ್ರಸ್ತಾಪ ಮಾಡಿದ್ರು. ನಾವು ನಿಮಗೆ ಅತಿ ದೊಡ್ಡ ಗೌರವ ನೀಡುತ್ತೆವೆ ಎಂದು ಹೇಳಿದ ಟ್ರಂಪ್, ಸೀಕ್ರೆಟ್ ಸರ್ವೀಸ್ ನಿರ್ದೇಶಕ ಸೀನ್ ಕರನ್ಗೆ ಡೆನಿಯಲ್ನ ಸೀಕ್ರೆಟ್ ಸರ್ವೀಸ್ ಏಜೆಂಟ್ ಆಗಿ ನೇಮಿಸುವಂತೆ ಆದೇಶ ನೀಡಿದ್ರು. ಟ್ರಂಪ್ನ ಈ ಆದೇಶ ಡೆನಿಯಲ್ ಹಾಗೂ ಕುಟುಂದವರಿಗೆ ಆಕಾಶವೇ ಕೈಗೆ ಸಿಕ್ಕಿದಷ್ಟು ಸಂತಸವಾಗಿದೆ. ಟ್ರಂಪ್ನ ಈ ನಡೆಗೆ ಪ್ರತಿಯೊಬ್ರು ಹ್ಯಾಟ್ಸಾಫ್ ಹೇಳುತ್ತಿದ್ದಾರೆ.
ಪ್ರಶಾಂತ್ ಎಸ್ ಸ್ಪೇಶಲ್ ಡೆಸ್ಕ್