ಕರ್ನಾಟಕ ಕಾಂಗ್ರೆಸ್ನಲ್ಲಿ ಕಳೆದ ಕೆಲವು ದಿನಗಳಿಂದ ನಡೆಯುತ್ತಿರುವ “ವರ್ಡ್ ವಾರ್” ಬಳಿಕ ಇಂದು ಬೆಳಗ್ಗೆ ದೊಡ್ಡ ಟ್ವಿಸ್ಟ್. ಮುಖ್ಯಮಂತ್ರಿ ಸಿದ್ದರಾಮಯ್ಯ ಮತ್ತು ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಇಬ್ಬರೂ ಒಂದೇ ಟೇಬಲ್ಗೆ ಬಂದು ಬ್ರೇಕ್ಫಾಸ್ಟ್ ಮಾಡಲಿದ್ದಾರೆ. ಈ “ಟಿಫಿನ್ ಪಾಲಿಟಿಕ್ಸ್” ರಾಜ್ಯ ರಾಜಕೀಯದಲ್ಲಿ ದೊಡ್ಡ ಕುತೂಹಲ ಮೂಡಿಸಿದೆ.
ಕಳೆದ ಒಂದು ವಾರದಿಂದ ಸಿಎಂ-ಡಿಸಿಎಂ ನಡುವೆ ನಾಯಕತ್ವ ಸಮಸ್ಯೆ ತಾರಕಕ್ಕೇರಿತ್ತು. ಡಿ.ಕೆ. ಶಿವಕುಮಾರ್ ಬಣದ ನಾಯಕರು ಸಿಎಂ ಬದಲಾವಣೆ ಒತ್ತಡ ಹೇರಿದ್ದರೆ, ಸಿದ್ದರಾಮಯ್ಯ ಬಣ “ಈಗಲೇ ಬದಲಾವಣೆ ಬೇಡ” ಎಂದು ಹೈಕಮಾಂಡ್ ಪರವಾಗಿ ನಿಂತಿತ್ತು. ಈ ಜಗಳದ ಮಧ್ಯೆ ಬಿಜೆಪಿ “ಕಾಂಗ್ರೆಸ್ ಸರ್ಕಾರ ಉರುಳ್ತೈತೆ” ಎಂದು ಟ್ರೋಲ್ ಮಾಡುತ್ತಿತ್ತು.
ಈ ಎಲ್ಲ ಗೊಂದಲಕ್ಕೆ ಬ್ರೇಕ್ ಹಾಕಲು ಡಿ.ಕೆ. ಶಿವಕುಮಾರ್ ಸ್ವತಃ ಮುಂದೆ ಬಂದಿದ್ದಾರೆ. ನಿನ್ನೆ ರಾತ್ರಿ ಸಿದ್ದರಾಮಯ್ಯ ಅವರನ್ನು ಫೋನ್ ಮಾಡಿ “ನಾಳೆ ಬೆಳಗ್ಗೆ ಮಾತುಕತೆಗೆ ಸಮಯ ಕೊಡಿ” ಎಂದು ಕೇಳಿದ್ದಾರೆ. ಸಿದ್ದರಾಮಯ್ಯ ಅವರು “ಟಿಫಿನ್ಗೆ ಬನ್ನಿ, ಮಾತಾಡೋಣ” ಎಂದು ಆಹ್ವಾನಿಸಿದ್ದಾರೆ ಎನ್ನಲಾಗಿದೆ.
ಇಂದು ಬೆಳಗ್ಗೆ ಡಿ.ಕೆ. ಶಿವಕುಮಾರ್ ಸಿದ್ದರಾಮಯ್ಯ ಅವರ ಅಧಿಕೃತ ನಿವಾಸಕ್ಕೆ ಆಗಮಿಸಲಿದ್ದಾರೆ. ಈ ಭೇಟಿಯ ಬಗ್ಗೆ ಕಾಂಗ್ರೆಸ್ ವರಿಷ್ಠರಿಗೆ ಮೊದಲೇ ಮಾಹಿತಿ ಇದೆ ಎನ್ನಲಾಗಿದೆ. ಆದರೆ ಇಬ್ಬರೂ ಮುಖಂಡರು ಒಂಟಿಯಾಗಿ ಕುಳಿತು ಏನು ಮಾತಾಡಲಿದ್ದಾರೆ ಎನ್ನುವುದು ರಾಜ್ಯ ರಾಜಕೀಯದಲ್ಲಿ ದೊಡ್ಡ ಪ್ರಶ್ನೆಯಾಗಿದೆ.
ಈ ಬ್ರೇಕ್ಫಾಸ್ಟ್ ಭೇಟಿಯಲ್ಲಿ ಏನಾಗಬಹುದು?
ಕಾಂಗ್ರೆಸ್ ಆಂತರಿಕ ಮೂಲಗಳ ಪ್ರಕಾರ, ಡಿ.ಕೆ. ಶಿವಕುಮಾರ್ ಈಗ “ಪಕ್ಷವನ್ನು ಒಡೆಯುವ ಆರೋಪ ಬೇಡ” ಎಂಬ ಒತ್ತಡದಲ್ಲಿ ಸಮಾಧಾನಕ್ಕೆ ಸಿದ್ಧರಿದ್ದಾರೆ. ಆದರೆ ಸಿದ್ದರಾಮಯ್ಯ ಬಣವೂ ಸುಮ್ಮನಿರದ ಕಾರಣ ಇಂದಿನ ಭೇಟಿ ತೀರಾ ಮುಖ್ಯವಾಗಿದೆ.
ಈ ಬ್ರೇಕ್ಫಾಸ್ಟ್ ಮೀಟಿಂಗ್ ಬೆಳಗ್ಗೆಯಿಂದಲೇ ರಾಜ್ಯ ರಾಜಕೀಯದಲ್ಲಿ ಟ್ರೆಂಡಿಂಗ್ ಆಗಿದ್ದು, ಎಲ್ಲರ ಕಣ್ಣು ಸಿದ್ದರಾಮಯ್ಯ ನಿವಾಸದ ಮೇಲೆ ನೆಟ್ಟಿದೆ. ಟಿಫಿನ್ ಮುಗಿದ ಮೇಲೆ ಏನು ಸಂದೇಶ ಬರುತ್ತದೆ ಎನ್ನುವುದನ್ನು ಕಾದು ನೋಡಬೇಕಿದೆ.
ಒಂದೇ ಮಾತಿನಲ್ಲಿ ಹೇಳುವುದಾದರೆ, ಇಂದು ಬೆಳಗ್ಗೆಯ ಇಡ್ಲಿ-ದೋಸೆಯ ಜೊತೆಗೆ ರಾಜ್ಯದ ಮುಂದಿನ 3 ವರ್ಷದ ರಾಜಕೀಯವೂ ನಿರ್ಧಾರವಾಗಬಹುದು.