ಬೆಂಗಳೂರು/ನವದೆಹಲಿ: ಈಗಾಗಲೇ ಸಕ್ಕರೆ, ಬೆಲ್ಲ, ಅಕ್ಕಿ ಸೇರಿದಂತೆ ಹಲವು ಆಹಾರ ಪದಾರ್ಥಗಳ ಬೆಲೆ ಏರಿಕೆಯಾಗಿ ಗ್ರಾಹಕರು ಈಗಾಗಲೇ ಸಂಕಷ್ಟದಲ್ಲಿರುವ ನಡುವೆ, ಈರುಳ್ಳಿ ದರವೂ ಹೆಚ್ಚಳವಾಗಿ ಇನ್ನಷ್ಟು ಹೊರೆ ಉಂಟುಮಾಡಿದೆ. ಬೆಂಗಳೂರಿನ ಯಶವಂತಪುರ ಸಗಟು ಮಾರುಕಟ್ಟೆಯಲ್ಲಿ ಈರುಳ್ಳಿ ದರವು ಕೇವಲ ಒಂದು ವಾರದಲ್ಲಿ ಕ್ವಿಂಟಲ್ಗೆ ₹1,600 ರಷ್ಟು ಏರಿಕೆಯಾಗಿದ್ದು, ರಿಟೇಲ್ ಮಾರುಕಟ್ಟೆಯಲ್ಲಿ ಕೆ.ಜಿ ಈರುಳ್ಳಿ ₹50-55 ಮಟ್ಟದಲ್ಲಿ ಮಾರಾಟವಾಗುತ್ತಿದೆ.
ಯಶವಂತಪುರ ಮಾರುಕಟ್ಟೆಯಲ್ಲಿ ಏನಿದೆ ಅಂಕಿಅಂಶ?
ಆಗಸ್ಟ್ 15ರಂದು ‘ಎ’ ದರ್ಜೆಯ ಕ್ವಿಂಟಲ್ ಈರುಳ್ಳಿ ದರ ₹3,000 ವರೆಗಿತ್ತು. ಆದರೆ, ಆಗಸ್ಟ್ 24ರಂದು ಇದೇ ಗುಣಮಟ್ಟದ ಈರುಳ್ಳಿ ಬೆಲೆ ₹4,500-₹4,600ಕ್ಕೆ ಏರಿಕೆಯಾಗಿದೆ. ಗುರುವಾರ ಮತ್ತು ಶುಕ್ರವಾರ ನಡೆದ ವಹಿವಾಟಿನಲ್ಲಿ ಈರುಳ್ಳಿ ಕ್ವಿಂಟಲ್ಗೆ ₹5,200ಕ್ಕೆ ತಲುಪಿತ್ತು. ಶನಿವಾರ ಮಾರುಕಟ್ಟೆಗೆ 65 ಸಾವಿರ ಚೀಲಗಳು (ಒಂದು ಚೀಲದಲ್ಲಿ 50-55 ಕೆ.ಜಿ) ಆವಕವಾಗಿ ದರ ಸ್ವಲ್ಪ ಇಳಿದಿತ್ತು. ಆದರೆ, ಸೋಮವಾರ ಕೇವಲ 43,500 ಚೀಲಗಳು ಮಾತ್ರ ಆವಕವಾಗಿದ್ದು, ದರ ಮತ್ತೆ ಏರಿಕೆಯಾಗಿದೆ.
ಮಳೆ ಕೊರತೆಯೇ ಕಾರಣ?
ರಾಜ್ಯದ ಈರುಳ್ಳಿ ಬೆಳೆಯಲ್ಲಿ ಶೇಕಡಾ 70 ರಷ್ಟು ಮಳೆಯಾಶ್ರಿತವಾಗಿದೆ. ಈ ಬಾರಿ ಮಳೆ ಕೊರತೆಯಿಂದಾಗಿ ಬೆಳೆ ಭಾರೀ ಪ್ರಮಾಣದಲ್ಲಿ ಕಡಿಮೆಯಾಗಿದೆ. ಇದು ಗ್ರಾಹಕರಿಗೆ ಮತ್ತಷ್ಟು ಆತಂಕ ಮೂಡಿಸಿದೆ.
ಅಖಿಲ ಭಾರತ ಬೆಲೆ ವಿವರ
ಅಖಿಲ ಭಾರತ ಮಟ್ಟದಲ್ಲಿ ಸೋಮವಾರ ಈರುಳ್ಳಿಯ ಸರಾಸರಿ ರಿಟೇಲ್ ದರ ₹43.53/ಕೆಜಿಗೆ ತಲುಪಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ₹27.37/ಕೆಜಿ ಇತ್ತು. ಅಂದರೆ ಶೇ.59 ರಷ್ಟು ಏರಿಕೆ. ಸಗಟು ಮಾರುಕಟ್ಟೆಯಲ್ಲಿ ದರವು ₹21.23 ಇದ್ದದ್ದು, ಈಗ ₹35.58ಕ್ಕೆ ತಲುಪಿದೆ – ಶೇ.68 ರಷ್ಟು ಏರಿಕೆ.
ಪ್ರಮುಖ ನಗರಗಳ ರಿಟೇಲ್ ಬೆಲೆಗಳು
-
ಚೆನ್ನೈ: ₹60/ಕೆಜಿ
-
ದೆಹಲಿ: ₹55/ಕೆಜಿ
-
ಕೋಲ್ಕತ್ತಾ: ₹53/ಕೆಜಿ
-
ಬೆಂಗಳೂರು: ₹50-55/ಕೆಜಿ
ಕೇಂದ್ರದ ಪರಿಹಾರ ಕ್ರಮಗಳು
ಬೆಲೆ ನಿಯಂತ್ರಣದ ಉದ್ದೇಶದಿಂದ ಕೇಂದ್ರ ಸರ್ಕಾರವು ಮಹತ್ವದ ಕ್ರಮಗಳನ್ನು ಕೈಗೊಂಡಿದೆ. ಕೇಂದ್ರ ಗ್ರಾಹಕ ವ್ಯವಹಾರ ಇಲಾಖೆಯ ಕಾರ್ಯದರ್ಶಿ ನಿಧಿ ಖಾರೆ ಅವರು, ರಾಷ್ಟ್ರೀಯ ಸಹಕಾರಿ ಗ್ರಾಹಕರ ಒಕ್ಕೂಟ (NCCF) ಮತ್ತು NAFED ಮೂಲಕ ಕೆ.ಜಿ ಈರುಳ್ಳಿಯನ್ನು ₹35ರಂತೆ ಮಾರಾಟ ಮಾಡಲಾಗುವುದು ಎಂದು ತಿಳಿಸಿದ್ದಾರೆ.
‘ಕಂದಾ ಎಕ್ಸ್ಪ್ರೆಸ್’ ರೈಲು ಸೇವೆ
ಮಹಾರಾಷ್ಟ್ರದ ನಾಸಿಕ್ನಿಂದ ಅತಿ ಹೆಚ್ಚು ಈರುಳ್ಳಿ ಬಳಸುವ ಚೆನ್ನೈ, ಮದುರೆ, ದೆಹಲಿ, ಎರ್ನಾಕುಲಂ ಮತ್ತು ಗುವಾಹಟಿಗೆ ‘ಕಂದಾ ಎಕ್ಸ್ಪ್ರೆಸ್’ ಮೂಲಕ ಈರುಳ್ಳಿ ಸಾಗಣೆ ಆರಂಭಿಸಲಾಗಿದೆ. ಈ ರೇಕ್ಗಳು ಬುಧವಾರದ ವೇಳೆಗೆ ಮಾರುಕಟ್ಟೆಗಳನ್ನು ತಲುಪುವ ನಿರೀಕ್ಷೆಯಿದ್ದು, ರಿಯಾಯಿತಿ ದರದಲ್ಲಿ ಮಾರಾಟ ಮಾಡಲಾಗುವುದು. ನಂತರ ಇತರ ಪ್ರದೇಶಗಳಿಗೆ ಅಗತ್ಯಕ್ಕೆ ತಕ್ಕಂತೆ ರವಾನಿಸಲಾಗುವುದು.