ನೈಸ್ ರೋಡ್, ಎಲೆವೇಟೆಡ್ ಫೈಓವರ್ ಟೋಲ್ ದರ ಏರಿಕೆ

ಬೆಂಗಳೂರು, ಜುಲೈ 01: ಬೆಂಗಳೂರು ವಾಹನ ಸವಾರರಿಗೆ ಜುಲೈ ತಿಂಗಳ ಮೊದಲ ದಿನವೇ ದೊಡ್ಡ ಶಾಕ್ ಕಾದಿದೆ. ನಗರದ ಪ್ರಮುಖ ರಸ್ತೆಗಳಾದ ನೈಸ್ ರಸ್ತೆ (NICE Road) ಮತ್ತು ಎಲೆಕ್ಟ್ರಾನಿಕ್ಸ್ ಸಿಟಿ ಎಲಿವೇಟೆಡ್ ಫ್ಲೈಓವರ್ (BETPL) ನಲ್ಲಿ ಜುಲೈ 1ರಿಂದ ಅನ್ವಯವಾಗುವಂತೆ ಟೋಲ್ ದರಗಳನ್ನು ಗಣನೀಯವಾಗಿ ಹೆಚ್ಚಿಸಲಾಗಿದೆ. ಈಗಾಗಲೇ ಬೆಲೆ ಏರಿಕೆಯಿಂದ ಕಂಗಾಲಾಗಿರುವ ಸಾರ್ವಜನಿಕರಿಗೆ ಈ ಟೋಲ್ ಹೆಚ್ಚಳವು ಮತ್ತಷ್ಟು ಆರ್ಥಿಕ ಹೊರೆಯನ್ನು ತಂದೊಡ್ಡಿದೆ.

NICE ರಸ್ತೆಯಲ್ಲಿ ಶೇ.10 ಟೋಲ್ ಏರಿಕೆ

ನೈಸ್ ರಸ್ತೆಯ (ನಾಲ್ವಡಿ ಕೃಷ್ಣರಾಜ ಒಡೆಯಾರ್ ಆರ್.ಒ.ಡಿ) ಟೋಲ್ ಶುಲ್ಕದಲ್ಲಿ ಶೇಕಡಾ 10 ರಷ್ಟು ಭಾರಿ ಹೆಚ್ಚಳ ಮಾಡಲಾಗಿದೆ. ಇದರಿಂದ ಪ್ರಯಾಣಿಕರ ಜೇಬಿಗೆ ಹೊಡೆತ ಬಿದ್ದಿದೆ.

ಹೊಸ ದರಗಳ ವಿವರ

• ಹೊಸೂರು ರಸ್ತೆಯಿಂದ ಬನ್ನೇರುಘಟ್ಟ ರಸ್ತೆ: ಕಾರು ಪ್ರಯಾಣಕ್ಕೆ ₹72

• ಮೈಸೂರು ರಸ್ತೆಯಿಂದ ಮಾಗಡಿ ರಸ್ತೆ: ಕಾರು ಪ್ರಯಾಣಕ್ಕೆ ₹77

• ಇದೇ ಮಾರ್ಗಗಳಲ್ಲಿ ಲಾರಿ, ಬಸ್ಸುಗಳ ದರದಲ್ಲೂ ಗಣನೀಯ ಏರಿಕೆಯಾಗಿದೆ.

ಎಲಿವೇಟೆಡ್ ಫ್ಲೈಓವರ್ (BETPL) ಹೊಸ ದರ

ಎಲೆಕ್ಟ್ರಾನಿಕ್ಸ್ ಸಿಟಿ ಎಲಿವೇಟೆಡ್ ಫ್ಲೈಓವರ್‌ನಲ್ಲಿ ಕಾರುಗಳ ದಿನದ ಬಹುಪ್ರಯಾಣದ ದರವನ್ನು ₹100 ಕ್ಕೆ ಹೆಚ್ಚಿಸಲಾಗಿದೆ. ಅಲ್ಲದೆ, ದ್ವಿಚಕ್ರ ವಾಹನಗಳ ಮಾಸಿಕ ಪಾಸ್ ದರವನ್ನು ₹785 ಕ್ಕೆ ಏರಿಸಲಾಗಿದೆ. ಆದರೆ, ದ್ವಿಚಕ್ರ ವಾಹನ ಹಾಗೂ ಕಾರುಗಳ ಏಕಮುಖ (ಸಿಂಗಲ್) ಪ್ರಯಾಣದ ದರದಲ್ಲಿ ಯಾವುದೇ ಬದಲಾವಣೆ ಮಾಡಲಾಗಿಲ್ಲ ಎಂದು ಸಂಸ್ಥೆ ತಿಳಿಸಿದೆ.

ಬೈಕ್ ಸವಾರರಿಗೂ ಸಂಕಟ

ಮೊದಲಿಗೆ ದ್ವಿಚಕ್ರ ವಾಹನಗಳಿಗೆ ಯಾವುದೇ ಟೋಲ್ ಇಲ್ಲದ ನೈಸ್ ರಸ್ತೆಯಲ್ಲಿ ಈಗ ದರ ಏರಿಕೆಯಾಗಿದ್ದು, ಬೈಕ್ ಸವಾರರು ಸಹ ಇನ್ನು ಮುಂದೆ ಟೋಲ್ ಪಾವತಿಸಬೇಕಾಗುತ್ತದೆ. ಇದು ಸಾವಿರಾರು ಬೈಕ್ ಸವಾರರಿಗೆ ದೊಡ್ಡ ಹೊಡೆತವಾಗಿದೆ. ಎಲೆಕ್ಟ್ರಾನಿಕ್ಸ್ ಸಿಟಿ, ಹೊಸೂರು, ಮತ್ತು ಸುತ್ತಮುತ್ತಲಿನ ಪ್ರದೇಶಗಳಿಂದ ಕೆಲಸಕ್ಕೆ ತೆರಳುವ ಐಟಿ ಉದ್ಯೋಗಿಗಳು ಮತ್ತು ವಿದ್ಯಾರ್ಥಿಗಳಿಗೆ ಈ ಹೆಚ್ಚಳವು ತೀವ್ರ ಪರಿಣಾಮ ಬೀರಲಿದೆ.

ಬಿಎಂಟಿಸಿ ವಜ್ರ ಬಸ್ ಟಿಕೆಟ್ ದರದ ಮೇಲೆ ಪರಿಣಾಮ

ನೈಸ್ ರಸ್ತೆಯಲ್ಲಿ ಟೋಲ್ ದುಬಾರಿಯಾಗಿರುವುದರಿಂದ, ಈ ರಸ್ತೆಯಲ್ಲಿ ಸಂಚರಿಸುವ ಬಿಎಂಟಿಸಿ ವಜ್ರ (ವೋಲ್ವೋ) ಬಸ್‌ಗಳ ಪ್ರಯಾಣಿಕರ ಟಿಕೆಟ್ ದರಗಳು ಕೂಡ ಹೆಚ್ಚಾಗುವ ಸಾಧ್ಯತೆ ಇದೆ. ಬಸ್ ಸಂಚಾರಕ್ಕೆ ಟೋಲ್ ಹೆಚ್ಚಾದಾಗ, ಆ ಹೆಚ್ಚುವರಿ ವೆಚ್ಚವನ್ನು ನೇರವಾಗಿ ಪ್ರಯಾಣಿಕರ ಮೇಲೆ ಹೊರಿಸುವ ಸಾಧ್ಯತೆಯಿರುತ್ತದೆ. ಇದು ದೈನಂದಿನ 50,000 ಕ್ಕೂ ಹೆಚ್ಚು ಪ್ರಯಾಣಿಕರ ಮೇಲೆ ಪರಿಣಾಮ ಬೀರಲಿದೆ.

ಟೋಲ್ ಹೆಚ್ಚಳವು ಖಾಸಗಿ ಅನುದಾನಿತ ಯೋಜನೆಗಳ ನಿರ್ವಹಣಾ ವೆಚ್ಚದ ಭಾಗವಾಗಿದ್ದು, ಈ ಹೆಚ್ಚಳವು ರಸ್ತೆ ನಿರ್ವಹಣೆ ಮತ್ತು ಸುರಕ್ಷತಾ ಸುಧಾರಣೆಗಳಿಗೆ ಬಳಕೆಯಾಗುತ್ತದೆ ಎಂದು ಸಂಸ್ಥೆಗಳು ತಿಳಿಸಿವೆ. ಆದಾಗ್ಯೂ, ಈ ಹೆಚ್ಚಳವು ಸಾಮಾನ್ಯ ಜನರ ಮೇಲೆ ಗಣನೀಯ ಪರಿಣಾಮ ಬೀರಿರುವುದರಿಂದ, ಸರ್ಕಾರಿ ಮಧ್ಯಸ್ಥಿಕೆಯ ಅಗತ್ಯವನ್ನು ಪ್ರಯಾಣಿಕ ಸಂಘಟನೆಗಳು ಒತ್ತಿ ಹೇಳಿವೆ. ಮುಂಬರುವ ದಿನಗಳಲ್ಲಿ ದರ ಪರಿಶೀಲನೆಗೆ ಒತ್ತಡ ಹೆಚ್ಚುವ ಸಾಧ್ಯತೆಯಿದೆ.