ಬೆಂಗಳೂರು: ರಾಜ್ಯದಾದ್ಯಂತ ಶಾಲಾ-ಕಾಲೇಜುಗಳ ಬಳಿ ಬೀದಿ ನಾಯಿಗಳ ಹಾವಳಿ ತೀವ್ರ ಸಮಸ್ಯೆಯಾಗಿರುವುದ್ದರಿಂದ, ಶಿಕ್ಷಣ ಇಲಾಖೆ ಇದೀಗ ಕಟ್ಟುನಿಟ್ಟಿನ ಮಾರ್ಗಸೂಚಿಯನ್ನು ಬಿಡುಗಡೆ ಮಾಡಿದೆ. ಪ್ರಾಥಮಿಕ ಮತ್ತು ಪ್ರೌಢಶಾಲಾ ಶಿಕ್ಷಣ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ರಶ್ಮಿ ಮಹೇಶ್ ಅವರು ನವೆಂಬರ್ ತಿಂಗಳಲ್ಲೇ ಈ ಸುತ್ತೋಲೆಯನ್ನು ಹೊರಡಿಸಿದ್ದು, ಸರ್ಕಾರಿ, ಅನುದಾನಿತ, ಖಾಸಗಿ ಹಾಗೂ ಅನುದಾನ ರಹಿತ ಎಲ್ಲಾ ಶಿಕ್ಷಣ ಸಂಸ್ಥೆಗಳಿಗೆ ಅನ್ವಯವಾಗಲಿದೆ.
ಈ ಹಿಂದೆ ಶಾಲಾ ಆವರಣದಲ್ಲಿ ಬೀದಿ ನಾಯಿಗಳು ಮಕ್ಕಳ ಮೇಲೆ ದಾಳಿ ನಡೆಸಿ ಗಾಯಗೊಳಿಸಿದ ಘಟನೆಗಳು ಹಲವು ಬಾರಿ ಸುದ್ದಿ ಮಾಡಿದ್ದವು. ಕೆಲವೊಮ್ಮೆ ಆ ದಾಳಿಗಳು ಪ್ರಾಣಾಂತಿಕವೂ ಆಗಿದ್ದವು. ಇಂತಹ ಘಟನೆಗಳನ್ನು ಸಂಪೂರ್ಣ ತಡೆಯುವ ನಿಟ್ಟಿನಲ್ಲಿ ಶಿಕ್ಷಣ ಇಲಾಖೆಯು ಈಗ ಸಮಗ್ರ ಮಾರ್ಗಸೂಚಿಯನ್ನು ರೂಪಿಸಿದೆ.
ಪ್ರಮುಖ ಆದೇಶಗಳು ಯಾವುವು?
1. ಶಾಲಾ ಆವರಣದಲ್ಲಿ ಅಥವಾ ಶಾಲೆಗೆ 200 ಮೀಟರ್ ವ್ಯಾಪ್ತಿಯೊಳಗೆ ಬೀದಿ ನಾಯಿಗಳು ಕಂಡುಬಂದರೆ ತಕ್ಷಣ ಸ್ಥಳೀಯ ಪುರಸಭೆ, ಪಂಚಾಯಿತಿ ಅಥವಾ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ ಪಶು ಆಸ್ಪತ್ರೆ/ನಾಯಿ ನಿಯಂತ್ರಣ ಘಟಕಕ್ಕೆ ಮಾಹಿತಿ ನೀಡಬೇಕು.
2. ಶಾಲಾ ಆಡಳಿತ ಮಂಡಳಿಯು ನಾಯಿಗಳನ್ನು ಗುರುತಿಸಿ, ಅವುಗಳ ಸ್ಥಳಾಂತರಕ್ಕೆ ಸಂಪೂರ್ಣ ಸಹಕಾರ ನೀಡಬೇಕು. ಸ್ಥಳೀಯ ಸಂಸ್ಥೆಗಳು ಆ ನಾಯಿಗಳಿಗೆ ಆಶ್ರಯ ಕೇಂದ್ರ ಅಥವಾ ಶೆಲ್ಟರ್‌ನಲ್ಲಿ ಸ್ಥಳ ಕಲ್ಪಿಸಬೇಕು.
3. ಒಮ್ಮೆ ಸ್ಥಳಾಂತರ ಮಾಡಿದ ನಾಯಿಗಳು ಮತ್ತೆ ಶಾಲಾ ಪ್ರದೇಶಕ್ಕೆ ಬರುವಂತೆ ತಡೆಯುವ ಜವಾಬ್ದಾರಿ ಶಾಲೆ ಮತ್ತು ಸ್ಥಳೀಯ ಸಂಸ್ಥೆ ಎರಡರ ಮೇಲೂ ಇರುತ್ತದೆ.
4. ಶಾಲಾ ಆವರಣಕ್ಕೆ ಎಲ್ಲೆಡೆ ಎತ್ತರದ ಕಾಂಪೌಂಡ್ ಅಥವಾ ಬಲವಾದ ಬೇಲಿ ಕಡ್ಡಾಯವಾಗಿ ನಿರ್ಮಿಸಬೇಕು. ಗೇಟ್‌ಗಳನ್ನು ಯಾವಾಗಲೂ ಮುಚ್ಚಿಡಬೇಕು, ಬೀದಿ ನಾಯಿಗಳು ಒಳಗೆ ಪ್ರವೇಶಿಸದಂತೆ ಖಾತರಿಪಡಿಸಿಕೊಳ್ಳಬೇಕು.
5. ಪ್ರತಿ ಶಾಲೆಯಲ್ಲಿ ಬೀದಿ ನಾಯಿ ಸಮಸ್ಯೆ ನಿರ್ವಹಣೆಗೆಂದೇ ಒಬ್ಬ “ನೋಡಲ್ ಅಧಿಕಾರಿ”ಯನ್ನು ನೇಮಿಸಬೇಕು. ಈ ಅಧಿಕಾರಿಯು ಸ್ಥಳೀಯ ಸಂಸ್ಥೆಗಳೊಂದಿಗೆ ನಿರಂತರ ಸಂಪರ್ಕದಲ್ಲಿರಬೇಕು, ಪ್ರತಿ ತಿಂಗಳು ವರದಿ ಸಲ್ಲಿಸಬೇಕು.
6. ಶಾಲಾ ಆವರಣದಲ್ಲಿ ಆಹಾರ ತ್ಯಾಜ್ಯವನ್ನು ತೆರೆದ ಸ್ಥಳದಲ್ಲಿ ಬಿಸಾಡದಂತೆ ಖಡಕ್ ನಿಯಮ. ಇದರಿಂದಲೇ ಬೀದಿ ನಾಯಿಗಳು ಆಕರ್ಷಿತವಾಗಿ ಬರುತ್ತವೆ ಎಂಬುದು ಇಲಾಖೆಯ ವಾದ.
ಈ ಮಾರ್ಗಸೂಚಿಯನ್ನು ಡಿಸೆಂಬರ್ 31ರೊಳಗೆ ಎಲ್ಲಾ ಶಾಲೆಗಳು ಕಟ್ಟುನಿಟ್ಟಾಗಿ ಜಾರಿಗೊಳಿಸಬೇಕು ಎಂದು ಎಚ್ಚರಿಕೆ ನೀಡಲಾಗಿದೆ. ಆ ನಂತರ ತಪಾಸಣೆ ನಡೆಸಲಾಗುವುದು ಮತ್ತು ನಿಯಮ ಉಲ್ಲಂಘಿಸಿದ ಶಾಲೆಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗುವುದು ಎಂದು ಸುತ್ತೋಲೆಯಲ್ಲಿ ಸ್ಪಷ್ಟವಾಗಿ ತಿಳಿಸಲಾಗಿದೆ.