ಬೆಂಗಳೂರು: ಸಿಲಿಕಾನ್ ಸಿಟಿ ಬೆಂಗಳೂರಿನ ಸಾರಿಗೆ ವ್ಯವಸ್ಥೆಯ ಬೆನ್ನೆಲುಬಾಗಿರುವ ಬಿಎಂಟಿಸಿಗೆ (BMTC) ಕೇಂದ್ರ ಸರ್ಕಾರದಿಂದ ಬಹುದೊಡ್ಡ ಕೊಡುಗೆ ಲಭಿಸಿದೆ. ಪರಿಸರ ಸ್ನೇಹಿ ಸಾರಿಗೆಯನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ಕೇಂದ್ರದ ‘ಪಿಎಂ-ಇ-ಡ್ರೈವ್’ (PM e-Drive) ಯೋಜನೆಯಡಿ ಬೆಂಗಳೂರಿಗೆ ಬರೋಬ್ಬರಿ 1,750 ಹೊಸ ಎಲೆಕ್ಟ್ರಿಕ್ ಬಸ್ಗಳನ್ನು ಹಂಚಿಕೆ ಮಾಡಲಾಗಿದೆ. ಈ ಮಹತ್ವದ ನಿರ್ಧಾರದಿಂದ ನಗರದ ಸಾರಿಗೆ ಸಮಸ್ಯೆಗಳು ಕಡಿಮೆಯಾಗುವ ಸಾಧ್ಯತೆ ಇದೆ.
ಬೆಂಗಳೂರು ನಗರವು ದಿನೇ ದಿನೇ ಬೆಳೆಯುತ್ತಿದ್ದು, ಹೊಸ ಬಡಾವಣೆಗಳಿಗೆ ಸಾರಿಗೆ ಸಂಪರ್ಕ ಕಲ್ಪಿಸುವುದು ಬಿಎಂಟಿಸಿಗೆ ದೊಡ್ಡ ಸವಾಲಾಗಿತ್ತು. ಪ್ರಸ್ತುತ ಬಿಎಂಟಿಸಿಯಲ್ಲಿ ಸುಮಾರು 6,800 ಬಸ್ಗಳಿವೆ. ಆದರೆ, ಈ ಪೈಕಿ ಹಲವು ಬಸ್ಗಳು ಹಳೆಯದಾಗಿದ್ದು, ಪದೇ ಪದೇ ತಾಂತ್ರಿಕ ದೋಷಗಳಿಂದ ಕೆಟ್ಟು ನಿಲ್ಲುತ್ತಿವೆ. ಹೀಗಾಗಿ ಹೊಸ ಮಾರ್ಗಗಳಿಗೆ ಬಸ್ ವಿಸ್ತರಿಸಲು ಬಿಎಂಟಿಸಿಗೆ ಸಾವಲಾಗಿತ್ತು. ಸದ್ಯ 1,750 ಇ-ಬಸ್ಗಳ ಸೇರ್ಪಡೆಯಿಂದ ಈ ಕೊರತೆ ನೀಗಲಿದೆ.
ಪಿಎಂ-ಇ-ಡ್ರೈವ್ ಯೋಜನೆಯ ಉದ್ದೇಶ
ಎಲೆಕ್ಟ್ರಿಕ್ ವಾಹನಗಳ (EV) ಬಳಕೆಯನ್ನು ಜನಪ್ರಿಯಗೊಳಿಸಲು ಕೇಂದ್ರ ಸರ್ಕಾರವು ಪಿಎಂ-ಇ-ಡ್ರೈವ್ ಯೋಜನೆಯನ್ನು ಜಾರಿಗೆ ತಂದಿದೆ. ಈ ಯೋಜನೆಯಡಿ ಇ-ಬಸ್ ಮಾತ್ರವಲ್ಲದೆ, ಇ-ದ್ವಿಚಕ್ರ, ಇ-ತ್ರಿಚಕ್ರ, ಇ-ಆಂಬ್ಯುಲೆನ್ಸ್ ಮತ್ತು ಇ-ಟ್ರಕ್ಗಳ ಖರೀದಿಗೂ ಉತ್ತೇಜನ ನೀಡಲಾಗುತ್ತಿದೆ. ಮೊದಲ ಹಂತದಲ್ಲಿ ಕರ್ನಾಟಕದ ವಿವಿಧ ನಗರಗಳಿಗೆ ಬಸ್ಗಳನ್ನು ನೀಡಲಾಗಿದ್ದು, ಇದೀಗ ಬೆಂಗಳೂರಿಗೆ ಅತಿ ದೊಡ್ಡ ಪ್ರಮಾಣದ ಹಂಚಿಕೆ ಮಾಡಲಾಗಿದೆ.
ಮಾರ್ಗಗಳ ಪುನರ್ ವಿಂಗಡಣೆ
ಈ ಹೊಸ ಎಲೆಕ್ಟ್ರಿಕ್ ಬಸ್ಗಳು ಬಿಎಂಟಿಸಿ ಸೇರ್ಪಡೆಯಾದ ನಂತರ, ಸಾರಿಗೆ ಸಂಸ್ಥೆಯು ಪ್ರಮುಖ ಮಾರ್ಗಗಳಲ್ಲಿ ಸಂಚಾರದ ದಟ್ಟಣೆಯನ್ನು ಕಡಿಮೆ ಮಾಡಲು ನಿರ್ಧರಿಸಿದೆ.
-
ಹೊಸ ಮಾರ್ಗಗಳು: ಸಾರಿಗೆ ಸೌಲಭ್ಯವಿಲ್ಲದ ಹೊರವಲಯದ ಬಡಾವಣೆಗಳಿಗೆ ಹೊಸದಾಗಿ ಬಸ್ ಸಂಪರ್ಕ ಕಲ್ಪಿಸಲಾಗುವುದು.
-
ಬೇಡಿಕೆಯ ಮಾರ್ಗಗಳು: ಮೆಟ್ರೋ ನಿಲ್ದಾಣಗಳು ಮತ್ತು ಐಟಿ ಕಾರಿಡಾರ್ಗಳಲ್ಲಿ ಬಸ್ಗಳ ಸಂಖ್ಯೆಯನ್ನು ಹೆಚ್ಚಿಸಲು ಯೋಜನೆ ರೂಪಿಸಲಾಗಿದೆ.
-
ಪರಿಸರ ಸಂರಕ್ಷಣೆ: ಡೀಸೆಲ್ ಬಸ್ಗಳ ಬದಲಿಗೆ ಎಲೆಕ್ಟ್ರಿಕ್ ಬಸ್ಗಳು ಸಂಚರಿಸುವುದರಿಂದ ನಗರದ ವಾಯುಮಾಲಿನ್ಯ ಗಣನೀಯವಾಗಿ ತಗ್ಗಲಿದೆ.
ಬಿಎಂಟಿಸಿ ಇತಿಹಾಸದಲ್ಲಿ ಇದು ಅತ್ಯಂತ ದೊಡ್ಡ ಪ್ರಮಾಣದ ಎಲೆಕ್ಟ್ರಿಕ್ ಬಸ್ ಖರೀದಿ ಪ್ರಕ್ರಿಯೆಯಾಗಿದ್ದು, ಸಾರ್ವಜನಿಕರಿಗೆ ಕಡಿಮೆ ಖರ್ಚಿನಲ್ಲಿ ಆರಾಮದಾಯಕ ಪ್ರಯಾಣ ದೊರೆಯಲಿದೆ. ಕೇಂದ್ರ ಮತ್ತು ರಾಜ್ಯ ಸರ್ಕಾರದ ಈ ಜಂಟಿ ಪ್ರಯತ್ನದಿಂದ ಬೆಂಗಳೂರು ‘ಗ್ರೀನ್ ಸಿಟಿ’ಯತ್ತ ಮತ್ತೊಂದು ಹೆಜ್ಜೆ ಇಟ್ಟಂತಾಗಿದೆ.