ಬೆಳಗಾವಿ, ನವೆಂಬರ್ 30: ಒಂದೇ ಒಂದು ಸರ್ಕಾರಿ ಹುದ್ದೆಗಾಗಿ ವರ್ಷಗಟ್ಟಲೇ ತಲೆಕೆಡಿಸಿಕೊಳ್ಳುವ ಈ ದಿನಗಳಲ್ಲಿ ಬೆಳಗಾವಿ ಜಿಲ್ಲೆ ಅಥಣಿ ತಾಲೂಕಿನ ಖಿಳೆಗಾಂವ ಗ್ರಾಮದ 26 ವರ್ಷದ ಧರಪ್ಪ ಸಂಗಮೇಶ ನಾಗಗೋಳ ಒಬ್ಬನೇ ಬರೋಬ್ಬರಿ 10 ಸರಕಾರಿ ಹುದ್ದೆಗಳನ್ನು ಗಳಿಸಿ ರಾಜ್ಯಾದ್ಯಂತ ಚರ್ಚೆಗೆ ಕಾರಣವಾಗಿದ್ದಾರೆ.
ತಂದೆ ಸಂಗಮೇಶ್ ಕೂಲಿ ಕಾರ್ಮಿಕರಾಗಿದ್ದಾರೆ, ತಾಯಿ ಆಶಾ ಕಾರ್ಯಕರ್ತೆಯಾಗಿ ಕೆಲಸ ಮಾಡುತ್ತಿದ್ದಾರೆ. ಕುಟುಂಬಕ್ಕೆ ಆಧಾರವಾಗಿರುವುದು ಕೇವಲ ಅರ್ಧ ಎಕರೆ ಜಮೀನು. ಇಂತಹ ಬಡ ಕುಟುಂಬದಲ್ಲಿ ಹುಟ್ಟಿದ ಧರಪ್ಪ ಬಿ.ಕಾಂ ಪದವಿ ಮುಗಿಸಿ ಖಾಸಗಿ ಬ್ಯಾಂಕ್‌ನಲ್ಲಿ ಕೆಲಸ ಮಾಡುತ್ತಿದ್ದರು. ಆದರೆ ಅವರ ತಂದೆ, ನಮ್ಮ ಊರಲ್ಲಿ ಬಡವರ ಮಕ್ಕಳು ಸರಕಾರಿ ನೌಕರಿ ಪಡೆದವರೇ ಇಲ್ಲ. ನೀನೊಬ್ಬ ಮಾದರಿಯಾಗು ಮಗನೇ… ನಾವು ಎಂತಹ ಕಷ್ಟ ಬಂದರೂ ನಿನ್ನ ಓದಿಗೆ ಬೆಂಬಲವಾಗಿ ನಿಲ್ತೀವಿ ಎಂದಿದ್ದರು. ತಂದೆಯ ಆ ಒಂದು ಮಾತು ಧರಪ್ಪ ಅವರ ಜೀವನವೇ ಬದಲಾಗುವ ಹಾಗೆ ಮಾಡಿದೆ.
ಈ ಮಾತು ಧರಪ್ಪನಲ್ಲಿ ಬೆಂಕಿ ಕಿಡಿಯಾಗಿ ಉರಿಯಿತು. 2021ರಲ್ಲಿ ಧಾರವಾಡಕ್ಕೆ ಕೋಚಿಂಗ್ ಕ್ಲಾಸ್‌ಗೆ ಹೋದರು. ಆದರೆ ಮನೆ ಬಾಡಿಗೆ, ಊಟ, ಪುಸ್ತಕ ಖರ್ಚು-ವೆಚ್ಚ ಭರಿಸಲಾಗದೇ ಕೇವಲ ಎರಡೇ ತಿಂಗಳಲ್ಲಿ ಗ್ರಾಮಕ್ಕೆ ಮರಳಿದರು. ಅಲ್ಲಿಂದ ಸ್ವಂತವಾಗಿ ಅಧ್ಯಯನ ಆರಂಭಿಸಿದರು.
ದಿನಚರಿ ಇಂತಿತ್ತು:
- ಬೆಳಗ್ಗೆ 5 ಗಂಟೆಗೆ ಎಬ್ಬಿಸಿಕೊಂಡು ರಾತ್ರಿ 12 ಗಂಟೆವರೆಗೆ ಓದು
- ದಿನಕ್ಕೆ 14 ಗಂಟೆ ಅಧ್ಯಯನ, 1 ಗಂಟೆ ಯೋಗ-ವ್ಯಾಯಾಮ
- ಮೊಬೈಲ್ ಫೋನ್, ಸೋಷಿಯಲ್ ಮೀಡಿಯಾ ಸಂಪೂರ್ಣ ಬಂದ್
- ದಿನಪತ್ರಿಕೆ, ಯೂಟ್ಯೂಬ್ ಉಪನ್ಯಾಸಗಳು, ಸ್ವಂತ ಕೈನೋಟ್ಸ್ – ಇವೇ ಅವರಿಗೆ ಗುರುಗಳಾದವು.
ಮನೆಯಲ್ಲಿ ಎರಡೇ ಕೋಣೆ. ಮಗನಿಗೆ ಶಾಂತವಾಗಿ ಓದಲು ಜಾಗವಿಲ್ಲವೆಂದು ತಂದೆ ಸಂಗಮೇಶ್ ಆಡು-ಕುರಿಗಳನ್ನು ಮಾರಿ ಒಂದು ಪ್ರತ್ಯೇಕ ಕೋಣೆ ಕಟ್ಟಿಕೊಟ್ಟರು. ಅದೇ ಕೋಣೆಯಲ್ಲಿ ಧರಪ್ಪ ಓದಲು ಪ್ರಾರಂಭಿಸಿದ್ದರು.
ಪ್ರತಿನಿತ್ರ ಧರಪ್ಪ ತಮ್ಮ ದಿನಚರಿಯಂತೆ ಓದಿ, ಆ ಸಮಯಕ್ಕೆ ಏನು ಸಾಕಷ್ಟು ಪರೀಕ್ಷೆಎ ಅರ್ಜಿ ಸಲ್ಲಿಸುತ್ತಾರೆ ಬಳಿಕ ಸಾಧ್ಯವಾದ ಎಲ್ಲಾ ಪರೀಕ್ಷೆಗಳನ್ನೂ ಬರೆದು ಸುಮಾರು 10 ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ, ಉತ್ತಮ ಹುದ್ದೆಗೆ ಆಯ್ಕೆಯಾಗಿದ್ದಾರೆ. ಸಧ್ಯ ಅವರು ಆಯ್ಕೆ ಆಗಿರುವ ಹುದ್ದೆಗಳೆಂದರೆ,
- ಸಿವಿಲ್ ಪೊಲೀಸ್ ಕಾನ್ಸ್‌ಟೇಬಲ್ – 5 ಹುದ್ದೆಗಳು
- ಸೆಕೆಂಡ್ ಡಿವಿಜನ್ ಅಸಿಸ್ಟೆಂಟ್ (SDA) – 2 ಹುದ್ದೆಗಳು
- ಫಸ್ಟ್ ಡಿವಿಜನ್ ಅಸಿಸ್ಟೆಂಟ್ (FDA) – 1 ಹುದ್ದೆ
- ಕಮರ್ಷಿಯಲ್ ಟ್ಯಾಕ್ಸ್ ಇನ್‌ಸ್ಪೆಕ್ಟರ್ – 1 ಹುದ್ದೆ
- ಪೊಲೀಸ್ ಸಬ್ ಇನ್‌ಸ್ಪೆಕ್ಟರ್ (PSI) – ದಾಖಲಾತಿ ಪರಿಶೀಲನೆಯಲ್ಲಿದೆ
- ಕೆಎಎಸ್ ಮುಖ್ಯ ಪರೀಕ್ಷೆ ಬರೆದು ಫಲಿತಾಂಶಕ್ಕೆ ಕಾಯುತ್ತಿದ್ದಾರೆ
ಸದ್ಯ ಉತ್ತರ ಕನ್ನಡ ಜಿಲ್ಲೆಯ ದಾಂಡೇಲಿ ತಾಲ್ಲೂಕು ಪಂಚಾಯತಿಯಲ್ಲಿ ಎಫ್‌ಡಿಎ ಆಗಿ ಜೂನ್ 2025ರಿಂದ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.
ಹಣ ಇಲ್ಲ ಅಂದ್ರೆ ಓದಲಾಗಲ್ಲ ಅಂತ ಯೋಚಿಸಬೇಡಿ. ದಿಟ್ಟ ಮನಸ್ಸು, ನಿರಂತರ ಪರಿಶ್ರಮ ಇದ್ದರೆ ಏನು ಬೇಕಾದರೂ ಸಾಧ್ಯ. ನಾನು ಮೊಬೈಲ್ ತೆಗೆದುಕೊಂಡೇ ಇಲ್ಲ. ತಂದೆ-ತಾಯಿಯ ಕಷ್ಟ ನೆನಪಿಟ್ಟುಕೊಂಡು ಓದಿದೆ ಎಂದು ಧರಪ್ಪ ಹೇಳುತ್ತಾರೆ. ಮುಂದೆ ಯುಪಿಎಸ್‌ಸಿ ಕ್ಲಿಯರ್ ಮಾಡಿ ಕರ್ನಾಟಕದಲ್ಲೇ ಐಎಎಸ್ ಅಧಿಕಾರಿಯಾಗಿ ಸೇವೆ ಸಲ್ಲಿಸಬೇಕೆಂಬುದು ಅವರ ಮುಂದಿನ ಕನಸು.
ಧರಪ್ಪನ ಈ ಅದ್ಭುತ ಸಾಧನೆ ಈಗ ಗ್ರಾಮದ ಮಕ್ಕಳಿಗೆ, ಬಡ ವಿದ್ಯಾರ್ಥಿಗಳಿಗೆ ದೊಡ್ಡ ಸ್ಫೂರ್ತಿಯಾಗಿ ಮಾರ್ಪಟ್ಟಿದೆ. ಕೋಚಿಂಗ್ ಇಲ್ಲದೇ, ಹಣವಿಲ್ಲದೇ ಇಷ್ಟೊಂದು ಸಾಧಿಸಿದ್ದಾರೆ… ನಮ್ಮ ಮಕ್ಕಳಿಗೂ ಆಗುತ್ತೆ ಎನ್ನುತ್ತಾರೆ ಗ್ರಾಮಸ್ಥರು. ಧರಪ್ಪ ನಾಗಗೋಳರಂತಹ ಯುವಕರೇ ನಮ್ಮ ಸಮಾಜಕ್ಕೆ ನಿಜವಾದ ಮಾದರಿ.