ಬೆಂಗಳೂರು: ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ಆನ್‌ಲೈನ್ ವ್ಯವಸ್ಥೆಯ ಮೂಲಕ ಬಿ-ಖಾತಾದಿಂದ ಎ-ಖಾತಾಗೆ ಮಾನ್ಯತೆ ನೀಡುವ ಪ್ರಕ್ರಿಯೆಯನ್ನು ಸರಳಗೊಳಿಸಲು ಮುಂದಾಗಿದೆ. ಈ ಬಗ್ಗೆ ಬಿಬಿಎಂಪಿ ಮುಖ್ಯ ಆಯುಕ್ತ ಎಂ. ಮಹೇಶ್ವರ ರಾವ್ ಮಹತ್ವದ ಹೇಳಿಕೆ ನೀಡಿದ್ದು, ಸರ್ಕಾರದಿಂದ ಈ ಕುರಿತು ಆದೇಶವಾಗಿದೆ ಎಂದು ತಿಳಿಸಿದ್ದಾರೆ. ಮುಂದಿನ ಎರಡು ವಾರಗಳಲ್ಲಿ ಹೊಸ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಲಾಗುವುದು ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಈ ಆನ್‌ಲೈನ್ ವ್ಯವಸ್ಥೆಯು ಆಸ್ತಿ ಮಾಲೀಕರಿಗೆ ತಮ್ಮ ಆಸ್ತಿಗಳಿಗೆ ಎ-ಖಾತಾ ಪಡೆಯಲು ಸುಲಭವಾದ ಮಾರ್ಗವನ್ನು ಒದಗಿಸಲಿದೆ. ಅರ್ಜಿ ಸಲ್ಲಿಕೆಗೆ ಎರಡು ವಾರಗಳ ಒಳಗೆ ಅವಕಾಶ ಕಲ್ಪಿಸಲಾಗುವುದು. ಈ ಪ್ರಕ್ರಿಯೆಯಲ್ಲಿ ಯಾವ ನಿಯಮಗಳನ್ನು ಅನುಸರಿಸಬೇಕು, ಎಷ್ಟು ಶುಲ್ಕ ಪಾವತಿಸಬೇಕು ಎಂಬುದರ ಕುರಿತು ಸರ್ಕಾರದ ಮಟ್ಟದಲ್ಲಿ ಚರ್ಚೆ ನಡೆದಿದ್ದು, ಶೀಘ್ರದಲ್ಲೇ ಅಂತಿಮ ತೀರ್ಮಾನವನ್ನು ಘೋಷಿಸಲಾಗುವುದು. ಈ ಎಲ್ಲ ವಿವರಗಳನ್ನು ಹೊಸ ಮಾರ್ಗಸೂಚಿಯಲ್ಲಿ ಸ್ಪಷ್ಟವಾಗಿ ಒದಗಿಸಲಾಗುವುದು ಎಂದು ಆಯುಕ್ತರು ಭರವಸೆ ನೀಡಿದ್ದಾರೆ.
ಇ-ಖಾತಾ ಪಡೆಯಲು ಶುಲ್ಕ ಎಷ್ಟು?
ಬಿಬಿಎಂಪಿಯ ಆನ್‌ಲೈನ್ ವ್ಯವಸ್ಥೆಯ ಮೂಲಕ ಇ-ಖಾತಾ ಪಡೆಯಲು ಈ ಕೆಳಗಿನ ಶುಲ್ಕಗಳನ್ನು ಪಾವತಿಸಬೇಕಾಗುತ್ತದೆ:
-
ನೇರ ಡೌನ್‌ಲೋಡ್ (BBMP Aasthi Karnataka Portal)
ಇ-ಖಾತಾವನ್ನು BBMP Aasthi karnataka.gov.in ವೆಬ್‌ಸೈಟ್‌ನಿಂದ ನೀವೇ ಡೌನ್‌ಲೋಡ್ ಮಾಡಿಕೊಂಡರೆ ಕೇವಲ ರೂ. 125/- ಶುಲ್ಕವನ್ನು ಪಾವತಿಸಬೇಕು. -
ಬೆಂಗಳೂರು ಒನ್ ಕೇಂದ್ರಗಳ ಮೂಲಕ
ಬೆಂಗಳೂರು ಒನ್ ಕೇಂದ್ರಗಳಲ್ಲಿ ಈ ಸೇವೆಯನ್ನು ಪಡೆಯಲು ರೂ. 125/- (ಬಿಬಿಎಂಪಿ ಶುಲ್ಕ) + ರೂ. 45/- (ಬೆಂಗಳೂರು ಒನ್ ಸೇವಾ ಶುಲ್ಕ) + ಪ್ರತಿ ಪುಟದ ಸ್ಕ್ಯಾನಿಂಗ್‌ಗೆ ರೂ. 5/- ಶುಲ್ಕವನ್ನು ಪಾವತಿಸಬೇಕಾಗುತ್ತದೆ. -
ಜನಸೇವಕರ ಮೂಲಕ (ಮನೆ ಬಾಗಿಲಿಗೆ ಸೇವೆ)
ಜನಸೇವಕರ ಮೂಲಕ ಇ-ಖಾತಾ ಸೇವೆಯನ್ನು ನಿಮ್ಮ ಮನೆ ಬಾಗಿಲಿಗೆ ಪಡೆಯಲು ರೂ. 125/- (ಬಿಬಿಎಂಪಿ ಶುಲ್ಕ) + ರೂ. 160/- (ಜನಸೇವಕ ಶುಲ್ಕ) + ಪ್ರತಿ ಪುಟದ ಸ್ಕ್ಯಾನಿಂಗ್‌ಗೆ ರೂ. 5/- ಶುಲ್ಕವನ್ನು ಭರಿಸಬೇಕು.
ಜನಸೇವಕ ಸೇವೆಗಾಗಿ 080 – 4920 3888 ಸಂಖ್ಯೆಗೆ ಕರೆ ಮಾಡಿ ಅಥವಾ ಆನ್‌ಲೈನ್‌ನಲ್ಲಿ https://janasevaka.karnataka.gov.in ಮೂಲಕ ಬುಕ್ ಮಾಡಬಹುದು.
ಅಗತ್ಯ ದಾಖಲೆಗಳು
ಇ-ಖಾತಾ ಪಡೆಯಲು ಈ ಕೆಳಗಿನ ದಾಖಲೆಗಳು ಸಿದ್ಧವಿರಬೇಕು.
-
ಮಾಲೀಕರ ಆಧಾರ್ ಕಾರ್ಡ್
-
ಆಸ್ತಿ ತೆರಿಗೆ ಎಸ್.ಎ.ಎಸ್. ಅರ್ಜಿ ಸಂಖ್ಯೆ
-
ಸ್ವತ್ತಿನ ಕ್ರಯ/ನೋಂದಾಯಿತ ಪತ್ರ ಸಂಖ್ಯೆ (ಕಾವೇರಿ ತಂತ್ರಾಂಶದಿಂದ ವಿದ್ಯುನ್ಮಾನವಾಗಿ ಪಡೆಯಲಾಗುವುದು)
-
ಬೆಸ್ಕಾಂ ಖಾತೆ ಸಂಖ್ಯೆ (ಖಾಲಿ ನಿವೇಶನಗಳಿಗೆ ಇದು ಅಗತ್ಯವಿಲ್ಲ)
-
ಸ್ಕೃತ್ತಿನ ಛಾಯಾಚಿತ್ರ
ಹೆಚ್ಚಿನ ಮಾಹಿತಿಗಾಗಿ ಇ-ಖಾತಾ ಸಹಾಯವಾಣಿ 94806 83695 ಸಂಖ್ಯೆಗೆ ಸಂಪರ್ಕಿಸಬಹುದು.
ಎ-ಖಾತಾಕ್ಕೆ ಪರಿವರ್ತನೆ ಅಥವಾ ಹೊಸ ಅರ್ಜಿ
ಈ ಆನ್‌ಲೈನ್ ವ್ಯವಸ್ಥೆಯ ಮೂಲಕ ಎರಡು ರೀತಿಯಲ್ಲಿ ಇ-ಖಾತಾ ಪಡೆಯಬಹುದು.
-
ಬಿ-ಖಾತಾವನ್ನು ಎ-ಖಾತಾಗೆ ಪರಿವರ್ತನೆ: ಈಗಾಗಲೇ ಬಿ-ಖಾತಾ ಹೊಂದಿರುವವರು ಎ-ಖಾತಾಗೆ ಬದಲಾಯಿಸಬಹುದು.
-
ಹೊಸ ಎ-ಖಾತಾ ಅರ್ಜಿ: ಯಾವುದೇ ಖಾತಾ ಇಲ್ಲದಿದ್ದರೆ, ನೇರವಾಗಿ ಹೊಸ ಎ-ಖಾತಾಗೆ ಅರ್ಜಿ ಸಲ್ಲಿಸಬಹುದು.
ಬಿಬಿಎಂಪಿ ಆಯುಕ್ತ ಎಂ. ಮಹೇಶ್ವರ ರಾವ್ ಎಚ್ಚರಿಕೆ ನೀಡಿದ್ದು, ಯಾವುದೇ ಬಿಬಿಎಂಪಿ ಕಚೇರಿಗೆ ಭೇಟಿ ನೀಡುವ ಅಗತ್ಯವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಯಾವುದೇ ಮಧ್ಯವರ್ತಿಗಳನ್ನು ಸಂಪರ್ಕಿಸದಂತೆ ಮತ್ತು ಲಂಚ ನೀಡದಂತೆ ಸೂಚಿಸಿದ್ದಾರೆ. ಆನ್‌ಲೈನ್ ವ್ಯವಸ್ಥೆಯು ಸುಮಾರು 15 ದಿನಗಳಲ್ಲಿ ಜಾರಿಗೆ ಬರಲಿದ್ದು, ಆಗ ಎಲ್ಲರಿಗೂ ಸುಲಭವಾಗಿ ಸೇವೆ ಲಭ್ಯವಾಗಲಿದೆ.
ಈ ಹೊಸ ವ್ಯವಸ್ಥೆಯು ಆಸ್ತಿ ತೆರಿಗೆ ಸಂಬಂಧಿತ ಪ್ರಕ್ರಿಯೆಗಳನ್ನು ಇನ್ನಷ್ಟು ಸರಳಗೊಳಿಸಲಿದೆ ಮತ್ತು ಪಾರದರ್ಶಕತೆಯನ್ನು ಖಾತ್ರಿಪಡಿಸಲಿದೆ.