ಬೆಂಗಳೂರು: ತಂತ್ರಜ್ಞಾನ ಬೆಳೆದಂತೆ ಉದ್ಯೋಗ ಮಾರುಕಟ್ಟೆಯಲ್ಲಿ ಭಾರೀ ಬದಲಾವಣೆಗಳಾಗುತ್ತಿವೆ. ಕೃತಕ ಬುದ್ಧಿಮತ್ತೆ (ಎಐ)ಯಿಂದಾಗಿ ಜಾಗತಿಕ ಮಟ್ಟಕ್ಕಿಂತ ವೇಗವಾಗಿ ಭಾರತದ ಆರಂಭಿಕ ಹಂತದ ಉದ್ಯೋಗಗಳು ಬದಲಾಗುತ್ತಿವೆ ಎಂದು ಪ್ರಮುಖ ಐಟಿ ಸಂಸ್ಥೆ ‘ಕಾಗ್ನಿಜೆಂಟ್’ ಮತ್ತು ಶಿಕ್ಷಣ ಸಂಸ್ಥೆ ‘ಪಿಯರ್ಸನ್’ ಬಿಡುಗಡೆ ಮಾಡಿರುವ ನೂತನ ಅಧ್ಯಯನ ವರದಿ ತಿಳಿಸಿದೆ.
ಅಮೆರಿಕ, ಬ್ರಿಟನ್ ಮತ್ತು ಭಾರತದ ಸುಮಾರು 750 ಎಚ್ಆರ್ ನಾಯಕರನ್ನು ಸಮೀಕ್ಷೆಗೊಳಪಡಿಸಿ ʼದಿ ಎಐ ವರ್ಕ್ಫೋರ್ಸ್ ಪಲ್ಸ್ʼ ಎಂಬ ವರದಿಯನ್ನು ಸಿದ್ಧಪಡಿಸಲಾಗಿದೆ. ಈ ವರದಿಯಲ್ಲಿ ಹಲವು ಸ್ಫೋಟಕ ಅಂಶಗಳಿವೆ.
ಫ್ರೆಶರ್ಸ್ ಮಾಡುವ 37% ಕೆಲಸ ಈಗ ಎಐ ಪಾಲು
ಜಾಗತಿಕವಾಗಿ ಎಂಟ್ರಿ ಲೆವೆಲ್ ಹುದ್ದೆಗಳ ಶೇ. 33ರಷ್ಟು ಕೆಲಸಗಳನ್ನು ಎಐ ಮಾಡುತ್ತಿದ್ದರೆ, ಭಾರತದಲ್ಲಿ ಈ ಪ್ರಮಾಣ ಶೇ. 37ರಷ್ಟಿದೆ! ಶೇ.18ರಷ್ಟು ಎಚ್ಆರ್ ಅಧಿಕಾರಿಗಳ ಪ್ರಕಾರ, ಹೊಸಬರು ಮಾಡುವ ಅರ್ಧಕ್ಕಿಂತ ಹೆಚ್ಚು ಕೆಲಸವನ್ನು ಈಗ ಎಐ ಮೂಲಕವೇ ಮಾಡಿಸಲಾಗುತ್ತಿದೆ.
ಉದ್ಯೋಗ ಕಡಿತವಲ್ಲ, ಕೆಲಸದ ಸ್ವರೂಪವೇ ಬದಲು!
ಎಐ ಬಂದರೆ ಉದ್ಯೋಗ ಹೋಗುತ್ತದೆ ಎಂಬ ಭಯ ಬೇಡ. ಬದಲಾಗಿ ಕೆಲಸದ ರೀತಿ ಬದಲಾಗುತ್ತದೆ ಎಂದೂ ವರದಿ ಹೇಳಿದೆ. ಶೇ. 96ರಷ್ಟು ಎಚ್ಆರ್ ಅಧಿಕಾರಿಗಳ ಪ್ರಕಾರ, ಮುಂದಿನ 5 ವರ್ಷಗಳಲ್ಲಿ ಎಂಟ್ರಿ ಲೆವೆಲ್ ಉದ್ಯೋಗಿಗಳು ‘ಎಐ ಸಿಸ್ಟಮ್’ಗಳನ್ನು ನಿರ್ವಹಿಸುವ, ಮೇಲ್ವಿಚಾರಣೆ ಮಾಡುವ ಕೆಲಸ ಮಾಡಲಿದ್ದಾರೆ.
ಶೇ. 94ರಷ್ಟು ಅಧಿಕಾರಿಗಳು, ಹಿಂದೆಂದೂ ಇರದಿದ್ದ ‘ಹೊಸ ಹುದ್ದೆಗಳು’ ಸೃಷ್ಟಿಯಾಗಲಿವೆ ಎಂದಿದ್ದಾರೆ.
ಭಾರತದಲ್ಲಿ ಶೇ. 80ರಷ್ಟು ಕಂಪನಿಗಳು ಹೇಳುವಂತೆ, ಎಐ ಬಳಕೆಯಿಂದಾಗಿ ಉದ್ಯೋಗಿಗಳು ತಮ್ಮ ದೈನಂದಿನ ಸಣ್ಣಪುಟ್ಟ ಕೆಲಸ ಬಿಟ್ಟು, ಕಂಪನಿಗೆ ಹೆಚ್ಚು ಮೌಲ್ಯ ತರುವ ದೊಡ್ಡ ಕೆಲಸಗಳತ್ತ ಗಮನಹರಿಸಲು ಸಾಧ್ಯವಾಗುತ್ತಿದೆ.
ಸಾಫ್ಟ್ ಸ್ಕಿಲ್ಸ್ & ಮಾನವ ಕೌಶಲ್ಯಕ್ಕೆ ನಿರಂತರ ಬೇಡಿಕೆ!
ಯಂತ್ರಗಳು ಎಷ್ಟೇ ಸ್ಮಾರ್ಟ್ ಆದರೂ, ಮನುಷ್ಯನ ಆಲೋಚನಾ ಶಕ್ತಿಗೆ ಸರಿಸಾಟಿಯಿಲ್ಲ. ಹೀಗಾಗಿ:
ಶೇ. 97ರಷ್ಟು ಕಂಪನಿಗಳು ಅಭ್ಯರ್ಥಿಗಳಲ್ಲಿ ಟೆಕ್ನಿಕಲ್ ಸ್ಕಿಲ್ಗಿಂತ ‘ಸಾಫ್ಟ್ ಸ್ಕಿಲ್ಸ್’, ಸಮಸ್ಯೆ ಬಗೆಹರಿಸುವ ಕೌಶಲ್ಯ ಮತ್ತು ಹೊಂದಿಕೊಳ್ಳುವ ಗುಣವನ್ನು ಎದುರು ನೋಡುತ್ತಿವೆ.
ಶೇ. 67ರಷ್ಟು ಎಚ್ಆರ್ ವೃತ್ತಿಪರರು, ಎಂಜಿನಿಯರಿಂಗ್ ಹೊರತಾದ (ಉದಾ: ಲಿಬರಲ್ ಆರ್ಟ್ಸ್, ಬಿಎ) ಪದವಿಗಳಿಗೂ ಈಗ ಹೆಚ್ಚಿನ ಮೌಲ್ಯ ನೀಡುತ್ತಿದ್ದಾರೆ. ಒಂದೇ ವಿಷಯದಲ್ಲಿ ಪರಿಣತಿಗಿಂತ, ಹಲವು ವಿಷಯಗಳ ಜ್ಞಾನ ಇರುವ ಯುವಜನರಿಗೆ ಹೆಚ್ಚು ಬೇಡಿಕೆ ಇದೆ.
ಎಐ ತರಬೇತಿಗೆ ಹೆಚ್ಚಿದ ಬೇಡಿಕೆ, ಕಂಪನಿಗಳಿಗೆ ಭಾರೀ ಸವಾಲು
ಶೇ. 91ರಷ್ಟು ಉದ್ಯೋಗಿಗಳು ತಮಗೆ ಎಐ ಟ್ರೈನಿಂಗ್ ಬೇಕು ಎಂದು ಕೇಳುತ್ತಿದ್ದಾರೆ. ಆದರೆ, ತಂತ್ರಜ್ಞಾನ ಬದಲಾಗುತ್ತಿರುವ ವೇಗಕ್ಕೆ ತಕ್ಕಂತೆ ತರಬೇತಿ ನೀಡಲು ಶೇ. 63ರಷ್ಟು ಭಾರತೀಯ ಕಂಪನಿಗಳು ಒದ್ದಾಡುತ್ತಿವೆ. ಆದಾಗ್ಯೂ, ಅಮೆರಿಕ (ಶೇ. 49)ಕ್ಕೆ ಹೋಲಿಸಿದರೆ ಭಾರತದ ಶೇ. 6 ರಷ್ಟು ಕಂಪನಿಗಳು ತಮ್ಮ ಉದ್ಯೋಗಿಗಳಿಗೆ ಎಐ ಕಲಿಯಲು ಪ್ರತ್ಯೇಕ ಸಮಯವನ್ನು ಮೀಸಲಿಟ್ಟಿವೆ.
ಇದೆಲ್ಲದರ ನಡುವೆ, ಎಐ ಅಳವಡಿಕೆಯಲ್ಲಿ ಕಂಪನಿಗಳ ‘ಮಿಡಲ್ ಮ್ಯಾನೇಜರ್’ಗಳ ಪಾತ್ರ ಅತ್ಯಂತ ಪ್ರಮುಖವಾದುದು ಎಂದು ಶೇ. 95ರಷ್ಟು ಎಚ್ಆರ್ ನಾಯಕರು ಅಭಿಪ್ರಾಯಪಟ್ಟಿದ್ದಾರೆ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಕಾಗ್ನಿಜೆಂಟ್ ಇಂಡಿಯಾ ಅಧ್ಯಕ್ಷ ಹಾಗೂ ಎಂಡಿ ರಾಜೇಶ್ ವಾರಿಯರ್, “ಭಾರತದಲ್ಲಿ ಎಐ ಬಳಕೆ ಬಹಳ ವೇಗವಾಗುತ್ತಿದೆ. ಯುವ ಉದ್ಯೋಗಿಗಳು ಎಐ ಜೊತೆಯಾಗಿ ಕೆಲಸ ಮಾಡುತ್ತಾ, ಅತ್ಯುತ್ತಮ ಫಲಿತಾಂಶ ನೀಡಬೇಕಿದೆ. ಈ ಬದಲಾಗುತ್ತಿರುವ ಆರ್ಥಿಕತೆಯಲ್ಲಿ ‘ರಿಸ್ಕಿಲ್ಲಿಂಗ್’ (ಹೊಸ ಕೌಶಲ್ಯ ಕಲಿಯುವುದು) ಅತ್ಯಂತ ಅಗತ್ಯ,” ಎಂದು ಅಭಿಪ್ರಾಯಪಟ್ಟರು.
“ಎಐ ನಮ್ಮ ಪ್ರತಿಭೆಗಳ ಆಯ್ಕೆಯ ವಿಧಾನವನ್ನೇ ಬದಲಿಸಿದೆ. ಕೌಶಲ್ಯದ ಅಗತ್ಯತೆಗಳು ಕ್ಷಿಪ್ರವಾಗಿ ಬದಲಾಗುತ್ತಿರುವುದರಿಂದ, ಕಂಪನಿಗಳು ಯುವಕರನ್ನು ನೇಮಿಸಿಕೊಳ್ಳುವ ಮತ್ತು ಬೆಳೆಸುವ ರೀತಿಯನ್ನು ಬದಲಾಯಿಸಿಕೊಳ್ಳಬೇಕಿದೆ,” ಎಂದು ಕಾಗ್ನಿಜೆಂಟ್ ಚೀಫ್ ಎಚ್ಆರ್ ಕ್ಯಾಥಿ ಡಯಾಜ್ ಹೇಳಿದರು.
“ಮಾನವ ಮತ್ತು ಎಐ ಒಟ್ಟಾಗಿ ಕೆಲಸ ಮಾಡುವ ಕೌಶಲ್ಯವನ್ನು ಬೆಳೆಸುವ ಸಂಸ್ಥೆಗಳು ಮಾತ್ರ ಭವಿಷ್ಯದಲ್ಲಿ ಯಶಸ್ವಿಯಾಗುತ್ತವೆ. ಇದಕ್ಕೆ ಯುವ ಪ್ರತಿಭೆಗಳೇ ಬುನಾದಿ,” ಎಂದು ಪಿಯರ್ಸನ್ ಚೀಫ್ ಎಚ್ಆರ್ ಅಲಿ ಬೆಬೊ ತಿಳಿಸಿದರು.
20,000ಕ್ಕೂ ಹೆಚ್ಚು ಫ್ರೆಶರ್ಸ್ ನೇಮಕ
ತನ್ನ ಹಿಂದಿನ ಸಮೀಕ್ಷೆಯಲ್ಲಿ ಶೇ. 93ರಷ್ಟು ಉದ್ಯೋಗಗಳ ಮೇಲೆ ಎಐ ಪ್ರಭಾವ ಬೀರಲಿದೆ ಎಂದು ಕಾಗ್ನಿಜೆಂಟ್ ಹೇಳಿತ್ತು. ಈ ಬದಲಾವಣೆಗೆ ತಕ್ಕಂತೆ ಯುವ ಪ್ರತಿಭೆಗಳನ್ನು ಸಜ್ಜುಗೊಳಿಸಲು ಕಂಪನಿ ಮುಂದಾಗಿದ್ದು, 2025ರಲ್ಲಿ ಬರೋಬ್ಬರಿ 20,000 ಫ್ರೆಶರ್ಸ್ಗಳನ್ನು ನೇಮಕ ಮಾಡಿಕೊಂಡಿದೆ. 2026ರಲ್ಲಿ ಈ ಸಂಖ್ಯೆಯನ್ನು ಇನ್ನಷ್ಟು ಹೆಚ್ಚಿಸುವ ಗುರಿಯನ್ನು ಕಂಪನಿ ಹೊಂದಿದೆ. ಜೊತೆಗೆ ಉದ್ಯೋಗಿಗಳಿಗೆ ತರಬೇತಿ ನೀಡಲು ಕಾಗ್ನಿಜೆಂಟ್ ಮತ್ತು ಪಿಯರ್ಸನ್ ಸಂಸ್ಥೆಗಳು ಜಂಟಿಯಾಗಿ ಕೆಲಸ ಮಾಡುತ್ತಿವೆ.