ಚಳಿಗಾಲದಲ್ಲಿ ಫಿಟ್ನೆಸ್ ಕಾಯ್ದುಕೊಳ್ಳಲು ನಾವೆಲ್ಲರೂ ಬೆಳ್ಳಂಬೆಳಿಗ್ಗೆ ಎದ್ದು ವಾಕಿಂಗ್ ಹೋಗುವುದನ್ನು ರೂಢಿಸಿಕೊಂಡಿರುತ್ತೇವೆ. ಆದರೆ, ನೀವು ಮಾಡುವ ಇದೇ ಹವ್ಯಾಸ ನಿಮ್ಮ ಪ್ರಾಣಕ್ಕೆ ಕುತ್ತು ತರಬಹುದು ಎಂದರೆ ನಂಬುತ್ತೀರಾ ? ಹೌದು, ಆರೋಗ್ಯ ತಜ್ಞರ ಪ್ರಕಾರ ಚಳಿಗಾಲದ ಮುಂಜಾನೆ ವಾಕಿಂಗ್ ಮಾಡುವುದು ಹೃದಯಾಘಾತದ (Heart Attack) ಅಪಾಯವನ್ನು ಹೆಚ್ಚಿಸುತ್ತದೆ.
ಏಕಾಗುತ್ತೆ ಈ ಅಪಾಯ? ತಜ್ಞರ ವಿಶ್ಲೇಷಣೆ
ಈ ಬಗ್ಗೆ ಹೃದ್ರೋಗ ತಜ್ಞರು ಮಾತನಾಡಿ, ಚಳಿಗಾಲದಲ್ಲಿ ವಾತಾವರಣ ತಂಪಾಗಿರುವುದರಿಂದ ನಮ್ಮ ದೇಹವು ತನ್ನನ್ನು ತಾನು ಬೆಚ್ಚಗಿಡಲು ಪ್ರಯತ್ನಿಸುತ್ತದೆ. ಈ ಪ್ರಕ್ರಿಯೆಯಲ್ಲಿ ರಕ್ತನಾಳಗಳು ಸಂಕುಚಿತಗೊಳ್ಳುತ್ತವೆ (Narrowing of blood vessels). ಇದರಿಂದಾಗಿ ರಕ್ತದೊತ್ತಡ (Blood Pressure) ಏರಿಕೆಯಾಗುತ್ತದೆ. ರಕ್ತವನ್ನು ಪಂಪ್ ಮಾಡಲು ಹೃದಯಕ್ಕೆ ಹೆಚ್ಚಿನ ಶ್ರಮ ಬೇಕಾಗುತ್ತದೆ, ಇದು ಹೃದಯದ ಮೇಲೆ ವಿಪರೀತ ಒತ್ತಡವನ್ನುಂಟು ಮಾಡುತ್ತದೆ. ಪರಿಣಾಮವಾಗಿ ಹೃದಯಾಘಾತ ಸಂಭವಿಸುವ ಸಾಧ್ಯತೆಗಳು ಹೆಚ್ಚಿರುತ್ತವೆ ಎಂದು ತಿಳಿಸಿದ್ದಾರೆ.
ಯಾರಿಗೆ ಹೆಚ್ಚು ಅಪಾಯ ?
ಈ ಕೆಳಗಿನ ಆರೋಗ್ಯ ಸಮಸ್ಯೆ ಇರುವವರು ಚಳಿಗಾಲದ ಮುಂಜಾನೆ ವಾಕಿಂಗ್ ಹೋಗುವುದನ್ನು ಕಟ್ಟುನಿಟ್ಟಾಗಿ ತಪ್ಪಿಸಬೇಕು:
-
ಈಗಾಗಲೇ ಹೃದಯಕ್ಕೆ ಸಂಬಂಧಿಸಿದ ಸಮಸ್ಯೆ ಇರುವವರು.
-
ಅಧಿಕ ರಕ್ತದೊತ್ತಡ: ಬಿಪಿ ಸಮಸ್ಯೆ ಇರುವವರಿಗೆ ಚಳಿಯ ಗಾಳಿ ಅಪಾಯಕಾರಿ.
-
ವೃದ್ಧರು: ವಯಸ್ಸಾದವರಲ್ಲಿ ರೋಗನಿರೋಧಕ ಶಕ್ತಿ ಮತ್ತು ರಕ್ತನಾಳಗಳ ಸ್ಥಿತಿಸ್ಥಾಪಕತ್ವ ಕಡಿಮೆ ಇರುವುದರಿಂದ ಅಪಾಯ ಹೆಚ್ಚು.
-
ಉಸಿರಾಟದ ತೊಂದರೆ ಇರುವವರು: ಮಂಜು ಮತ್ತು ಮಾಲಿನ್ಯದ ಕಾರಣದಿಂದ ಆಸ್ತಮಾ ಅಥವಾ ಬ್ರಾಂಕೈಟಿಸ್ ಸಮಸ್ಯೆ ಹೆಚ್ಚಾಗಬಹುದು.
ಸುರಕ್ಷಿತವಾಗಿ ವಾಕಿಂಗ್ ಮಾಡುವುದು ಹೇಗೆ ?
ನೀವು ವಾಕಿಂಗ್ ಮಾಡಲೇಬೇಕು ಎಂದಿದ್ದರೆ ವೈದ್ಯರು ಕೆಲವು ಬದಲಾವಣೆಗಳನ್ನು ಸೂಚಿಸಿದ್ದಾರೆ:
-
ಸಮಯ ಬದಲಾಯಿಸಿ: ಮುಂಜಾನೆ 6 ಗಂಟೆಗೆ ಹೋಗುವ ಬದಲು, ಸೂರ್ಯ ಬಂದ ಮೇಲೆ ಅಂದರೆ ಬೆಳಿಗ್ಗೆ 8 ಅಥವಾ 9 ಗಂಟೆಯ ನಂತರ ಹೋಗಿ. ಇಲ್ಲವೇ ಸಂಜೆ ನಡಿಗೆ ಮಾಡುವುದು ಉತ್ತಮ.
-
ಸರಿಯಾದ ಬಟ್ಟೆ ಧರಿಸಿ: ತಲೆ, ಕಿವಿ ಮತ್ತು ಎದೆಯ ಭಾಗವನ್ನು ಸಂಪೂರ್ಣವಾಗಿ ಮುಚ್ಚುವಂತಹ ಉಣ್ಣೆಯ ಬಟ್ಟೆಗಳನ್ನು (Sweater/Monkey Cap) ಧರಿಸಿ.
-
ಒಳಾಂಗಣ ನಡಿಗೆ: ಹೊರಗೆ ವಿಪರೀತ ಮಾಲಿನ್ಯ ಅಥವಾ ದಟ್ಟ ಮಂಜು ಇದ್ದರೆ, ಮನೆಯ ಒಳಗೇ ಅಥವಾ ಟೆರೇಸ್ ಮೇಲೆ ಓಡಾಡಿ.
-
ವೇಗ ಬೇಡ: ಚಳಿಗಾಲದಲ್ಲಿ ಹಠಾತ್ತನೆ ವೇಗವಾಗಿ ಓಡುವುದು ಅಥವಾ ಜಾಗಿಂಗ್ ಮಾಡುವುದು ಬೇಡ. ಸಾವಧಾನವಾಗಿ ನಡೆಯಿರಿ.
ಈ ಲಕ್ಷಣಗಳಿದ್ದರೆ ತಕ್ಷಣ ನಿಲ್ಲಿಸಿ:
ನಡೆಯುವಾಗ ನಿಮಗೆ ಅತಿಯಾದ ಬೆವರು ಬರುವುದು, ಎದೆ ನೋವು, ಉಸಿರಾಟದಲ್ಲಿ ತೊಂದರೆ ಅಥವಾ ತಲೆತಿರುಗುವಿಕೆ ಉಂಟಾದರೆ ಅದನ್ನು ನಿರ್ಲಕ್ಷಿಸಬೇಡಿ. ಇದು ಹೃದಯದ ಮೇಲೆ ಒತ್ತಡ ಬೀಳುತ್ತಿರುವುದರ ಮುನ್ಸೂಚನೆಯಾಗಿರಬಹುದು. ಕೂಡಲೇ ವೈದ್ಯರನ್ನು ಸಂಪರ್ಕಿಸಿ.