ಗಂಟೆಗಟ್ಟಲೆ ಕುಳಿತು ಕೆಲಸ ಮಾಡ್ತೀರಾ? ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರಬಹುದು!

ಇತ್ತೀಚಿನ ದಿನಗಳಲ್ಲಿ ಆಫೀಸ್ ಕೆಲಸ, ಮನೆಯಿಂದಲೇ ಕಾರ್ಯನಿರ್ವಹಣೆ (Work From Home) ಮತ್ತು ಆನ್ಲೈನ್ ಅಧ್ಯಯನದಿಂದಾಗಿ ಬಹುತೇಕ ಜನರು ಗಂಟೆಗಟ್ಟಲೆ ಕುಳಿತುಕೊಳ್ಳುವುದು ಸಾಮಾನ್ಯವಾಗಿದೆ. ಕಂಪ್ಯೂಟರ್, ಲ್ಯಾಪ್ಟಾಪ್ ಅಥವಾ ಮೊಬೈಲ್ ಪರದೆಯ ಮುಂದೆ ನಿರಂತರವಾಗಿ ಕುಳಿತಿರುವುದು ಅನೇಕರಿಗೆ ಒಂದು ಅಭ್ಯಾಸವಾಗಿದೆ. ಆದರೆ ತಜ್ಞರ ಪ್ರಕಾರ, ಇದೊಂದು ಸಾಮಾನ್ಯ ಅಭ್ಯಾಸವಲ್ಲ. ಇದು ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರಬಹುದು.

ದೀರ್ಘಕಾಲ ಕುಳಿತುಕೊಳ್ಳುವುದರಿಂದ ಸ್ನಾಯುಗಳು ದುರ್ಬಲವಾಗುತ್ತವೆ. ಬೆನ್ನುಹುರಿಯ ಮೇಲೆ ಅತಿಯಾದ ಒತ್ತಡ ಉಂಟಾಗುತ್ತದೆ ಮತ್ತು ರಕ್ತ ಸಂಚಾರವು ನಿಧಾನಗೊಳ್ಳುತ್ತದೆ. ಇದರ ಪರಿಣಾಮವಾಗಿ ಬೆನ್ನು ನೋವು (Back Pain), ಕೈ-ಕಾಲುಗಳಲ್ಲಿ ಊತ ಮತ್ತು ಸ್ನಾಯು ಸೆಳೆತದಂತಹ ಸಮಸ್ಯೆಗಳು ಸಾಮಾನ್ಯವಾಗುತ್ತವೆ. ಇದನ್ನು ನಿರ್ಲಕ್ಷಿಸಿದರೆ, ಇದು ನಾನಾ ರೀತಿಯ ಆರೋಗ್ಯ ಸಮಸ್ಯೆ ಗಳಿಗೆ ದಾರಿ ಮಾಡಿಕೊಡುತ್ತದೆ.

ಅಪಾಯಗಳೇನು? (ಡಾ. ಅಜಯ್ ಕುಮಾರ್ ಅವರ ಪ್ರಕಾರ)

• ಬೆನ್ನು ಮತ್ತು ಕತ್ತು ನೋವು: ತಪ್ಪಾದ ಭಂಗಿಯಲ್ಲಿ ದೀರ್ಘಕಾಲ ಕುಳಿತಿರುವುದು ಬೆನ್ನುಮೂಳೆಯ ಮೇಲೆ ಒತ್ತಡ ಹೇರಿ, ದೀರ್ಘಕಾಲದ ನೋವಿಗೆ ಕಾರಣವಾಗಬಹುದು.

• ಹೃದಯ ಸಮಸ್ಯೆಗಳು ಮತ್ತು ಮಧುಮೇಹ: ಕುಳಿತುಕೊಳ್ಳುವುದರಿಂದ ಮೆಟಾಬಾಲಿಸಮ್ ನಿಧಾನವಾಗುತ್ತದೆ, ಕ್ಯಾಲೊರಿಗಳು ಸುಡದೇ ಹೋಗುವುದರಿಂದ ತೂಕ ಹೆಚ್ಚಳ, ಹೃದ್ರೋಗ ಮತ್ತು ಟೈಪ್-2 ಮಧುಮೇಹದ ಅಪಾಯ  ಹೆಚ್ಚಾಗುತ್ತದೆ.

• ಕಣ್ಣಿನ ತೊಂದರೆ: ನಿರಂತರವಾಗಿ ಪರದೆಯನ್ನು ನೋಡುತ್ತಿರುವುದರಿಂದ ಕಣ್ಣುಗಳು ಒಣಗುವುದು, ಉರಿ, ದಣಿವು, ಮತ್ತು ದೃಷ್ಟಿ ಮಸುಕಾಗುವ ಸಮಸ್ಯೆ ಕಾಣಿಸಬಹುದು.

• ಮಾನಸಿಕ ಆರೋಗ್ಯ ಪರಿಣಾಮ: ದೀರ್ಘಕಾಲದ ನಿಶ್ಚಲತೆಯಿಂದ ಮನಸ್ಸಿನಲ್ಲಿ ಚಡಪಡಿಕೆ, ಏಕಾಗ್ರತೆಯ ಕೊರತೆ ಮತ್ತು ನಿದ್ರಾಹೀನತೆ ಸಾಮಾನ್ಯವಾಗುತ್ತದೆ.

ಈ ಲಕ್ಷಣಗಳು ಕಂಡುಬಂದರೆ ನಿರ್ಲಕ್ಷಿಸಬೇಡಿ

• ಬೆನ್ನು, ಕತ್ತು ಅಥವಾ ಸೊಂಟದಲ್ಲಿ ನಿರಂತರ ನೋವು

• ಕಣ್ಣುಗಳಲ್ಲಿ ಉರಿ, ಒಣಗುವಿಕೆ, ಅಥವಾ ಅಸ್ಪಷ್ಟ ದೃಷ್ಟಿ

• ಕೈ, ಕಾಲುಗಳಲ್ಲಿ ಊತ ಅಥವಾ ಜುಮ್ಮೆನ್ನುವಿಕೆ

• ಶಕ್ತಿಯ ಕೊರತೆ, ಯಾವಾಗಲೂ ಆಯಾಸ ಅನುಭವವಾಗುವುದು

• ವಿವರಿಸಲಾಗದ ತೂಕ ಹೆಚ್ಚಳ, ಸ್ನಾಯುಗಳು ಸಡಿಲವಾಗುವುದು

• ಚಡಪಡಿಕೆ, ಏಕಾಗ್ರತೆ ಕಡಿಮೆಯಾಗುವುದು, ರಾತ್ರಿ ನಿದ್ರೆ ಸರಿಯಾಗಿ ಬಾರದಿರುವುದು

ತಡೆಗಟ್ಟುವ ಸರಳ ಮಾರ್ಗಗಳು (ಪ್ರಾಯೋಗಿಕ ಸಲಹೆಗಳು)

1. ನಿಯಮಿತ ವಿರಾಮ ತೆಗೆದುಕೊಳ್ಳಿ: ಪ್ರತೀ 45-60 ನಿಮಿಷಗಳಿಗೊಮ್ಮೆ 5 ನಿಮಿಷಗಳ ಬ್ರೇಕ್ ತೆಗೆದುಕೊಳ್ಳಿ. ಎದ್ದು ನಿಂತು, ಸ್ವಲ್ಪ ದೂರ ನಡೆದುಕೊಂಡು ಬನ್ನಿ.

2. ಸ್ಟ್ರೆಚಿಂಗ್ ಮರೆಯಬೇಡಿ: ಕುಳಿತ ಸ್ಥಿತಿಯಲ್ಲೇ ಕುತ್ತಿಗೆ, ಭುಜಗಳು, ಮಣಿಕಟ್ಟು ಮತ್ತು ಕಾಲ್ಬೆರಳುಗಳನ್ನು ಸ್ಟ್ರೆಚ್ ಮಾಡಿ.

3. ಸರಿಯಾದ ಭಂಗಿ ಕಾಪಾಡಿಕೊಳ್ಳಿ: ಬೆನ್ನು ನೇರವಾಗಿರಲಿ, ಕಂಪ್ಯೂಟರ್ ಪರದೆಯು ಕಣ್ಣುಗಳ ಮಟ್ಟದಲ್ಲಿರಲಿ. ನಿಮ್ಮ ಕುರ್ಚಿಗೆ ಬೆಂಬಲವಿರಬೇಕು.

4. ಸ್ಟ್ಯಾಂಡಿಂಗ್ ಡೆಸ್ಕ್ ಬಳಸಿ: ಸಾಧ್ಯವಾದರೆ, ಕೆಲಸದ ಸಮಯದಲ್ಲಿ ಅರ್ಧ ಗಂಟೆ ಕುಳಿತು, ಅರ್ಧ ಗಂಟೆ ನಿಂತುಕೊಂಡು ಕೆಲಸ ಮಾಡಿ.

5. ಸಮತೋಲನ ಆಹಾರ ಮತ್ತು ಹೈಡ್ರೇಶನ್: ಸಾಕಷ್ಟು ನೀರು ಕುಡಿಯಿರಿ. ಜಂಕ್ ಫುಡ್ ತಪ್ಪಿಸಿ, ಫೈಬರ್ ಯುಕ್ತ ಆಹಾರ ಸೇವಿಸಿ.

6. ನಿಯಮಿತ ವ್ಯಾಯಾಮ: ಯೋಗ, ವಾಕಿಂಗ್, ಸೈಕ್ಲಿಂಗ್ ಅಥವಾ ಈಜಿನಂತಹ ದೈನಂದಿನ ದೈಹಿಕ ಚಟುವಟಿಕೆಗಳನ್ನು ನಿಮ್ಮ ದಿನಚರಿಯಲ್ಲಿ ಅಳವಡಿಸಿಕೊಳ್ಳಿ.

ದೀರ್ಘಕಾಲ ಕುಳಿತುಕೊಳ್ಳುವ ಅಭ್ಯಾಸವನ್ನು ಸಣ್ಣದಾಗಿ ಕಾಣಬೇಡಿ. ಇದು ನಿಮ್ಮ ದೇಹ ಮತ್ತು ಮನಸ್ಸನ್ನು ನಿಧಾನವಾಗಿ ಹಾನಿಗೊಳಿಸಬಹುದು. ಮೇಲಿನ ಸಲಹೆಗಳನ್ನು ಅನುಸರಿಸುವ ಮೂಲಕ, ನಿಮ್ಮ ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು ಮತ್ತು ಕೆಲಸದ ದಕ್ಷತೆಯನ್ನು ಹೆಚ್ಚಿಸಬಹುದು.