ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ಜಿಮ್ ಜೀವನಶೈಲಿಯ ಒಂದು ಅವಿಭಾಜ್ಯ ಅಂಗವಾಗಿಬಿಟ್ಟಿದೆ. ದೇಹ ತೂಕ ಇಳಿಸಿಕೊಳ್ಳಲು, ಸ್ನಾಯು ಬಲ ಹೆಚ್ಚಿಸಿಕೊಳ್ಳಲು, ಆರೋಗ್ಯ ಸುಧಾರಿಸಿಕೊಳ್ಳಲು ಅಥವಾ ಫಿಟ್ ಲುಕ್ಗಾಗಿ ಪ್ರತಿ ವ್ಯಕ್ತಿಗೂ ಜಿಮ್ಗೆ ಹೋಗಲು ಕಾರಣವಿರುತ್ತದೆ. ಆದರೆ ಆರೋಗ್ಯಕ್ಕಾಗಿ ಬೆವರು ಸುರಿಸುತ್ತಿರುವ ಜಾಗದಲ್ಲೇ ರೋಗಾಣುಗಳ ಅಪಾಯ ಅಡಗಿದೆ ಎಂಬುದನ್ನು ಹಲವರು ಗಮನಿಸುವುದಿಲ್ಲ.
ಕೆಲವು ಅಧ್ಯಯನಗಳ ಪ್ರಕಾರ, ಜಿಮ್ನ ಟ್ರೆಡ್ಮಿಲ್ಗಳ ಮೇಲಿನ ಬ್ಯಾಕ್ಟೀರಿಯಾ ಪ್ರಮಾಣವು ಸಾರ್ವಜನಿಕ ಶೌಚಾಲಯಗಳಿಗಿಂತ ಹಲವಾರು ಪಟ್ಟು ಹೆಚ್ಚು ಇರಬಹುದು ಎಂದು ಹೇಳಲಾಗಿದೆ. ತೂಕ ಎತ್ತುವ ಡಂಬೆಲ್ಗಳು ಮತ್ತು ಬಾರ್ಬೆಲ್ಗಳ ಮೇಲೂ ಅಪಾರ ಪ್ರಮಾಣದ ಜೀವಾಣುಗಳು ಕಂಡುಬಂದಿರುವ ವರದಿಗಳಿವೆ. ಈ ಅಂಕಿಅಂಶಗಳು ಸ್ವಲ್ಪ ಅತಿರಂಜಿತವಾಗಿರಬಹುದು ಎಂದು ಕೆಲವರು ಭಾವಿಸಿದರೂ, ಜಿಮ್ ಉಪಕರಣಗಳ ಮೇಲೆ ಜೀವಾಣುಗಳ ಪ್ರಮಾಣ ಕಡಿಮೆ ಎನ್ನಲು ಸಾಧ್ಯವಿಲ್ಲ.
ಜಿಮ್ನಲ್ಲಿ ಬೆವರು, ತೇವಾಂಶ ಮತ್ತು ಗಾಳಿಯ ಹರಿವಿನ ಕೊರತೆ ಬ್ಯಾಕ್ಟೀರಿಯಾ ಮತ್ತು ಫಂಗಸ್ ಬೆಳವಣಿಗೆಗೆ ಸೂಕ್ತ ವಾತಾವರಣ ಒದಗಿಸುತ್ತದೆ. ಏರ್ ಕಂಡೀಷನ್ ಇರುವ ಮುಚ್ಚಿದ ವಾತಾವರಣದಲ್ಲಿ ಸಾಕಷ್ಟು ತಾಜಾ ಗಾಳಿ ಸಿಗದಿದ್ದರೆ ಸೋಂಕಿನ ಅಪಾಯ ಹೆಚ್ಚಾಗುತ್ತದೆ. ವಿಶೇಷವಾಗಿ ಕಾಲು ಮತ್ತು ಉಗುರುಗಳಲ್ಲಿ ಫಂಗಲ್ ಸೋಂಕು ಕಾಣಿಸಿಕೊಳ್ಳುವುದು ಸಾಮಾನ್ಯ. ಶೇರ್ ಮಾಡಿಕೊಳ್ಳುವ ಮ್ಯಾಟ್, ಯಂತ್ರಗಳ ಹಿಡಿಕೆಗಳು, ಲಾಕರ್ ರೂಮ್ ಮತ್ತು ಶವರ್ ಪ್ರದೇಶಗಳು ಹೆಚ್ಚಿನ ಅಪಾಯದ ಸ್ಥಳಗಳು.
ವರ್ಕೌಟ್ ಮುನ್ನ ಮತ್ತು ನಂತರ ಏನು ಮಾಡಬೇಕು?
ಜಿಮ್ನಲ್ಲಿ ಉಪಕರಣ ಬಳಸುವ ಮುನ್ನ ಅದರ ಹಿಡಿಕೆಗಳನ್ನು ಸ್ಯಾನಿಟೈಸಿಂಗ್ ವೈಪ್ನಿಂದ ಒರೆಸುವುದು ಒಳ್ಳೆಯ ಅಭ್ಯಾಸ. ಟ್ರೆಡ್ಮಿಲ್, ಸ್ಟೇಷನರಿ ಬೈಕ್, ಕ್ರಾಸ್ ಟ್ರೈನರ್ ಮುಂತಾದ ಯಂತ್ರಗಳ ಮೇಲೆ ಅನೇಕರು ಸ್ಪರ್ಶ ಮಾಡಿರುವುದರಿಂದ ಸ್ವಚ್ಛತೆ ಅತ್ಯಗತ್ಯ. ತೂಕದ ಡಂಬೆಲ್ಗಳು, ಕೆಟಲ್ಬೆಲ್ಗಳು ಮುಂತಾದವುಗಳನ್ನು ಬಳಸಿದ ಬಳಿಕ ಕೈಗಳನ್ನು ಸ್ಯಾನಿಟೈಸರ್ನಿಂದ ಶುಚಿಗೊಳಿಸಬೇಕು.
ನಿಮ್ಮದೇ ಟವೆಲ್ – ಅತ್ಯಂತ ಮುಖ್ಯ!
ಜಿಮ್ನಲ್ಲಿ ಬೆವರು ಬರುವುದು ಸಾಮಾನ್ಯ… ಆದರೆ ಅದನ್ನು ಕೈಯಲ್ಲಿ, ಟೀ-ಶರ್ಟ್ನಲ್ಲಿ ಅಥವಾ ಉಪಕರಣಗಳ ಮೇಲೆ ಒರೆಸಿಕೊಳ್ಳುವುದು ತಪ್ಪು. ನಿಮ್ಮದೇ ಪ್ರತ್ಯೇಕ ಟವೆಲ್ ತೆಗೆದುಕೊಂಡು ಹೋಗಿ, ಅದನ್ನು ಬೇರೆ ಯಾರೂ ಬಳಸದಂತೆ ನೋಡಿಕೊಳ್ಳಿ. ಉಪಕರಣ ಬಳಸುವ ಮುನ್ನ ಮತ್ತು ನಂತರ ಟವೆಲ್ನಿಂದ ಒರೆಸಿಕೊಳ್ಳುವುದರಿಂದ ನಿಮ್ಮ ಬೆವರು ಇತರರಿಗೆ ತಗುಲುವುದನ್ನು ಮತ್ತು ಇತರರ ಬೆವರು ನಿಮಗೆ ತಗುಲುವುದನ್ನು ಕಡಿಮೆ ಮಾಡಬಹುದು.
ಜಿಮ್ನ ಶವರ್, ಸೌನಾ ಅಥವಾ ಸ್ಟೀಮ್ ರೂಮ್ ಬಳಸುವವರು ಹೆಚ್ಚುವರಿ ಎಚ್ಚರಿಕೆ ವಹಿಸಬೇಕು. ಸಾಧ್ಯವಾದರೆ ನಿಮ್ಮದೇ ಸ್ಲಿಪರ್, ಸಾಬೂನು, ಟವೆಲ್ ಬಳಸಿ. ಶೇರ್ ಮಾಡಿಕೊಳ್ಳುವ ವಸ್ತುಗಳು ಸೋಂಕಿನ ಪ್ರಮುಖ ಮೂಲವಾಗಬಹುದು.
ಗಾಯಗಳಿದ್ದರೆ ನಿರ್ಲಕ್ಷ್ಯ ಬೇಡ
ದೇಹದಲ್ಲಿ ತೆರೆದ ಗಾಯಗಳಿದ್ದರೆ, ಚರ್ಮ ಬಿರುಕು ಬಿಟ್ಟಿದ್ದರೆ ಅಥವಾ ಹಿಮ್ಮಡಿ ಒಡೆದಿದ್ದರೆ ಜಿಮ್ಗೆ ಹೋಗುವಾಗ ವಿಶೇಷ ಜಾಗ್ರತೆ ಅಗತ್ಯ. ತೆರೆದ ಗಾಯಗಳು ಜೀವಾಣುಗಳಿಗೆ ಸುಲಭ ಪ್ರವೇಶ ದ್ವಾರವಾಗುತ್ತವೆ. ಗಾಯದ ಮೇಲೆ ಬ್ಯಾಂಡೇಜ್ ಹಾಕಿ ಹೋಗುವುದು ಒಳಿತು. ಜಿಮ್ನಲ್ಲಿ ಬರಿಗಾಲಿನಲ್ಲಿ ನಡೆಯುವುದನ್ನು ತಪ್ಪಿಸಿ. ಸದಾ ಶೂ ಅಥವಾ ಚಪ್ಪಲಿ ಧರಿಸಬೇಕು.
ಮನೆಗೆ ಬಂದ ನಂತರವೂ ಜಾಗ್ರತೆ
ಬಹಳಷ್ಟು ಮಂದಿ ಜಿಮ್ನಿಂದ ಬಂದು ಸುಸ್ತಾಗಿ ನೇರವಾಗಿ ಮಲಗುತ್ತಾರೆ. ಇದು ದೊಡ್ಡ ತಪ್ಪು. ವರ್ಕೌಟ್ ನಂತರ ತಕ್ಷಣ ಸ್ನಾನ ಮಾಡುವುದು ಮುಖ್ಯ. ಬೆವರು ಒಣಗಿದರೆ ಚರ್ಮದ ಸಮಸ್ಯೆಗಳು ಉಂಟಾಗಬಹುದು. ಜಿಮ್ನಲ್ಲಿ ಧರಿಸಿದ ಬಟ್ಟೆಗಳನ್ನು ಬೇರೆ ಬಟ್ಟೆಗಳಿಂದ ಪ್ರತ್ಯೇಕವಾಗಿ ತೊಳೆಯಬೇಕು. ಜಿಮ್ ಬ್ಯಾಗ್, ಗ್ಲೋವ್ಸ್, ನೀರಿನ ಬಾಟಲಿ ಇತ್ಯಾದಿಗಳನ್ನು ನಿಯಮಿತವಾಗಿ ಸ್ವಚ್ಛಗೊಳಿಸಬೇಕು.
ಶುಚಿತ್ವವೇ ರಕ್ಷಣಾ ಕವಚ
ಜಿಮ್ನಲ್ಲಿ ಆರೋಗ್ಯ ಹೆಚ್ಚಿಸಿಕೊಳ್ಳಲು ಹೋಗಿ, ಸೋಂಕು ಬರುವಂತಾಗಬಾರದು. ವೈಯಕ್ತಿಕ ಶುಚಿತ್ವ, ಉಪಕರಣಗಳ ಸ್ವಚ್ಛತೆ ಮತ್ತು ಸರಿಯಾದ ಅಭ್ಯಾಸಗಳನ್ನು ಪಾಲಿಸಿದರೆ ಬಹುತೇಕ ಸೋಂಕುಗಳನ್ನು ತಪ್ಪಿಸಬಹುದು. ವರ್ಕೌಟ್ ಎಷ್ಟು ಮುಖ್ಯವೋ, ಅದರ ನಂತರದ ಹೈಜೀನ್ ಅಷ್ಟೇ ಮುಖ್ಯ.
ಆರೋಗ್ಯಕರ ದೇಹಕ್ಕಾಗಿ ಬೆವರು ಸುರಿಸುವುದು ಒಳ್ಳೆಯದು. ಆದರೆ ಸ್ವಚ್ಛತೆ ಕಡೆಗಣಿಸಿದರೆ ಅದೇ ಬೆವರು ಸಮಸ್ಯೆಗಳಿಗೆ ಕಾರಣವಾಗಬಹುದು. ಆದ್ದರಿಂದ ಜಿಮ್ನಿಂದ ಬಂದು ನೇರವಾಗಿ ಮಲಗುವ ಅಭ್ಯಾಸ ಬಿಟ್ಟು, ಸರಿಯಾದ ಆರೈಕೆ ಕ್ರಮಗಳನ್ನು ಅನುಸರಿಸಿ…