ಬೆಂಗಳೂರು: ಇಂದಿನ ಬದಲಾದ ಆಹಾರ ಪದ್ಧತಿ ಮತ್ತು ಜೀವನಶೈಲಿಯಿಂದಾಗಿ ಜೀರ್ಣಕ್ರಿಯೆಗೆ ಸಂಬಂಧಿಸಿದ ಸಮಸ್ಯೆಗಳು ಸಾಮಾನ್ಯ ಎಂಬಂತಾಗಿದೆ. ಆದರೆ, ನಾವು ಸಾಮಾನ್ಯ ಗ್ಯಾಸ್ಟ್ರಿಕ್ ಅಥವಾ ಅಜೀರ್ಣ ಎಂದು ಭಾವಿಸುವ ಕೆಲವು ಲಕ್ಷಣಗಳು ವಾಸ್ತವವಾಗಿ ಮಾರಕ ‘ಗ್ಯಾಸ್ಟ್ರೋಇಂಟೆಸ್ಟೈನಲ್ (GI) ಕ್ಯಾನ್ಸರ್’ನ ಮುನ್ಸೂಚನೆಗಳಾಗಿರಬಹುದು. ಆರಂಭಿಕ ಹಂತದಲ್ಲಿ ಗುರುತಿಸಿದರೆ ಈ ಕ್ಯಾನ್ಸರ್ ಅನ್ನು ಯಶಸ್ವಿಯಾಗಿ ಗುಣಪಡಿಸಲು ಸಾಧ್ಯವಿದೆ.
ಏನಿದು ಗ್ಯಾಸ್ಟ್ರೋಇಂಟೆಸ್ಟೈನಲ್ ಕ್ಯಾನ್ಸರ್ ?
ಗ್ಯಾಸ್ಟ್ರೋಇಂಟೆಸ್ಟೈನಲ್ ಕ್ಯಾನ್ಸರ್ ಎನ್ನುವುದು ನಮ್ಮ ಜೀರ್ಣಾಂಗ ವ್ಯವಸ್ಥೆಯ ವಿವಿಧ ಭಾಗಗಳಿಗೆ ಬರುವ ಕ್ಯಾನ್ಸರ್ಗಳ ಒಂದು ಗುಂಪು. ಇದು ಅನ್ನನಾಳ, ಹೊಟ್ಟೆ (Stomach), ಸಣ್ಣ ಕರುಳು, ದೊಡ್ಡ ಕರುಳು (Colon), ಗುದನಾಳ (Rectum), ಲಿವರ್ ಮತ್ತು ಪ್ಯಾಂಕ್ರಿಯಾಸ್ನಂತಹ ಪ್ರಮುಖ ಅಂಗಗಳ ಮೇಲೆ ಪರಿಣಾಮ ಬೀರುತ್ತದೆ. ಜೀರ್ಣಾಂಗವ್ಯೂಹದ ಕೋಶಗಳಲ್ಲಿ ಅಸಹಜ ಬೆಳವಣಿಗೆ ಉಂಟಾದಾಗ ಇದು ಕ್ಯಾನ್ಸರ್ ಆಗಿ ಮಾರ್ಪಡುತ್ತದೆ.
ಈ 5 ಲಕ್ಷಣಗಳ ಬಗ್ಗೆ ಇರಲಿ ಎಚ್ಚರ
1. ನಿರಂತರ ಹೊಟ್ಟೆನೋವು ಮತ್ತು ಅಸ್ವಸ್ಥತೆ: ಹೊಟ್ಟೆಯ ಮೇಲ್ಭಾಗದಲ್ಲಿ ಪದೇ ಪದೇ ನೋವು ಕಾಣಿಸಿಕೊಳ್ಳುವುದು ಅಥವಾ ಹೊಟ್ಟೆ ಉಬ್ಬರಿಸಿದಂತೆ (Bloating) ಅನಿಸುವುದು ಜಿಐ ಕ್ಯಾನ್ಸರ್ನ ಪ್ರಾಥಮಿಕ ಲಕ್ಷಣ. ಇದನ್ನು ಕೇವಲ ಗ್ಯಾಸ್ಟ್ರಿಕ್ ಎಂದು ನಿರ್ಲಕ್ಷಿಸುವುದು ಅಪಾಯಕಾರಿ.
2. ಮಲ ಅಥವಾ ವಾಂತಿಯಲ್ಲಿ ರಕ್ತ: ಮಲ ವಿಸರ್ಜನೆಯ ಸಮಯದಲ್ಲಿ ರಕ್ತ ಹೋಗುವುದು ಅಥವಾ ಮಲವು ಕಪ್ಪು ಬಣ್ಣದಲ್ಲಿರುವುದು ಜೀರ್ಣಾಂಗದ ಒಳಗಡೆ ರಕ್ತಸ್ರಾವವಾಗುತ್ತಿರುವುದರ ಸೂಚನೆ. ಅಂತೆಯೇ ವಾಂತಿಯಲ್ಲಿ ರಕ್ತ ಕಾಣಿಸಿಕೊಂಡರೆ ತಕ್ಷಣ ವೈದ್ಯಕೀಯ ತಪಾಸಣೆ ಅತ್ಯಗತ್ಯ.
3. ಊಟದ ನಂತರದ ಅಸ್ವಸ್ಥತೆ: ಸ್ವಲ್ಪ ತಿಂದರೂ ಹೊಟ್ಟೆ ತುಂಬಿದಂತೆ ಅನಿಸುವುದು (Early Satiety), ನುಂಗಲು ತೊಂದರೆಯಾಗುವುದು ಅಥವಾ ಊಟವಾದ ತಕ್ಷಣ ವಾಕರಿಕೆ ಬರುವುದು ಅನ್ನನಾಳ ಅಥವಾ ಹೊಟ್ಟೆಯ ಕ್ಯಾನ್ಸರ್ನ ಲಕ್ಷಣಗಳಾಗಿರಬಹುದು.
4. ಹಠಾತ್ ತೂಕ ಇಳಿಕೆ ಮತ್ತು ಸುಸ್ತು: ಯಾವುದೇ ವ್ಯಾಯಾಮ ಅಥವಾ ಡಯಟ್ ಮಾಡದಿದ್ದರೂ ದೇಹದ ತೂಕ ಗಣನೀಯವಾಗಿ ಇಳಿಕೆಯಾಗುತ್ತಿದ್ದರೆ ಅದು ದೇಹದ ಒಳಗಿನ ಅನಾರೋಗ್ಯವನ್ನು ಸೂಚಿಸುತ್ತದೆ. ಕ್ಯಾನ್ಸರ್ ಕೋಶಗಳು ದೇಹದ ಶಕ್ತಿಯನ್ನು ಹೀರುವುದರಿಂದ ಅತಿಯಾದ ಸುಸ್ತು ಮತ್ತು ನಿಶಕ್ತಿ ಉಂಟಾಗುತ್ತದೆ.
5. ದೀರ್ಘಕಾಲದ ಅಜೀರ್ಣ ಮತ್ತು ಎದೆ ಉರಿ: ಸತತವಾಗಿ ಎದೆ ಉರಿ (Heartburn), ಗ್ಯಾಸ್ಟ್ರಿಕ್ ಸಮಸ್ಯೆ, ಮಲಬದ್ಧತೆ ಅಥವಾ ಪದೇ ಪದೇ ಭೇದಿಯಾಗುತ್ತಿದ್ದರೆ ಅದನ್ನು ಸಾಮಾನ್ಯ ಸಮಸ್ಯೆ ಎಂದು ಕಡೆಗಣಿಸಬೇಡಿ.
ಗಮನಿಸಿ: ಮೇಲೆ ತಿಳಿಸಿದ ಲಕ್ಷಣಗಳು ಕಂಡುಬಂದ ತಕ್ಷಣ ಅದು ಕ್ಯಾನ್ಸರ್ ಎಂದು ಭಯಪಡುವ ಅಗತ್ಯವಿಲ್ಲ. ಆದರೆ, ಇವು ದೀರ್ಘಕಾಲದವರೆಗೆ ಮುಂದುವರಿದರೆ ತಜ್ಞ ವೈದ್ಯರನ್ನು (Gastroenterologist) ಸಂಪರ್ಕಿಸಿ ಎಂಡೋಸ್ಕೋಪಿ ಅಥವಾ ಅಗತ್ಯ ಸ್ಕ್ಯಾನಿಂಗ್ ಮಾಡಿಸಿಕೊಳ್ಳುವುದು ಉತ್ತಮ. ಆರಂಭಿಕ ಪತ್ತೆಯೇ ಕ್ಯಾನ್ಸರ್ ವಿರುದ್ಧದ ಹೋರಾಟದ ಮೊದಲ ಹಂತ.